1-2. Kasi mungelo wakaŵaphalira vichi ŵanakazi ku dindi la Yesu, ndipo ŵati ŵafumako, Yesu wakaŵaphalira kuti vichi?

UKAŴA mulenjilenji wa zuŵa la Nisani 16, 33 C.E. Gulu la ŵanakazi ŵakopa Chiuta likaŵa na chitima apo likalutanga ku dindi ilo ŵakasungamo Yesu. Maora ghakujumpha 36 ghakaŵa kuti ghajumphapo kufuma apo thupi la Fumu Yesu Khristu likasungikira mu dindi. Ŵati ŵafika ku dindi kuti ŵakaphake vyakununkhira thupi la Yesu, ŵakazizwa kuwona kuti mu dindi mulije kanthu. Ndipo mungelo wakaŵaphalira kuti Yesu wawuskika ku ŵakufwa. Kweniso wakaŵaphaliraso kuti: “Wadangira munthazi mwinu wakuya ku Galileya. Mwamumuwona kwenekura.”—Mat. 28:1-7; Luka 23:56; 24:10.

² Ŵanakazi ŵati ŵafumako ku dindi, Yesu wakawonekera kwa iwo na kuŵaphalira kuti: “Lutani mukaphalire ŵabali ŵane kuti ŵalute ku Galileya, ndipo kwenekura ndiko ŵamuniwona.” (Mat. 28:10) Yesu wakwenera kuti wakaŵa na ulongozgi wakuzirwa chomene wakuti waphalire ŵasambiri ŵake. Lekani wati wawuskika waka wakanozga ungano wakuti wakumane nawo.

3-4. Chifukwa wuli tingati dango ilo lili pa Mateyu 28:19, 20 likapelekeka ku ŵapositole pera yayi? (Wonani chithuzi cha pa chikopi.)

³ Ŵazgani Mateyu 28:16-20. Pa ungano uwo Yesu wakanozga, wakayowoya vya ntchito yakuzirwa chomene iyo ŵasambiri ŵake ŵakeneranga kuchita, nakuti nase tikuchita ntchito iyi mazuŵa ghano. Yesu wakati: “Ntheura, lutaninge mukazgore ŵanthu ŵa mitundu yose kuŵa ŵasambiri, . . . mukaŵasambizge kusungilira vinthu vyose ivyo namuphalirani.”

⁴ Yesu wakukhumba kuti ŵalondezgi ŵake wose ŵapharazgenge. Iyo wakaphaliranga waka ŵapositole ŵakugomezgeka 11  pera yayi kuti ndiwo ŵakwenera kuchita mulimo uwu. Kasi tikumanya wuli? Apo Yesu wakayowoyanga dango ili, pa phiri la ku Galileya pakaŵa ŵapositole ŵake pera yayi. Kumbukani kuti mungelo wakaphalira ŵanakazi kuti: “Mwamumuwona kwenekura [ku Galileya].” Ntheura ŵanakazi ŵakugomezgeka aŵa ŵakwenera kuti nawo ŵakaŵapo pa ungano uwu. Kweni paliso ukaboni unyake. Mpositole Paulosi wakati Yesu “wakawonekera ku ŵabali ŵakujumpha 500 pa nyengo yimoza.” (1 Kor. 15:6) Kasi ŵabali aŵa ŵakawungana nkhu?

5. Chifukwa wuli tikugomezga kuti lemba la 1 Ŵakorinte 15:6 likuyowoya vya ungano wa ku Galileya uwo ukuyowoyeka mu chaputara 28 cha buku la Mateyu?

⁵ Tili na vifukwa vyakupulikikwa vyakugomezgera kuti pa 1 Ŵakorinte 15:6, Paulosi wakayowoyanga za ungano wa ku Galileya uwo ukuyowoyeka mu chaputara 28 cha buku la Mateyu. Tili na vifukwa wuli? Chakwamba, ŵasambiri ŵanandi ŵa Yesu ŵakaŵa ŵa ku Galileya. Ntheura ku phiri la Galileya, ghakaŵa malo ghakwenelera kukumana na ŵanthu ŵanandi kuluska kukumana ku nyumba ya munthu ku Yerusalemu. Chachiŵiri, panyengo iyi, Yesu wakaŵa kuti wasangana nawo kale ŵapositole ŵake 11 mu nyumba ya munthu munyake ku Yerusalemu. Viŵenge kuti Yesu wakakhumbanga kuti ŵapositole ŵake pera ndiwo ŵapharazgenge na kuzgora ŵanthu kuŵa ŵasambiri, mphanyi wakaŵaphalilira ku Yerusalemu m’malo mwakuŵaphalilira ku Galileya pamoza na ŵanakazi na ŵanthu ŵanyake.—Luka 24:33, 36.

6. Kasi lemba la Mateyu 28:20 likulongora wuli kuti dango lakuzgora ŵanthu kuŵa ŵasambiri lichali kugwira ntchito mazuŵa ghano, ndipo ŵanthu ŵakulongora wuli kuti ŵakupulikira dango ili?

⁶ Wonani chifukwa chachitatu chakuzirwa chomene. Dango ilo Yesu wakayowoya likalutanga ku Ŵakhristu ŵa mu nyengo yake pera yayi. Kasi tikumanya wuli? Yesu wakamalizga na mazgu agha ku ŵalondezgi ŵake: “Ine nili namwe mazuŵa ghose m’paka umaliro wa charu ichi.” (Mat. 28:20) Nga umo Yesu wakayowoyera, ŵanthu ŵanandi mazuŵa ghano ŵakovwira ŵanthu kuŵa ŵasambiri. Ŵanthu pafupifupi 300,000 chaka chilichose ŵakuzgoka kuŵa ŵasambiri ŵa Yesu, ndipo ŵakubatizika na kuŵa Ŵakaboni ŵa Yehova. Ichi ntchakukondweska chomene.

7. Kasi sono tidumbiskanenge vichi, ndipo chifukwa wuli?

⁷ Ŵanandi awo ŵakusambira Baibolo ŵakukura mwauzimu na kubatizika. Ndipouli, ŵanyake awo tikusambira nawo, vikuwoneka kuti ŵakuchita wofi kuti ŵaŵe ŵasambiri ŵa Khristu. Ŵakutemwa kusambira, kweni ŵakukura yayi mwauzimu kuti ŵabatizike. Para muli na msambiri wa Baibolo, tikugomezga kuti mukukhumba kumovwira kuti wachitenge ivyo wakusambira na kuŵa msambiri wa Khristu. Nkhani iyi yikulongosora umo tingamovwilira msambiri withu kutemwa Yehova kweniso kuti wakure mwauzimu. Chifukwa wuli ntchakukhumbikwa kudumbiskana nkhani iyi? Chifukwa yikuŵapo nyengo apo tingakhumbikwira kuwona usange chingaŵa makora kulutilira kusambira Baibolo na munthu panji yayi.

8. Chifukwa wuli nyengo zinyake chingaŵa chakusuzga kovwira msambiri withu kutemwa Yehova?

⁸ Yehova wakukhumba kuti ŵanthu ŵamuteŵeterenge chifukwa chakuti ŵakumutemwa. Ntheura chilato chithu nkhovwira ŵasambiri ŵithu kumanya kuti Yehova wakuŵapwelelera chomene waliyose payekha kweniso wakuŵatemwa chomene. Tikwenera kuŵawovwira kuti ŵawonenge Yehova kuti ni “wiske wa mwana mulanda na muvikiliri wa vyokoro.” (Sal. 68:5) Para ŵasambiri ŵinu ŵamanya makora umo Chiuta wakuŵatemwera, chiŵenge chipusu kuti nawo ŵambe kumutemwa chomene. Ŵasambiri ŵanyake chingaŵaŵira chinonono kuwona Yehova kuti ni Dada wachitemwa chifukwa chakuti adada ŵawo ŵakuthupi ŵakaŵalongoranga yayi chitemwa. (2 Tim. 3:1, 3) Ntheura para mukusambira nawo,  didimizgani chomene vya mikhaliro ya Yehova. Wovwirani ŵasambiri ŵinu kumanya kuti Chiuta withu wachitemwa wakukhumba kuti wazakaŵape umoyo wamuyirayira ndipo ngwakunozgeka kuŵawovwira kuti ŵazakawusange. Kweni kasi tikweneraso kuchita vichi?

9-10. Kasi ni mabuku wuli agho tikwenera kusambizgira ŵanthu Baibolo, ndipo chifukwa wuli mabuku agha ngakwenelera?

⁹ Gwiliskirani ntchito buku la “Kasi Baibolo Likutisambizga Vichi?” na la “Kasi Mungachita Wuli Kuti Mukhalilire mu Chitemwa cha Chiuta?” Mabuku agha ghali kulembeka munthowa yakuti ghatovwire kuŵafika pamtima ŵasambiri ŵithu. Mwachiyelezgero, mu mutu 1 mu buku la Kasi Baibolo Likutisambizga Vichi? muli mazgoro gha mafumbo agha: Kasi Chiuta wakutipwelelera panji ngwankhaza?, Kasi Chiuta wakujipulika wuli para ŵanthu ŵakusuzgika?, na Kasi mungaŵa paubwezi na Chiuta? Wuli pakuyowoya vya buku la Mukhalilire mu Chitemwa cha Chiuta? Buku ili likovwira msambiri umo wangalondezgera fundo za mu Baibolo kweniso umo wangasendelelera kwa Yehova. Nanga vingaŵa kuti mwasambirapo kale na ŵanthu ŵanandi mabuku agha, kweni mukwenera  kunozgekera makora sambiro lililose kuti mukawovwire makora msambiri waliyose payekha.

¹⁰ Tiyelezgere kuti msambiri winu wanweka na nkhani yinyake iyo mu buku ilo mukusambizgira mulije. M’malo mwa kulekezga dankha kusambira, mungamuchiska kuti waŵazge payekha buku ilo mukusangika nkhani iyo wanweka nayo.

11. Kasi mpha nyengo wuli apo tikwenera kwamba na lurombo para tikusambizga munthu Baibolo, ndipo kasi tingamovwira wuli msambiri withu kupulikiska kuti ntchakuzirwa kuchita nthena?

¹¹ Lombani pambere mundambe kusambira Baibolo na munthu. Kuyowoya unenesko, ntchakuzirwa chomene kwamba na kujara na lurombo para tikusambizga munthu Baibolo. Tikwenera kwamba kuchita ivi mwaluŵiro panji para pajumpha waka masabata ghachoko waka kufuma apo tikambira kusambira mwakukhazikika. Tikwenera kumovwira msambiri kumanya kuti tingapulikiska Mazgu gha Chiuta para mzimu utuŵa ungatovwira. Ŵabali na ŵadumbu ŵanyake ŵakuŵazga lemba la Yakobe 1:5 kuti ŵalongosore chifukwa icho tikulombera para tikusambira na munthu Baibolo. Lemba ili likuti: “Usange yumoza wa imwe wakupeleŵera vinjeru, walombenge Chiuta.” Pamanyuma ŵakumufumba msambiri kuti, “Kasi tikwenera kuchita wuli kuti Chiuta watipe vinjeru?” Kanandi msambiri wakukolerana na fundo yakuti tikwenera kulomba.

12. Kasi msambiri winu mungamovwira wuli na lemba la Salimo 139:2-4 kuti wayowoyenge mwakufwatuka kwa Yehova mu lurombo?

¹² Sambizgani msambiri winu kulomba. Mulongosolerani kuti Yehova wakukhumba kuti timulombenge kufumira pasi pamtima. Muphalirani kuti malurombo agho tikulomba para tili kwatekha, tingamuphalira Yehova umo tikujipulikira kweniso tingamuphalira vinthu ivyo tingafwatuka yayi kuphalira munthu munyake. Kumbukani kuti Yehova wakumanya kale maghanoghano gha munthu. (Ŵazgani Salimo 139:2-4.) Tingamuchiskaso msambiri withu kuti walombenge Chiuta kuti wamovwire kusintha kaghanaghaniro kaheni kweniso kuti wamazge vizgoŵi viheni. Tiyelezgere kuti msambiri munyake wa Baibolo uyo wasambira kwa nyengo yitali, wakutemwa kuchitako maholide agho ghakukhozgera kusopa kwautesi. Wakumanya kuti ntchiheni, kweni wakuchitako vinthu vinyake vya maholide agha. Para vili nthena, muchiskani kuti wamuphalire Yehova umo wakujipulikira na kumulomba kuti wamovwire kuti watemwenge vinthu ivyo Chiuta wakuvitemwa.—Sal. 97:10.

13. (a) Chifukwa wuli msambiri winu wa Baibolo mukwenera kumuchemera mwaluŵiro ku maungano? (b) Kasi tingachita wuli kuti msambiri wafwatukenge usange wiza pa Nyumba ya Ufumu?

¹³ Muchemerani mwaluŵiro ku maungano msambiri winu. Ivyo msambiri winu wangakawona na kupulika ku maungano ghithu vingamovwira kuti wambe kuteŵetera Yehova kweniso kuti wakure mwauzimu. Mulongorani ka vidiyo ka mutu wakuti Kasi pa Nyumba ya Ufumu Pakuchitika Vichi?, ndipo muchiskani kuti mulutire lumoza ku maungano. Muphalirani kuti ndimwe ŵakunozgeka kumovwira usange wakukhumba wovwiri kuti wakafike ku maungano. Ntchakovwira chomene kuluta na ŵapharazgi ŵakupambanapambana ku sambiro linu la Baibolo. Para muchitenge nthena, msambiri winu waŵamanyenge mwaluŵiro ŵabali na ŵadumbu mu mpingo, ndipo waŵenge wakufwatuka para wiza ku maungano ghithu.

14. Kasi ntchivichi chingamovwira msambiri kuti wakure mwauzimu?

¹⁴ Chilato chithu nkhovwira msambiri withu wa Baibolo kuti wakure mwauzimu. (Efe. 4:13) Para munthu wazomera kusambira Baibolo, wanganweka kumanya vyandulo ivyo wasangenge chifukwa cha kusambira Baibolo. Usange chitemwa chake pa Yehova chamba kukura, wambenge kughanaghanira umo wangawovwilira ŵanji, kusazgapo na awo ŵali mu mpingo. (Mat. 22:37-39) Panyengo yakwenelera, muphalirani kuti tili  ŵanangwa kovwirapo pa ntchito ya Ufumu na ndalama zithu.

15. Kasi tingamovwira wuli msambiri withu wa Baibolo kuti wachitenge mwamahara para wasangana na masuzgo?

¹⁵ Sambizgani msambiri winu wa Baibolo ivyo wangachita usange wasangana na masuzgo. Tiyelezgere kuti msambiri winu wa Baibolo, uyo ni mupharazgi wambura kubatizika wamuphalirani kuti mupharazgi munyake mu mpingo wamukhuŵazga. M’malo mwa kuŵa ku chigaŵa chimoza, mungachita makora kumukumbuska ivyo Baibolo likuyowoya kuti wangachita. Wangamugowokera. Kweni usange wakuwona kuti wangasulako waka yayi wakwenera kukadumbiskana nayo mwalusungu kweniso mwachitemwa, na chilato chakuti ‘wamuwezge mubali wake.’ (Yaniskani na Mateyu 18:15.) Movwirani msambiri winu kunozgekera ivyo wangakayowoya. Mulongorani umo wangagwiliskira ntchito JW Library^® app, Buku Lakupenjera Nkhani la Ŵakaboni ŵa Yehova, na jw.org^® kuti wamanye umo wangachitira usange vyanthena vyachitika. Para mwamusambizga vinandi pambere wandabatizike, ntchakuwonekerathu kuti wangazakaŵa paubwezi wakukhora na ŵabali na ŵadumbu mu mpingo pamanyuma pakubatizika.

16. Kasi pakuŵa uwemi wuli usange tachemerako mupharazgi munyake ku sambiro lithu?

¹⁶ Ku sambiro linu mulutenge lumoza na ŵapharazgi ŵanyake mu mpingo, kweniso usange muli pa sabata yapadera lutani na mulaŵiliri wa dera. Chifukwa wuli? Chifukwa ntchakuti ŵapharazgi ŵanyake ŵangamovwira msambiri winu munthowa yakuti imwe mungafiska yayi. Tiyelezgere kuti msambiri winu wayezeska kuti waleke kukhweŵa, kweni watondeka kanandi waka. Mungachita makora kuluta ku sambiro linu na Kaboni uyo wali kutonda suzgo ili. Kaboni uyu wangapeleka wovwiri wakuzirwa chomene kwa msambiri winu. Para mwenda na mupharazgi waluso ndipo mukuwona kuti mungafwatuka yayi kuchitiska sambiro, mungachita makora kumupempha kuti ndiyo wachitiske sambiro. Msambiri wasangenge chandulo chomene para mukuchemerako ŵanji ku sambiro linu. Kumbukani kuti chilato chithu ntchakuti tovwire msambiri withu kuti wakure mwauzimu.

17-18. Kasi mukwenera kughanaghanira vichi para mukukhumba kuleka dankha kusambira na munthu Baibolo?

¹⁷ Para sambiro linu likukura yayi mwauzimu, mungachita makora kujifumba kuti, ‘Kasi nileke dankha kusambira nayo?’ Pambere mundasankhe chakuchita pa nkhani iyi, mungachita makora kughanaghanira dankha umo msambiri winu waliri. Ŵanyake ŵakukura mwaluŵiro mwauzimu apo ŵanyake yayi. Jifumbani kuti: ‘Kasi msambiri wane wakukura mwauzimu kuyana na umo vinthu viliri kwa iyo?’ ‘Kasi wali kwambapo “kusungilira,” panji kulondezga ivyo wakusambira?’ (Mat. 28:20) Nangauli vingatora nyengo kuti uyo mukusambira nayo waŵe msambiri wa Khristu, kweni wakwenera kulongora kuti wakusintha vinthu vinyake mu umoyo wake.

¹⁸ Kweni kasi mungachita wuli usange mwasambira Baibolo na munthu kwa nyengo yitali, kweni  wakulongora kuti wakuzirwiska viŵi yayi ivyo wakusambira? Tiyelezgere kuti muli kumalizga kusambira nayo buku la Baibolo Likutisambizga Vichi, panji na la Mukhalilire mu Chitemwa cha Chiuta, kweni mbwenu wandizeko ku maungano gha mpingo, nanga nkhu Chikumbusko, ndipo nyengo zinyake wakutondeska sambiro pa vifukwa vyambura kupulikikwa. Para vyaŵa nthena, mungachita makora kudumbiskana nayo mwambura kumubisa. *

19. Kasi mungayowoya vichi kwa msambiri uyo wakuzirwiska viŵi yayi ivyo wakusambira, ndipo mukwenera kughanaghanira dankha vichi?

¹⁹ Mungamba chidumbirano mwakumufumba kuti, ‘Kasi mukughanaghana kuti suzgo linu likuru ni vichi kuti muŵe yumoza wa Ŵakaboni ŵa Yehova?’ Nyengo zinyake msambiri wangazgora kuti, ‘Nkhutemwa nadi kusambira Baibolo, kweni ningaŵa yayi Kaboni wa Yehova.’ Usange ndimo wakughanaghanira uku wasambira Baibolo kwa nyengo yitali, vingaŵa makora kuleka dankha kusambira nayo. Ndipouli, nyengo zinyake msambiri winu wangamuphalirani icho chikumutondeska kukura mwauzimu. Mwachiyelezgero, wangawona kuti wangafiska yayi kupharazga nyumba na nyumba. Para mwamanya umo wakujipulikira ndipo mungamovwira makora.

20. Kasi lemba la Milimo 13:48 likutovwira wuli kumanya munthu uyo tingalutilira kusambira nayo Baibolo?

²⁰ Ntchachitima kuti ŵanyake awo tikusambira nawo Baibolo, ŵali nga Mbaisrayeli ŵa mu nyengo ya Ezekiyeli. Wonani ivyo Yehova wakaphalira Ezekiyeli vya Ŵaisrayeli aŵa. Wakati: “Wona, kwa iwo uli nga ni sumu yachitemwa, yakwimbika na mazgu ghawemi pamoza na vyakwimbira vyavingwe vyakulizgika mwaluso. Ŵazamupulika mazgu ghako kweni pazamuŵavya uyo wazamughalondezga.” (Ezek. 33:32) Nyengo zinyake chingaŵa chakusuzga kuphalira msambiri withu kuti tilekenge dankha kusambira nayo. Ndipouli, “nyengo yakukhalako yafupiskika.” (1 Kor. 7:29) M’malo mwakumalira nyengo yinandi kusambizga munthu uyo wakukura yayi mwauzimu, ntchiwemi kusanga munthu munyake uyo wangalongora kuti wali na ‘maghanoghano ghakwenelera umoyo wamuyirayira.’—Ŵazgani Milimo 13:48.

21. Kasi lemba la chaka cha 2020 ndakuti wuli, ndipo litovwirenge kuchita vichi?

²¹ Lemba la chaka cha 2020, litovwirenge kusazgirako luso lwithu pa mulimo wakupanga ŵasambiri. Lemba ili lili na mazgu agho Yesu wakayowoya pa ungano wakuzirwa chomene ku phiri la ku Galileya apo wakati: “Ntheura, lutaninge mukazgore ŵanthu . . . kuŵa ŵasambiri, mukaŵabatize.”—Mat. 28:19.