NKHANI YAKUSAMBIRA 5
SUMU 108 Chitemwa cha Chiuta
Umo Tikusangira Chandulo na Chitemwa cha Yehova
“Khristu Yesu wakiza mu charu kuzakaponoska ŵakwananga.” —1 TIM. 1:15.
FUNDO YIKURU
Umo tikusangira chandulo na sembe yakuwombora kweniso umo tingalongolera kuti tikumuwonga Yehova.
1. Kasi tingachita wuli kuti timukondweskenge Yehova?
GHANAGHANIRANI kuti mukumupa munthu munyake uyo mukumutemwa chawanangwa chiwemi chomene kweniso chakovwira. Mungakhuŵara chomene usange munthu uyu wangakachisunga waka chawanangwa ichi na kuŵikakoso mahara wuwo yayi kuti wakapokera chawanangwa. Kweni mungakondwa chomene usange wangachigwiliskira ntchito makora na kulongora kuti wakuwonga chawanangwa ichi. Kasi fundo njakuti wuli? Yehova wali kupeleka Mwana wake chifukwa cha ise. Yehova wangakondwa chomene para tingalongora kuti tikuwonga chawanangwa ichi, kweniso chitemwa chake icho watilongora, icho chikamutuma kuti wapeleke sembe yakuwombora iyi.—Yoh. 3:16; Rom. 5:7, 8.
2. Kasi tidumbiskanenge vichi mu nkhani iyi?
2 Ndipouli, apo nyengo yikujumphapo tingamba kuchiwona mwakupepuka chawanangwa ichi cha sembe yakuwombora. Vingaŵa nga tachisunga waka chawanangwa cha Chiuta. Nangauli tingaŵa kuti tikukondwa nacho chawanangwa ichi, kweni tachibisa waka kwambura kuchigwiliskira ntchito. Kuti ivi vileke kutichitikira, nyengo zose tikwenera kughanaghanira vyose ivyo Chiuta na Khristu ŵali kutichitira. Nkhani iyi yitovwirenge kuchita nthena. Tidumbiskanenge umo tikusangira chandulo sono kweniso umo munthazi tingazakasangira chandulo na sembe yakuwombora iyi. Tiwonengeso umo tingalongolera kuti tikuwonga chitemwa cha Yehova, chomenechomene mu nyengo ya Chikumbusko iyi.
UMO TIKUSANGIRA CHANDULO SONO
3. Kasi ni nthowa wuli yimoza iyo tikusangira chandulo na sembe yakuwombora sono?
3 Pasono tikusanga kale chandulo na sembe yakuwombora ya Khristu. Mwachiyelezgero, chifukwa cha sembe iyi, Yehova wakutigowokera zakwananga zithu. Iyo wakukhumbikwira kuti watigowokere yayi. Ndipouli, iyo ngwakunozgeka kutigowokera. Wamasalimo wakalongora umo wakawongera chifukwa chakuti Yehova wakamugowokera. Wakimba kuti: “Chifukwa imwe, A Yehova, ndimwe muwemi, wakunozgeka kugowokera.”—Sal. 86:5; 103:3, 10-13.
4. Kasi Yehova wali kupeleka sembe yakuwombora chifukwa cha anjani? (Luka 5:32; 1 Timote 1:15)
4 Ŵanyake ŵangamba kuwona kuti mbakwenelera yayi kuti Yehova waŵagowokere. Mbunenesko nadi kuti waliyose wa ise, palije uyo ngwakwenelera kugowokereka. Mpositole Paulosi wakamanyanga fundo iyi, lekani wakati wakaŵa “wakwenelera yayi kuchemeka mpositole.” Kweni wakasazgirapo kuti: ‘Chifukwa cha lusungu lukuru lwa Chiuta lekani sono nili nthena.’ (1 Kor. 15:9, 10) Para talapa zakwananga zithu, Yehova wakutigowokera. Chifukwa wuli? Chifukwa chakuti tili ŵakwenelera yayi, kweni chifukwa chakuti wakutitemwa. Usange mukusuzgika maghanoghano chifukwa chakuti mukujiwona ŵambura kwenelera, kumbukani kuti Yehova wakapeleka sembe yakuwombora chifukwa cha ŵanthu ŵakufikapo yayi, kweni chifukwa cha ŵakwananga awo ŵang’anamuka mtima.—Ŵazgani Luka 5:32; 1 Timote 1:15.
5. Kasi walipo wa ise uyo wakwenera kujiwona kuti ngwakwenelera lusungu lwa Yehova? Longosorani.
5 Paŵavye uyo wakwenera kujiwona kuti iyo ndiyo ngwakwenelera kulongoreka lusungu na Yehova chifukwa chakuti waka wateŵetera Yehova kwa vyaka vinandi. Mbunenesko kuti Yehova wakukumbuka vyose ivyo tamuchitira. (Heb. 6:10) Kweni wakapeleka Mwana wake mwawanangwa, kuti ni malipiro yayi pakuti tikumuteŵetera. Ntheura ni mahara yayi kughanaghana kuti chifukwa chakuti tamuchitira vinandi Yehova, ndikuti tili ŵakwenelera kuti watigowokere. Usange ndivyo tikughanaghana ndikuti tikuwona kuti tikukhumbikwira sembe yakuwombora yayi.—Yaniskani na Ŵagalatiya 2:21.
6. Chifukwa wuli Paulosi wakalimbikiranga uteŵeti?
6 Paulosi wakamanyanga kuti nanga wangamuchitira vinandi wuli Yehova, kweni vingachitika kuti waleke kuŵa wakwenelera kugowokereka. Ipo chifukwa wuli pera wakalimbikiranga chomene uteŵeti? Wakalimbikiranga kuti walongore kuti ngwakwenelera kulongoreka lusungu yayi, kweni kuti walongore kuti wakuwonga Yehova chifukwa cha kumulongora lusungu lukuru. (Efe. 3:7) Nga ni Paulosi, tikwenera kulutilira kuchita uteŵeti mwamwamphu, chifukwa chakuti Yehova watilongore lusungu yayi, kweni chifukwa chakuti tikukhumba kulongora kuti tikuwonga.
7. Kasi ni nthowa wuli yinyake iyo tikusangira chandulo na sembe yakuwombora sono? (Ŵaroma 5:1; Yakobe 2:23)
7 Nthowa yinyake iyo tikusangira chandulo sono na sembe yakuwombora njakuti tingaŵa paubwezi wakukhora na Yehova. a Nga umo tikawonera mu nkhani iyo yajumpha, apo tikababikanga tikaŵa kuti tili paubwezi yayi na Chiuta. Kweni chifukwa cha sembe yakuwombora, tingaŵa “pamtende na Chiuta” na kuŵa nayo paubwezi wakukhora.—Ŵazgani Ŵaroma 5:1; Yakobe 2:23.
8. Chifukwa wuli tikwenera kuwonga Yehova chifukwa cha mwaŵi wa lurombo?
8 Wonani chinthu chimoza icho chingatovwira kuŵa paubwezi na Yehova. Chinthu ichi ni lurombo. Yehova wakupulika waka malurombo gha pa maungano ghithu pera yayi, kweni na malurombo gha muteŵeti wake waliyose payekhapayekha. Lurombo lungatovwira kuti mtima withu uŵe mu malo kweniso kuti tiŵe na mtende wa mu mtima. Kweni lurombo lukutovwiraso pa vigaŵa vinyake. Lurombo lungatovwira kukhozga ubwezi withu na Chiuta. (Sal. 65:2; Yak. 4:8; 1 Yoh. 5:14) Yesu apo wakaŵa pa charu chapasi, kanandi wakalombanga chifukwa wakamanyanga kuti Yehova wakupulika kweniso kuti lurombo lungamovwira kuŵa paubwezi wakukhora na Awiske. (Luka 5:16) Tikuwonga chomene mwaŵi wapadera uwu, chifukwa cha sembe yakuwombora ya Yesu, tingaŵa paubwezi na Yehova na kuyowoya nayo mwakufwatuka mu lurombo.
UMO TIZAMUSANGIRA CHANDULO MUNTHAZI
9. Kasi ŵateŵeti ŵa Chiuta ŵazamusanga chandulo wuli munthazi chifukwa cha sembe yakuwombora?
9 Kasi ŵateŵeti ŵa Yehova ŵakugomezgeka ŵazamusanga chandulo wuli munthazi na sembe yakuwombora? Ŵazamusanga umoyo wamuyirayira. Ŵanthu ŵanandi ŵakughanaghana kuti ivi vingachitika yayi chifukwa ŵanthu ŵali kwamba kufwa nikale chomene. Kweni khumbo la Yehova pakwamba likaŵa lakuti ŵanthu ŵakhale kwamuyirayira. Adamu walekenge kunanga, mphanyi palije uyo wakughanaghana kuti vingachitika yayi kukhala kwamuyirayira. Nangauli pasono ntchakusuzga kugomezga kuti tizamukhala kwamuyirayira, kweni ivi vizamuchitika nadi chifukwa chakuti Yehova wali kulipira mtengo wakudura chomene, uwo ni umoyo wa Mwana wake wakutemweka.—Rom. 8:32.
10. Kasi ŵakuphakazgika na ŵamberere zinyake ŵakulindilira vichi?
10 Nangauli tizamukhala kwamuyirayira munthazi, kweni nanga ni sono nthena Yehova wakukhumba kuti tighanaghanirenge vya charu chiphya. Ŵakuphakazgika ŵakulindilira mwakunweka umoyo wamuyirayira kuchanya apo ŵamuwusa lumoza na Khristu. (Chivu. 20:6) Ŵamberere zinyake ŵakulindilira mwakunweka kuzakakhala mu Paradiso pa charu chapasi umo muzamuŵavya vyakuŵinya na vitima. (Chivu. 21:3, 4) Kasi ndimwe yumoza wa ŵamberere zinyake uyo wakulindilira kuzakakhala pa charu chapasi kwamuyirayira? Thumbiko ili kuti ndapasi yayi pakuyaniska na thumbiko la umoyo wakuchanya. Taŵanthu tikalengekera kuti tikhale pa charu chapasi. Ntheura tizamuŵa ŵakukondwa chomene kukhala pa charu chapasi.
11-12. Kasi ni vitumbiko wuli ivyo tikukhazga mu Paradiso? (Wonaniso vithuzi.)
11 Ghanaghanirani umo umoyo uzamuŵira mu Paradiso. Muzamufipaso mtima yayi na matenda panji nyifwa. (Yes. 25:8; 33:24) Yehova wazamumukhorweskani nadi. Kasi muzamutemwa kuti musambire vichi? Vyasayansi, sumu, panji vyakujamburajambura? Tikukayika yayi kuti pazamukhumbikwa awo ŵakumanya kupanga mapulani, kuzenga, kweniso vyaulimi. Ndipo ŵanthu ŵazamukhumbikwiraso kuphika vyakurya, kupanga vyakugwilira ntchito, kweniso kupwelelera minda. (Yes. 35:1; 65:21) Chifukwa chakuti muzamukhala kwamuyirayira, muzamuŵa na nyengo yinandi yakusambilira luso lulilose ulo mungaghanaghanira.
12 Chizamuŵa chakukondweska chomene kupokelera ŵabali ŵithu awo ŵali kufwa. (Mil. 24:15) Ghanaghaniraniso umo muzamukondwera kusambira vinandi vyakukhwaskana na Yehova kwizira mu chilengiwa. (Sal. 104:24; Yes. 11:9) Chakuluska vyose, chizamuŵa chakukondweska chomene kusopa Yehova kwambura kumunangiraso. Kasi mungalolera kutaya vitumbiko ivi chifukwa cha “vyakukondweska vya nyengo yichoko waka vya kwananga”? (Heb. 11:25) Yayi. Vitumbiko ivi ni viwemi chomene kuluska chilichose icho tingasida mu charu ichi pasono. Kumbukani kuti tikhalirenge waka kulindilira Paradiso yayi. Paumaliro layizgo ili lizamufiskika nadi, ghazamuŵa malo ghithu ghakukhalamo zuŵa lililose. Ndipo vyose ivi vizamuchitika chifukwa chakuti Yehova wakatitemwa chomene na kupeleka Mwana wake kuzakatifwira.
Kasi ni vitumbiko wuli ivyo mukulindilira mwakunweka chomene mu Paradiso? (Wonani ndime 11-12)
LONGORANI KUTI MUKUWONGA CHITEMWA CHA YEHOVA
13. Kasi tingalongora wuli kuti tikuwonga chitemwa icho Yehova wali kutilongora? (2 Ŵakorinte 6:1)
13 Kasi tingalongora wuli tikumuwonga Yehova chifukwa cha kutipa sembe yakuwombora? Tingalongora para tikuŵika vinthu vya Ufumu pakwamba mu umoyo withu. (Mat. 6:33) Nakuti Yesu wakafwa mwakuti “awo mbamoyo ŵaleke kujikhalira ŵekha, kweni ŵakondweskenge uyo wakaŵafwira na kuwuskika.” (2 Kor. 5:15) Ntheura tikwenera yayi kuwinda chilato icho Yehova wali kutilongolera lusungu lwake lukuru.—Ŵazgani 2 Ŵakorinte 6:1.
14. Kasi tingalongora wuli kuti tikugomezga ulongozgi wa Yehova?
14 Tingalongoraso kuti tikuwonga chitemwa cha Yehova para tikumugomezga na kulondezga ulongozgi wake. Mwawuli? Para tikukhumba kupanga chakusankha, nga mpha nkhani ya masambiro panji ntchito, tikwenera kusanda ivyo Yehova wakukhumba kuti tichite. (1 Kor. 10:31; 2 Kor. 5:7) Para tikusankha vinthu chifukwa cha kupulikira Yehova, chipulikano chithu na ubwezi withu na iyo viŵenge vyakukhora. Kweniso chigomezgo chithu cha umoyo wamuyirayira chiŵenge chanadi.—Rom. 5:3-5; Yak. 2:21, 22.
15. Kasi tingalongora wuli kuti tikuwonga mu nyengo ya Chikumbusko?
15 Paliso nthowa yinyake iyo tingalongolera kuti tikuwonga chitemwa cha Yehova. Ni para mu nyengo ya Chikumbusko iyi tingachita vyose ivyo tingafiska kuti tilongore Yehova umo tikuwongera pakutipa sembe yakuwombora. Padera pakunozgekera kuzakasangikapo pa Chikumbusko, tingachemerakoso ŵanji. (1 Tim. 2:4) Mulongosolerani uyo mwamuchemerako ivyo vikuchitika pa Chikumbusko. Ŵalongorani pa jw.org mavidiyo ghakuti Chifukwa Wuli Yesu Wakafwa? kweniso Kukumbukira Nyifwa ya Yesu. Ŵalara ŵakwenera kuwoneseska kuti ŵachemerako ŵakulopwa. Ghanaghanirani chimwemwe icho chikuŵa kuchanya na pa charu chapasi usange mberere yakuzgeŵa ya Yehova yawelera ku mskambo wake! (Luka 15:4-7) Pa Chikumbusko, tiyeni tijiŵikire chilato chakuti tizakatawuzge waliyose, chomenechomene awo mbaphya panji awo ŵakizako nikale ku maungano. Tikukhumba kuti ŵazakajipulike kuti ŵapokelereka.—Rom. 12:13.
16. Chifukwa wuli tikwenera kusazgirako uteŵeti withu mu nyengo ya Chikumbusko?
16 Kasi mungasazgirako uteŵeti winu mu nyengo ya Chikumbusko? Kuchita nthena ni nthowa yiwemi chomene yakulongolera kuti tikuwonga vyose ivyo Chiuta na Khristu ŵali kutichitira. Para tikunjira chomene mu uteŵeti, tiwonengeso kuti Yehova wakutovwira chomene, ndipo paumaliro timugomezgengeso chomene. (1 Kor. 3:9) Kweniso woneseskani kuti mukulondezga ndondomeko yakuŵazga Baibolo mu nyengo ya Chikumbusko iyo yikuŵa mu kabuku ka Kusanda Malemba Zuŵa na Zuŵa kweniso mu Kabuku ka Maungano ka Uteŵeti na Umoyo Wachikhristu. Mungasankhaso kuti mavesi agha ndigho musambirenge pamwekha.
17. Kasi Yehova wakukondwa na vichi? (Wonaniso bokosi lakuti “ Nthowa Izo Mungalongolera Kuti Mukuwonga Chitemwa cha Yehova.”)
17 Mbunenesko kuti nyengo zinyake mungatondeka kulondezga masachizgo ghose agho ghali mu nkhani iyi chifukwa cha umo vinthu viliri kwa imwe. Ndipouli, kumbukani kuti Yehova wakumuyaniskani na ŵanji yayi pa ivyo mungamuchitira; iyo wakuwona ivyo vili mu mtima winu. Wakukondwa chomene para wakuwona kuti mukuwonga kufumira pasi pamtima chawanangwa chake chapachanya chomene cha sembe yakuwombora.—1 Sam. 16:7; Mrk. 12:41-44.
18. Chifukwa wuli tikuwonga Yehova Chiuta na Yesu Khristu?
18 Tikugowokereka zakwananga zithu, kuŵa paubwezi na Yehova, kweniso kuŵa na chilindizga cha umoyo wamuyirayira, chifukwa cha sembe yakuwombora. Mphanyi nyengo zose talongora kuti tikuwonga chitemwa cha Yehova, icho chikamutuma kuti watipe vitumbiko ivi. (1 Yoh. 4:19) Kweniso mphanyi talongora kuti tikumuwonga Yesu, uyo wakatitemwa chomene mwakuti wakapeleka umoyo wake chifukwa cha ise.—Yoh. 15:13.
SUMU 154 Chitemwa Chikumara Yayi
