NKHANI YAKUSAMBIRA 4
SUMU 18 Kuwonga Sembe Yakuwombora
Kasi Sembe Yakuwombora Yikutisambizga Vichi?
“Chitemwa cha Chiuta chikawoneka kwa ise mu nthowa iyi.”—1 YOH. 4:9.
FUNDO YIKURU
Mu nkhani iyi tiwonenge umo sembe yakuwombora yikuvumbulira mikhaliro yiwemi ya Yehova Chiuta na Yesu Khristu.
1. Kasi tikusanga chandulo wuli para tikusangikapo pa Chikumbusko cha nyifwa ya Khristu chaka chilichose?
MWAMBURA kukayika namwe mungazomerezga kuti sembe yakuwombora ntchawanangwa chapadera chomene. (2 Kor. 9:15) Chifukwa chakuti Yesu wakapeleka umoyo wake, mungaŵa paubwezi wakukhora na Yehova Chiuta. Kweniso mungaŵa na chilindizga cha kuzakakhala kwamuyirayira. Ntheura tili na vifukwa vinandi vyakuwongera Yehova uyo wali kutipa sembe yakuwombora chifukwa chakuti wakutitemwa. (Rom. 5:8) Kuti watovwire kulutilira kuwonga kweniso kuti tileke kuluwa ivyo Yehova na Yesu ŵali kutichitira, Yesu wakalangura kuti tikwenera kuchita Chikumbusko cha nyifwa yake chaka chilichose.—Luka 22:19, 20.
2. Kasi tidumbiskanenge vichi mu nkhani iyi?
2 Chaka chino tizamukumbukira nyifwa ya Yesu pa Chisulo, Epulero 12, 2025. Mwambura kukayika tose tikunozga vyakuti tizakasangikepo. Tizamusanga chandulo chomene usange mu nyengo ya Chikumbusko tizamupatura nyengo na kulanguruka a pa vyose ivyo Yehova na Mwana wake ŵali kutichitira. Mu nkhani iyi, tidumbiskanenge ivyo sembe yakuwombora yikutisambizga vyakukhwaskana na Yehova kweniso Mwana wake. Ndipo mu nkhani yakulondezgapo, tizamovwirika kupulikiska umo tingasangira chandulo na sembe yakuwombora kweniso umo tingalongolera kuti tikuwonga.
IVYO SEMBE YAKUWOMBORA YIKUTISAMBIZGA VYAKUKHWASKANA NA YEHOVA
3. Kasi nyifwa ya munthu yumoza yingawombora wuli ŵanthu mamiliyoni ghanandi? (Wonaniso chithuzi.)
3 Sembe yakuwombora yikutisambizga vya urunji wa Yehova. (Doto. 32:4) Munthowa wuli? Ghanaghanirani fundo iyi: Kufuma apo Adamu wakanangira, tili kuhara kwananga uko kukwiziska nyifwa. (Rom. 5:12) Kuti tifwatuke ku kwananga na nyifwa, Yehova wakanozga vyakuti Yesu wazakatifwire. Kweni kasi nyifwa ya munthu yumoza wakufikapo yingaponoska wuli ŵanthu mamiliyoni ghanandi? Mpositole Paulosi wakalongosora kuti: “Ŵanandi ŵakaŵa ŵakwananga chifukwa cha kuleka kupulikira kwa munthu yumoza [Adamu], mwakuyana waka, ŵanandi ŵaŵenge ŵarunji chifukwa cha kupulikira kwa munthu yumoza [Yesu].” (Rom. 5:19; 1 Tim. 2:6) Ndipo mukayowoyero kanyake tingati, kuleka kupulikira kwa munthu yumoza kuli kupangiska kuti tose tiŵe ŵazga ŵa kwananga na nyifwa. Ntheura, pakakhumbikwirangaso munthu yumoza wakufikapo kweniso wakupulikira kuti tifwatuke ku wuzga uwu.
Kwizira mwa munthu yumoza Adamu tose tili mu wuzga wa kwananga na nyifwa. Ndipo kwizira mwa munthu yumoza Yesu, tili kufwatuka ku kwananga na nyifwa (Wonani ndime 3)
4. Chifukwa wuli Yehova wakazomerezga yayi kuti ŵana ŵa mtima uwemi ŵa Adamu ŵakhale kwamuyirayira?
4 Kasi Yesu wakeneranga nadi kufwa kuti watiwombore? Asi Yehova mphanyi wakazomerezga waka kuti ŵana ŵa Adamu ŵa mtima uwemi ŵakhale kwamuyirayira? Ku ŵanthu ŵambura kufikapo, iyi yingawoneka nga ndiyo ni nthowa yiwemi kweniso yalusungu. Kweni nthowa iyi yikate yilongorenge yayi urunji wenecho wa Yehova. Chifukwa vyatenge viwonekenge nga kuti Adamu wakananga chomene yayi kweniso kuti ŵana ŵake mbambura urunji yayi, apo ndimo vikaŵira yayi.
5. Chifukwa wuli tingagomezga kuti Yehova nyengo zose wachitenge icho ntchakwenelera?
5 Kweni kasi vyatenge viŵenge wuli kuti Yehova walekenge kupeleka sembe yakuwombora, na kuzomerezga waka kuti ŵana ŵa Adamu ŵakhale kwamuyirayira nangauli mbambura kufikapo? Ŵanthu ŵatenge ŵakayikirenge kuti Chiuta wangachita mwaurunji pa nkhani zinyake. Mwachiyelezgero, ŵanthu ŵatenge ŵakayikirenge usange wafiskenge vinyake ivyo wali kulayizga. Kweni tikwenera kufipa mtima yayi kuti ivi vingachitika. Chifukwa chakuti iyo wakachita kujikomora kupeleka Mwana wake wakutemweka, vikutisimikizgira kuti iyo nyengo zose wachitenge icho ntchakwenelera.
6. Kasi ni nthowa wuli yimoza iyo sembe yakuwombora yikulongolera chitemwa cha Yehova? (1 Yohane 4:9, 10)
6 Paliso mukhaliro unyake uwo ukamuchiska Yehova kuti watume Mwana wake kuzakatifwira, mukhaliro uwu ntchitemwa icho wali nacho pa ise. (Yoh. 3:16; ŵazgani 1 Yohane 4:9, 10.) Pakutuma Mwana wake kuzakatifwira, Yehova wakakhumbanga waka kuti tikhale kwamuyirayira yayi, kweni kuti tiŵeso chigaŵa cha mbumba yake. Ghanaghanirani fundo iyi: Adamu wakati wananga, Yehova wakamuwuskamo mu mbumba ya ŵasopi ŵake. Ndipo ivi vili kupangiska kuti tose tibabikire kuwaro kwa mbumba ya Chiuta. Kweni kwizira mu sembe yakuwombora, Yehova wakutigowokera zakwananga zithu, ndipo panyengo yake wazamuguzira mu mbumba yake ŵanthu wose awo ŵali na chipulikano mwa iyo kweniso awo ŵakupulikira. Nanga ni sono nthena tingaŵa paubwezi uwemi na Yehova kweniso na ŵabali na ŵadumbu ŵithu. Nadi, Yehova wakutitemwa chomene.—Rom. 5:10, 11.
7. Kasi umo Yesu wakasuzgikira vikutovwira wuli kumanya kuti Yehova wakutitemwa?
7 Tingapulikiska makora chomene umo Yehova wakutitemwera, para tingaghanaghanira umo vikamuŵinyira kuwona Mwana wake wakusuzgika. Satana wakuyowoya kuti palije muteŵeti wa Chiuta uyo wangalutilira kuŵa wakugomezgeka para wakumana na masuzgo ghakuru. Kuti walongore kuti Satana ni mutesi, Yehova wakazomerezga kuti Yesu wasuzgike dankha pambere wandafwe. (Yobu 2:1-5; 1 Pet. 2:21) Yehova wakawonanga Yesu wakuneneka na ŵakususka, kuthyapulika na ŵasilikari, kweniso kukhomeka pa khuni. Pamanyuma Yehova wakawona Mwana wake wakutemweka wakufwa nyifwa yakuŵinya chomene. (Mat. 27:28-31, 39) Yehova wakaŵa nazo nkhongono zakulekeskera vyose ivi kuchitika. Mwachiyelezgero, pa nyengo iyo ŵanthu ŵakatenge, “Ipo Chiuta wamuthaske usange wakumukhumba,” Yehova wakatenge wachitenge makora waka. (Mat. 27:42, 43) Ndipouli, Yehova wanjilirengepo, sembe yakuwombora yikate yipelekekenge yayi ndipo tikatenge tiŵavyenge chigomezgo chilichose. Ntheura Yehova wakazomerezga Mwana wake kusuzgika m’paka apo wakamalizgikira.
8. Kasi Yehova vikamuŵinyanga kuwona Mwana wake wakusuzgika? Longosorani. (Wonaniso chithuzi.)
8 Ndipouli, tikwenera yayi kughanaghana kuti, pakuti Chiuta ngwankhongonozose, mbwenu ndikuti wakukhwaskika yayi na vinthu ivyo vyachitika. Ise tili kulengeka mu chikozgo chake, ndipo para vinthu vinyake vyachitika tikukhwaskika. Ntheura ivi vikulongora kuti nayo wakukhwaskika. Baibolo likulongora kuti nayo ‘vikumuŵinya’ kweniso ‘wakukwenyelera.’ (Sal. 78:40, 41) Ghanaghaniraniso nkhani ya Abrahamu na Yisake. Mungakumbuka kuti Yehova wakamuphalira Abrahamu kuti wapeleke sembe mwana wake yumoza pera. (Gen. 22:9-12; Heb. 11:17-19) Ntheura tingaghanaghanira waka umo Abrahamu wakwenera kuti wakajipulikira kweniso umo vikamuŵinyira apo wakanozgekanga kukoma mwana wake Yisake na chimayi. Mwakuyana waka, Yehova nayo vikamuŵinya chomene kuwona Mwana wake wakukomeka mwankhaza na ŵanthu ŵambura kopa Chiuta.—Wonani pa jw.org vidiyo yakuti Yezgani Chipulikano Chawo—Abrahamu, Chigaŵa 2.
Vikamuŵinya chomene Yehova kuwona Mwana wake wakusuzgika (Wonani ndime 8)
9. Kasi lemba la Ŵaroma 8:32, 38, 39 likumovwirani wuli kupulikiska ukuru wa chitemwa icho Yehova wali nacho pa imwe kweniso ŵasopi ŵanyinu?
9 Sembe yakuwombora yikutisambizga kuti palije uyo wakutitemwa chomene kuluska umo wakutitemwera Yehova, nanga wangaŵa mubali withu panji mubwezi withu wapamtima. (Ŵazgani Ŵaroma 8:32, 38, 39.) Mwambura kukayika, Yehova wakutitemwa chomene kuluska umo tikujitemwera taŵene. Kasi mukukhumba kukhala na umoyo kwamuyirayira? Yehova ndiyo ngwakukhumbisiska chomene. Kasi mukukhumba kuti zakwananga zinu zigowokereke? Yehova ndiyo ngwakukhumbisiska chomene kumugowokerani. Icho iyo wakukhumba ntchakuti ise tizomere chawanangwa cha sembe yakuwombora mwa kuŵa na chipulikano mwa iyo kweniso kumupulikira. Sembe yakuwombora ntchilongolero chakuti Chiuta wakutitemwa chomene. Ndipo mu charu chiphya, tizamusambira vinandi vyakukhwaskana na chitemwa cha Yehova.—Muph. 3:11
IVYO SEMBE YAKUWOMBORA YIKUTISAMBIZGA VYAKUKHWASKANA NA YESU
10. (a) Chifukwa wuli Yesu wakasuzgika chomene mu mtima chifukwa cha nyifwa yake? (b) Kasi Yesu wakatuŵiska wuli zina la Yehova? (Wonaniso bokosi lakuti “ Kugomezgeka kwa Yesu Kukatuŵiska Zina la Yehova.”)
10 Yesu wakuvikilira chomene lumbiri lwa Adada ŵake. (Yoh. 14:31) Yesu wakasuzgika chomene mu mtima chifukwa chakuti ŵakamupa mulandu wakuti wakuyuyura Chiuta, ivyo vikananganga zina la Adada ŵake. Lekani wakalomba kuti: “Adada, usange ntchamachitiko, nkhombo iyi yinijumphilire.” (Mat. 26:39) Chifukwa chakuti Yesu wakagomezgeka m’paka apo wakafwira, wakasuska mautesi ghose agho Satana wakayowoyera Adada ŵake.
11. Kasi Yesu wakalongora wuli kuti wakutemwa chomene ŵanthu? (Yohane 13:1)
11 Sembe yakuwombora yikutisambizgaso kuti Yesu wakuŵatemwa chomene ŵanthu, chomenechomene ŵalondezgi ŵake. (Zinth. 8:31; ŵazgani Yohane 13:1.) Mwachiyelezgero, Yesu wakamanyanga kuti vinyake ivyo wakumanenge navyo pa uteŵeti wake pa charu chapasi viŵenge vyakusuzga chomene, chomenechomene nyifwa yake. Ndipouli, Yesu wakachita vyose ivi chifukwa chakuti waka wakatumika na Adada ŵake yayi, kweni chifukwa chakuti wakatemwanga ŵanthu. Yesu wakaŵika mtima wake wose pa kupharazga, kusambizga, na kovwira ŵanji. Nanga pangaŵa pa zuŵa ilo wakafwiranga, Yesu wakapatura nyengo kugeziska malundi gha ŵapositole ŵake na kuŵakhozga kweniso kuŵapa ulongozgi. (Yoh. 13:12-15) Ndipo apo wakaŵa pa khuni lakusuzgikirapo, Yesu wakapeleka chigomezgo kwa chigeŵenga icho chikapayikika pafupi nayo, kweniso kunozga vyakuti amama ŵake ŵapwelerekenge. (Luka 23:42, 43; Yoh. 19:26, 27) Yesu wakalongora chitemwa pa kutifwira pera yayi, kweni panyengo yose iyo wakaŵa pa charu chapasi.
12. Kasi pasono Yesu wakutovwira wuli?
12 Nangauli Khristu wakafwa “kamoza pera,” kweni wachali kuchita vinandi pa kovwira ise. (Rom. 6:10) Wakuchita wuli nthena? Wakulutilira kuchita milimo yinandi kuti watipe vinthu viwemi chomene ivyo ni vyamachitiko chifukwa cha sembe yakuwombora. Ghanaghanirani waka milimo iyo wakuchita. Iyo ni Themba, Wasembe Mukuru, kweniso mutu wa mpingo. (1 Kor. 15:25; Efe. 5:23; Heb. 2:17) Iyo wakudangilira pa mulimo wakuwunganya ŵakuphakazgika kweniso ŵa mzinda ukuru, mulimo uwo uzamumara pambere suzgo yikuru yindamare. b (Mat. 25:32; Mrk. 13:27) Kweniso iyo wakuwoneseska kuti ŵateŵeti ŵake ŵali na chakurya chinandi chauzimu mu mazuŵa ghaumaliro agha. (Mat. 24:45) Ndipo mu Muwuso wake wa Vyaka 1,000, wazamulutilira kutipa ivyo tikukhumbikwira. Apa Yehova wali kutipa nadi Mwana wake kuti watovwire.
LUTILIRANI KUSAMBIRA VINTHU VIPHYA
13. Kasi kughanaghanirapo kungamovwirani wuli kuti mulutilire kusambira za chitemwa icho Chiuta na Khristu ŵali nacho pa ise?
13 Mungalutilira kusambira vinandi vyakukhwaskana na chitemwa icho Yehova na Khristu Yesu ŵali nacho pa ise, para mukughanaghanirapo pa ivyo ŵali kutichitira. Panji mu nyengo ya Chikumbusko chaka chino, mungaŵazga mwakupwelelera buku limoza panji ghanandi gha Makani Ghawemi. Lekani kuŵazga vinthu vinandi pa nyengo yimoza. M’malo mwake, muŵazgenge pachokopachoko na kuwona vifukwa vinyake ivyo mukwenera kumutemwera Yehova na Yesu. Kweniso, muphalirengeko ŵanyinu ivyo mwasambira.
14. Kuyana na lemba la Salimo 119:97 na mazgu ghamusi, kasi kufufuza kungamovwirani wuli kuti mulutilire kusambira vya sembe yakuwombora kweniso visambizgo vinyake? (Wonaniso chithuzi.)
14 Usange mukasambira unenesko nikale, nyengo zinyake mungawona nga palije chachilendo icho mungasambira pa nkhani nga zaurunji wa Chiuta, chitemwa chake, ndiposo sembe yakuwombora. Nakuti unenesko ngwakuti pali vinandi vyakuti mungasambira vyakukhwaskana na nkhani izi. Ntheura kasi mungachita wuli? Muŵazgenge kweniso kusambira mabuku ghithu ghakulongosora Baibolo. Para mwaŵazga fundo yinyake iyo mukuyipulikiska makora yayi, fufuzani. Kufuma apo, zuŵa lose ghanaghaniranipo pa ivyo mwasanga kweniso ivyo mwasambira vyakukhwaskana na Yehova, Mwana wake, kweniso umo ŵakumutemwerani.—Ŵazgani Salimo 119:97 na mazgu ghamusi.
Nanga tingaŵa kuti taŵa mu unenesko kwa vyaka vinandi, tingalutilira kusambira vinandi ivyo vingatovwira kuti tiwongenge chomene sembe yakuwombora (Wonani ndime 14)
15. Chifukwa wuli tikwenera kulutilira kupenjerezga fundo ziphya?
15 Kugongowa yayi para mundasange fundo yiphya panji iyo yamukondweskani apo mukusambira panji para mukufufuza. Jitorani nga ndimwe munthu uyo wakupenja golide. Mwakuzikira, ŵanthu awo ŵakupenja golide ŵakumalira maora ghanandi panji mazuŵa uku ŵakupenjapenja, pambere ŵandasangepo nanga kangaŵa kagolide kachoko waka. Ndipouli, iwo ŵakulimbikira chomene chifukwa nanga kangaŵa kagolide kachoko waka nkhakuzirwa chomene kwa iwo. Ntheura fundo yiliyose yiphya iyo tikusambira mu Baibolo njakuzirwa chomene kuluska golide. (Sal. 119:127; Zinth. 8:10) Ntheura muzikirenge kweniso kulondezga chomene ndondomeko yinu ya kuŵazga Baibolo.—Sal. 1:2.
16. Kasi tingamuyezga wuli Yehova na Yesu?
16 Para mukusambira, penjerezgani nthowa izo mungalondezgera ivyo mukusambira. Mwachiyelezgero, mungayezga urunji wa Yehova mwakuŵachitira ŵanji vinthu mwambura kutemwera. Mungayezga Yesu umo wakutemwera Adada ŵake na ŵanthu, mwakuŵa ŵakukhumbisiska kusuzgika chifukwa cha zina la Yehova kweniso kovwira ŵabali na ŵadumbu ŵithu nanga vingaŵa kuti umoyo withu uŵenge pangozi. Kweniso, mungayezga Yesu mwa kupharazgira ŵanji kuti nawo ŵaŵe na mwaŵi wakuzomera chawanangwa cha Yehova cha sembe yakuwombora.
17. Kasi tizamudumbiskana vichi mu nkhani yakulondezgapo?
17 Para tikusambira vinandi vyakukhwaskana na sembe yakuwombora, timutemwenge chomene Yehova kweniso Mwana wake. Ndipo nawo ŵatitemwenge chomene. (Yoh. 14:21; Yak. 4:8) Ntheura tikwenera kugwiliskira ntchito vyose ivyo Yehova wali kutipa kuti tilutilire kusambira vya sembe yakuwombora. Mu nkhani yakulondezgapo, tizamuwona nthowa zinyake za umo tingasangira chandulo na sembe yakuwombora kweniso umo tingalongolera kuti tikuwonga chitemwa cha Yehova.
SUMU 107 Chiuta Ntchakuwonerapo cha Chitemwa
a MAZGU GHALONGOSOREKA: “Kulanguruka” chikung’anamura kughanaghanirapo chomene pa nkhani iyo tikuŵazga kuti tiyipulikiske makora.
b Kuwunganya “vinthu vyose pamoza” uko Paulosi wakayowoya pa Ŵaefeso 1:10, kukupambana na kuwunganyika kwa “ŵakusoleka” uko Yesu wakayowoya pa Mateyu 24:31 na Mariko 13:27. Paulosi wakayowoyanga vya nyengo iyo Yehova wakusora ŵana ŵake ŵauzimu mwa kuŵaphakazga na mzimu utuŵa. Apo Yesu wakayowoyanga vya nyengo iyo ŵakuphakazgika ŵakukhalira pa charu chapasi ŵazamuwunganyikira kuchanya pa nyengo ya suzgo yikuru.
