1-2. Kasi ni nthowa wuli yiwemi chomene yakuŵazgira na kusambilira Baibolo? Pelekani chiyelezgero.

 TIYELEZGERE kuti mukukhumba kugura nyumba. Kasi mungatemwa kuwona dankha vichi pambere mundasankhe kugura? Kasi mungatemwa kuti muwone waka chithuzi cha umo nyumba yikuwonekera kumaso? Ntchakumanyikwirathu kuti mungatemwa kuti mukayiwone dankha mwekha mukati na kuwaro, kweniso kuwona mwakupwelelera chilichose chakukhwaskana na nyumba iyi. Mungatemwaso kuti mumanye umo yili kuzengekera. Ntchakuwonekerathu kuti mungakhumba kumanya vyose vyakukhwaskana na nyumba iyo mukukhumba kugura.

² Tingachitaso mwakuyana waka para tikuŵerenga kweniso kusambira Baibolo. Mulembi munyake wakayaniska uthenga wa mu Baibolo na “nyumba yikuru kweniso yitali chomene iyo yazengeka pa fawundeshoni yakukhora.” Ipo kasi tingachita wuli kuti timanye makora ivyo vili mu Baibolo? Para mungaliŵazga waka mwakuchimbilira, mbwe mumanyenge waka fundo zipusuzipusu waka ivyo ni “vinthu vyakwambilira, vya mazgu ghakupatulika gha Chiuta.” (Heb. 5:12) Nga umo mungachitira na nyumba iyo mukukhumba kugura, sambirani mwakupwelelera Baibolo kuti mulipulikiske makora. Nthowa yiwemi chomene yakusambilira Baibolo nkhumanya umo fundo zakupambanapambana za mu Baibolo zikukolerana na zinyake. Padera pakumanya waka unenesko uwo mukugomezga, ŵikanipo mtima kumanya chifukwa icho mukuwugomezgera.

3. Kasi mpositole Paulosi wakaŵachiska vichi Ŵakhristu ŵanyake, ndipo chifukwa wuli? (Ŵaefeso 3:​14-19)

³ Kuti tipulikiske makora vigaŵa vyose vya Mazgu gha Chiuta,  tikwenera kusanda mwakupwelelera fundo zakunyang’amira za mu Baibolo. Mpositole Paulosi wakachiska Ŵakhristu ŵanyake kuti ŵafwilirengepo kusambira Mazgu gha Chiuta mwakuti “ŵamanye makora uwo mbusani, utali, kutumphuka na kunyang’amira” kwa unenesko. Kuchita nthena kukaŵawovwiranga ‘kujintha misisi na kukhazikika’ mu chipulikano chawo. (Ŵazgani Ŵaefeso 3:​14-19.) Naseso tikwenera kuchita mwakuyana waka. Tiyeni tiwone umo tingachitira kuti tisambirenge Mazgu gha Chiuta mwakupwelelera kuti timanye makora ng’anamuro lake.

4. Kasi tingachita vichi kuti tisendelere kwa Yehova? Pelekani viyelezgero.

⁴ Pakuŵa Ŵakhristu, tikwenera kukhorwa waka na visambizgo vyakwambilira vya mu Baibolo yayi. Tikwenera kusambira “nanga ni vinthu vyakubisika vya Chiuta,” ndipo mzimu utuŵa wa Chiuta ungatovwira. (1 Kor. 2:​9, 10) Namwe mungachita makora kwambapo kusambira Baibolo pamwekha kuti musendelere kufupi na Yehova. Mwachiyelezgero, mungachita kafukufuku pa umo Yehova wakalongoleranga chitemwa ku ŵateŵeti ŵake mu nyengo yakale na kuwona umo wakulongolera kuti namweso wakumutemwani chomene. Mungasandaso ndondomeko iyo Yehova wakanozga ya umo Ŵaisrayeli ŵakamusoperanga na kuyaniska na ndondomeko iyo Ŵakhristu ŵakumusopera mazuŵa ghano. Nyengo zinyake mungasanda mwakupwelelera mauchimi agho Yesu wakafiska pa nyengo iyo wakaŵa pa charu chapasi.

5. Kasi yilipo nkhani yinyake iyo mungatemwa kuti mukachite kafukufuku pa sambiro la mwaŵene?

⁵ Ŵasambiri ŵanyake ŵa Baibolo ŵakafumbika vya vinthu vyakunyang’amira ivyo ŵangatemwa kuti ŵasande paŵekha mu Mazgu gha Chiuta. Mungawona vinyake mwa ivyo ŵakazgora kuti ŵangatemwa kusambira mu bokosi lakuti “ Nkhani Izo Mungasambira pa Sambiro la Mwaŵene.” Mungaŵa ŵakukondwa chomene para mungasambira nkhani izi mwakugwiliskira ntchito Watch Tower Publications Index panji Buku Lakupenjera Nkhani la Ŵakaboni ŵa Yehova. Kuchita kafukufuku pakusambira Baibolo kukhozgenge chipulikano chinu kweniso kumovwiraninge “kumumanya nadi Chiuta.” (Zinth. 2:​4, 5) Sono tiyeni tidumbiskane fundo zinyake za mu Baibolo  zakunyang’amira izo tingakhumbikwira kuchita kafukufuku.

6. (a) Longosorani chifukwa icho khumbo la Yehova nyengo zose likufiskika. (b) Chifukwa wuli tingati khumbo la Yehova ku ŵanthu na charu chapasi ‘ndamuyirayira’? (Ŵaefeso 3:11)

⁶ Mwachiyelezgero, tiyeni tiwone ivyo Baibolo likuyowoya vyakukhwaskana na khumbo la Chiuta. Yehova wali nga ni ŵanthu yayi awo ŵakusankha waka nthowa yimoza iyo yingaŵalongozgera uko ŵakukhumba kuluta. Kweni para chinthu chinyake chajandizga nthowa, ŵangatondeka kukafika uko ŵakuluta. Khumbo la Yehova lili nga ni malo agho munthu wakulutako. Yehova wangasankha uko wangakhumba kuluta panji chinthu chinyake icho wakukhumba kuchita, kweni wangagwiliskira ntchito nthowa yinyake kuti wafiske ivyo wakukhumba. Mwamwaŵi, Yehova wavumbura pachoko na pachoko ‘khumbo lake lamuyirayira’ mu Baibolo. Nakuti iyo wangatondekapo yayi kufiska chifukwa ‘wakuchita chilichose kuti wafiske khumbo lake.’ (Zinth. 16:4) Ndipo ivyo Yehova wakuchita vikukhalilira muyirayira. Kasi khumbo la Yehova ndakuti wuli, ndipo ni vinthu wuli ivyo wasintha na chilato chakuti wafiske khumbo lake?

7. Ŵanthu ŵakwamba ŵakati ŵagaluka, kasi Yehova wakasintha wuli nthowa kuti wafiske khumbo lake? (Mateyu 25:34)

⁷ Chiuta wakaphalira ŵanthu ŵakwambilira khumbo ilo wakaŵa nalo kwa iwo. Khumbo lake likaŵa lakuti ‘ŵababane, ŵandane ŵazuzge charu chapasi na kuchithereska, na kuŵa na mazaza pa vyamoyo vyose’ pa charu chapasi. (Gen. 1:28) Adamu na Eva ŵakati ŵagaluka, ŵakanjizga kwananga pa charu chapasi, kweni khumbo la Yehova likamalira papo yayi. Iyo wakasintha waka umo khumbo lake lifiskikirenge. Mwaluŵiro, wakanozga kuti wakhazikiske Ufumu kuchanya uwo uzamufiska khumbo lake la pakwamba ku ŵanthu na charu chapasi. (Ŵazgani Mateyu 25:34.) Panyengo yakwenelera, Yehova wakatuma Mwana wake wapadera pa charu chapasi kuzakasambizga ŵanthu vya Ufumu kweniso kupeleka umoyo wake kutiwombora ku kwananga na nyifwa. Kufuma apo, Yesu wakawuskikira kuchanya kuti wakaŵe Fumu ya Ufumu wa Chiuta. Kweni pachali vinthu vinandi vyakuti tighanaghanirepo vyakukhwaskana na khumbo la Chiuta.

8. (a) Kasi fundo yikuru ya mu Baibolo njakuti wuli? (b) Kuyana na Ŵaefeso 1:​8-11, kasi Yehova wakukhumbaso vichi? (Wonani chithuzi cha pa chikopi.)

⁸ Fundo yikuru ya mu Baibolo njakuti Yehova wazamutuŵiska zina lake, ndipo lizamutuŵiskika para khumbo lake kulazga ku charu chapasi lazakafiskika mwakugwiliskira ntchito Ufumu wake pasi pa Khristu. Khumbo la Yehova lingasinthika yayi. Iyo walayizga kuti vyose vifiskikenge nga umo wali kuyowoyera. (Yes. 46:​10, 11, mazgu ghamusi; Heb. 6:​17, 18) Panyengo yake, charu chizamuŵa paradiso ndipo ŵana ŵa Adamu na Eva awo ŵazamuŵa ŵarunji na ŵakufikapo, ‘ŵazamukondwa na umoyo muyirayira.’ (Sal. 22:26) Kweni ni ivi pera yayi ivyo Yehova wazamufiska. Iyo wazamovwiraso kuti ŵateŵeti ŵake wose kuchanya na charu chapasi ŵaŵe ŵakukolerana. Ndipo waliyose wazamujilambika kwa Yehova pakuŵa Muwusi wawo. (Ŵazgani Ŵaefeso 1:​8-11.) Kasi ntchakukondweska yayi kuwona umo Yehova wakufiskira khumbo lake?

9. Kasi tingamanya vinthu wuli ivyo vichitikenge kunthazi para tikuŵazga Baibolo?

⁹ Ghanaghanirani za uchimi uwo Yehova wakayowoya mu munda wa Edeni, uwo uli pa Genizesi 3:15. b Ukayowoya za vinthu ivyo viwovwirenge kufiska khumbo lake, nangauli pakeneranga kujumpha vyaka masauzandi ghanandi kuti vichitike. Vyakuchitika ivi vikasazgapo  mphapu iyo yizamufuma mwa Abrahamu, ndipo mu mphapu iyi ndimo muzamubabikira Khristu. (Gen. 22:​15-18) Pamanyuma, mu 33 C.E., Yesu wakalumika ku chitende, nga umo uchimi ukayowoyera. (Mil. 3:​13-15) Chinthu chaumaliro icho chizamuchitika icho uchimi uwu ukayowoya, nkhudinya mutu wa Satana, ndipo kwakhala vyaka vyakujumpha 1,000 kuti ivi vichitike. (Chivu. 20:​7-10) Baibolo likuvumbura vinandi vyakukhwaskana na ivyo vizamuchitika para ulwani wapakati pa charu cha Satana na gulu la Yehova wafika paheni chomene.

10. (a) Kasi ni vinthu wuli ivyo vichitikenge sonosono apa? (b) Kasi tinganozgekereska wuli mitima yithu na maghanoghano ghithu? (Wonani mazgu ghamusi.)

¹⁰ Ghanaghanirani vya vyakuchitika vyakofya ivyo Baibolo likayowoyerathu. Chakwamba, mitundu yizamuchemerezga kuti “bata na mtende!” (1 Tes. 5:​2, 3) “Mwamabuchi,” suzgo yikuru yizamwamba apo mitundu yizamuwukira visopa vyose vyautesi. (Chivu. 17:16) Kufuma apo, ‘Mwana wa munthu wazamwiza pa mabingu ghakuchanya pamoza na nkhongono na uchindami ukuru.’ (Mat. 24:30) Yesu wazamupeleka cheruzgo pa ŵanthu, ndipo wazamupatura mberere ku mbuzi. (Mat. 25:​31-33, 46) Ndipouli, Satana wazamukhalapo waka chete yayi. Chifukwa chakuti wakutinkha chomene ŵanthu ŵa Chiuta, wazamupangiska Gogi wa charu cha Magogi, uko nkhukolerana kwa mitundu, kuti wawukire ŵanthu ŵa Chiuta. (Ezek. 38:​2, 10, 11) Panyengo yinyake, ŵakuphakazgika awo ŵachali pa charu chapasi ŵazamuwunganyika na kuluta kuchanya kukaŵa pamoza na Khristu na ŵankhondo ŵake ŵakuchanya kuti ŵakarwe nkhondo ya Aramagedoni, ndipo uwu uzamuŵa umaliro wa suzgo yikuru. c (Mat. 24:31; Chivu. 16:​14, 16) Kufuma apo, Muwuso wa Khristu wa Vyaka 1,000 uzamwamba.—Chivu. 20:6.

11. Kasi chilindizga cha umoyo wamuyirayira ntchachandulo wuli kwa imwe? (Wonaniso chithuzi.)

¹¹ Sono ghanaghanirani ivyo vizamuchitika kunthazi para vyaka 1,000 vyajumpha. Baibolo likuti Mlengi withu “wali kuŵika vyamuyirayira mu mtima [withu].” (Muph. 3:11) Ghanaghanirani umo ivi vizamukhwaskira ubwezi winu na Yehova. Buku la Sendelerani kwa Yehova, pa peji 319, likuyowoya mazgu ghakukondweska agha ghakuti: “Pamanyuma pakukhala na umoyo vyaka  mahandiredi, masauzandi, mamiliyoni, ndiposo nanga ni mabiliyoni, tizamumanya vinandi vyakukhwaskana na Yehova Chiuta kuluska ivyo tikumanya sono. Kweni tizamuwona nipera kuti pachali vinthu viwemi vinandi vyakuti tisambire. Umoyo wamuyirayira uzamuŵa wang’anamuro chomene kuluska umo tingaghanaghanira ndipo uzamuŵa na vyakuchita vinandi, ndipo kusendelera kwa Yehova nyengo zose ndicho chizamuŵa chinthu chakukondweska chomene cha umoyo uwu.” Apo tikulutilira kusambira Mazgu gha Chiuta, kasi ni vichi vinyake ivyo tingaghanaghanira?

12. Kasi tingalaŵiska wuli kuchanya? Pelekani chiyelezgero.

¹² Mazgu gha Chiuta ghakutipa chithuzi cha umo vikuŵira kuŵa pamaso pa Yehova uyo wakukhala “kuchanya nkhanira.” (Yes. 33:5) Baibolo likuvumbura vinthu vyakuzizwiska vyakukhwaskana na Yehova kweniso chigaŵa cha kuchanya cha gulu lake. (Yes. 6:​1-4; Dan. 7:​9, 10; Chivu. 4:​1-6) Mwachiyelezgero, tingaŵazga vinthu vyakuzizwiska ivyo Ezekiyeli wakawona apo ‘kuchanya kukajulika ndipo wakamba kuwona mboniwoni za Chiuta.’—Ezek. 1:1.

13. Kasi ntchivichi icho imwe mukuwonga chomene pa ivyo Yesu wakuchita kuchanya, nga umo pakulongosolera pa Ŵahebere 4:​14-16?

¹³ Ghanaghaniraniso ivyo Yesu wakutichitira pasono kuchanya, pakuŵa Fumu yalusungu kweniso Wasembe Mukuru. Kwizira mwa iyo, tingasendelera ku ‘chitengo cha Chiuta uyo wali na lusungu lukuru,’ na kupempha kuti watichitire lusungu na kutovwira “panyengo yakwenelera.” (Ŵazgani Ŵahebere 4:​14-16.) Ntheura tingazomerezganga yayi kuti zuŵa lijumphepo kwambura kughanaghanirapo ivyo Yehova na Yesu ŵali kutichitira kweniso ivyo ŵakutichitira sono kuchanya. Pakuwona umo ŵakutitemwera mphanyi vyatichiska kuti tiŵikepo mtima pa mulimo wakupharazga na kusopa Yehova.—2 Kor. 5:​14, 15.

14. Kasi ntchinthu wuli chiwemi chomene icho tingachita kuti tilongore kuti tikumuwonga chomene Yehova na Yesu? (Wonaniso vithuzi.)

 ¹⁴ Nthowa yiwemi chomene iyo tingalongolera kuti tikumuwonga Chiuta withu na Mwana wake, nkhuyezgayezga kovwira ŵanji kuti nawo ŵaŵe Ŵakaboni ŵa Yehova kweniso ŵasambiri ŵa Yesu. (Mat. 28:​19, 20) Ivi ndivyo mpositole Paulosi wakachita kuti walongore kuti wakuwonga Chiuta na Khristu. Wakamanya kuti khumbo la Yehova ndakuti “ŵanthu ŵa mitundu yose ŵamanye makora unenesko na kuponoskeka.” (1 Tim. 2:​3, 4) Wakalimbikiranga chomene mu uteŵeti kuti wawovwire ŵanthu ŵanandi ‘mwakuti munthowa yiliyose waponoske ŵanyake.’—1 Kor. 9:​22, 23.

15. Kuyana na Salimo 1:​2, kasi ntchivichi chimovwiraninge kuŵa ŵakukondwa?

¹⁵ Uyo wakalemba salimo lakwamba wakalongosora kuti munthu wachimwemwe kweniso uyo chilichose icho wakuchita chikumwendera makora ni uyo “wakukondwa na dango la Yehova,” kweniso uyo ‘wakughanaghanirapo muhanya na usiku.’ (Sal. 1:​1-3) Munthu munyake uyo wakang’anamurako Baibolo zina lake Joseph Rotherham, pakuyowoyapo vya lemba ili mu buku lake lakuti Studies in the Psalms, wakayowoya kuti munthu wakwenera “kutemwa chomene ulongozgi wakufuma kwa Chiuta mwakuti wachitenge kuwupenja, kuwusambira na kughanaghanirapo.” Wakayowoyaso kuti uyo wakuŵazga Baibolo wakwenera kuwona kuti “para zuŵa lajumpha waka kwambura kuŵazga Baibolo, ndikuti zuŵa ilo lanangika pawaka.” Mungakondwa pakuŵerenga Baibolo para mukunweka na fundo zake zose kweniso para mukuwona umo fundo zake zose zikukolelerana. Ntheura munthu wakukondwa chomene para wakusambira Mazgu gha Chiuta mwakupwelelera chomene.

16. Kasi tizamudumbiskana vichi mu nkhani yakulondezgapo?

¹⁶ Fundo zakukondweska izo Yehova wakutisambizga mu Mazgu ghake ni zakusuzga chomene yayi kuzipulikiska. Mu nkhani yakulondezgapo, tizamuwona fundo yinyake yakunyang’amira. Fundo iyi njakukhwaskana na tempile likuru lauzimu la Yehova, ilo Paulosi wakalilongosora mu kalata iyo wakalembera Ŵakhristu Ŵachihebere. Mphanyi kusanda nkhani iyi kwazakatovwira kuŵa ŵakukondwa chomene.