NKHANI YAKUSAMBIRA 28
SUMU 123 Kujilambika ku Ndondomeko ya Chiuta
Kasi Mukuwumanya Uwo Ni Unenesko?
“Chinthani, mwati mwajikakilira mu chiwuno lamba wa unenesko.”—EFE. 6:14.
FUNDO YIKURU
Nkhani iyi yitovwirenge kumanya mphambano iyo yilipo pakati pa unenesko uwo tikusambira kufuma kwa Yehova kweniso mautesi ghakukhuŵilizgika na Satana na ŵakususka.
1. Kasi mukuwuwona wuli unenesko?
ŴANTHU ŵa Yehova ŵakuwutemwa chomene unenesko uwo ukufuma mu Mazgu gha Chiuta. Chipulikano chithu chikujintha pa unenesko uwu. (Rom. 10:17) Nakuti tili kukhorwa kuti Yehova wali kwambiska mpingo Wachikhristu kuŵa “ntchindamiro ya unenesko.” (1 Tim. 3:15) Ndipo tikujilambika na mtima wose ku “awo ŵakulongozga” pakati pithu, apo ŵakutisambizga unenesko wakufuma mu Baibolo na kutipa ulongozgi uwo ukukolerana na khumbo la Chiuta.—Heb. 13:17.
2. Kuyana na Yakobe 5:19, kasi ntchivichi chingatichitikira pamanyuma pakusambira unenesko?
2 Ndipouli, pamanyuma pa kusambira unenesko kweniso kuzomera kuti tilondezgenge ulongozgi wakufuma ku gulu la Chiuta, nyengo zinyake tingapuluskika nipera. (Ŵazgani Yakobe 5:19.) Satana wakukhumba chomene kuti tileke kulondezga ulongozgi wakufuma mu Baibolo kweniso ulongozgi uwo tikupokera kufuma ku gulu la Chiuta.—Efe. 4:14.
3. Chifukwa wuli tikwenera kukoleska unenesko? (Ŵaefeso 6:13, 14)
3 Ŵazgani Ŵaefeso 6:13, 14. Sonosono apa Dyabulosi wazamugwiliskira ntchito mautesi kuti wapuluske mitundu yose kususkana na Yehova. (Chivu. 16:13, 14) Kweniso tikukhazga kuti Satana waŵikengepo mtima chomene kuti wapuluske ŵanthu ŵa Yehova. (Chivu. 12:9) Lekani ntchakuzirwa chomene kuti tijisambizge kumanya mphambano pakati pa unenesko na utesi, kweniso kuti tilutilire kulondezga unenesko. (Rom. 6:17; 1 Pet. 1:22) Ichi ntchakuzirwa chomene kuti tizakapone pa suzgo yikuru.
4. Kasi tiwonenge vichi mu nkhani iyi?
4 Mu nkhani iyi tiwonenge mikhaliro yiŵiri yakukhumbikwa chomene, iyo yingatovwira kumanya unenesko wakufuma mu Baibolo na kulutilira kulondezga ulongozgi wakufuma ku gulu la Chiuta. Kufuma apo, tiwonenge masachizgo ghatatu agho tikwenera kulondezga kuti tilutilire kukoleska unenesko.
MIKHALIRO IYO NJAKUKHUMBIKWA KUTI TIMANYE UNENESKO
5. Kasi kopa Yehova kungatovwira wuli kuti timanye makora unenesko?
5 Kopa Yehova. Para tikopa Yehova mwakwenelera, timutemwenge chomene ndipo tichitenge chilichose yayi icho chingamukwiyiska. Ndise ŵakukhumbisiska kumanya mphambano pakati pa chiwemi na chiheni, unenesko na utesi, mwakuti tikondweske Yehova. (Zinth. 2:3-6; Heb. 5:14) Tikwenera yayi kopa chomene ŵanthu kuluska kutemwa Yehova, chifukwa kanandi ivyo vikukondweska ŵanthu vikukwiyiska Yehova.
6. Kasi kopa ŵanthu kukapangiska wuli mphachi 10 za mafuko gha Israyeli kubendezga unenesko?
6 Para tikopa chomene ŵanthu kuluska kopa Chiuta, tingapatukako ku unenesko. Wonani chiyelezgero cha mphachi 12 izo zikaluta kukendera charu icho Yehova wakalayizga kuti wapenge Ŵaisrayeli. Mphachi 10 zikawopa chomene Ŵakenani kuluska kutemwa Yehova. Zikaphalira Ŵaisrayeli ŵanyawo kuti: “Tingimikana nawo yayi ŵanthu aŵa chifukwa mbankhongono chomene kuluska ise.” (Maŵa. 13:27-31) Mukawonero ka ise taŵanthu, Ŵakenani ŵakaŵa ŵankhongono chomene kuluska Ŵaisrayeli. Nakuti kaunenesko kakaŵapo. Kweni kuyowoya kuti Ŵaisrayeli ŵangakathereska yayi ŵalwani ŵawo ukaŵa utesi ukuru chomene, vikaŵa nga ŵamuluwa Yehova. Mphachi 10 izi zikeneranga kuŵika mtima pa ivyo Yehova wakakhumbanga kuti Ŵaisrayeli ŵachite. Zikenerangaso kughanaghanira ivyo wakaŵa kuti waŵachitirapo kumanyuma. Zichitenge nthena zikatenge zimanyenge kuti Ŵakenani ŵakaŵavya nkhongono pakuyaniska na Yehova Chiuta wankhongonozose. Mwakupambanako na mphachi zambura chipulikano zira, Joshuwa na Kalebi ŵakakhumbanga kukondweska Yehova. Ŵakaphalira ŵanthu kuti: “Usange Yehova wakukondwa nase, wamutinjizga nadi mu charu ichi na kutipa.”—Maŵa. 14:6-9.
7. Kasi tingachita wuli kuti timopenge Yehova mwakwenelera? (Wonaniso chithuzi.)
7 Kuti tilutilire kopa Yehova, tikwenera kuŵikapo mtima kumukondweska pa chilichose icho tikusankha kuchita. (Sal. 16:8) Apo mukuŵazga nkhani za mu Baibolo, jifumbani kuti: ‘Viŵenge kuti ivi vikachitikira ine, kasi mphanyi nkhasankha kuchita wuli?’ Mwachiyelezgero, jitorani kuti mukutegherezga apo mphachi panji kuti ŵalongozgi 10 Ŵaisrayeli ŵakuyowoya lipoti lawo lambura kukhozga. Kasi mukatenge mugomezgenge lipoti ili na kwamba kopa ŵanthu, panji mukatenge mopenge yayi chifukwa mukutemwa chomene Yehova ndipo mukukhumba kumukondweska? Wumba wose wa Israyeli ukatondeka kumanya kuti Joshuwa na Kalebi ŵakayowoyanga unenesko. Ntheura ŵakataya mwaŵi wakunjira mu Charu cha Layizgano.—Maŵa. 14:10, 22, 23.
Kasi mukatenge mugomezgenge njani? (Wonani ndime 7)
8. Kasi ni mukhaliro wuli uwo tikwenera kuŵikapo mtima kuŵa nawo, ndipo chifukwa wuli?
8 Kujiyuyura. Yehova wakuvumbulira unenesko ŵanthu awo mbakujiyuyura. (Mat. 11:25) Tikajiyuyura na kuzomera kuti ŵanji ŵatisambizge unenesko. (Mil. 8:30, 31) Ndipouli, tikwenera kuŵa maso kuti tileke kuŵa ŵakujikuzga. Kujikuzga kungapangiska kuti tambe kuwona maghanoghano ghithu kuti ghakuyana waka na fundo za mu Malemba kweniso ulongozgi wakufuma ku gulu la Yehova.
9. Kasi tingachita wuli kuti tilutilire kuŵa ŵakujiyuyura?
9 Kuti tilutilire kuŵa ŵakujiyuyura, tikwenera kukumbuka kuti Yehova ni mukuru chomene kuluska ise. (Sal. 8:3, 4) Tikwenera kulomba kuti Yehova watovwire tiŵe ŵakujiyuyura kweniso tiŵe na mzimu wakusambizgika. Yehova watovwirenge kuti tiwonenge kuti maghanoghano ghake agho ghakusangika mu Baibolo kweniso agho ghakufuma ku gulu lake, ngakuzirwa kuluska maghanoghano ghithu. Apo mukuŵazga Baibolo pamwekha, wonani maukaboni agho ghakulongora kuti Yehova wakutemwa mukhaliro wa kujiyuyura na kutinkha mikhaliro nga kujikuzga, kunotha na kujitukumura. Ndipo para mwapika udindo panji uteŵeti unyake wapadera, yezgeskani chomene kuti mulutilire kuŵa ŵakujiyuyura.
UMO TINGACHITIRA KUTI TIKOLESKE UNENESKO
10. Kasi Yehova wakagwiliskirapo ntchito anjani pakupeleka ulongozgi ku ŵanthu ŵake?
10 Lutilirani kugomezga ulongozgi wakufuma ku gulu la Yehova. Mu nyengo ya Ŵaisrayeli, Yehova wakagwiliskira ntchito Mozesi kweniso kufuma apo Joshuwa kuti ŵapelekenge ulongozgi ku ŵanthu ŵake. (Josh. 1:16, 17) Ŵaisrayeli vinthu vikaŵayenderanga makora apo ŵakawonanga kuti ŵanalume aŵa ŵakwimira Yehova Chiuta. Pamanyuma pa vyaka vinandi mpingo Wachikhristu ukati wapangika, ŵapositole 12 ndiwo ŵakapelekanga ulongozgi. (Mil. 8:14, 15) Nyengo yati yajumphapo, pa gulu ili pakasazgikiraso ŵalara ŵanyake ŵa mu Yerusalemu. Chifukwa cha kulondezga ulongozgi wakufuma ku ŵanalume ŵakugomezgeka aŵa, “mipingo yikalutilira kukhozgeka mu chipulikano ndipo zuŵa lililose ŵanthu ŵakasazgikiranga mu mpingo.” (Mil. 16:4, 5) Mazuŵa ghano napo, nase tikutumbikika chomene para tikulondezga ulongozgi wakufuma ku gulu la Yehova. Kweni kasi Yehova wangajipulika wuli usange tingakana kupulikira awo waŵasankha kuti ŵatilongozgenge? Kuti tisange zgoro la fumbo ili, tiyeni tiwone ivyo vikachitika apo Ŵaisrayeli ŵakalutanga ku Charu cha Layizgano.
11. Mu nyengo ya Ŵaisrayeli, kasi ntchivichi chikachitikira awo ŵakalimbananga na Mozesi uyo Chiuta wakamusankha kuti walongozgenge ŵanthu ŵake? (Wonaniso chithuzi.)
11 Panyengo yinyake, apo Ŵaisrayeli ŵakaŵa paulendo wakuluta ku Charu cha Layizgano, ŵanalume ŵakumanyikwa ŵakamba kulimbana na Mozesi chifukwa cha udindo uwo Yehova wakamupa. Ŵakatenge: “Wumba wose ngutuŵa [Mozesi pera yayi], munthu waliyose, ndipo Yehova wali pakati pawo.” (Maŵa. 16:1-3) Nangauli ukaŵa unenesko kuti mu maso gha Chiuta “wumba wose” ukaŵa utuŵa, kweni Yehova wakasora Mozesi kuti ndiyo walongozgenge ŵanthu ŵake. (Maŵa. 16:28) Pakwimikana na Mozesi, vikaŵa nga ŵanthu ŵakugaluka aŵa ŵakwimikana na Yehova. Ŵakaŵika mtima pa ivyo Yehova wakukhumba yayi, kweni pa ivyo iwo ŵakukhumba, kuŵa na mazaza kweniso kumanyikwa. Chiuta wakaparanya wose awo ŵakambiska uchigaluka uwu, kweniso ŵanthu masauzandi ghanandi awo ŵakakolerana na wumba uwu. (Maŵa. 16:30-35, 41, 49) Mazuŵa ghano napo tili na chigomezgo chose kuti Yehova wakukondwa nawo yayi ŵanthu awo ŵakuyuyura ulongozgi uwo ukufuma ku gulu lake.
Kasi mukatenge mukhozgerenge njani? (Wonani ndime 11)
12. Chifukwa wuli tikwenera kulutilira kuligomezga gulu la Yehova?
12 Tingalutilira kuligomezga gulu la Yehova. Para pakukhumbikwa kusintha umo tikapulikiskiranga fundo yinyake ya mu Baibolo panji umo ntchito yithu ya Ufumu yikwenera kwendera, awo ŵakulongozga ŵakuchitapo kanthu mwaluŵiro na kusintha apo pakukhumbikwira kusintha. (Zinth. 4:18) Chifukwa chikuru icho ŵakuchitira nthena ntchakuti ŵakukhumba kukondweska Yehova. Ŵakuchita vyose ivyo ŵangafiska kuti ivyo ŵakusankha vikoleranenge na Mazgu gha Chiuta, agho ŵanthu ŵa Yehova wose ŵakwenera kulondezga.
13. Kasi “mazgu ghaunenesko” ni vichi, ndipo tikwenera kuchita nawo wuli?
13 ‘Lutilirani kukoleska mazgu ghaunenesko.’ (2 Tim. 1:13) “Mazgu ghaunenesko” agho ghakuyowoyeka apa ni visambizgo Vyachikhristu ivyo vikusangika mu Baibolo. (Yoh. 17:17) Pa visambizgo ivi ndipo pajintha vigomezgo vithu. Gulu la Yehova latisambizga kuti nyengo zose vigomezgo vithu vijinthenge pa unenesko. Para tikuchita nthena, titumbikikenge chomene.
14. Kasi Ŵakhristu ŵanyake ŵakaleka wuli kukoleska “mazgu ghaunenesko”?
14 Kasi chingachitika ntchivichi para tapatukako ku “mazgu ghaunenesko”? Wonani chiyelezgero ichi. Mu nyengo ya Ŵakhristu ŵakwambilira, Ŵakhristu ŵanyake ŵakathandazganga utesi wakuti zuŵa la Yehova liza. Pakwenera kuti pakaŵa kalata yinyake iyo ŵanthu ŵakawonanga nga walemba ni mpositole Paulosi iyo yikayowoyanga ivi. M’malo mwakuti ŵasande dankha usange uwu ukaŵa unenesko, Ŵakhristu ŵanyake ŵa ku Tesalonika ŵakagomezga utesi uwu na kwamba kuwuthandazga. Ŵakumbukenge ivyo mpositole Paulosi wakaŵasambizga apo ŵakaŵa lumoza mphanyi ŵakapusikika yayi. (2 Tes. 2:1-5) Paulosi wakaŵachenjezga ŵabali ŵake kuti ŵaleke kugomezga waka chilichose icho ŵapulika. Pakuŵawovwira kuti munthazi ŵaleke kupusikika, Paulosi wakamalizga kalata yake yachiŵiri ya ku Ŵatesalonika kuti: “Ine Paulosi nkhumutawuzgani, nkhulemba na woko lane, icho ntchimanyikwiro cha makalata ghane ghose, umu ndimo nkhulembera.”—2 Tes. 3:17.
15. Kasi tingajivikilira wuli ku mautesi agho ghakuwoneka nga ngaunenesko? Yowoyani chiyelezgero. (Wonaniso vithuzi.)
15 Kasi tingasambirako vichi ku mazgu gha Paulosi agho wakalembera Ŵatesalonika? Usange tapulika nkhani yinyake iyo yikukolerana yayi na ivyo tikusambira mu Baibolo panji tapulika nkhani yinyake yakuzizika, tikwenera kuchita vinthu mwavinjeru. Mu nyengo yakale ya boma la Soviet Union, ŵalwani ŵithu ŵakathandazga kalata iyo yikalongora nga kuti yafuma ku likuru lithu. Kalata iyi yikachiska ŵabali ŵanyake kuti ŵapange kagulu kakujiyimira pakekha. Ndipo kalata iyi payekha yikawonekanga nga njaunenesko. Kweni ŵabali awo ŵakaŵa ŵakugomezgeka ŵakapusikika yayi. Ŵakamanya kuti ivyo kalata iyi yikuyowoya vikukolerana yayi na ivyo ŵali kusambizgika. Mazuŵa ghano napo, ŵalwani ŵithu nyengo zinyake ŵakugwiliskira ntchito tekinoloje kuti ŵatigaŵaniske kweniso kuti ŵatitimbanizge. M’malo mwa “kusunkhunyika luŵiro maghanoghano,” tingajivikilira para tikughanaghanirapo dankha usange ivyo tikupulika panji kuŵazga vikukolerana na unenesko uwo tili kusambira.—2 Tes. 2:2; 1 Yoh. 4:1.
Mungapusikikanga yayi na nkhani zautesi izo zikuwoneka nga zaunenesko (Wonani ndime 15) a
16. Kuyana na Ŵaroma 16:17, 18, kasi tikwenera kuchita wuli usange ŵanyake ŵapatukako ku unenesko?
16 Lutilirani kukolerana na awo mbakugomezgeka kwa Yehova. Chiuta wakukhumba tiŵe ŵakukolerana apo tikumusopa. Tilutilirenge kuŵa ŵakukolerana para tikukoleska unenesko. Waliyose uyo wapatukako ku unenesko wangambiska kugaŵikana mu mpingo, ndipo Chiuta wakutichenjezga kuti ‘tipatukeko kwa iwo.’ Para tingalutilira kukolerana nawo nase tingapatukako ku unenesko.—Ŵazgani Ŵaroma 16:17, 18.
17. Kasi tikusanga vyandulo wuli para tamanya makora unenesko na kuwukoleska?
17 Para tawumanya makora unenesko na kulutilira kuwukoleska, tilutilirenge kuŵa paubwezi wakukhora na Yehova kweniso kuŵa na chipulikano chakukhora. (Efe. 4:15, 16) Tiŵenge ŵakuvikilirika ku mautesi gha Satana kweniso nkhani zambura ukaboni, ndiposo tizamuŵa ŵakuvikilirika na Yehova panyengo ya suzgo yikuru. Ntheura lutilirani kukoleska unenesko, “ndipo Chiuta wa mtende waŵenge namwe.”—Fil. 4:8, 9.
SUMU 122 Muŵe Ŵakukhora, Ŵambura Kusunkhunyika!
a MAZGU GHAKULONGOSORA CHITHUZI: Chithuzi cha mu nyengo yakale, apo ŵabali mu nyengo ya Soviet Union ŵakapokera kalata iyo yikawonekanga nga yafuma ku likuru lithu, apo yikafuma ku ŵalwani ŵithu. Mazuŵa ghano, ŵalwani ŵangagwiliskira ntchito Intaneti kuti ŵathandazge mautesi ghakukhwaskana na gulu la Yehova.
