Panji nga umo viliri na taŵanandi, namwe vikumusuzgani kukumbuka ivyo mwasambira. Kweni kasi muli kuwona kuti ntchipusu kukumbuka ntharika za Yesu? Mungaŵa na chithuzi cha ivyo vikachitika, ndipo ivi vikumovwirani kuti muzikumbukenge. Mwakuyana waka, namwe mungakumbuka chomene ivyo mukusambira para mukuyezga kuŵa na chithuzi cha umo vikaŵira. Kasi mungachita wuli nthena? Mudindenge vithuzi apo mukusambira.

Ŵanthu awo ŵakudinda vithuzi vya vinthu viphya ivyo ŵasambira, kanandi ŵakuvikumbuka ivyo ŵasambira. Nakuti ŵakuwona kuti nthowa iyi yikuŵawovwira kupulikiska waka mazgu yayi, kweniso na fundo zikuru. Vithuzi ivyo ŵakudinda ni vyakusuzga yayi, vikuŵa vipusu waka. Ndipo ukaboni ukulongora kuti ŵanthu ŵachilara ŵakusanga chandulo chomene na nthowa iyi.

Pa sambiro linu lakulondezgapo, mungazakayezga kudinda vithuzi vya vinthu ivyo mwasambira. Mungazakazizwa kuwona unandi wa vinthu ivyo muzamukumbukira!