Nkhababika mu 1955, mu mbumba yakwithu tilimo ŵana ŵatatu ŵanalume pera, ndipo ine ndine waumaliro. Nkhakulira kumwera kwa Finland, mu chigaŵa cha mumphepete mwa nyanja icho sono chikuchemeka msumba wa Vantaa.

Amama ŵakabatizika na kuŵa Kaboni wa Yehova vyaka vichoko waka pambere ine nindababike. Ndipouli, adada ŵakasuskanga chomene unenesko ndipo ŵakaŵazomerezganga yayi amama kuti ŵasambirenge nase Baibolo panji kuluta nase ku maungano gha mpingo. Ntheura amama ŵakatisambizganga visambizgo vyakwambilira vya Baibolo para adada ŵafumapo.

Kufuma waka apo nkhaŵa mwana, nkhaŵikapo mtima kupulikira Yehova. Mwachiyelezgero, apo nkhaŵa na vyaka 7, msambizgi wane wakakwiya nane chomene chifukwa nkhakana chakurya chakuchemeka verilättyjä (tuvibama twa ku Finland uto ŵakuphikira ndopa panji kuti luŵende). Na woko limoza wakanifyenya mulomo wane kuti wawujure, ndipo na woko linyake, wakayezga kuti waniŵikemo kachibama ako kakaŵa ku foloko. Kweni nkhafiska kuphafulira pasi foloko iyo yikaŵa mu woko lake.

Apo nkhaŵa na vyaka 12, adada ŵakatayika. Kufuma apo, nkhambapo kuwungana. Ŵabali ku mpingo ŵakanilongoranga lusungu chomene, ndipo ivi vikanovwira kuti nikure mwauzimu. Nkhamba kuŵazga Baibolo zuŵa lililose kweniso nkhafwilirapo kuŵazga mabuku ghithu. Ivi vikawovwira chomene kuti nibatizike apo nkhaŵa na vyaka 14, pa Ogasiti 8, 1969.

 Nati namalizga waka sukulu, nkhamba kuchita upayiniya wanyengozose. Pati pajumpha masabata ghachoko waka, nkhasamukira ku chigaŵa icho kukakhumbikwiranga wovwiri, ku Pielavesi, kufupi na tawuni yikuru ya Finland.

Ku Pielavesi, ndiko nkhasangana na Sirkka uyo sono ni muwoli wane. Nkhamutemwa chomene chifukwa chakuti wakaŵa munthu wakujiyuyura kweniso wakatemwanga chomene vinthu vyauzimu. Wakapenjanga umoyo wapachanya yayi panji kukhumba kumanyikwa. Tose taŵaŵiri tikakhumbanga kuteŵetera Yehova mwakukwana, kwambura kupwelelerako za uteŵeti uliwose uwo tingapika. Tikatorana pa Malichi 23, 1974. M’malo mwa kuluta ku malo ghanyake kukenda tati tatorana waka, tikaluta kukateŵetera ku Karttula, uko kukakhumbikwiranga chomene ŵapharazgi ŵa Ufumu.

Kufuma waka apo tikatolerana, Yehova walongora kuti watipenge ivyo tikukhumbikwira usange tikuŵika vya Ufumu pa malo ghakwamba. (Mat. 6:33) Mwachiyelezgero, apo tikaŵa ku Karttula, tikaŵavya galimoto. Pakwamba, tikendanga pa njinga. Ndipouli, mu nyengo yakuzizima kukazizimanga chomene. Kuti tipharazge ku vigaŵa vyakutali vya mpingo withu tikakhumbikwiranga galimoto. Kweni tikaŵavya ndalama zakuti tingagulira.

Mwamabuchi, mbwenu kukiza mukuru wane kuzakatiwona. Wakatipa galimoto yake. Inshuwalansi wakalipira kale. Ise tikakhumbikwiranga kugura waka mafuta. Apa sono tikaŵa na galimoto iyo tikakhumbikwiranga.

Yehova wakalongora kuti watipenge ivyo tikukhumbikwira mwakuthupi. Ise tikeneranga waka kuŵika vya Ufumu pakwamba.

Apo tikaŵa ku Sukulu ya Uteŵeti wa Upayiniya mu 1978, Raimo Kuokkanen, a yumoza wa ŵasambizgi ŵithu, wakatichiska kuti tipemphe kuti tikanjire Sukulu ya Giliyadi. Ntheura tikamba kusambira Chingelezi na chilato chakuti tiŵe ŵakwenelera kunjira sukulu iyi. Ndipouli, mu 1980, pambere tindapemphe kukanjira sukulu iyi, tikachemeka kuti tikateŵetere pa ofesi ya munthavi ku Finland. Pa nyengo iyi, awo ŵakuteŵetera pa Beteli ŵakazomerezgekanga yayi kupempha kuti ŵakanjire Sukulu ya Giliyadi. Kweni tikakhumbanga kuchita uteŵeti uwo Yehova wakuwona kuti tingawuchita makora chomene, uwo ise tikukhumba yayi. Ntheura tikazomera kuluta ku Beteli. Ndipouli, tikalutilira kusambira Chingelezi kuchitira kuti nyengo zinyake  mwaŵi ungasangika wakupempha kunjira Sukulu ya Giliyadi.

Vyaka vichoko waka vyati vyajumphapo, Wupu Wakulongozga ukazomerezga kuti awo ŵakuteŵetera pa Beteli nawo ŵangapempha kunjira sukulu iyi. Mwaluŵiro tikasayina mafomu ghakupempha kunjira sukulu iyi ndipo tikachita nthena chifukwa chakuti tikalekanga kukondwa pa Beteli yayi. Tikakondwanga na uteŵeti withu. Kweni tikakhumbanga waka kujipeleka kukateŵetera kulikose uko kukukhumbikwa wovwiri chikuru ndise ŵakwenelera. Tikazomerezgeka kukanjira Sukulu ya Giliyadi ndipo tikaŵa mu kilasi nambara 79 ilo tikamalizga mu Seputembala 1985. Tikatumika ku Colombia.

Ku Colombia, pakwamba ŵakatituma pa ofesi ya munthavi. Nkhayezgayezga kuchita makora uteŵeti uwo nkhapika, kweni pamanyuma pa chaka chimoza, nkhawona kuti nkhwenera kusintha uteŵeti. Kwanyengo yakwamba pa umoyo wane, nkhapempha kuti ŵanipe uteŵeti unyake. Kufuma apo, ŵakatituma kuti tikateŵetere nga mbamishonale mu msumba wa Neiva, ku chigaŵa cha Huila.

Nyengo zose nkhukondwa chomene na mulimo wakupharazga. Apo nkhachitanga upayiniya wanyengozose ku Finland, nyengo zinyake nkhapharazganga kwamba mulenji chomene m’paka mise chomene. Tikati tatorana waka na Sirkka, naposo tikatandalanga mu upharazgi. Para taluta kukapharazga ku vigaŵa vyakutali, nyengo zinyake tikagonanga waka mu galimoto yithu. Ivi vikawovwiranga kuti zuŵa lakulondezgapo tileke kusuzgikaso na kwenda mtunda utali ndipo tikambanga luŵiro kupharazga.

Pakuŵa ŵamishonale, tikambiraso kuŵa na mwamphu nga ni uwo tikaŵa nawo pakwamba mu upharazgi. Mpingo withu ukakura ndipo ŵabali na ŵadumbu ŵa ku Colombia ŵakaŵa ŵantchindi, ŵachitemwa kweniso ŵa mtima wakuwonga.

Mu matawuni ghanyake ghakufupiko na uko tikateŵeteranga ku Neiva, kukaŵavya Kaboni waliyose. Nkhafipanga mtima chomene na umo makani ghawemi ghangakafikira ku vigaŵa ivi. Ndipouli, chifukwa cha viwawa ivyo vikachitikanga mu charu ichi, vigaŵa ivi vikaŵa vyakofya kupharazgako, chomene ku ŵalendo. Ntheura nkhalombanga kuti yumoza wa mu matawuni agha waŵe Kaboni. Nkhaghanaghananga kuti munthu uyo wakwenera kukhala dankha ku Neiva kuti wasambire unenesko. Ntheura nkhalombaso kuti para wabatizika, wazakaŵe dankha Mkhristu wakukhwima mwauzimu ndipo wazakawelerenge ku tawuni yakwake kukapharazga. Nkhamanya yayi kuti Yehova ndiyo wali na nthowa yiwemi chomene kuluska nthowa iyo ine nkhaghanaghananga.

Nyengo yichoko waka yati yajumphapo, nkhamba kusambira Baibolo na munyamata munyake zina lake Fernando González. Munyamata uyu wakakhalanga ku Algeciras, yimoza mwa ma tawuni agho kukaŵavya Kaboni waliyose. Fernando wakendanga makilomita ghakujumpha 50 kwiza ku Neiva kuzakagwira ntchito. Wakanozgekeranga makora chomene sambiro lililose ndipo mwaluŵiro wakamba kwiza pa maungano ghose gha mpingo. Kufuma waka sabata yakwamba iyo wakambira kusambira, Fernando wakachemanga ŵanyake mu tawuni yakwake na kwamba kuŵasambizga ivyo wakasambiranga pa sambiro la Baibolo.

Fernando wakabatizika mu Janyuwale 1990, pati pajumpha waka myezi 6 kufuma apo wakambira kusambira Baibolo. Kufuma apo, wakamba upayiniya wanyengozose. Pakuti sono kukaŵa Kaboni ku Algeciras, chikaŵa chipusu kuti ofesi ya munthavi  yitumeko ŵapayiniya ŵapadera. Mu Febuluwale 1992, mpingo ukapangika mu tawuni iyi.

Kasi Fernando wakapharazganga waka mu tawuni yakwake pera? Yayi! Wati watora, iyo na muwoli wake ŵakasamira ku San Vicente del Caguán, tawuni yinyake iyo mukaŵavya Kaboni waliyose. Uku, ŵakawovwirapo kwambiska mpingo. Mu 2002, Fernando wakimikika kuŵa mulaŵiliri wa dera, ndipo iyo na muwoli wake Olga, ŵachali kuchita uteŵeti uwu m’paka sono.

Pa ivyo vikachitika apa, nkhasambira kuti ntchakuzirwa chomene kulomba mwakudunjika pa nkhani zakukhwaskana na milimo iyo yikuchitika mu gulu lithu. Yehova wakuchita ivyo ise tingachita yayi. Nakuti mulimo wakuvuna ngwake, ngwithu yayi.—Mat. 9:38.

Mu 1990 tikamba uteŵeti wakwendakwenda. Chigaŵa chithu chakwamba kwendera ukaŵa msumba ukuru wa Bogotá. Tikafipanga mtima kuti tamuwukwaniska yayi uteŵeti uwu. Ine na muwoli wane ndise ŵanthu bweka ndipo tilije maluso ghapadera ghalighose. Nakutiso tikaŵa tindazgoŵere kukhala mu msumba wa ŵanthu ŵanandi chomene. Ndipouli, Yehova wakafiska layizgo lake ilo lili pa Ŵafilipi 2:​13, lakuti: “Chiuta, chifukwa cha khumbo lake liwemi, ndiyo wakumuchiskani, wakumupani khumbo kweniso nkhongono kuti muchite vyose ivyo wakukhumba.”

Pamanyuma tikamba kwendera dera mu chigaŵa cha Medellín, msumba uwo nanguwuzunura kukwambilira. Ŵanthu mu chigaŵa ichi ŵakavizgoŵera waka vivulupi ivyo vikachitikanga mwakuti ŵakafipanga na mtima yayi. Mwachiyelezgero, zuŵa linyake apo nkhachitiskanga sambiro la Baibolo, nkhapulika kuti kuwaro ŵanthu ŵamba kulasana na futi. Nkhakhumbanga nichimbire nkhabisame, kweni uyo nkhasambiranga nayo Baibolo wakalutilira waka kuŵazga ndime nga kuti palije chilichose icho chikuchitika. Wati wamalizga kuŵazga, wakati pachoko waka, mbwenu wakafumira kuwaro. Pati pajumpha kanyengo, wakawerako uku wali na ŵana ŵake ŵaŵiri, ndipo uku mtima uli m’malo wakati, “Phepani, nanguluta kukatora waka ŵana ŵane.”

Pakaŵaso nyengo zinyake apo umoyo withu ukaŵanga pangozi. Zuŵa linyake apo tikapharazganga nyumba na nyumba, muwoli wane wakachimbilira kwa ine uku wakuwoneka wawofi chomene. Wakayowoya kuti munthu munyake wanilasa. Nane nkhachita wofi chomene. Ndipouli, tikamanya kuti munthu uyu wakakhumbanga kulasa Sirkka yayi; kweni wakakhumbanga kulasa munthu munyake uyo wakajumphanga pafupi nayo.

Nyengo yati yajumphapo, nase tikazgoŵera waka na vivulupi ivyo vikachitikanga. Tikakhozgekanga chomene na umo Ŵakaboni ŵa mu chigaŵa ichi ŵakazizipizgiranga masuzgo ghanthena agha panji kujumphirapo. Tikawona kuti usange Yehova wakuŵawovwira ŵabali aŵa, nase watovwirenge. Nyengo zose tikapulikiranga ulongozgi wakufuma ku ŵabali ŵalara, kuchita vinthu mwamahara, na kuleka vyose mu mawoko gha Yehova.

Mbunenesko kuti malo ghanyake ghakaŵanga ghakofya chomene nga umo ise tikaghanaghaniranga yayi. Ulendo unyake, nkhapulika nga kuti ŵanakazi ŵaŵiri ŵakunenana kuwaro kwa nyumba iyo nkhapharazganga. Ine nkhakhumba yayi kuwonelera ŵanthu ŵakugazgana, kweni mweneko wa nyumba wakati tilute pawaro tikawone. Tikati tafika pawaro, tikasanga kuti viyuni vinyake viŵiri  vyakuchemeka parrot ndivyo “vikagazgananga” ndipo vikayezganga ŵazengezgani ŵa mweneko wa nyumba iyo nkhapharazgangako.

Mu 1997, nkhimikika kuŵa msambizgi wa Sukulu Yakusambizga Uteŵeti. b Nyengo zose nkhakondwanga kunjira sukulu za Ufumu, kweni nkhaghanaghanangako yayi kuti nane ningazakaŵa na mwaŵi wapadera wakuŵa msambizgi.

Kufuma apo, nkhimikika kuŵa mulaŵiliri wa chigaŵa. Ndondomeko iyi yati yalekeskeka, nkhatumikaso kukateŵetera nga mulaŵiliri wa dera. Kwa vyaka vyakujumpha 30, nakondwa chomene kuteŵetera nga msambizgi kweniso mulaŵiliri wakwendakwenda. Chifukwa cha mauteŵeti agha, nasanga vitumbiko vinandi chomene. Ndipouli, ni nyengo zose yayi apo vinthu vikendanga makora pera. Lekani nilongosore.

Ndine munthu wachikanga kweniso wambura kulekelera vinthu. Ivi vyanovwira kutonda masuzgo agho nasangananga nagho. Ndipouli, nyengo zinyake nkhachitanga vinthu mwakutalulira pakupwelelera nkhani zinyake mu mipingo. Nyengo zinyakeso, nkhapelekanga ulongozgi wankhongono ku ŵabali ŵanyake wakuti ŵaŵenge ŵachitemwa kweniso kuti ŵaghanaghanirenge ŵanji. Kweni chachitima ntchakuti pa nyengo zanthena izi nane nkhatondekanga kulongora mikhaliro iyi.—Rom. 7:​21-23.

Chifukwa cha ivyo nkhabudiskanga, nyengo zinyake nkhagongowanga chomene. (Rom. 7:24) Zuŵa linyake, nkhaphalira Yehova mu lurombo kuti chingaŵa chiwemi chomene kuti nileke waka uteŵeti wa umishonale ndipo niwelere ku Finland. Mise yira, nkhaluta ku maungano gha mpingo. Ivyo nkhasambira ku maungano vikanikhozga chomene ndipo vikanovwira kuti nilutilire kuchita uteŵeti wane na kulutilira kusintha ivyo nkhatondekanga kuchita makora. M’paka pasono, nichali kukhwaskika na umo Yehova wakazgolera lurombo ulo nkhalomba. Chinyakeso ntchakuti, nkhuwonga chomene Yehova kufumira pasi pa mtima chifukwa cha kunovwira mwalusungu kumarana na ivyo nkhatondekanga kuchita makora.

Ine na muwoli wane Sirkka, tikuwonga chomene Yehova chifukwa cha kuŵa na mwaŵi wakumuteŵetera mu uteŵeti wanyengozose kwa vyaka vinandi chomene. Nkhuwongaso chomene Yehova chifukwa cha kunipa mwanakazi wachitemwa kweniso wakugomezgeka kwa vyaka vyose ivi.

Sonosono apa nikwaniskenge vyaka 70 ndipo nilekenge kuŵa msambizgi wa sukulu za Ufumu kweniso mulaŵiliri wakwendakwenda. Ndipouli, ivi vikunigongoweska yayi. Chifukwa wuli? Chifukwa nkhugomezga na mtima wose kuti icho Yehova wakukhumba ntchakuti timuteŵeterenge na mtima wakujiyuyura na kumulumba chifukwa chakuti tikumutemwa kweniso kuwonga pa vyose ivyo wakutichitira. (Mika 6:8; Mrk. 12:​32-34) Ntheura kuti tilumbe Yehova, vikuthemba kuti tiŵe na udindo pera yayi.

Para nkhughanaghanira mauteŵeti ghose agho nasangwa nagho kumanyuma kose uku, nkhumanya kuti nkhapika mauteŵeti agha chifukwa chakuti ndine wapachanya kuluska ŵanyane yayi; panji chifukwa chakuti nili na maluso ghapadera. Kweni Yehova wakanipa mauteŵeti agha chifukwa cha lusungu lwake lukuru. Wakanipa mauteŵeti agha nangauli nkhatondekanga kuchita makora vinthu vinyake. Nkhumanya kuti nafiska mauteŵeti ghose agha chifukwa cha wovwiri wa Yehova. Pa chifukwa ichi, ningati kulopwa kwane kwalongora kuti nkhongono za Chiuta ni zakufikapo.—2 Kor. 12:9.