1. Kasi ŵanthu ŵanandi mazuŵa ghano ŵakukhumba vichi?

 KASI namwe mukuwona kuti ŵanthu ŵanandi mbakujinotha mazuŵa ghano? Mwachiyelezgero, ŵanyake ŵafika na pakujilongora kwizira pa malo ghakuchezgerapo gha pa Intaneti. Ndipouli, mbanthu ŵachoko waka awo ŵakupeleka uchindami kwa Yehova Chiuta mazuŵa ghano. Mu nkhani iyi, tidumbiskanenge ng’anamuro la kupeleka uchindami kwa Yehova kweniso chifukwa icho tikwenera kuchitira nthena. Tiwonengeso umo tingamupira Chiuta uchindami uwo ukumwenelera, kweniso umo iyo Chiuta wazamutuŵiskira zina lake sonosono apa munthazi.

KASI CHIKUNG’ANAMURACHI KUPELEKA UCHINDAMI KWA YEHOVA?

2. Kasi Yehova wakalongora wuli uchindami wake pa Phiri la Sinayi? (Wonaniso chithuzi.)

² Kasi uchindami ni vichi? Mu Baibolo, lizgu lakuti “uchindami” lingang’anamura chilichose icho chingapangiska munthu munyake kuwoneka wakuchindikika panji wapadera. Yehova wakalongorapo uchindami wake mwapadera pakati pajumpha nyengo yichoko waka wati wawombora mtundu wa Israyeli ku wuzga ku Eguputo. Muŵe nga mukuwona Ŵaisrayeli ŵanandi ŵawungana musi mwa Phiri la Sinayi kuti ŵakumane na Chiuta wawo. Kufuma apo, mbwe chibingu chakuti bii chikujara phiri lose. Mwamabuchi, mbwe mukupulika chindindindi chikuru chikusunkhunya phiri na kuphuliska vijosi uku ŵaleza ŵakumwetuka na kududumira, kweniso mukupulika kulira kukuru kwa mbata. (Eks. 19:​16-18; 24:17; Sal. 68:8) Ghanaghanirani umo Ŵaisrayeli aŵa ŵakajipulikira Yehova wakati walongora nkhongono zake izi za uchindami wake.

3. Kasi chikung’anamurachi kupeleka uchindami kwa Yehova?

 ³ Wuli pakuyowoya za ise taŵanthu? Kasi Yehova tingamupa uchindami? Enya, tingamupa. Nthowa yimoza iyo tingamupira uchindami Yehova, nkhuphalirako ŵanji vyakukhwaskana na nkhongono zake zapadera kweniso mikhaliro yake yakukondweska chomene. Tingamupaso uchindami Yehova para tikuzomerezga kuti malumbo ghose ghalute kwa iyo pa vinthu ivyo watovwira kufiska. (Yes. 26:12) Themba Davide ndimoza mwa ŵanthu awo ni viyelezgero viwemi chomene pa nkhani ya kupeleka uchindami kwa Yehova. Mu lurombo ulo wakapeleka panthazi pa mpingo wa Israyeli, Davide wakayowoya kuti: “A Yehova, ukuru, nkhongono, utozi, uchindami, na ntchindi ni vinu. Pakuti vyose ivyo vili kuchanya na pa charu chapasi ni vinu.” Davide wakati wamalizga lurombo lwake, “mpingo wose ukalumba Yehova.”—1 Mid. 29:​11, 20.

4. Kasi Yesu wakapeleka wuli uchindami kwa Yehova?

⁴ Apo Yesu wakaŵa pa charu chapasi wakapeleka uchindami kwa Adada ŵake mwa kuphalira ŵanthu kuti ndiwo ŵakamupanga nkhongono zakuchitira minthondwe. (Mrk. 5:​18-20) Yesu wakapelekangaso uchindami kwa Yehova kwizira mu ivyo wakayowoyanga vyakukhwaskana na Adada ŵake, kweniso umo wakachitiranga vinthu na ŵanji. Pa ulendo unyake, Yesu wakasambizganga mu sunagoge. Pa ŵanthu awo ŵakategherezganga pakaŵa mwanakazi munyake uyo wakaŵa na mzimu uheni kwa vyaka 18. Mzimu uwu ukamupangiska kuti wakokonyare msana ndipo wakatondekanga kwinuka. Mwanakazi uyu wakwenera kuti wakasuzgikanga chomene! Yesu wakamulengera lusungu chomene mwanakazi uyu ndipo wakaluta kwa iyo na kumuphalira kuti: “Wamwanakazi, wafwatuka ku ulwari wako.” Pamanyuma wakaŵika mawoko ghake pa iyo, ndipo nyengo yeneyiyo mwanakazi yura wakanyoloka na “kwamba kupeleka uchindami kwa Chiuta,” chifukwa wakachizgika! (Luka 13:​10-13) Mwanakazi uyu wakaŵa na chifukwa chakupulikikwa cha kupelekera uchindami kwa Yehova, ndipo nase tili na vifukwa vinandi vyakuchitira nthena.

CHIFUKWA WULI TIKUPELEKA UCHINDAMI KWA YEHOVA?

5. Kasi tili na vifukwa wuli vyakumuchindikira Yehova?

⁵ Tikupeleka uchindami kwa Yehova chifukwa chakuti tikumuchindika chomene. Tili na vifukwa vinandi vyakumuchindikira Chiuta. Yehova ngwankhongonozose ndipo nkhongono zake zilije chigoti. (Sal. 96:​4-7) Vinjeru vyake vyapachanya vikuwoneka makora chomene kwizira mu vinthu ivyo wali kulenga. Iyo Ntchisimi cha umoyo ndipo wali kupeleka vyose ivyo vikovwira kuti umoyo ulutilire kuŵapo. (Chivu. 4:11) Iyo ngwakugomezgeka. (Chivu. 15:4) Chilichose icho wakuchita chikwenda makora, ndipo nyengo zose wakufiska malayizgo ghake. (Josh. 23:14) Lekani ntchimi Yeremiya yikayowoya vyakukhwaskana na Yehova kuti: “Pa ŵavinjeru wose ŵa ŵamitundu na mu maufumu ghawo ghose, palije wakuyana na imwe.” (Yer. 10:​6, 7) Nadi, tili na vifukwa vinandi vyakupelekera ntchindi kwa Adada ŵithu ŵakuchanya. Kweni Yehova ngwakwenelera kupika waka ntchindi yayi, waliso na mikhaliro yakukondweska chomene iyo yikutipangiska kuti timutemwenge.

6. Chifukwa wuli tikumutemwa Yehova?

⁶ Tikumupa uchindami Yehova chifukwa chakuti tikumutemwa chomene. Ghanaghanirani mikhaliro yakupambanapambana ya Yehova iyo yikupangiska kuti timutemwenge chomene. Iyo ngwalusungu kweniso ngwachiwuravi. (Sal. 103:13; Yes. 49:15) Chifukwa chakuti ngwalusungu, para ise tapwetekeka mu mtima, nayo vikumuŵinya chomene. (Zek. 2:8) Wakutovwiraso kuti tisendelere kwa iyo na kuŵa nayo paubwezi. (Sal. 25:14; Mil. 17:27) Ndiposo ngwakujiyuyura, iyo “wakukotama kuti walaŵiske mtambo na charu chapasi, wakuwuska wakuyuyuka mu fuvu.” (Sal. 113:​6, 7) Chifukwa cha mikhaliro  yose yakukondweska iyi, tikwenera kumupa nadi uchindami Chiuta withu mukuru.—Sal. 86:12.

7. Kasi tili na mwaŵi wuli wapadera?

⁷ Tikumupa uchindami Yehova chifukwa chakuti tikukhumba ŵanji ŵamumanye. Ŵanandi ŵakumanya yayi unenesko wakukhwaskana na Yehova. Chifukwa wuli? Chifukwa Satana wali kubulumutizga maghanoghano ghawo na mautesi ghakofya agho wathandazga ghakukhwaskana na Chiuta. (2 Kor. 4:4) Satana wapangiska ŵanthu kukhorwa kuti Yehova ngwankhaza, wakupwelelerako yayi vya ise, kweniso kuti ndiyo wakupangiska masuzgo pa charu. Kweni ise tikumanya unenesko wakukhwaskana na Chiuta withu! Ntheura tili na mwaŵi wakuphalirako ŵanji umo Chiuta withu waliri nadi, ndipo ivi vingapeleka uchindami kwa iyo. (Yes. 43:10) Lemba la Salimo 96 likudidimizga chomene vya kupeleka uchindami kwa Yehova. Apo tikudumbiskana mavesi ghanyake gha mu Salimo ili, ghanaghanirani nthowa izo mungapelekera uchindami kwa Yehova, uwo ukumwenelera nadi.

KASI TINGAMUPA WULI YEHOVA UCHINDAMI UWO UKUMWENELERA?

8. Kasi ni nthowa wuli yimoza iyo tingapelekera uchindami kwa Yehova? (Salimo 96:​1-3)

⁸ Ŵazgani Salimo 96:​1-3. Tingamupa uchindami Yehova kwizira mu ivyo tikuyowoya vyakukhwaskana na iyo. Mu mavesi agha, ŵanthu ŵa Yehova ŵakuphalirika kuti ‘ŵimbire Yehova,’ ‘ŵalumbe zina lake,’ ‘ŵapharazge makani ghawemi gha chiponosko chake,’ kweniso kuti ‘ŵapharazge uchindami wake ku ŵamitundu.’ Zose izi ni nthowa izo tingapelekera uchindami kwa Adada ŵithu ŵakuchanya. Ŵayuda ŵakugomezgeka kweniso Ŵakhristu ŵakwambilira, ŵakaziwulika yayi kwamba kuphalirako ŵanji vyakukhwaskana na vinthu viwemi vyose ivyo Yehova wakaŵachitiranga. Chinyake ntchakuti ŵakavikiliranga zina lake. (Dan. 3:​16-18; Mil. 4:29) Kasi nase tingachita wuli mwakuyana waka?

9-10. Kasi tikusambirako vichi ku ivyo vikachitikira Angelena? (Wonaniso chithuzi.)

⁹ Wonani ivyo wakachita Angelena, a mudumbu uyo wakukhala ku United States. Mwachikanga wakavikilira zina la Yehova pa kampani apo wakugwira ntchito. Pakuŵa muphya pa ntchito, Angelena wakachemeka ku nkhumano pamoza na ŵanyake awo nawo ŵakaŵa kuti ŵanjira waka ntchito, mwakuti waliyose wayowoye mbiri yake. Angelena wakanozga vyakuti wakalongore vithuzi vinyake ivyo vikalongoranga umoyo wakukondwa uwo wali nawo chifukwa cha kuŵa Kaboni wa Yehova. Ndipouli, apo  iyo wakaŵa pafupi kujilongosora, munyake uyo nayo wakaŵa kuti wamba waka ntchito wakajilongosora kuti nayo wakakulira mu mbumba ya Ŵakaboni ŵa Yehova. Wakamba kuyowoya viheni vyakukhwaskana na vigomezgo vithu. Angelena wakuti: “Nkhachita wofi chomene. Kweni nkhajifumba kuti: ‘Kasi nizomerezgenge munyake kuti walutilire kuyowoya vinthu vyautesi vyakukhwaskana na Yehova? Panji nivikilirenge zina la Yehova?’”

¹⁰ Munyake wa pa ntchito uyu wakati wamara kuyowoya, Angelena wakalomba mwakudumura cha mu mtima. Kufuma apo wakamuphalira munthu uyu mwalusungu kuti: “Ine nane umo nili kulerekera vikuyanako waka na iwe. Nane nili kukulira mu mbumba ya Ŵakaboni ŵa Yehova ndipo m’paka mwahuno nichali Kaboni wa Yehova.” Nangauli vinthu vikaŵa makora yayi, kweni Angelena wakakhazika mtima pasi. Wakaŵalongora ŵanyake ŵa ku ntchito vithuzi ivyo iyo na ŵabwezi ŵake ŵakajambuliska ku chakuchitika chinyake chauzimu, ndipo wakavikilira vigomezgo vyake mwantchindi. (1 Pet. 3:15) Kasi pakaŵa vyakufumapo wuli? Kufika panyengo iyo Angelena wakamalizganga kuyowoya, munyake wa pa ntchito yura wakaŵa kuti watuna. Nakuti wakazomerezgaso kuti nayo wakukumbuka nyengo zakukondweska apo wakawungananga na Ŵakaboni ŵa Yehova. Angelena wakuti: “Zina la Yehova likukhumbikwa kuvikilirika nadi. Nakuti ni mwaŵi wapadera kuvikilira zina lake.” Nase tili na mwaŵi wakulumba Yehova na kumupa uchindami para tawona ŵanji ŵakumuyuyura.

11. Kasi kwamba kale ŵasopi ŵa Yehova ŵalondezga wuli fundo ya pa Salimo 96:8?

¹¹ Ŵazgani Salimo 96:8. Tingapeleka uchindami kwa Yehova na vinthu vithu vyakuzirwa. Kwamba kale ŵasopi ŵaunenesko ŵakuchindika Yehova munthowa iyi. (Zinth. 3:9) Mwachiyelezgero, Ŵaisrayeli ŵakapeleka vyakupeleka kuti viwovwire pakuzenga na kupwelelera tempile. (2 Mathe. 12:​4, 5; 1 Mid. 29:​3-9) Ŵasambiri ŵanyake ŵa Yesu ŵakapeleka “vyuma vyawo” kuti viwovwire Yesu na ŵapositole pa ivyo ŵakakhumbikwiranga. (Luka 8:​1-3) Ŵakhristu ŵakwambilira nawo ŵakapeleka vyakupeleka ŵakati ŵapulika kuti ŵabali na ŵadumbu ŵawo njara yaŵawira. (Mil. 11:​27-29) Mazuŵa ghano napo, tingapeleka uchindami kwa Yehova na vyuma vithu.

12. Kasi vyawanangwa vithu vingapeleka wuli uchindami kwa Yehova? (Wonaniso chithuzi.)

¹² Wonani chiyelezgero chimoza icho chikulongora umo vyakupeleka vithu vikovwilira kuti Yehova wapike uchindami. Mu 2020 ku Zimbabwe kukaŵa chilangalanga icho chikatora nyengo yitali. Ŵanthu ŵanandi ŵakaŵavya  chakurya, kusazgapo mudumbu munyake zina lake Prisca. Nangauli vinthu vikaŵa makora yayi, kweni Prisca wakalutilira kupharazga zuŵa lililose la Chitatu na Chinkhondi, nanga ni mu nyengo ya kulima. Ŵazengezgani ŵake ŵakamunyozanga chifukwa chakuti wakalutanga kukapharazga m’malo mwa kuluta ku munda. Ŵakayowoyanga kuti: “Uzamufwa na njara iwe.” Kweni Prisca wakaŵazgoranga kuti, “Yehova wandaŵasidepo ŵateŵeti ŵake.” Nyengo yichoko waka yikati yajumphapo, wakapokera chakurya na vinthu vinyake kufuma ku gulu lithu. Vinthu ivi vikaŵapo chifukwa cha vyakupeleka vithu. Ŵazengezgani ŵake ŵara ŵakakondweskeka, ndipo ŵakati: “Nyengo zose Chiuta wakukovwira, ntheura nase tikukhumba kumanya vinandi vyakukhwaskana na iyo.” Ŵazengezgani ŵake 7 ŵakamba kuluta ku maungano.

13. Kasi nkharo yithu yingapeleka wuli uchindami kwa Yehova? (Salimo 96:9)

¹³ Ŵazgani Salimo 96:9. Tingamupa uchindami Yehova kwizira mu nkharo yithu. Ŵasembe awo ŵakateŵeteranga pa tempile ŵakakhumbikwiranga kuŵa ŵakutowa mwakuthupi. (Eks. 40:​30-32) Kweni padera pa kuŵa ŵakutowa mwakuthupi ŵakenerangaso kuŵa na nkharo yituŵa. (Sal. 24:​3, 4; 1 Pet. 1:​15, 16) Tikwenera kuŵikapo mtima kuvura “wunthu wakale”—izo ni nkharo zawakawaka—ndipo tivware “wunthu uphya”—icho chikung’anamura kuŵa na kaghanaghaniro na kuchita vinthu ivyo vikukolerana na mikhaliro ya Yehova. (Kol. 3:​9, 10) Na wovwiri wa Yehova, nanga ni ŵanthu awo ŵakuchita vinthu viheni chomene ŵangasintha na kuvwara wunthu uphya.

14. Kasi mukusambirako vichi ku nkhani ya Jack? (Wonaniso chithuzi.)

¹⁴ Wonani chiyelezgero cha Jack, munthu uyo wakaŵa wankhaza chomene ndipo wakachemekanga na zina lakuti Satana. Chifukwa cha milandu iyo wakapalamura, Jack wakapika chilango chakuti wakomeke. Ndipouli, apo wakalindiliranga kuti zuŵa ilo wakomekerenge likwane, Jack wakazomera kusambira Baibolo na mubali munyake uyo wakaluta kukapharazga ku jele ilo Jack wakajalirika. Nangauli wakachita vinthu viheni vinandi, kweni Jack wakavura wunthu wake wakale ndipo pamanyuma wakabatizika. Jack wakasintha chomene, mwakuti pa zuŵa ilo wakakomekeranga ŵalinda ŵanyake ŵa jele ŵakathiska masozi apo ŵakalayirananga nayo. Mulara wa ŵalinda wa pa jele ili wakati: “Jack pakwamba wakaŵa mukayidi wankhaza chomene. Kweni sono wasintha chomene.” Sabata yakulondezgapo Jack wati wakomeka, ŵabali awo ŵakalutaso ku jele ili kukapangiska maungano ŵakasangana  na mukayidi munyake uyo kakaŵa kakwamba kusangikapo pa maungano agha. Ntchivichi chikamuchiska kuti wafike pa maungano? Wakakopeka na umo Jack wakasinthira ndipo nayo wakakhumbanga kumanya icho wakwenera kuchita kuti wasope Yehova. Nadi, nkharo yithu yingapeleka uchindami kwa Adada ŵithu ŵakuchanya!—1 Pet. 2:12.

KASI CHIUTA WAZAMUTUŴISKA WULI ZINA LAKE SONOSONO APA MUNTHAZI?

15. Kasi Yehova watuŵiskenge wuli zina lake sonosono apa munthazi? (Salimo 96:​10-13)

¹⁵ Ŵazgani Salimo 96:​10-13. Mavesi ghaumaliro mu Salimo 96 ghakulongosora Yehova kuti ni Mweruzgi kweniso Themba laurunji. Kasi Yehova wazamutuŵiska wuli zina lake sonosono apa munthazi? Kwizira mu vyeruzgo vyake. Sonosono apa waparanyenge Babuloni Mukuru chifukwa cha mautesi agho wakuyowoyera zina lake lituŵa. (Chivu. 17:​5, 16; 19:​1, 2) Ŵanyake awo ŵazamuwona kuti Babuloni Mukuru wakuparanyika ŵangazakamba kusopa nase. Ndipo pa Aramagedoni, Yehova wazamuparanya charu chiheni cha Satana ichi, na kuwuskapo wose awo ŵakususkana nayo kweniso kuyowoyera mautesi zina lake. Kweni wazamuponoska wose awo ŵakumutemwa na kumupulikira ndipo ŵakunotha kumupa uchindami. (Mrk. 8:38; 2 Tes. 1:​6-10) Pamanyuma pa chiyezgo chaumaliro icho chizamuchitika para Muwuso wa Khristu wa Vyaka 1,000 wamara, Yehova wazamuŵa kuti walituŵiskirathu zina lake. (Chivu. 20:​7-10) Pa nyengo iyo, “charu chapasi chizamuzura na kumanya uchindami wa Yehova nga umo maji ghakuzuzgira nyanja.”—Hab. 2:14.

16. Kasi mwaŵikapo mtima kuchitachi? (Wonaniso chithuzi.)

¹⁶ Chizamuŵa chakukondweska chomene kuwona waliyose pa charu chapasi wakumupa Yehova uchindami uwo ukumwenelera! Kweni apo tikulindilira nyengo iyi, tikwenera kuchitapo chigaŵa chithu kuti tigwiliskire ntchito m’pata uliwose kumupa uchindami Chiuta withu. Kuti timanye kuti nkhani iyi njakuzirwa chomene, Wupu Wakulongozga wasankha lemba la Salimo 96:8 kuŵa lemba la chaka cha 2025, ilo likuti: “Pelekani kwa Yehova uchindami wakwenelera zina lake.”