1. Kasi ntchivichi chikutipa chimwemwe chikuru?

 YEHOVA wakukhumba kuti tikondwenge. Tikumanya fundo iyi chifukwa chakuti chimwemwe ntchimoza mwa vipambi vyamzimu. (Gal. 5:22) Pakuti uyo wakupeleka wakukondwa chomene kuluska uyo wakupokera, tikuŵa na chimwemwe chikuru chomene para tikulimbikira kupharazga na kovwira ŵabali ŵithu munthowa zakupambanapambana.—Mil. 20:35.

2-3. (a) Nga umo pakulongolera pa Ŵagalatiya 6:4, kasi ni vinthu wuli viŵiri ivyo vingatovwira kuti tilutilire kuŵa ŵakukondwa pakuteŵetera Yehova? (b) Kasi tidumbiskanenge vichi mu nkhani iyi?

² Nga umo pakulongolera pa Ŵagalatiya 6:4, mpositole Paulosi wakazunura vinthu viŵiri ivyo vingatovwira kuti tilutilire kuŵa ŵakukondwa. (Ŵazgani.) Chakwamba, tikwenera kumupa Yehova viwemi chomene. Para tikumupa viwemi chomene, tiŵenge ŵakukondwa nadi. (Mat. 22:36-38) Chachiŵiri, tikwenera kugega kujiyaniska na ŵanji. Chilichose icho tikukwaniska kuchita kwali ntchifukwa chakuti thupi lithu lili makora panji chifukwa chakuti tili na maluso, panji tikumanya chomene vinthu, tikwenera kuwonga Yehova. Nakuti unenesko ngwakuti chilichose icho tili nacho tili kupokera kufuma kwa iyo. Kweniso usange ŵanji ŵakuchita makora vigaŵa vinyake vya uteŵeti kuluska ise, tikwenera kukondwa kuti ŵakugwiliskira ntchito maluso ghawo kulumbira Yehova, iwo ŵeneko yayi. Ntheura m’malo mwa kuphalizgana nawo, tikwenera kusambirako kwa iwo.

³ Mu nkhani iyi, tiwonenge umo tingachitira usange tikujipulika kuti tikuchita vinandi yayi pa uteŵeti withu. Tiwonengeso umo tingagwiliskira ntchito mwakukwana maluso ghithu agho tili nagho na kuwona ivyo tingasambirako ku ŵanji.

4. Kasi ntchivichi chingapangiska ŵanyake kugongowa? Pelekani chiyelezgero.

⁴ Ŵateŵeti ŵanyake ŵa Yehova ŵakutondeka kuchita vinandi nga umo ŵakukhumbira chifukwa cha uchekuru panji ulwari, ndipo ivi vikuŵagongoweska. Umu ndimo vinthu vikaŵiraso kwa Carol. Wakaŵapo na mwaŵi wakuteŵetera uko kukakhumbikwanga ŵapharazgi ŵanandi. Panyengo iyo, wakachitiskanga masambiro gha Baibolo ghakukwana 35, ndipo wakawovwira ŵanthu ŵanandi kujipeleka na kubatizika. Uteŵeti ukamwenderanga makora chomene. Mbwenu pamanyuma wakazakalwara, ndipo kanandi wakakhalanga waka panyumba. Iyo wakuti: “Nkhumanya kuti chifukwa cha ulwari, lekani nkhutondeka kuchita ivyo ŵanji ŵakuchita, kweni nipera vikunipangiska kujipulika kuti ndine wakutondeka pakuyaniska na ŵanyane. Nkhutondeka kuchita ivyo nkhukhumba, ndipo ivi vikunipangiska kuti nigongowenge.” Carol wakukhumba kumuchitira Yehova vyose ivyo wangakwaniska. Nakuti agha ni maghanoghano ghawemi chomene. Ndipo tili na chigomezgo chose kuti Chiuta withu wachiwuravi wakukondwa nayo chomene chifukwa wakuchita ivyo wangafiska.

5. (a) Kasi tikwenera kukumbuka vichi usange tagongowa chifukwa chakuti tikutondeka kufiska ivyo tikukhumba? (b) Nga umo paliri pa vithuzi, kasi mubali wachita wuli kuti wamupenge Yehova vyose ivyo wangafiska pa uteŵeti wake?

⁵ Usange nyengo zinyake mukugongowa chifukwa chakuti mukuchita vichoko, jifumbani kuti, ‘Kasi Yehova wakukhumbachi kwa ine?’ Yehova wakukhumba kuti muchitenge vyose ivyo mungafiska kuyana na umo vinthu viliri kwa imwe pasono. Ghanaghanirani chakuchitika ichi: Mudumbu uyo wali na vyaka 80 wakugongowa chifukwa chakuti wakutondeka kuchita vinandi mu uteŵeti nga umo wakachitiranga nyengo iyo wakaŵa na vyaka 40. Iyo wakughanaghana kuti nangauli wakuchita vyose ivyo wangafiska, kweni Yehova wakukondwa yayi. Kweni kasi uwu mbunenesko? Ghanaghanirani fundo iyi. Usange mudumbu uyu wakachitanga vyose ivyo wangafiska apo wakaŵa na vyaka 40, ndipo m’paka sono wakulutilira kupeleka ivyo wangafiska, apa ndikuti wandaleke yayi kuchita vyose ivyo wangafiska. Usange tamba kujipulika kuti tikuchita vinandi yayi kuti tikondweske Yehova, tikwenera kukumbuka kuti Yehova ndiyo wakumanya icho ntchakukwana kwa iyo, kumupangiska kuti wakondwe. Para tikuchita ivyo tingakwaniska, Yehova wayowoyenge kuti: “Wachita makora.”—Yaniskani na Mateyu 25:20-23.

6. Kasi tingasambirako vichi kwa mudumbu Maria?

⁶ Chiŵenge chipusu kuŵa ŵakukondwa nyengo zose, para tikuŵika mtima pa ivyo tingakwaniska, m’malo mwa ivyo tingakwaniska yayi. Wonani ivyo vikachitikira mudumbu munyake zina lake Maria, uyo wali na nthenda iyo yikumutondeska kuchita vinandi mu uteŵeti. Pakwamba, wakasuzgikanga maghanoghano ndipo wakajiwonanga kuti ngwawakawaka. Pamanyuma wakaghanaghanira za mudumbu munyake mu mpingo uyo wakakhaliranga waka kugona pa bedi chifukwa cha ulwari, ndipo Maria wakawona kuti wawovwirepo. Maria wakuti: “Nkhanozga ndondomeko kuti nipharazgirenge nayo lumoza mwakugwiliskira ntchito foni na kulemba makalata. Ndipo nyengo yiliyose iyo tikachitiranga ivi lumoza, nkhalutanga ku nyumba kuti nili wakukondwa kweniso wakukhorwa kuti nawovwira mudumbu munyane.” Naseso tingalutilira kuŵa ŵakukondwa para tikuŵika mtima pa ivyo tingafiska kuchita m’malo mwa ivyo tingafiska yayi. Kweni wuli usange tingakwaniska kuchita vinandi pakuteŵetera Yehova?

7. Kasi ni ulongozgi wuli uwo mpositole Petrosi wakapeleka ku Ŵakhristu?

⁷ Mu kalata yake yakwamba, mpositole Petrosi wakachiska ŵabali kuti ŵagwiliskirenge ntchito vyawanangwa vyawo na maluso ghawo kukhozga ŵasopi ŵanyawo. Petrosi wakalemba  kuti: “Mwakuyana na umo waliyose wali kupokera chawanangwa, muteŵeteranenge nacho pakuŵa ŵateŵeti ŵalara ŵawemi ŵa lusungu lukuru lwa Chiuta.” (1 Pet. 4:10) Tikwenera kuyezeska kugwiliskira ntchito maluso agho tili nagho, tileke kufipa mtima kuti ŵanji ŵatichitirenge sanji panji kugongowa. Chifukwa usange tikutondeka kuchita vyose ivyo tingafiska chifukwa chakuti tikopa umo ŵanthu ŵanyake ŵatiwonerenge, timupenge yayi Yehova viwemi chomene.

8. Kuyana na 1 Ŵakorinte 4:6, 7, chifukwa wuli tikwenera yayi kujitemwa na maluso agho tili nagho?

⁸ Tikwenera kugwiliskira ntchito maluso ghithu mwakufikapo, kweni tikwenera kuŵa maso kuti tileke kujiŵikamo chifukwa cha maluso agho tili nagho. (Ŵazgani 1 Ŵakorinte 4:6, 7.) Mwachiyelezgero, nyengo zinyake mungaŵa na luso pakwambiska masambiro gha Baibolo. Mukwenera kukoleska luso ulu na kuligwiliskira ntchito. Kweni ntchakuzirwa chomene kukumbuka kuti mukwenera kujitemwa nalo yayi luso lwinu. Tiyelezgere kuti mwasonosono apa vinthu vyangumwenderani makora mu upharazgi ndipo mwangwambiska sambiro la Baibolo. Ndipo ndimwe ŵakukhumbisiska kuphalirako kagulu kinu ka uteŵeti nkhani iyi. Mwati mwakumana ku gulu linu, mbwe mwasanga mudumbu wakulongosora ivyo vikachitika kuti wagaŵire magazini. Iyo wakuyowoya vyakugaŵira magazini yimoza; kweni imwe mukambiska sambiro. Kasi muchitenge wuli apa? Mukumanya kuti kagulu kakhozgekenge na ivyo vikachitikira imwe, kweni mungachita makora kulindilira nyengo yiwemi yakuti muzakayowoyere ivi, chifukwa mukukhumba yayi kupangiska mudumbu uyo wakagaŵira magazini yimoza kujiwona kuti wakuchita vichoko pakuyaniska na imwe. Kuchita nthena kungalongora kuti muli na lusungu. Kweni mulimose umo vingaŵira kuleka yayi kusanga masambiro gha Baibolo. Usange muli na chawanangwa, chigwiliskirani ntchito.

9. Kasi tikwenera kughagwiliskira wuli ntchito maluso ghithu?

⁹ Tikwenera kukumbuka kuti maluso ghalighose agho tili kubabika nagho, ni vyawanangwa vyakufuma kwa Chiuta. Tikwenera kugwiliskira ntchito vyawanangwa ivi kuti tovwilirenge mpingo, kujilongolera yayi. (Fil. 2:3) Para tikugwiliskira ntchito nkhongono na maluso ghithu kuteŵetera Chiuta, tiŵenge na chifukwa chakuŵira ŵakukondwa, tiŵenge ŵakukondwa chifukwa chakuti tikuchita vinandi kuluska ŵanyithu yayi, kweni chifukwa chakuti tikugwiliskira ntchito maluso ghithu kulumbira Yehova.

10. Chifukwa wuli ni mahara yayi kujiyaniska na ŵanji?

¹⁰ Usange tingaleka kuŵa maso tinganjira mu chipingo cha kuyaniska ivyo ise tikuchita makora na ivyo ŵanyithu ŵakutondeka. Mwachiyelezgero, mubali wangaŵa na luso la kuyowoya makora chomene nkhani zachisanisani. Apa ndikuti iyo wakuchita makora pa chigaŵa ichi. Kweni nyengo zinyake  mu mtima wake wangamba kughanaghana kuti wakumujumpha mubali uyo vikumusuzga kudumba makora nkhani. Kweni mubali uyo wangaŵa kuti wakuchita makora pa nkhani yakupokelera ŵalendo, kusambizga ŵana ŵake, panji kulimbikira mu upharazgi. Tikuwonga chomene kuti tili na ŵabali na ŵadumbu ŵanandi awo ŵali na maluso ndipo ŵakughagwiliskira ntchito pakuteŵetera Yehova na kovwilira ŵanji.

11. Chifukwa wuli tikwenera kumuyezga Yesu?

¹¹ Nangauli tikwenera kugega kujiyaniska na ŵanji, kweni tingasanga chandulo para tingasambirako ku ŵanthu ŵakugomezgeka. Munthu muwemi chomene uyo tingasambirako ni Yesu. Nangauli wakaŵa wakufikapo, kweni tingasambirako vinandi ku mikhaliro yake na vinthu vinyake ivyo wakachita. (1 Pet. 2:21) Para tikuchita vyose ivyo tingafiska kulondezga mendero ghake mwakugomezgeka, tingaŵa ŵateŵeti ŵawemi chomene ŵa Yehova ndipo tingaŵaso ŵaluso mu upharazgi.

12-13. Kasi tingasambirako vichi kwa Themba Davide?

¹² Mu Mazgu gha Chiuta, tikusangamo viyelezgero vinandi vya ŵanalume na ŵanakazi ŵakugomezgeka awo nangauli ŵakaŵa ŵambura kufikapo kweni mbakuti tingasambirako. (Heb. 6:12) Ghanaghanirani Themba Davide, uyo Yehova wakamuchema kuti “munthu uyo wakukolerana na mtima wane.” (Mil. 13:22) Kweni Davide wakaŵa wambura kufikapo. Nakuti wakanangiskapo vinthu vinyake vikuruvikuru. Nangauli vili nthena, kweni ntchiyelezgero chiwemi kwa ise. Chifukwa wuli? Chifukwa wati wapika ulongozgi wakajiŵikira kumanyuma yayi. M’malo mwake, wakazomera ulongozgi wankhongono uwo wakapika ndipo chitima chikamukora chomene chifukwa cha ivyo wakachita. Ntheura, Yehova wakamugowokera.—Sal. 51:3, 4, 10-12.

¹³ Tingasambirako kwa Davide para tingajifumba kuti: “Kasi nkhuchita wuli para napokera ulongozgi? Kasi nkhuzomerezga kuti nanangiska nadi, panji nkhuyowoya mazgu agho ghakulongora kuti nkhujiŵikira kumanyuma? Kasi nkhutemwa kuphatira ŵanyane vinthu? Kasi nkhuyezeska kuti nileke kuwerezgaso maubudi ghane?’ Mungajifumbaso mafumbo agha para mukuŵazga nkhani za ŵanalume na ŵanakazi ŵanyake ŵakugomezgeka ŵa mu Baibolo. Kasi masuzgo agho ŵakakumananga nagho ghakuyanako na agho mukukumana nagho? Kasi ŵakalongora mikhaliro wuli yiwemi? Pa nkhani yiliyose, jifumbani kuti: ‘Kasi ningamuyezga wuli muteŵeti wakugomezgeka wa Yehova uyu?’

14. Kasi tingasanga vyandulo wuli para tingasambirako ku Ŵakhristu ŵanyithu?

¹⁴ Tingasangaso vyandulo para tingasambirako ku Ŵakhristu ŵanyithu, ŵalara na ŵachoko wuwo. Mwachiyelezgero, kasi walipo mu mpingo winu uyo wakuzizipizga masuzgo nga kuchichizgika na  ŵanji, kususkika na ŵamumbumba yakwawo, panji ulwari? Kasi mukuwonamo mikhaliro yiwemi mwa munthu uyu iyo mukuwona kuti mungatolerako? Para mungamuyezga munthu uyu, namwe mungasambira umo mungazizipizgira masuzgo ghinu. Tikuwonga chomene chifukwa ŵabali na ŵadumbu aŵa ni viyelezgero viwemi chomene pa nkhani ya chipulikano.—Heb. 13:7; Yak. 1:2, 3.

15. Kasi ni ulongozgi wuli uwo Paulosi wakapeleka uwo ungatovwira kuti tilutilire kukondwa na uteŵeti withu kwa Yehova?

¹⁵ Kuti mu mpingo mulutilire kuŵa mtende, waliyose wa ise wakwenera kuyezgayezga chomene. Ghanaghanirani za Ŵakhristu ŵakwambilira. Ŵakaŵa na maluso na mauteŵeti ghakupambanapambana. (1 Kor. 12:4, 7-11) Kweni ichi chikapangiska kuti ŵaphalizganenge panji kugaŵikana yayi. M’malo mwake, Paulosi wakaŵachiska kuti waliyose wachitenge icho chikukhumbikwa kuti “ŵazenge thupi la Khristu.” Paulosi wakalembera Ŵaefeso kuti: “Para chiŵaro chilichose chikugwira ntchito mwakwenelera, thupi likukura na kujizenga mu chitemwa.” (Efe. 4:1-3, 11, 12, 16) Awo ŵakachitanga ivyo Paulosi wakayowoya, ŵakawovwira kuti mtende na umoza vilutilire mu mpingo, nakuti ivi ndivyo tikuviwonaso mu mipingo yithu mazuŵa ghano.

16. Kasi tikwenera kuŵikapo mtima kuchita vichi? (Ŵahebere 6:10)

¹⁶ Ŵikanipo mtima kuti muleke kujiyaniska na ŵanji. M’malo mwake, sambirani kwa Yesu na kuyezga mikhaliro yake. Sangani chandulo na viyelezgero vya mu Baibolo kweniso vya mazuŵa ghano pa nkhani ya chipulikano. Apo mukulutilira kuchita vyose ivyo mungakwaniska, ŵani na chigomezgo kuti Yehova“ngwambura urunji yayi kuti waluwe mulimo winu.” (Ŵazgani Ŵahebere 6:10.) Lutilirani kukondwa pakuteŵetera Yehova uku mukumanya kuti wakuwonga chomene para wakumuwonani kuti mukuchita vyose ivyo mungafiska kuti mumukondweske.