Dango la pa Dotoronome 22:25-27 chilato chake chikuru ntchakuti litiphalire kuti mwanalume ndiyo ngwakubuda yayi, chifukwa pa lemba ili mwanalume ngwakubuda kale. Kweni dango ili likuyowoya za mwanakazi kuti ngwambura kubuda. Wonani ivyo nkhani yose yikuyowoya.

Mavesi ghakumasinda ghakuyowoya za mwanalume uyo wakagona mwali wakujalirika “mu msumba.” Mwanalume wakaŵa na mulandu chifukwa chakuti mwanakazi uyo wajalirika ŵakamuwonanga nga kuti ngwakutengwa. Kweni wuli pakuyowoya za mwanakazi? “Wakachemerezga yayi mu msumba.” Wachemerezgenge, ŵanji ŵakatenge ŵapulikenge ndipo ŵakatenge ŵamuvikilirenge. Kweni pakuti wakachemerezga yayi, ndikuti nayo wakachita uleŵi. Ntheura wose ŵakaŵanga na mulandu.—Doto. 22:23, 24.

Kweni pa mavesi ghakulondezgapo, Dango likuyowoya fundo yinyake, likuti: “Kweni usange mwanalume waluta ku thondo na kusanga mwali wakujalirika, ndipo wamuvwandamira na kugona nayo, mwanalume uyo wafwe yekha. Msungwana mumuleke waka chifukwa wandachite kwananga kwakwenelera nyifwa. Ivyo vyachitika apa vikuyana waka na para munthu wawukira munyake na kumukoma. Chifukwa chakuti mwanalume uyu wakasanga mwali uyo ku thondo, ndipo mwali wakachemerezga, kweni pakaŵavya munthu wakuti wamuthaske.”—Doto. 22:25-27.

Pa nkhani iyi, ŵeruzgi ŵakamugomezganga mwanakazi. Chifukwa wuli? Chifukwa ntchakuti ŵakawonanga kuti munthu uyu wakwenera kuti “wakachemerezga,” kweni pakaŵavya wakumuponoska. Ntheura wakaŵa kuti wandachite uleŵi. Ndipouli, mwanalume wakaŵanga na milandu yiŵiri, wakukolelera na wa uleŵi chifukwa wakachita ‘kumuvwandamira na kugona nayo’ mwanakazi wakujalirika.

Nangauli dango ili likuyowoya chomene vyakuti mwanakazi walije mulandu, kweni likulongosora mwambura kubisa kuti mwanalume wali na mulandu wa kukolelera na wa uleŵi. Tikugomezga kuti ŵeruzgi ‘ŵakapenjerezganga’ ndipo ŵakadumuranga mwakukolerana na fundo izo Chiuta wakaziyowoya mwakuwerezgawerezga.—Doto. 13:14; 17:4; Eks. 20:14.