Kasi Mukumanya?
Chifukwa wuli ŵanthu ŵa mitundu yinyake ŵakazomerezgeka kuŵa mu gulu la ŵankhondo ŵa Themba Davide?
PA GULU la vinkhara vya Davide ivyo vikafuma mu mitundu yinyake, pakaŵa ŵanalume nga Zeleki Muamoni, Uriya Muhiti, na Itima Mumowabu. a (1 Mid. 11:39, 41, 46) Pa ŵankhondo ŵa Davide pakaŵaso “Ŵakereti, Ŵapeleti, na Ŵagiti.” (2 Sam. 15:18) Vikuwoneka kuti Ŵakereti na Ŵapeleti ŵakaŵa paubali na Ŵafilisiti. (Ezek. 25:16) Ndipo Ŵagiti ŵakafuma mu msumba wa Ŵafilisiti wakuchemeka Gati.—Josh. 13:2, 3; 1 Sam. 6:17, 18.
Chifukwa wuli Davide wakazomerezga kuti ŵanthu ŵamitundu yinyake ŵaŵe mu gulu la ŵankhondo ŵake? Wakaŵa na chigomezgo chose kuti mbakugomezgeka kwa iyo, kweni kwakuluska, ŵakaŵa ŵakugomezgeka kwa Yehova. Mwachiyelezgero, pakuyowoya vya Ŵakereti na Ŵapeleti, buku linyake likuti: “Ŵakalutilira kugomezgeka kwa Davide mu nyengo zakusuzga chomene za muwuso wake.” (The New Interpreter’s Dictionary of the Bible) Ŵakalongora wuli kugomezgeka? Apo “ŵanthu [wose] ŵa kwa Israyeli” ŵakaleka kulondezga Themba Davide, na kwamba kulondezga “munthu wakusuzga zina lake Sheba,” Ŵakereti na Ŵapeleti ŵakalutilira kugomezgeka kwa Davide na kumovwira kulimbana na ŵakugaluka awo ŵakaŵa ku chigaŵa cha Sheba. (2 Sam. 20:1, 2, 7) Nyengo yinyake Adoniya mwana wa Themba Davide wakakhumbanga kupoka ufumu adada ŵake. Kweni Ŵakereti na Ŵapeleti ŵakalutilira kugomezgeka kwa Davide ndipo ŵakawovwirapo pakwimika Solomoni uyo Yehova wakamusankha kuŵa themba, m’malo mwa Davide.—1 Mathe. 1:24-27, 38, 39.
Munthu munyake uyo wakaŵa Muisrayeli yayi ndipo wakaŵa wakugomezgeka chomene kwa Davide, wakaŵa Itayi Mugiti. Itayi na ŵanalume ŵake 600, ŵakawovwira Themba Davide apo mwana wake Abisalomu wakamugalukira na kwiba mitima ya ŵanalume ŵa Israyeli, kuti ŵamwimike iyo kuŵa themba m’malo mwa awiske. Pakwamba Davide wakamuphalira Itayi kuti wawelere chifukwa iyo wakaŵa mulendo ndipo nkhondo iyi yikamukhwaskanga yayi. Kweni Itayi wakati: “Umo Yehova waliri wamoyo, imweso fumu yane themba wamoyo, kulikose uko fumu yane yiŵenge, kwali nkhu nyifwa panji umoyo, kwenekuko ndiko muteŵeti winu waŵenge!”—2 Sam. 15:6, 18-21.
Itayi wakaŵa wakugomezgeka kwa Davide, themba lakuphakazgika la Yehova
Nangauli Ŵakereti, Ŵapeleti, na Ŵagiti ŵakaŵa Ŵaisrayeli yayi, kweni ŵakamanyanga kuti Yehova ndiyo ni Chiuta waunenesko kweniso kuti Davide ngwakuphakazgika wake. Davide wakwenera kuti wakawonganga chomene chifukwa cha kuŵa na ŵanalume ŵakugomezgeka aŵa ku chigaŵa chake!
a Dango la Chiuta ilo lili pa Dotoronome 23:3-6 likakanizganga Ŵaamoni na Ŵamowabu kunjira mu mpingo wa Israyeli. Ndipouli, vikuwoneka kuti dango ili likakanizganga kuŵirathu mwenekaya mu mtundu wa Israyeli, ndipo likakanizganga yayi kuti ŵanthu aŵa ŵachezgenge panji kukhala pakati pa ŵanthu ŵa Chiuta. Wonani buku la Insight on the Scriptures, Volume 1, peji 95.
