Para vili nthena, mpingo ukwenera kuwona kuti nthengwa yake yakale yili kumara ndipo nthengwa yake yasono ndiyo njakuzomerezgeka. Kuti tipulikiske chifukwa icho tayowoyera nthena, tiyeni tiwone ivyo Yesu wakayowoya pa nkhani ya kupatana na kutoraso.

Pa Mateyu 19:9, Yesu wakayowoya chifukwa chekha cha mu Malemba icho nthengwa yingamalira. Iyo wakati: “Waliyose uyo wakupata muwoli wake, kwambura chifukwa cha uzaghali, na kutora munyake wakuchita uleŵi.” Pa mazgu gha Yesu agha, tikusambirapo kuti (1) uzaghali ndicho chifukwa chekha cha mu Malemba icho nthengwa yingamalira ndipo (2) mwanalume uyo wapata muwoli wake kwambura chifukwa cha mu Malemba na kutora munyake ndikuti waleŵa. *

Kasi ivyo Yesu wakayowoya vikulongora kuti mwanalume uyo wachita uzaghali na kupata muwoli wake ndikuti ni mwanangwa kutoraso kuyana na Malemba? Viŵi yayi. Para mfumu wachita uleŵi, muwoli ndiyo wakwenera kusankha kugowokera mfumu wake panji yayi. Usange mwanakazi wakana kumugowokera ndipo watora kalata ya chipati, wose ŵaŵiri mbanangwa, mfumu wangatoraso ndipo muwoli nayo wangatengwaso kunyake, chikuru ŵalondezga ndondomeko yose yakumazgira nthengwa m’paka paumaliro.

Ndipouli, vingachitikaso kuti mwanakazi uyo wabudilika wakukhumbisiska kuti nthengwa yilutilire ndipo ngwakunozgeka kumugowokera mfumu wake. Kweni wuli usange mwanalume uyo waleŵa wakukhumba yayi kuti muwoli wake wamugowokere, ndipo yekha wakukatora kalata ya chipati? Chifukwa chakuti mwanakazi ngwakukhumbisiska kuti wamugowokere na kulutizga nthengwa, mwanalume uyu ndikuti ni mwanangwaso yayi kutoraso kuyana na Malemba. Usange wakosera na kutora mwanakazi munyake apo ni mwanangwaso yayi kutoraso kuyana na Malemba, ndikuti waleŵaso, ndipo komiti ya cheruzgo mu mpingo yimweruzgengeso.—1 Kor. 5:1, 2; 6:9, 10.

Wuli usange mwanalume uyo ni mwanangwa yayi kutoraso kuyana na Malemba mbwe watoraso, kasi mpingo ukwenera kuyiwona wuli nthengwa yake yakale kweniso nthengwa yake yasono? Kasi nthengwa yakale yichalipo kuyana na Malemba? Kasi uyo wabudilika wachali nawo mwaŵi wakusankha kumugowokera mfumu wake panji yayi? Kasi mpingo ukwenera kuyiwona nthengwa yasono kuti njauleŵi?

Kumasinda uku, mpingo ukatenge nthengwa yasono njauleŵi chikuru uyo wabudilika wachali wamoyo, wandatengwe, kweniso wandasangikepo na mulandu wa uzaghali. Ndipouli, Yesu wakazunurapo yayi vya uyo wabudilika apo wakayowoyanga vya kupatana na kutoraso. M’malo mwake, wakalongosora kuti mwanalume uyo wakupata muwoli wake kwambura chifukwa cha mu Malemba na kutora munyake, ndikuti waleŵa. Ntheura, para mwanalume wapata muwoli wake na  kutoraso, Yesu wakati mwanalume uyu ndikuti wachita uleŵi, ndipo para vyaŵa nthena ndikuti nthengwa yakale yira yamara.

Para mwanalume wapata muwoli wake na kutora munyake, mwanakazi walijeso wenelero wakusankha kumugowokera mfumu wake panji yayi chifukwa ntchakuti vingachitikaso yayi. Lekani palijeso chifukwa chakuti mwanakazi wasuzgikirenge vyakuti wasankhe kumugowokera mfumu wake wakale panji yayi. Chinyake ntchakuti kwali mwanakazi wakubudilika wali kufwa, wali kutengwa, panji wakaŵa na mulandu wa uzaghali, mpingo ukusintha yayi umo ukuwonera nthengwa yasono. *

Pa chiyelezgero icho tawona pachanya apa, chifukwa chakuti mwanalume wachita uleŵi, ndivyo vyapangiska kuti nthengwa yimare. Kweni wuli usange mwanalume wakaleŵa yayi ndipo wakapata waka muwoli wake na kutora munyake? Panji wuli usange mwanalume wakachita uzaghali yayi pambere wandapate muwoli wake, kweni wakachita uzaghali wati wapata muwoli wake na kutora munyake nangauli muwoli wake wakaŵa wakunozgeka kuti wamugowokere? Pose paŵiri, kupata muwoli wake na kutoraso, ivyo mbuleŵi, vikumazga nthengwa yake yakale. Nthengwa yasono iyi njakuzomerezgeka na dango. Nga umo vikuyowoyekera mu Gongwe la Mulinda la Chingelezi la Novembala 15, 1979, pa peji 32, iyo yikuti: “Sono wanjira mu nthengwa yinyake ndipo wangayijowora waka yayi na kuwelera kwa muwoli wake wakale; nthengwa yakale yikamara apo wakatora chipati, kuleŵa na kutora munyake.”

Fundo yasono iyi yikung’anamura kuti Ŵakhristu ŵayuyurenge nthengwa yayi nesi kuwona kuti uleŵi nkhwananga kukuru yayi. Mwanalume uyo wakupata muwoli wake kwambura chifukwa cha mu Malemba na kutora munyake uku wanangwa uwu walije kuyana na Malemba, wakumanenge na komiti ya cheruzgo chifukwa waleŵa. (Usange mwanakazi uyo watora sono ni Mkhristu, nayo wakumanenge na komiti ya cheruzgo pa mulandu wa uleŵi.) Nangauli nthengwa yake yasono tingati njauleŵi yayi, mwanalume wanthena wangaŵa wakwenelera yayi kupika mauteŵeti ghapadera mu mpingo kwa vyaka vinandi, kweniso wangapika yayi mauteŵeti usange ŵanthu ŵanyake ŵachali kukumbuka panji ŵakukonthora pa viheni ivyo wakachita. Ichi chikung’anamura kuti pambere ŵandamupe munthu wanthena mwaŵi wa uteŵeti, ŵalara ŵawonengeso dankha umo vinthu viliri na muwoli wakale wa munthu uyu, uyo wakamuchitira uryarya kweniso ŵana ŵachoko awo munthu wakubuda uyu wali kuŵaleka.—Mal. 2:14-16.

Pakuwona uheni wa kupatana na kutoraso kwambura kuzomerezgeka na Malemba, Ŵakhristu ŵakuyezga Yehova, ndipo ŵakuwona nthengwa kuŵa yakupatulika.—Muph. 5:4, 5; Heb. 13:4.