1-2. Kasi Zadoki wakaŵa njani? (1 Midauko 12:​22, 26-28)

 MUŴE nga mukuwona wumba wa ŵanalume ŵakujumpha 340,000, wawungana pamoza kuti wimike Davide kuŵa themba la Israyeli yose. Kwa mazuŵa ghatatu wumba uwu ukaŵa ku mapiri ghakufupi na Heburoni, uko ukasekanga, kudumbiskana, kweniso kwimba mwakukondwa sumu zakulumba Yehova. (1 Mid. 12:39) Pawumba uwu pakaŵa munyamata munyake zina lake Zadoki, uyo panji ŵanthu ŵanandi ŵakamanya yayi kuti walipo. Ndipouli, Yehova wakawoneseska kuti timanye kuti Zadoki wakaŵapo. (Ŵazgani 1 Midauko 12:​22, 26-28.) Kasi Zadoki wakaŵa njani?

² Zadoki wakaŵa wasembe uyo wakateŵeteranga lumoza na Wasembe Mukuru Abiyatara. Zadoki wakaŵaso muwoni uyo wakamanyanga khumbo la Chiuta, kweniso wakapika vinjeru vyapadera. (2 Sam. 15:27) Ŵanthu ŵakizanga kwa Zadoki usange ŵakukhumba ulongozgi wavinjeru. Iyo wakaŵaso mwanalume wachikanga. Mukhaliro wake uwu ndiwo tidumbiskanenge mu nkhani iyi.

3. (a) Chifukwa wuli ŵateŵeti ŵa Yehova ŵakukhumbikwira chikanga? (b) Kasi tidumbiskanenge vichi mu nkhani iyi?

³ Mu mazuŵa ghaumaliro agha, Satana wakuwukira chomene ŵateŵeti ŵa Chiuta kuluska kumanyuma kose. (1 Pet. 5:8) Tikukhumbikwira chikanga apo tikulindilira Yehova kuti waparanye Satana kweniso charu chiheni ichi. (Sal. 31:24) Tiyeni tiwone nthowa zitatu izo tingayezgera Zadoki pa nkhani ya chikanga.

KHOZGERANI UFUMU WA CHIUTA

4. Chifukwa wuli ŵanthu ŵa Yehova ŵakukhumbikwira chikanga kuti ŵakhozgere Ufumu wa Chiuta? (Wonaniso chithuzi.)

⁴ Pakuŵa ŵanthu ŵa Yehova tikukhozgera Ufumu wa Chiuta na mtima wose, kweni kanandi kuti tichite nthena tikukhumbikwira chikanga. (Mat. 6:33) Mwachiyelezgero, mu charu chiheni ichi tikukhumbikwira chikanga kuti tichite vinthu ivyo vingakondweska Yehova, kweniso kupharazga makani ghawemi gha Ufumu. (1 Tes.  2:2) Ndipo kanandi tikukhumbikwira chikanga kuti tileke kunjilirapo pa vya charu, apo charu chikulutilira kugaŵikana. (Yoh. 18:36) Ŵanthu ŵa Yehova ŵanandi ŵakusangana na masuzgo gha vyachuma, kuchitirika nkhaza, panji kujalirika mu jele chifukwa cha kukana kunjilirapo pa vya ndyali panji kunjira usilikari.

5. Chifukwa wuli Zadoki wakakhumbikwiranga chikanga kuti wakhozgere Davide?

⁵ Zadoki wakaluta ku Heburoni, kuti wakaŵepo waka apo Davide wakimikikanga kuŵa themba yayi. Wakaluta na vyankhondo vyake ndipo wakaŵa wakunozgeka kurwa nkhondo. (1 Mid. 12:38) Wakaŵa wakukhumbisiska kuluta na Davide ku nkhondo kuvikilira Ŵaisrayeli ku ŵalwani ŵawo. Zadoki wakaŵa chinkhara yayi pakurwa nkhondo, kweni wakaluta chifukwa cha chikanga.

6. Kasi Zadoki wakasambirako vichi kwa Davide pa nkhani ya chikanga? (Salimo 138:3)

⁶ Kasi ni nkhuni uko wasembe nga Zadoki wakasambilira kuŵa wachikanga chomene? Iyo wakamanyanga ŵanalume ŵanandi ŵankhongono kweniso ŵachikanga. Tikukayika yayi kuti wakasambirako vinandi kwa iwo. Mwachiyelezgero, chikanga icho wakalongora Davide ‘pakulongozga Israyeli pankhondo zake,’ chikapangiska kuti Ŵaisrayeli wose ŵaŵe ŵakukhumbisiska kumwimika kuŵa themba. (1 Mid. 11:​1, 2) Nyengo zose Davide wakagomezganga Yehova kuti wamovwire kulimbana na ŵalwani ŵake. (Sal. 28:7; ŵazgani Salimo 138:3.) Zadoki wakasambiraso ku ŵanalume ŵachikanga nga Yehoyada na mwana wake Benaya uyo wakaŵa chinkhara pa nkhondo, kweniso ku ŵalongozgi 22 ŵamunyumba ya awiske awo ŵakaŵa ku chigaŵa cha Davide. (1 Mid. 11:​22-25; 12:​26-28) Ŵanalume wose aŵa ŵakaŵikapo mtima kuti Davide waŵe themba.

7. (a) Kasi ni viyelezgero wuli vya mazuŵa ghano ivyo tingasambirako pa nkhani ya chikanga? (b) Kuyana na vidiyo, kasi mwasambirako vichi ku chiyelezgero cha Mubali Nsilu?

⁷ Nase tingaŵa na chikanga para tikughanaghanira za ŵanthu awo ŵakakhozgera muwuso  wa Yehova mwachikanga. Themba lithu Khristu Yesu likakanirathu kunjilirapo pa ndyali za mu charu chiheni cha Satana ichi. (Mat. 4:​8-11; Yoh. 6:​14, 15) Nyengo zose Yesu wakagomezganga nkhongono zakufuma kwa Yehova. Tiliso na viyelezgero vinandi vyamazuŵa ghano, vya ŵachinyamata awo ŵakukana kuchitako ndyali kweniso kuchitako nkhondo. Mungachita makora kuŵazga nkhani zakukhwaskana na ŵachinyamata aŵa pa jw.org. a

WOVWIRANI ŴABALI ŴINU

8. Kasi mphanyengo wuli apo ŵalara ŵakukhumbikwira chikanga kuti ŵawovwire ŵabali na ŵadumbu?

⁸ Ŵanthu ŵa Yehova ŵakutemwa kovwira ŵanyawo. (2 Kor. 8:4) Ndipouli, nyengo zinyake pakukhumbikwira chikanga kuchita nthena. Mwachiyelezgero, para kwachitika nkhondo ŵalara ŵakumanya kuti ŵabali na ŵadumbu ŵakukhumbikwira kuŵakhozga na kuŵawovwira mwakuthupi kweniso mwauzimu. Chifukwa chakuti ŵakutemwa chomene mberere, ŵalara ŵakuŵika umoyo wawo pangozi kuti ŵapeleke wovwiri ku ŵabali na ŵadumbu. (Yoh. 15:​12, 13) Ndipo para ŵakuchita nthena, ŵakuyezga Zadoki pa nkhani ya chikanga.

9. Nga umo likuyowoyera lemba la 2 Samuyeli 15:​27-29, kasi Davide wakaphalira Zadoki kuchitachi? (Wonaniso chithuzi.)

⁹ Umoyo wa Davide ukaŵa pangozi. Mwana wake Abisalomu wakaŵikapo mtima kuti wamupoke ufumu. (2 Sam. 15:​12, 13) Davide wakakhumbikwiranga kuti wafumemo mwaluŵiro mu Yerusalemu! Wakaphalira ŵateŵeti ŵake kuti: “Wukani, tiyeni tichimbire pakuti palije nanga njumoza wa ise uyo waponenge kwa Abisalomu.” (2 Sam. 15:14) Apo ŵateŵeti ŵake ŵakanyamukanga, Davide wakawamo kuti munthu munyake wakukhumbikwira kuti wakhale mu Yerusalemu, kuti wamuphalirenge ivyo Abisalomu wakukhumba kuchita. Ntheura wakatuma Zadoki na ŵasembe ŵanyake kuti ŵawelere mu msumba, kuti mwachibisibisi ŵamuphalirenge ivyo  vikuchitika. (Ŵazgani 2 Samuyeli 15:​27-29.) Ŵakeneranga kuchita vinthu mwakuchenjera chomene. Ivyo Davide wakaphalira ŵasembe aŵa kuchita, vikaŵikanga umoyo wawo pangozi. Abisalomu wakaŵa wankhaza, wakujikuzga, kweniso wakujighanaghanira yekha. Ghanaghanirani waka ivyo Abisalomu wakatenge wachitirenge Zadoki na ŵasembe ŵanyake, viŵenge kuti wakamanya kuti ŵakumwenda pasi!

10. Kasi Zadoki na awo wakaŵa nawo ŵakamuvikilira wuli Davide?

¹⁰ Davide wakapempha Zadoki na mubwezi wake wakugomezgeka Hushayi kuti ŵamovwire kuti pulani yake yende. (2 Sam. 15:​32-37) Pakulondezga pulani iyi Hushayi wakaŵa nga wakukhozgera Abisalomu ndipo wakamupa ulongozgi wa umo wangawukilira Davide, ivyo vikapeleka mwaŵi wakuti Davide wanozgekere makora. Kufuma apo, Abisalomu wati wapulikira ulongozgi wake, Hushayi wakaphalira Zadoki na Abiyatara ivyo Abisalomu wachitenge. (2 Sam. 17:​8-16) Ŵanalume ŵaŵiri aŵa ŵakatumizga uthenga uwu kwa Davide. (2 Sam. 17:17) Na wovwiri wa Yehova, Zadoki na ŵasembe ŵanyake ŵakafiska kovwirapo kuti ŵavikilire umoyo wa Davide.—2 Sam. 17:​21, 22.

11. Kasi tingamuyezga wuli Zadoki pa nkhani ya chikanga para tikovwira ŵabali?

¹¹ Usange mwapempheka kovwira ŵabali panyengo izo ntchakofya kuchita nthena, kasi mungalongora wuli chikanga nga Zadoki? (1) Londezgani ulongozgi. Panyengo zakofya ntchakuzirwa chomene kuŵa ŵakukolerana. Pulikirani ulongozgi wakufuma ku ofesi yinu ya munthavi. (Heb. 13:17) Nyengo zose ŵalara ŵakwenera kuweleramo ulongozgi uwo ungaŵawovwira kunozgekera masoka kweniso ivyo ŵangachita para kwachitika soka. (1 Kor. 14:​33, 40) (2) Muŵe ŵachikanga, kweni ŵakuchenjera. (Zinth. 22:3) Pambere mundachitepo kanthu mughanaghanirengepo dankha. Kweniso muŵenge maso apo mukovwirapo. (3) Gomezgani Yehova. Kumbukani kuti Yehova wakumutemwani mose, ndipo wakukhumba imwe na  ŵabali wose muŵe ŵakuvikilirika. Ntheura wangamovwirani kuti namwe muŵe ŵakuvikilirika apo mukovwira ŵabali.

12-13. Kasi tikusambirako vichi ku ivyo vikachitikira Viktor na Vitalii? (Wonaniso chithuzi.)

¹² Wonani ivyo vikachitikira Viktor na Vitalii, ŵalara ŵaŵiri awo ŵakapelekeranga chakurya na maji ku Ŵakhristu ŵanyawo ku Ukraine. Viktor wakuti: “Tikapenja kulikose uko kungasangika chakurya. Ndipo kanandi tikapulikanga ŵanthu ŵakulasana cha kufupi na ise. Mubali munyake wakajipeleka pa kovwirapo na vyakurya ivyo wakatora mu sitoro yake. Ivyo wakachita apa vikawovwira kuti ŵapharazgi ŵanandi ŵaŵe na chakurya kwakanyengo. Apo tikapakiranga katundu mu galimoto yithu, bomba likaphulika pa mtunda wa mamita 20 pafupi na ise. Zuŵa lose nkhaŵeyelera Yehova kuti wanipe chikanga na kulutilira kovwira ŵapharazgi.”

¹³ Vitalii wakuti: “Tikakhumbikwiranga chikanga chomene. Ulendo wakwamba nkhenda maora 12. Nkhalomba Yehova nthowa yose.” Vitalii wakaŵa wachikanga, kweni wakaŵaso wakuchenjera. Iyo wakutiso: “Nkhalutilira kulomba Yehova kuti wanipe vinjeru kweniso kumanya ivyo ningafiska. Nkhendanga mu misewu iyo ŵamazaza ŵakazomerezganga. Nkhakhozgeka chomene kuwona ŵabali na ŵadumbu ŵakuchita vinthu mwakukolerana. Ŵakawuskangamo vyakujandizga mu msewu, kutolera vinthu nga chakurya, malaya, na vinyake, na kutipa ise kuti tipakire mu galimoto kweniso ŵakatipa malo ghakugona na chakurya.”

LUTILIRANI KUŴA ŴAKUGOMEZGEKA KWA YEHOVA

14. Kasi tingakhwaskika wuli usange munyake uyo tikumutemwa chomene waleka kuteŵetera Yehova?

¹⁴ Chiyezgo chimoza chakusuzga chomene icho chingatigulura nkhongono, ni usange mubwezi withu panji wamumbumba yithu waleka Yehova. (Sal. 78:40; Zinth. 24:10) Chifukwa chakuti mukatemwananga chomene chingaŵa chakusuzga kuzomerezga umo vinthu viliri. Usange vyanthena ivi vili kumuchitikiranipo, chiyelezgero cha Zadoki chingamukhozgani.

15. Chifukwa wuli Zadoki wakakhumbikwiranga chikanga kuti walutilire kuŵa wakugomezgeka kwa Yehova? (1 Mathemba 1:​5-8)

¹⁵ Zadoki wakalutilira kugomezgeka kwa Yehova apo mubwezi wake Abiyatara wakaleka kugomezgeka. Ivi vikachitika kuumaliro wa muwuso wa Davide. Apo Davide wakaŵa muchekuru chomene, mwana wake Adoniya wakakhumbanga kupoka ufumu uwo Yehova wakalayizga kuti upelekekenge kwa Solomoni. (1 Mid. 22:​9, 10) Abiyatara wakakolerana na Adoniya. (Ŵazgani 1 Mathemba 1:​5-8.) Apa Abiyatara wakalongora kuti ngwambura kugomezgeka kwa Davide pera yayi, kweniso kwa Yehova! Ghanaghanirani waka umo Zadoki wakakhuŵalira kweniso chitima icho wakaŵa nacho. Kwa vyaka vyakujumpha 40 iyo na Abiyatara ŵakateŵeteranga lumoza nga ŵasembe. (2 Sam. 8:17) Ŵakapweleleranga lumoza “likasa la Chiuta waunenesko.” (2 Sam. 15:29) Pakwamba, wose ŵaŵiri ŵakamovwira chomene Davide kuti waŵe themba ndipo ŵakachitaso vinyake vinandi.—2 Sam. 19:​11-14.

16. Kasi ntchivichi chikwenera kuti chikawovwira Zadoki kulutilira kuŵa wakugomezgeka?

¹⁶ Zadoki wakalutilira kugomezgeka kwa Yehova nangauli Abiyatara wakaleka kugomezgeka. Davide wakamukayikiranga yayi Zadoki. Vikati vyamanyikwa kuti Adoniya wakukhumba kupoka ufumu, Davide wakasankha Zadoki, Natani, na Benaya kuti ŵaphakazge Solomoni kuŵa themba. (1 Mathe. 1:​32-34) Zadoki wakwenera kuti wakakhozgeka chomene na chiyelezgero cha ŵateŵeti ŵanyake ŵa Yehova, nga Natani uyo wakaŵa wakugomezgeka kwa Yehova kweniso kwa Davide. (1 Mathe. 1:​38, 39) Solomoni wati waŵa themba “wakimika Zadoki kuŵa wasembe m’malo mwa Abiyatara.”—1 Mathe. 2:35.

17. Kasi tingamuyezga wuli Zadoki usange munthu uyo tikumutemwa chomene waleka kugomezgeka kwa Yehova?

 ¹⁷ Kasi mungamuyezga wuli Zadoki? Para munthu munyake uyo mukumutemwa chomene wasankha kuleka Yehova, imwe lutilirani kugomezgeka kwa Yehova. (Josh. 24:15) Yehova wamupaninge nkhongono na chikanga icho mukukhumbikwira. Lombani kwa Yehova ndipo lutilirani kuŵa paubwezi na ŵanthu awo mbakugomezgeka kwa iyo. Yehova wakuzirwiska kugomezgeka kwinu ndipo wazamumutumbikani.—2 Sam. 22:26.

18. Kasi mukusambirako vichi ku ivyo vikachitikira Marco na Sidse?

¹⁸ Wonani chiyelezgero cha Marco na muwoli wake Sidse, awo ŵana ŵawo ŵasungwana ŵaŵiri ŵali kuleka kuteŵetera Yehova. Marco wakuti: “Kufuma waka pa zuŵa ilo ŵana ŵako ŵababikira, ukuŵa kuti ukuŵatemwa chomene. Ukuchita chilichose kuti uŵavikilire ku ivyo vingaŵapweteka. Ntheura para ŵasankha kuleka kuteŵetera Yehova chikuŵa chakuŵinya chomene.” Iyo wakutiso: “Kweni Yehova ndiyo watovwira kuti tizizipizge. Iyo wawoneseska kuti apo ine nalopwa, muwoli wane waŵe wankhongono, apo muwoli wane walopwa, ine niŵe wankhongono.” Sidse wakusazgirapo kuti: “Patekha tikatenge tizizipizgenge yayi viŵenge kuti Yehova wakaleka kutipa nkhongono zakuzizipizgira. Nkhaŵa na chitima chomene ndipo nkhasuzgikanga na maghanoghano ghakuti ndine nkhapangiska, ntheura nkhamuphalira Yehova umo nkhajipulikiranga. Pati pajumpha nyengo yichoko waka mudumbu munyake uyo tikawonana vyaka vinandi kumanyuma, wakiza kwa ine na kunikora mu viŵegha, ndipo uku tikulaŵiskana wakati: ‘Kumbuka Sidse, suzgo ndiwe yayi!’ Yehova wanovwira kuti niŵe na chimwemwe apo nkhumuteŵetera.”

19. Kasi mwaŵikapo mtima kuchita vichi?

¹⁹ Yehova wakukhumba ŵateŵeti ŵake wose ŵaŵe na chikanga nga Zadoki. (2 Tim. 1:7) Ndipouli, iyo wakukhumba kuti tigomezgenge nkhongono zithu yayi. Kweni wakukhumba kuti timugomezgenge iyo. Ntheura usange mwasangana na vinthu ivyo vikukhumbikwira kuti mulongore chikanga, thembani Yehova. Para muchitenge nthena, mungaŵa na chigomezgo chose kuti wamupaninge chikanga nga umo vikaŵira na Zadoki.—1 Pet. 5:10.