1. Chifukwa wuli ubatizo ngwakuzirwa chomene? (Wonani chithuzi chakwamba.)

ŴANTHU masawuzandi ghanandi ŵakubatizika chaka chilichose. Ŵanandi mwa ŵanthu aŵa mbachinyamata na ŵana. Ŵanandi ŵangaŵa kuti ŵali kukulira mu unenesko. Kasi ndimwe yumoza wawo? Para ni nthena, mukuwongeka chomene. Mkhristu wakwenera kubatizika kuti wazakasange umoyo.—Mat. 28:19, 20; 1 Pet. 3:21.

2. Chifukwa wuli mukwenera kopa yayi panji kuleka kujipeleka kwa Yehova?

² Nangauli munthu wakutumbikika chomene para wabatizika, kweni wakuŵaso na maudindo ghanyake. Munthowa wuli? Pa zuŵa ilo mukabatizikiranga, mukafumbika fumbo lakuti “Pasi pa sembe ya Yesu Khristu, kasi mwalapa zakwananga zinu na kujipeleka kuti muchite khumbo la Yehova?” Ndipo mukazgora kuti “Enya.” Mwati mwabatizika, muli kulongora kuti mwajipeleka kwa Yehova. Mukalayizga Yehova kuti mumutemwenge na kuŵika khumbo lake pakwamba kuluska chilichose. Ivyo mukalayizga ni nkhani yamaseŵera yayi. Kasi mukwenera kughanaghana kuti mukabudiska  kujipeleka kwa Yehova? Yayi. Palije chinthu chiwemi chomene kuluska kujiŵika mu mawoko gha Yehova. Ghanaghanirani fundo iyi. Munthu uyo wali kwa Yehova yayi wakuŵa ku chigaŵa cha Satana. Dyabulosi wakukhumba yayi kuti muzakapone. Unenesko ngwakuti Satana wangakondwa chomene para mungatondeka kuzakasanga umoyo chifukwa chakuti muli ku chigaŵa chake ndipo mwakana muwuso wa Yehova.

3. Kasi munthu wakusanga vitumbiko wuli para wajipeleka kwa Yehova?

³ Ghanaghanirani umo Yehova wamutumbikirani chifukwa chakuti muli kujipeleka kwa iyo na kubatizika. Pakuti muli kujipeleka kwa Yehova, mungayowoya na mtima wose kuti: “Yehova wali kwa ine, niwopenge chara. Kasi munthu wangachitachi kwa ine?” (Sal. 118:6) Kuŵa ku chigaŵa cha Chiuta na kumukondweska ni mwaŵi ukuru chomene.

4, 5. (a) Chifukwa wuli tingati kujipeleka ni nkhani ya waliyose payekha? (b) Ni masuzgo wuli agho Mkhristu waliyose wangasangana nagho?

⁴ Pakuti ndimwe Mkhristu wakubatizika, ubwezi winu na Yehova ukuthemba pa ŵapapi ŵinu yayi panji waliyose. Nangauli mungaŵa kuti muchali kukhala na ŵapapi ŵinu, kweni ni udindo winu kuyezgayezga kuti musange chiponosko chinu. Chifukwa wuli ntchakuzirwa kukumbuka fundo iyi? Chifukwa mukumanya yayi masuzgo agho musanganenge nagho munthazi. Mwachiyelezgero, para mukabatizika muchali ŵana, muwonenge kuti vinthu vinyake vikusintha mu thupi linu, kweniso mukumanenge na masuzgo ghanyake pa unyamata. Msungwana munyake wakalongosora kuti: “Mwana wangaleka yayi kuŵa Kaboni wa Yehova chifukwa chakuti ŵanyake ku sukulu ŵakurya keke pa zuŵa lawo lakubabikira. Kweni para vyaka vyajumphapo ndipo khumbo la kugonana lamba kukura, wakwenera kukhorwa nadi kuti ntchiwemi chomene kupulikira malango gha Yehova nyengo zose.”

⁵ Mbachinyamata pera yayi awo ŵakukumana na viyezgo vyachilendo. Awo ŵakabatizika kuti mbalara kale nawo ŵakusangana na vinthu vinandi ivyo vingayezga chipulikano chawo. Ŵangakumana na viyezgo mu nthengwa, ku ntchito, panji matenda. Unenesko ngwakuti waliyose, kwali ni mulara panji mwana, wakumanenge na masuzgo agho ghamuyezgenge usange ngwakugomezgeka kwa Yehova.—Yak. 1:12-14.

6. (a) Chifukwa wuli mukwenera kufiska ivyo mukalayizga Yehova? (b) Kasi lemba la Ŵafilipi 4:11-13 likutisambizga vichi?

⁶ Kuluwa yayi kuti mungasintha yayi ivyo mukalayizga Yehova. Para mukukumbuka fundo iyi, mulutilirenge kugomezgeka pa chilichose. Mukalayizga Yehova, uyo nimweneko wa chilengiwa chose, kuti mulutilirenge kumuteŵetera nanga ŵabwezi panji ŵapapi ŵinu ŵangaleka kumuteŵetera. (Sal. 27:10) Pa chilichose, lombani Yehova kuti wamupani nkhongono kuti mufiske ivyo mukamulayizga.—Ŵerengani Ŵafilipi 4:11-13.

7. Kasi kusanga chiponosko chinu na “kopa na kutenthema” chikung’anamurachi?

⁷ Yehova wakukhumba kuti muŵe ŵabwezi ŵake. Kweni mukwenera kulimbikira kuti mulutilire kuŵa ŵabwezi ŵake na kusanga chiponosko. Lemba la Ŵafilipi 2:12 likuti: “Lutilirani kopa na kutenthema kuti musange chiponosko chinu.” Mazgu agha ghakulongora kuti mukwenera kughanaghanira umo mungachitira kuti mulutilire kuŵa ŵabwezi ŵa Yehova, na kugomezgeka kwa iyo nanga mungasangana na masuzgo. Lekani kujigomezga chomene. Nanga mbateŵeti ŵanyake ŵa Chiuta awo ŵateŵetera nyengo yitali ŵatondeka kugomezgeka. Kasi mungachita vichi kuti musange chiponosko chinu?

8. Kasi mukwenera kuchita vichi para mukusambira Baibolo, ndipo chifukwa wuli?

⁸ Pali vinthu viŵiri ivyo vingatovwira kuti tiŵe ŵabwezi ŵa Yehova. Kutegherezga na kuyowoyeskana nayo. Kusambira Baibolo patekha ni nthowa yakwamba yakutegherezgera kwa Yehova. Fundo iyi yikung’anamura kuŵerenga na kughanaghanirapo Mazgu gha Chiuta na mabuku ghakulongosora Baibolo. Apo mukuchita nthena, kumbukani kuti kusambira Baibolo vikuyana yayi na umo ŵanthu ŵakusambilira ku sukulu. Ku sukulu, ŵanthu ŵakusungilira waka vinthu pa mtima kuti ŵakwere mayeso. Ndimo mukwenera kuchitira yayi pakusambira Baibolo. Tingayaniska kusambira Baibolo na ulendo uwo munthu waluta kuti wakafufuze na kubowozga vinthu vinyake. Pakusambira, tikwenera kuyezgayezga kuti timanye vinthu viphya vyakukhwaskana na wunthu wa Yehova. Ichi chimovwiraninge kuti musendelere kwa Chiuta, ndipo iyo wasendelerenge kwa imwe.—Yak. 4:8.

9. Kasi ni vinthu wuli ivyo vyamovwirani pakusambira pamwekha?

⁹ Gulu la Yehova latipa vinthu vinandi ivyo vingatovwira kuti tisambirenge makora Baibolo. Mwachiyelezgero, pa jw.org pa chigaŵa cha “Ŵanyamata na Ŵasungwana” pali “Vyakuchita Pakusambira Baibolo.” Chigaŵa ichi chingamovwirani kuti muchitenge ivyo mukusambira mu Baibolo. Pa jw.org paliso chigaŵa chakuti, “Kasi Baibolo Likusambizgachi? (Vyakovwira Pakusambira). Chigaŵa ichi chingamovwirani kukhorwa kuti ivyo mukugomezga ni vyaunenesko. Vigaŵa vyose ivi vingamovwirani kuti mulongosolerenge makora ŵanyinu ivyo mukugomezga. Fundo zinyake izo zingamovwirani pakusambira zili mu Galamukani ya Epulero 2009, pa mutu wakuti, “Zimene Achinyamata Amadzifunsa . . . Kodi Ndingatani Kuti Kuwerenga Baibolo Kuzindisangalatsa?” Kusambira na kughanaghanirapo vingamovwirani kuti musange chiponosko chinu.—Ŵerengani Salimo 119:105.

10. Chifukwa wuli Mkhristu wakubatizika wakwenera kulomba?

¹⁰ Para tikusambira Baibolo patekha tikutegherezga kwa Yehova, ndipo para tikulomba tikuyowoyeskana nayo. Mkhristu wakwenera yayi kulomba mwadango waka, panji kughanaghana kuti lurombo lungamovwira kuti vinthu vimwendere makora. Kweni lurombo ni nthowa iyo tikuyowoyeskerana na Mlengi withu. Yehova  wakukhumba kuti tilombenge kwa iyo. (Ŵerengani Ŵafilipi 4:6.) Para tikufipa mtima na chinthu chilichose, Baibolo likutiphalira kuti: “Katundu wako umuthwikiske Yehova.” (Sal. 55:22) Kasi mukugomezga fundo ya pa lemba ili? Ŵabali na ŵadumbu mamiliyoni ghanandi ŵawona kuti ulongozgi wa mu lemba ili waŵawovwira chomene. Namwe ungamovwirani.

11. Chifukwa wuli mukwenera kuwonga Yehova nyengo zose?

¹¹ Ntchiwemi yayi kulomba waka para tikukhumba kuti Yehova watovwire. Baibolo likuti: “Longorani kuti muli ŵakuwonga.” (Kol. 3:15) Nyengo zinyake tikuŵika chomene mahara ku masuzgo ghithu mwakuti tikuwona yayi vitumbiko ivyo tili navyo. Yezgani kuchita nthena: Zuŵa lililose ghanaghanirani vinthu vitatu ivyo mungawongera Yehova. Pamanyuma muwongani Yehova pa ivyo wamuchitirani. Msungwana munyake zina lake Abigail, uyo wakabatizika wali na vyaka 12, wakati: “Nkhuwona kuti palije uyo wakwenera kuwongeka chomene kuluska Yehova. Tikwenera kumuwonga nyengo yiliyose chifukwa cha vyawanangwa ivyo wakutipa. Munthu munyake wakayowoya kuti: Para Yehova wangati tikhale waka na vinthu ivyo tikamuwonga pakugona, kasi tingakhala na vinthu vilinga?” *

12, 13. Chifukwa wuli ntchakuzirwa kughanaghanirapo ivyo Yehova wamuchitirani?

¹² Yehova wakawovwira Fumu Davide kuti yizizipizge masuzgo. Davide wati wawona ivyo Yehova wakamuchitira, wakimba kuti: “Chetani mwe, muwone kuti Yehova ni muwemi. Ngwakukondwa munthu uyo wakubisama mwa iyo.” (Sal. 34:8) Mazgu agha ghakulongora kuti nase tikwenera kujiwonera tekha kuti Yehova ni muwemi. Para mukuŵerenga Baibolo, mabuku ghithu, na kuluta ku maungano, mukupulika umo Chiuta wakawovwilira ŵanyinu kuti ŵalutilire kugomezgeka. Vinthu ivi vikumukhozgani chomene. Kweni apo mukukura mwauzimu, mukwenera kuwona mwekha umo Yehova wamovwilirani. Kasi imwe mwachetapo kuti Yehova ni muwemi?

¹³ Taŵakhristu tose tili kuchetapo uwemi wa Yehova. Yehova ndiyo wali kutichema kuti tisendelere kwa iyo na Mwana wake. Yesu wakati: “Palije munthu uyo wangiza kwa ine kwambura kuti Adada awo ŵakanituma ŵamuguza.” (Yoh. 6:44) Kasi mukujipulika kuti ni Yehova wali kumuguzani? Nyengo zinyake ŵachinyamata ŵangaghanaghana kuti, ‘Yehova wakaguza ŵapapi ŵane, ndipo ine nkhulondezga waka.’ Kweni mukati mwajipeleka kwa Yehova na kubatizika, mukalongora kuti muli paubwezi na iyo. Sono Yehova wakumumanyani. Baibolo likuti: “Usange munthu wakutemwa Chiuta, uyu ndiyo wakumanyikwa na Chiuta.” (1 Kor. 8:3) Nyengo zose muwonenge kuti ivyo mukuchita mu gulu la Yehova ni vyakuzirwa chomene ndipo muwongenge.

14, 15. Kasi tikukhozga wuli chipulikano para tikupharazga?

¹⁴ Nthowa yinyake iyo mungachetera uwemi wa Yehova nkhuphalirako ŵanyinu ivyo mukugomezga. Mungapharazga uko kukusangika ŵanthu ŵanandi kweniso ku sukulu. Ŵachinyamata ŵanyake vikuŵasuzga kupharazgira ŵanyawo ku sukulu. Mungapulikiska chifukwa chake. Ŵakumanya yayi umo ŵanyawo ŵachitirenge para ŵaŵapharazgira. Chingaŵa chakusuzga chomene kupharazgira gulu la ŵanthu kuluska kudumbiskana na munthu yumoza uyo mukusambira nayo sukulu. Kasi ntchivichi chingamovwirani kuti mupharazgenge makora?

¹⁵ Chakwamba, jifumbani chifukwa icho mukugomezgera ivyo mukusambira. Kasi vyakovwira  pakusambira ivyo vili pa jw.org vilimo mu chiyowoyero chinu? Para mukumanya makora yayi, sangani nyengo kuti mufufuze. Chigaŵa ichi chili kupangika kuti chimovwirani kughanaghanirapo ivyo mukugomezga, chifukwa icho mukugomezgera, kweniso umo mungalongosolera ŵanyinu ivyo mukugomezga. Para mwakhorwa nadi na ivyo mukusambira ndipo mwanozgekera makora, mukhukenge kupharazga zina la Yehova.—Yer. 20:8, 9.

16. Ntchivichi chingamovwirani kuti muyowoyenge mwachikanga ivyo mukugomezga?

¹⁶ Nangauli munganozgekera makora, kweni nyengo zinyake mungachita wofi kuphalirako ŵanyinu ivyo mukugomezga. Mudumbu munyake wa vyaka 18, uyo wakabatizika na vyaka 13 wakati: “Nkhumanya ivyo nkhugomezga, kweni nyengo zinyake vikunisuzga kuti nilongosore makora.” Kasi wakuchita wuli na suzgo ili? Iyo wakati: “Nkhuyezgayezga kuti niyowoyenge nawo mwakuchezga waka. Awo nkhusambira nawo ŵakuyowoya mwakufwatuka ivyo ŵakuchita. Nane nkhuwona kuti nkhwenera kuchita nthena. Para tikuchezga, nyengo zinyake nkhuyowoya waka kuti ‘zuŵa linyake nkhasambizganga munthu Baibolo ndipo . . . ’ Mbwe nkhwamba nkhani iyo nkhukhumba kuyowoya. Nangauli nkhuyowoya fundo ya mu Baibolo yayi, kweni kanandi ŵanyake ŵakukhumba kumanya umo nkhuchitira para nkhusambizga ŵanthu Baibolo. Nyengo zinyake ŵakufumba mafumbo. Para nachita nthena, chikuŵa chipusu kupharazgira ŵanthu. Ndipo pamanyuma nkhujipulika makora.”

17. Kasi ntchivichi chingamovwirani kuti muyowoyenge makora ivyo mukugomezga?

¹⁷ Para ŵanthu ŵawona kuti mukuŵaghanaghanira kweniso mukuŵachindika, nawo ŵamuchindikaninge. Olivia uyo wali na vyaka 17 ndipo wakabatizika wachali muchoko, wakayowoya kuti: “Nyengo zose nkhawopanga kuti para ningamba kuyowoya vya Baibolo, ŵanthu ŵaniwonenge kuti nili wakusuzga.” Pamanyuma wakamba kughanaghana makora. M’malo mwa kuŵika chomene mahara ku ivyo vingachitika, Olivia wakaghanaghana kuti: “Ŵachinyamata ŵanandi ŵakumanya chilichose yayi chakukhwaskana na Ŵakaboni ŵa Yehova. Ŵakumanya waka kuti ise tili Ŵakaboni. Ivyo ise tikuchita ndivyo vingaŵapangiska kuti ŵategherezge uthenga withu panji yayi. Wuli usange tikuchita soni panji vikutisuzga kuyowoya ivyo tikugomezga? Wuli usange tikuyowoya mwakupora? Iwo ŵangawona kuti tikuchita soni na ivyo tikugomezga. Ŵangamba kuyuyura vigomezgo vithu. Kweni para tikuyowoya mwakufwatuka ndiposo na mtima wose na kuleka kuchita soni, ŵatichindikenge.”

18. Kasi mukwenera kuchita wuli kuti musange chiponosko chinu?

¹⁸ Nga umo tawonera, ni nkhani yikuru kuti musange chiponosko chinu. Mukwenera kuŵerenga Mazgu gha Chiuta na kughanaghanirapo, kulomba kwa Yehova, kweniso kughanaghanira umo Yehova wamutumbikirani pamwekha. Para muchitenge ivi, muwonenge kuti ni mwaŵi ukuru chomene kuŵa ŵabwezi ŵa Yehova. Pamanyuma mukhukenge kuyowoya ivyo mukugomezga.—Ŵerengani Salimo 73:28.

19. Chifukwa wuli mukwenera kulimbikira kuti musange chiponosko chinu?

¹⁹ Yesu wakati: “Usange munthu wakukhumba kunilondezga, wajipate na kunyamura khuni lake lakusuzgikirapo ndipo walutilire kunilondezga.” (Mat. 16:24) Kuti Mkhristu walondezge Yesu, wakwenera kujipeleka kwa Yehova na kubatizika. Ivi ndivyo Mkhristu waliyose wakwenera kuchita. Para munthu wachita nthena, watumbikikenge sono kweniso wazamusanga umoyo wamuyirayira mu charu chiphya. Ntheura chitani chilichose icho mungafiska kuti musange chiponosko chinu.