NKHANI YAKUSAMBIRA 4
“Mzimu Ukuchitira Ukaboni”
“Mzimu ukuchitira ukaboni pamoza na mzimu withu kuti ndise ŵana ŵa Chiuta.”—ROM. 8:16.
SUMU 25 Ŵanthu Ŵapadera
CHILATO CHA NKHANI IYI *
Pa Pentekoste, Yehova wakapungulira mzimu wake utuŵa pa Ŵakhristu ŵakujumpha 120 munthowa yakuzizwiska chomene (Wonani ndime 1-2)
1-2. Kasi ntchinthu wuli chakuzizwiska icho chikachitika pa Pentekoste mu 33 C.E.?
PAKAŴA pa Sabata mulenji ku Yerusalemu. Chikaŵa chaka cha 33 C.E., pa zuŵa la Pentekoste. Ŵasambiri pafupifupi 120 ŵakawungana mu chipinda chamuchanya cha nyumba yinyake. (Mil. 1:13-15; 2:1) Pakaŵa kuti pajumpha mazuŵa ghachoko waka kufuma apo Yesu wakaŵaphalilira kuti ŵangafumangamo yayi mu Yerusalemu chifukwa ŵakaŵa kuti ŵapokerenge chawanangwa chapadera chomene. (Mil. 1:4, 5) Kasi pamanyuma chikachitika ntchivichi?
2 “Mwamabuchi mphomo yikapulikikwa kufuma kuchanya, iyo yikaŵa nga nkhuputa kwa mphepo yankhongono.” Mphomo iyi yikapulikikwa mu nyumba yose. Kufuma apo, “moto uwo ukaŵa nga ni malulimi” ukawoneka pachanya pa mitu ya ŵasambiri, ndipo wose “ŵakazuzgika na mzimu utuŵa.” (Mil. 2:2-4) Munthowa yakuzizwiska iyi, Yehova wakapungulira mzimu wake utuŵa pa ŵasambiri aŵa. (Mil. 1:8) Aŵa ŵakaŵa ŵakwamba kuphakazgika na mzimu utuŵa * na kupika chilindizga cha kukawusa na Yesu kuchanya.
KASI CHIKUCHITIKA NTCHIVICHI USANGE MUNYAKE WAPHAKAZGIKA?
3. Chifukwa wuli awo ŵakaphakazgika pa Pentekoste ŵakakayikanga yayi kuti ŵaphakazgika na mzimu utuŵa?
3 Namwe muŵenge yumoza wa ŵasambiri awo ŵakawungana mu chipinda chamuchanya, mphanyi mukaluwa yayi ivyo vikachitika pa zuŵa ili. Chinthu chinyake icho chikawonekanga nga ni lulimi lwa moto chikiza pa mutu winu, ndipo mukamba kuyowoya mu viyowoyero vyakupambanapambana. (Mil. 2:5-12) Na ukaboni uwu mukatenge mukayikenge yayi kuti mwaphakazgika nadi na mzimu utuŵa. Kweni kasi wose awo ŵakuphakazgika na mzimu utuŵa ŵakuphakazgika munthowa yakuyana kweniso pa nyengo yimoza? Yayi. Kasi tikumanya wuli?
4. Kasi Ŵakhristu ŵakwambilira wose ŵakaphakazgika nyengo yimoza? Longosorani.
4 Tiyeni tidumbiskane nkhani ya nyengo iyo munthu wangaphakazgikira. Ŵakaŵa ŵasambiri pafupifupi 120 pera yayi awo ŵakaphakazgika na mzimu utuŵa pa Pentekoste, 33 C.E. Pa zuŵa leneliri, ŵasambiri ŵanyake pafupifupi 3,000 nawo ŵakapokera mzimu utuŵa uwo Yesu wakalayizga. Ŵakaphakazgika ŵati ŵabatizika. (Mil. 2:37, 38, 41) Kweni vyaka vyakulondezgapo, Mbakhristu wose yayi awo ŵakaphakazgikanga para ŵabatizika waka. Ŵasamariya ŵakaphakazgika pati pajumpha nyengo kufuma apo ŵakabatizikira. (Mil. 8:14-17) Nakuti kuphakazgika kwa Koneliyo na ŵamunyumba yake kukaŵa kwachilendo chomene. Iwo ŵakaphakazgika pambere ŵandabatizike.—Mil. 10:44-48.
5. Kuyana na 2 Ŵakorinte 1:21, 22, kasi chikuchitika ntchivichi para munyake waphakazgika na mzimu utuŵa?
5 Tiyeni tiwoneso ivyo vikuchitika para munthu waphakazgika na mzimu utuŵa. Ŵanyake awo ŵali kuphakazgika, pakwamba chingaŵaŵira chinonono kuzomerezga kuti Yehova waŵasora. Ŵangajifumba kuti, ‘Chifukwa wuli Chiuta wasora ine?’ Kweni ŵanyake ŵakujipulika nthena yayi. Mulimose umo vingaŵira, mpositole Paulosi wakalongosora ivyo vikuchitika ku wose awo ŵaphakazgika, wakati: “Mukati mwagomezga, mukadindika * na mzimu utuŵa uwo ukalayizgika, uwo ntchikhole cha chiharo chithu.” (Efe. 1:13, 14) Ntheura Yehova wakuŵasimikizgira Ŵakhristu aŵa na mzimu wake utuŵa kuti waŵasora. Mu nthowa iyi, mzimu utuŵa “ntchikhole [panji kuti layizgo]” ilo likupika kwa iwo, kuŵasimikizgira kuti munthazi ŵazamukhala kwamuyirayira kuchanya, pa charu chapasi yayi.—Ŵazgani 2 Ŵakorinte 1:21, 22.
6. Kasi Mkhristu wakuphakazgika wakwenera kuchita wuli kuti wazakapokere njombe yake yakuchanya?
6 Kasi para Mkhristu waphakazgika ndikuti mulimose umo vingaŵira wazamupokera kale njombe yake yakuchanya? Yayi. Nangauli wangaŵa kuti wakusimikizga kuti wasoleka, kweni wakwenera kukumbuka chenjezgo lakuti: “Ŵabali, limbikirani chomene kuti kuchemeka na kusoleka kwinu kuŵe kwanadi. Pakuti usange mukulutilira kuchita vinthu ivi, muzamutondeka yayi.” (2 Pet. 1:10) Ntheura nanga Mkhristu wangaŵa kuti wasoleka panji kuti kuchemeka kuluta kuchanya, wazamupokera njombe yake pekha para walutilira kugomezgeka.—Fil. 3:12-14; Heb. 3:1; Chivu. 2:10.
KASI MUNTHU WAKUMANYA WULI KUTI WAPHAKAZGIKA?
7. Kasi ŵakuphakazgika ŵakumanya wuli kuti ŵachemekera kuchanya?
7 Kasi munthu wangamanya wuli kuti waphakazgika nadi? Zgoro lakudunjika tikulisanga mu mazgu agho Paulosi wakalembera Ŵakhristu ŵa ku Romu awo ŵakachemekanga “kuŵa ŵatuŵa.” Wakaŵaphalira kuti: “Mukapokera mzimu wa wuzga yayi, wakuchitiska wofi, kweni mukapokera mzimu wa kuzgoreka kuŵa ŵana, mzimu uwo ukutichiska kuchemerezga kuti: ‘Abba, Adada!’ Mzimu ukuchitira ukaboni pamoza na mzimu withu kuti ndise ŵana ŵa Chiuta.” (Rom. 1:7; 8:15, 16) Ntheura kwizira mu mzimu wake utuŵa, Chiuta wakuŵasimikizgira ŵakuphakazgika kuti ŵachemekera kuchanya.—1 Tes. 2:12.
8. Kasi lemba la 1 Yohane 2:20, 27 likulongora wuli kuti Ŵakhristu ŵakuphakazgika ŵakukhumbikwira kufumba munthu yayi kuti ŵasimikizge kuti mbakuphakazgika nadi?
8 Yehova wakuŵasimikizgira mu maghanoghano na mu mitima yawo wose awo ŵapokera ntchemo ya kuchanya, ndipo ŵakukayikaso yayi. (Ŵazgani 1 Yohane 2:20, 27.) Mbunenesko kuti ŵakuphakazgika ŵakukhumbikwira kusambizgika na Yehova kwizira mu mpingo wawo nga umo vikuŵira na ŵanthu wose. Kweni ŵakukhumbikwira kufumba munthu yayi kuti ŵasimikizge kuti ŵaphakazgika nadi. Yehova wakugwiliskira ntchito mzimu utuŵa uwo ngwankhongono chomene, kuŵasimikizgira kuti mbakuphakazgika nadi.
‘ŴAKUBABIKASO’
9. Nga umo pakuyowoyera pa Ŵaefeso 1:18, kasi ntchivichi chikusintha para munthu waphakazgika?
9 Ŵateŵeti ŵa Chiuta ŵanandi mazuŵa ghano vingaŵasuzga kupulikiska ivyo vikuchitika para Chiuta waphakazga munthu. Chifukwa wuli? Chifukwa ntchakuti iwo ŵandaphakazgike. Chiuta wakalenga ŵanthu kuti ŵakhalenge pa charu chapasi muyirayira, kuchanya yayi. (Gen. 1:28; Sal. 37:29) Kweni Yehova wasora ŵanthu ŵanyake kuti ŵakakhale kuchanya. Ntheura para waŵaphakazga, chigomezgo chawo na kaghanaghaniro kawo vikusintha, ndipo ŵakwamba kuŵa na chigomezgo chakuti ŵamukhala kuchanya.—Ŵazgani Ŵaefeso 1:18.
10. Kasi “kubabikaso”chikung’anamurachi? (Wonani mazgu ghamusi.)
10 Para Ŵakhristu ŵaphakazgika na mzimu utuŵa ‘ŵakubabikaso,’ panji kuti ‘ŵakubabika kufuma kuchanya.’ * Yesu wakati ntchakusuzga kulongosolera uyo wandaphakazgike umo munthu uyo “wababikaso,” panji kuti ‘kubabika na mzimu’ wakujipulikira.—Yoh. 3:3-8; mazgu ghamusi.
11. Kasi munthu wakwamba kughanaghana wuli para waphakazgika?
11 Kasi Ŵakhristu ŵakwamba kughanaghana wuli para ŵaphakazgika? Pambere Yehova wandaŵaphakazge Ŵakhristu aŵa, ŵakazirwiskanga chomene chigomezgo chawo cha kuzakakhala pa charu chapasi kwamuyirayira. Ŵakalindiliranga mwakunweka nyengo iyo Yehova wazamuwuskapo uheni wose na kuzgora charu ichi kuŵa paradiso. Panji ŵakaghanaghaniranga umo ŵazamupokelera ŵabali na ŵabwezi ŵawo pa nyengo ya chiwuka. Kweni ŵati ŵaphakazgika, kaghanaghaniro kawo kakasintha. Chifukwa wuli? Chifukwa ntchakuti ŵakaleka kukondwa na chilindizga cha kuzakakhala pa charu chapasi yayi panji kuvuka na masuzgo. Kweniso ŵakawona kuti kuzakakhala na umoyo wamuyirayira pa charu chapasi kuzamuŵa kwakuvuska yayi. M’malo mwake, Yehova wakagwiliskira ntchito mzimu wake utuŵa kusintha kaghanaghaniro kawo kweniso kuti ŵakondwenge na chilindizga chawo.
12. Kuyana na 1 Petrosi 1:3, 4, kasi ŵakuphakazgika ŵakujipulika wuli chifukwa cha chilindizga chawo?
12 Munyake uyo waphakazgika wangamba kuwona nga ngwambura kwenelera kupika mwaŵi wapadera uwu. Kweni wakujikayikira yayi kuti Yehova wamusora. M’malo mwake, wakukondwa chomene para wakughanaghanira vya chilindizga chake cha kukakhala kuchanya.—Ŵazgani 1 Petrosi 1:3, 4.
13. Kasi ŵakuphakazgika ŵakuwuwona wuli umoyo wawo wa pano pa charu chapasi?
13 Kasi ichi chikung’anamura kuti ŵakuphakazgika ŵakudokera kufwa kuti ŵalute kuchanya? Zgoro tikulisanga mu ivyo Mpositole Paulosi wakayowoya. Iyo wakayaniska thupi lawo na hema ndipo wakati: “Nakuti ise tili mu hema ili tikutampha na kunyekezgeka, chifukwa tikukhumba kulivura yayi, kweni kuti tivware linyake, mwakuti umoyo wamuyirayira umire ilo likufwa.” (2 Kor. 5:4) Ntheura tingati Ŵakhristu ŵakuphakazgika aŵa ŵavuka na umoyo wa pa charu chapasi yayi, panji kudokera kuti mphanyi ŵafwa mwaluŵiro. M’malo mwake, ŵakukondwa na umoyo ndipo nyengo zose ŵakukondwa kuteŵetera Yehova pamoza na mbumba zawo na ŵabwezi ŵawo. Ndipouli, nyengo zose ŵakughanaghanira vya chilindizga chawo cha munthazi.—1 Kor. 15:53; 2 Pet. 1:4; 1 Yoh. 3:2, 3; Chivu. 20:6.
KASI NAMWE YEHOVA WAMUPHAKAZGANI?
14. Kasi ni vinthu wuli ivyo ni ukaboni yayi wakuti munthu waphakazgika na mzimu utuŵa?
14 Panji nyengo zinyake mukujifumbanga usange mwaphakazgika na mzimu utuŵa. Para ni nthena, ghanaghaniranipo mafumbo ghakuzirwa agha: Kasi mukukhumbisiska kuchita khumbo la Yehova? Kasi mukuwona kuti mukulimbikira chomene kupharazga? Kasi mukutemwa kuŵerenga Baibolo na kusanda “vinthu vyakubisika vya Chiuta”? (1 Kor. 2:10) Kasi mukuwona kuti Yehova wakumutumbikani pa mulimo wa kupharazga? Kasi mukukhumbisiska kovwira ŵanyinu kuti ŵateŵeterenge Yehova? Kasi Yehova wali kumovwiranipo munthowa zinyake zapadera? Usange mafumbo ghose agha zgoro ndakuti enya, kasi ndikuti mwachemeka nadi kuluta kuchanya? Yayi. Chifukwa wuli? Chifukwa ntchakuti ivi vingachitikira Mkhristu waliyose, kwali ngwakuphakazgika panji yayi. Yehova wangawovwira muteŵeti wake waliyose na mzimu wake utuŵa kuchita milimo iyi, vilije kanthu kuti wali na chilindizga uli. Nakuti para mukujikayikira usange muli kuphakazgika nadi na mzimu utuŵa, ntchilongolero chakuti mundaphakazgike. Awo ŵachemeka na Yehova kuti ŵalute kuchanya, ŵakukayika yayi. Ŵakumanya kuti ŵasoleka nadi.
Yehova wakawovwira Abrahamu, Sara, Davide, na Yohane Mubatizi na mzimu wake utuŵa kuti ŵachite milimo yapadera, kweni ŵakachemekera kuchanya yayi (Wonani ndime 15-16) *
15. Kasi tikumanya wuli kuti ni wose yayi awo ŵapokera mzimu utuŵa wa Chiuta ndikuti ŵasoleka kuluta kuchanya?
15 Baibolo likuzunura ŵanalume ŵanandi ŵakugomezgeka awo ŵakapokera mzimu utuŵa, kweni ŵakaŵa na chilindizga cha kuluta kuchanya yayi. Davide wakalongozgekanga na mzimu utuŵa. (1 Sam. 16:13) Mzimu utuŵa ukamovwira kupulikiska vinthu vyakunyang’amira vya Yehova, kweniso ukamovwira kuti walembeko vigaŵa vinyake vya Baibolo. (Mrk. 12:36) Ndipouli, mpositole Petrosi wakati Davide “wakakwelera kuchanya chara.” (Mil. 2:34) Yohane Mubatizi ‘wakazuzgika na mzimu utuŵa.’ (Luka 1:13-16) Yesu wakati wandawukepo munthu mukuru kuluska Yohane, kweni pamanyuma wakati Yohane wandachemekere kuchanya. (Mat. 11:10, 11) Nangauli Yehova wakawovwira ŵanthu aŵa na mzimu wake utuŵa kuti ŵachite milimo yapadera, kweni wakaŵachemera kuchanya yayi. Kasi ndikuti ŵakaŵa ŵakugomezgeka pachoko para tingaŵayaniska na awo ŵamuwusa kuchanya? Yayi. Yehova wazamuŵawuska kuti ŵazakakhale na umoyo mu Paradiso pa charu chapasi.—Yoh. 5:28, 29; Mil. 24:15.
16. Kasi ŵateŵeti ŵanandi ŵa Chiuta mazuŵa ghano ŵakulindilira vichi?
16 Ŵateŵeti ŵanandi ŵa Chiuta mazuŵa ghano ŵalije chilindizga chakuti ŵakuluta kuchanya. Nga ni Abrahamu, Sara, Davide, Yohane Mubatizi, na ŵanyake ŵanandi awo ŵakuzunulika mu Baibolo, ŵakulindilira kuzakakhala pa charu chapasi apo ŵazamuwusika na Ufumu wa Chiuta.—Heb. 11:10.
17. Kasi mu nkhani yakulondezgapo tizamudumbiskana mafumbo wuli?
17 Mazuŵa ghano pakuti ŵakuphakazgika ŵanyake ŵachali pakati pithu, panji tingaŵa na mafumbo ghanyake. (Chivu. 12:17) Mwachiyelezgero, kasi ŵakuphakazgika ŵakwenera kujiwona wuli? Para munyake mu mpingo winu wamba kurya na kumwa vimanyikwiro pa Chikumbusko, kasi mukwenera kumuwona wuli? Ndipo kasi mukwenera kufipa mtima usange chiŵelengero cha awo ŵakuti ŵaphakazgika chikulutilira kukwera? Nkhani yakulondezgapo yizamuzgora mafumbo agha.
^ ndime 5 Kwamba pa Pentekoste 33 C.E. m’paka sono, Yehova wakuŵapa Ŵakhristu ŵanyake chilindizga chapadera chomene. Chilindizga ichi ntchakuti ŵamuwusa na Mwana wake kuchanya. Kweni kasi Ŵakhristu aŵa ŵakumanya wuli kuti ŵasoleka? Kasi chikuchitika ntchivichi usange munyake wachemekera kuchanya? Nkhani iyi yikukolerana na iyo yikaŵa mu Gongwe la Mulinda la Janyuwale 2016. Ndipo yizgorenge mafumbo ghakuzirwa agha.
^ ndime 2 MAZGU GHALONGOSOLEKA: Kuphakazgika na mzimu utuŵa: Yehova wakugwiliskira ntchito mzimu wake utuŵa kuti wasore awo ŵamuwusa na Yesu kuchanya. Na mzimu wake uwu, Chiuta wakumupirathu munthu layizgo panji kuti ‘chikhole.’ (Efe. 1:13, 14) Lekani Ŵakhristu aŵa ŵangati mzimu ‘ukuŵachitira ukaboni,’ panji ukuŵangweluska kuti njombe yawo yili kuchanya.—Rom. 8:16.
^ ndime 5 MAZGU GHALONGOSOLEKA: Chidindo. Kudindika kweneko kukuchitika para Mkhristu wakuphakazgika wakhala pachoko kufwa uku wachali wakugomezgeka panji kuzamuchitika para suzgo yikuru yili pafupi kwamba.—Efe. 4:30; Chivu. 7:2-4; wonani “Mafumbo Ghakufuma ku Ŵaŵazgi” mu Gongwe la Mulinda, la Epulero 2016.
^ ndime 10 Kuti mumanye ng’anamuro lenecho la ‘kubabikaso,’ wonani Gongwe la Mulinda, la Epulero 1, 2009, peji 3-12.
SUMU 27 Ŵana ŵa Chiuta Ŵazamuvumbukwa
^ ndime 57 MAZGU GHAKULONGOSORA CHITHUZI: Kwali tili kujalirika mu jele chifukwa cha chipulikano chithu panji ndise ŵanangwa kupharazga na kusambizga unenesko, tose tikulindilira mwakunweka kuzakakhala pa charu chapasi apo Ufumu wa Chiuta uzamutiwusa.
