Kasi muli kuŵerengapo magazini gha Gongwe la Mulinda ghasonosono apa? Yezgani kuzgora mafumbo agha:

Kasi ni fundo wuli za mu Malemba izo zikulongora kuti Chiuta wakutilengera chitima?

Apo Ŵaisrayeli ŵakaŵa ŵazga ku Eguputo, Chiuta wakamanyanga masuzgo ghawo ndipo vikamuŵinya. (Eks. 3:7; Yes. 63:9) Tili kulengeka mu chikozgo cha Chiuta, ndipo nase tingalengera ŵanji chitima. Chiuta wakutilengera chitima nanga ni para tingajiwona nga kuti tili ŵakwenelera yayi kuti watitemwe.—wp18.3, pp. 8-9.

Kasi visambizgo vya Yesu vikovwira wuli ŵanthu kuti ŵamazge sankho?

Ŵayuda ŵanandi mu nyengo ya Yesu ŵakaŵa na sankho. Khristu wakadidimizga kukhumbikwa kwa kujiyuyura na kuleka kujikuzga chifukwa cha fuko. Wakachiska ŵalondezgi ŵake kuti ŵawonenge ŵanyawo kuti mbabali.—w18.06, pp. 9-10.

Kasi tikusambirapo vichi pa chifukwa icho Chiuta wakazomerezgera yayi kuti Mozesi wakanjire mu Charu cha Layizgano?

Mozesi wakaŵa paubwezi wakukhora na Yehova. (Doto. 34:10) Kuumaliro wa ulendo wawo wa vyaka 40 apo ŵakaŵa mu mapopa, ŵanthu ŵakadandawuraso kachiŵiri vya kusoŵa kwa maji. Chiuta wakaphalira Mozesi kuti wayowoye ku Jalawe. Kweni, Mozesi wakatimba jalawe. Yehova wakwenera kuti wakakwiya chifukwa chakuti Mozesi wakalondezga yayi ulongozgi wake panji chifukwa chakuti Mozesi wakapeleka yayi uchindami kwa Chiuta uyo wakachita munthondwe. (Maŵa. 20:6-12) Ichi chikutisambizga kuti ntchakuzirwa kupulikira Yehova na kumupa uchindami.—w18.07, pp. 13-14.

Chifukwa wuli tingabudiska usange tingeruzga kuyana na kawonekero ka kuwaro?

Pali vigaŵa vitatu ivyo vikupangiska ŵanandi kuti ŵeruzgenge kuyana na kawonekero ka kuwaro. Vigaŵa ivi ni mtundu panji fuko la munthu, kasangiro ka munthu, na msinkhu panji kuti vyaka vyake. Ntchakuzirwa chomene kuti tiwonenge ŵanji nga umo Chiuta wakuŵawonera. Iyo wakutemwera yayi. (Mil. 10:34, 35)—w18.08, pp. 8-12.

Kasi ni nthowa wuli zinyake izo Ŵakhristu ŵachekuru ŵangawovwilira ŵanji?

Mkhristu muchekuru uyo uteŵeti wake uli kusintha wachali wakuzirwa kwa Chiuta ndipo wangachita vinandi kuti wawovwire ŵanji. Wangapharazgira ŵafumu panji ŵawoli ŵambura kugomezga, kovwira ŵakulopwa, kuchitiska masambiro gha Baibolo, ndiposo kusazgirako uteŵeti wake.—w18.09, pp. 8-11.

Ŵakhristu ŵali na vinthu wuli ivyo ŵakusambizgira ŵanthu Baibolo?

Ŵali na makadi ndiposo tumapepara twakuchemera ŵanthu ku vyakuchitika vyapadera. Ŵaliso na mathirakiti 8, magazini gha Gongwe la Mulinda na Wukani!, mabuku ghaŵiri ghakusambizgira ŵanthu Baibolo, ndiposo mavidiyo ghanayi ghakovwira chomene, kusazgapo vidiyo ya mutu wakuti Chifukwa Wuli Mukwenera Kusambira Baibolo?—w18.10, p. 16.

Kasi Mkhristu ‘wangagura wuli unenesko,’ nga umo pakuyowoyera pa Zintharika 23:23?

Tikupeleka ndalama yayi kuti tigure unenesko. Kweni, tikukhumbikwira nyengo na kufwilirapo chomene kuti tiwugure.—w18.11, p. 4.

Kasi tingasambirako vichi kwa Hoseya pa umo wakachitira na muwoli wake Gomeri?

Gomeri wakachita uleŵi mwakuwerezgawerezga, kweni Hoseya wakamugowokera na kulutilira kukhala nayo mu nthengwa. Usange Mkhristu wachita uleŵi, uyo wandabude wangamugowokera munyake. Para wayambaso kugonana na uyo wabuda, mbwe wangaŵaso na chifukwa cha mu Malemba yayi cha kumazgira nthengwa.—w18.12, p. 13.