1. Kasi ŵanthu ŵanandi ŵakuyiwona wuli ntchito?

UKO mukukhala, kasi ŵanthu ŵanandi ŵakuyiwona wuli ntchito? Kuluska kumanyuma kose, mu vyaru vinandi ŵanthu ŵakulimbikira chomene ntchito ndipo ŵakugwira kwa maora ghanandi. Kweni kanandi ŵanthu awo ŵakugwira ntchito mwakujumphizga, ŵakuŵavya nyengo yakupumulira, yakuchezgera na mbumba zawo kweniso yakusambira vyakukhwaskana na Chiuta. (Muph. 2:23) Ndipouli, ŵanthu ŵanyake ŵakutemwa yayi kugwira ntchito ndipo ŵakuyezgayezga kusanga vifukwa vyakujigowokera.—Zinth. 26:13, 14.

2-3. Kasi Yehova na Yesu ŵakuyiwona wuli ntchito?

² Mwakupambana na umo ŵanthu ŵanandi ŵakuyiwonera ntchito, wonani umo Yehova na Yesu ŵakuyiwonera. Yehova wakutemwa kugwira ntchito. Yesu wakayowoya mwakupulikikwa makora pa nkhani iyi, wakati: “Adada ŵakugwira ntchito m’paka sono, ndipo nane nkhulutilira kugwira ntchito.” (Yoh. 5:17) Ghanaghanira ntchito iyo Chiuta wakaŵa nayo apo wakalenganga ŵangelo, nyenyezi na mapulaneti. Kweniso Chiuta wali kulenga vinthu vinandi vyakutowa pano pa charu chapasi. Wamasalimo wakati: “A Yehova, nawo mbunandi wa milimo yinu! Muli kuyipanga yose mu vinjeru. Charu chapasi ntchakuzura na ivyo muli kupanga.”—Sal. 104:24.

³ Yesu wakayezga Awiske. Wakawovwirapo apo Chiuta “wakanozganga machanya.” Wakaŵa pafupi na Yehova “nga ni misiri.” (Zinth. 8:27-31) Pamanyuma, Yesu wati wiza pa charu chapasi wakachita ntchito yikuru chomene. Yesu wakati ntchito iyo Yehova  wakamupa yikaŵa nga ntchakurya, ndipo chilichose icho wakachita pa charu chapasi chikalongora kuti wakatumika nadi na Chiuta.—Yoh. 4:34; 5:36; 14:10.

4. Kasi tingasambirako vichi kwa Yehova na Yesu pa nkhani yakupumura?

⁴ Pakuti Yehova na Yesu ŵakulimbikira kugwira ntchito, kasi chikung’anamura kuti ntchakukhumbikwa yayi kupumura? Yayi. Yehova wakuvuka yayi, ntheura wakukhumbikwira kupumura yayi para wagwira ntchito yinyake. Ndipouli, Baibolo likuyowoya kuti Yehova wakati wamalizga kulenga machanya na charu chapasi “wakaleka milimo yake na kupumura.” (Eks. 31:17) Ivi vikulongora kuti Yehova wakaleka kulenga vinthu, ndipo wakapatura nyengo kuti wakondwe na milimo yake. Nangauli Yesu wakalimbikiranga ntchito apo wakaŵa pa charu chapasi, kweni wakaŵanga na nyengo yakupumulira na yakulyera chakurya pamoza na ŵabwezi ŵake.—Mat. 14:13; Luka 7:34.

5. Kasi ŵanandi vikuŵasuzga kuchita vichi?

⁵ Baibolo likuchiska ŵanthu ŵa Chiuta kuti ŵagwirenge ntchito. Ŵateŵeti ŵake ŵakwenera kulimbikira kugwira ntchito m’malo mwa kuŵa ŵakata. (Zinth. 15:19) Panji mukugwira ntchito yakulembeka kuti mupwelelere mbumba yinu. Kweni ŵasambiri wose ŵa Khristu ŵaliso na mulimo wa kupharazga makani ghawemi. Nangauli vili nthena, kweni mukwenera kuŵa na nyengo yakupumulira. Kasi nyengo zinyake vikumusuzgani kugaŵa makora nyengo yakugwilira ntchito, yakupharazgira, kweniso kupumura? Kasi mukumanya wuli nyengo iyo mukwenera kumalira pakugwira ntchito na kupumura?

6. Kasi lemba la Mariko 6:30-34 likulongora wuli kuti Yesu wakawonanga mwakwenelera ntchito na kupumura?

⁶ Ntchakuzirwa chomene kuyiwona mwakwenelera ntchito. Themba Solomoni likalemba kuti: “Pali nyengo yake yakutemeka . . . ya chilichose.” Likayowoya kuti pali nyengo ya kupanda, kuzenga, kulira, kuseka, kuvina, na vyakuchitika vinyake. (Muph. 3:1-8) Apa ntchakuwonekerathu kuti vinthu viŵiri vyakuzirwa pa umoyo wamunthu, nkhugwira ntchito na kupumura. Yesu wakawonanga mwakwenelera nkhani yakugwira ntchito na kupumura. Zuŵa linyake ŵapositole ŵakafuma mu upharazgi. Pa zuŵa ili ŵakatangwanika chomene kupharazgira ŵanthu mwakuti “ŵakaŵavya nyengo yakupumulira nanga njakulyera.” Yesu wakaŵaphalira kuti: “Zaninge, imwe mwekha ku malo ghamayiyi na kupumulapo pachoko.” (Ŵazgani Mariko 6:30-34.) Nangauli ni nyengo zose yayi apo iyo na ŵasambiri ŵake ŵakapumulanga umo ŵakakhumbiranga, kweni Yesu wakamanyanga kuti wose ŵakakhumbikwiranga kupumura.

7. Kasi kusambira vya dango la Sabata kutovwirenge wuli?

⁷ Nyengo zinyake tose tikukhumbikwira kupumura panji kusintha milimo yithu ya zuŵa na zuŵa. Fundo iyi tikuyiwona mu ndondomeko iyo Chiuta wakanozgera ŵanthu ŵake mu nyengo yakale. Wakanozga ndondomeko yakuti ŵasungenge Sabata. Nangauli tili pasi pa Dango la Mozesi yayi, kweni tingasanga chandulo para tingasambira ivyo likuyowoya pa nkhani ya Sabata. Ivyo tingasambirako vingatovwira kumanya usange tikuwona mwakwenelera ntchito na kupumura.

8. Kuyana na Ekisodo 31:12-15, kasi zuŵa la Sabata likaŵa lakuchitira vichi?

⁸ Mazgu gha Chiuta ghakuti mazuŵa 6 ghakulenga ghakati ghamara, Chiuta wakaleka kulenga vinthu pa charu chapasi. (Gen. 2:2) Ndipouli, Yehova wakutemwa kugwira ntchito, ndipo tingayowoyaso kuti ‘wakulutilira kugwira ntchito.’ (Yoh. 5:17) Yehova wakagwira ntchito mazuŵa 6 ndipo pa zuŵa la nambara 7 wakapumura. Ndipo wakaphaliraso Ŵaisrayeli kuti ŵapumulenge  pa zuŵa lililose la nambara 7 mu sabata. Chiuta wakati zuŵa la Sabata likaŵa chimanyikwiro pakati pa iyo na Ŵaisrayeli. Likaŵa zuŵa ‘lakupumura ku ntchito zose ndipo likaŵa lakupatulika kwa Yehova.’ (Ŵazgani Ekisodo 31:12-15.) Palije uyo wakazomerezgekanga kugwira ntchito, kwali ni mwana, muzga, panji chiŵeto. (Eks. 20:10) Zuŵa ili likaŵapanga mwaŵi ŵanthu wakuŵika maghanoghano ghawo ghose pa vinthu vyauzimu.

9. Kasi ni maghanoghano wuli ghakubudika pa nkhani ya Sabata agho ŵanthu ŵanyake ŵakaŵa nagho mu nyengo ya Yesu?

⁹ Zuŵa la Sabata likaŵa liwemi ku ŵanthu ŵa Chiuta. Kweni kufika mu nyengo ya Yesu ŵalongozgi ŵanandi ŵa chisopa ŵakakhwimiskanga chomene dango la Sabata. Ŵakatenge ntchambura kuzomerezgeka pa Sabata kupulura mphonje za tirigu na kurya panji kuchizga munthu. (Mrk. 2:23-27; 3:2-5) Maghanoghano agha ghakaŵa ghakupambana na gha Chiuta, ndipo Yesu wakayowoya mwakupulikikwa makora fundo iyi ku awo ŵakamutegherezganga.

10. Kasi tingasambirapo vichi pa lemba la Mateyu 12:9-12 pa nkhani ya umo Yesu wakawoneranga Sabata?

¹⁰ Yesu na ŵalondezgi ŵake awo ŵakaŵa Ŵayuda ŵakasunganga Sabata chifukwa chakuti ŵakaŵa pasi pa Dango la Mozesi. * Kweni ivyo Yesu wakayowoya na kuchita vikalongora kuti chikaŵa chiheni yayi kuchita milimo yalusungu na kovwira ŵanji pa Sabata. Wakayowoya mwambura kubisa kuti: “Ntchakuzomerezgeka kuchita chinthu chiwemi pa Sabata.” (Ŵazgani Mateyu 12:9-12.) Wakawonanga kuti ntchiheni  yayi kuchita milimo yalusungu na kovwira ŵanji pa Sabata. Ivyo Yesu wakachita vikalongora kuti wakapulikiska chifukwa icho Chiuta wakaphalilira ŵanthu ŵake kuti ŵapumulenge pa Sabata. Chifukwa chakuti ŵanthu ŵakapumulanga ku milimo yawo ya zuŵa na zuŵa, ŵakaŵikanga maghanoghano ghawo pa vinthu vyauzimu. Yesu wakakulira mu mbumba iyo yikwenera kuti pa zuŵa la Sabata yikasopanga Chiuta. Tikumanya fundo iyi chifukwa cha ivyo tikuŵazga vyakukhwaskana na Yesu apo wakaŵa mu tawuni yakwake ya Nazareti: “Wakanjira mu sunagoge pa zuŵa la Sabata kuyana na kaluso kake.”—Luka 4:15-19.

11. Kasi ntchiyelezgero wuli chiwemi icho Yesu wakalongora pa nkhani ya ntchito?

¹¹ Yosefe wakasambizga Yesu ukalipentara kweniso umo Chiuta wakuyiwonera ntchito. (Mat. 13:55, 56) Yesu wakwenera kuti wakawonanga umo Yosefe wakalimbikiliranga ntchito zuŵa lililose kuti wapwelelere mbumba yake. Nakuti Yesu pamanyuma wakaphalira ŵasambiri ŵake kuti: “Wantchito wakwenera kupokera malipiro ghake.” (Luka 10:7) Apa ntchakuwonekerathu kuti Yesu wakalimbikiranga ntchito.

12. Kasi ni malemba wuli agho ghakulongora ivyo Baibolo likuyowoya pa nkhani ya kulimbikira ntchito?

¹² Mpositole Paulosi nayo wakalimbikiranga ntchito. Mulimo wake ukuru ukaŵa wakuphalira ŵanthu vyakukhwaskana na Yesu na ivyo wakasambizga. Ndipouli, Paulosi wakagwiranga ntchito kuti wasange vyakukhumbikwa pa umoyo wake. Ŵatesalonika ŵakamanyanga kuti wakaŵa ‘wakufukafuka,’ ndipo ‘wakagwiranga ntchito usiku na muhanya’ mwakuti waleke “kuŵika mphingo yikuru” pa waliyose. (2 Tes. 3:8; Mil. 20:34, 35) Apo Paulosi wakalemba vyakukhwaskana na ntchito yake, wakwenera kuti wakanenanga ntchito yakupanga mahema. Apo wakaŵa ku Korinte, wakakhalanga na Akwila na Prisila ndipo ‘wakagwiranga nawo ntchito, chifukwa ntchito yawo yikaŵa yakupanga mahema.’ Paulosi pakuyowoya kuti wakagwiranga ntchito “usiku na muhanya,” wakang’anamuranga kuti wakakhaliranga waka kugwira ntchito kwambura kupumura yayi. Wakalekezganga dankha kupanga mahema, nga mpha zuŵa la Sabata. Pa zuŵa ili wakapharazgiranga Ŵayuda, awo nawo ŵakagwiranga yayi ntchito pa Sabata.—Mil. 13:14-16, 42-44; 16:13; 18:1-4.

13. Kasi tingasambirako vichi kwa Paulosi?

¹³ Mpositole Paulosi wakalongora chiyelezgero chiwemi. Nangauli wakagwiranga ntchito yakuthupi, kweni wakawoneseskangaso kuti nyengo zose wakuchita “mulimo utuŵa wa kupharazga makani ghawemi gha Chiuta.” (Rom. 15:16; 2 Kor. 11:23) Wakachiskaso ŵanji kuti ndimo nawo ŵachitirenge. Nakuti Akwila na Prisila ŵakaŵa “ŵantchito [ŵanyake] mwa Khristu Yesu.” (Rom. 12:11; 16:3) Paulosi wakachiska Ŵakorinte kuti ŵaŵe “na vyakuchita vinandi mu mulimo wa Fumu.” (1 Kor. 15:58; 2 Kor. 9:8) Yehova wakakhuŵilizga mpositole Paulosi kulemba kuti: “Usange munthu wakukhumba yayi kugwira ntchito, kurya nako waleke.”—2 Tes. 3:10.

14. Kasi Yesu wakang’anamurangachi apo wakayowoya mazgu agho ghali pa Yohane 14:12?

¹⁴ Mulimo wakuzirwa chomene mu mazuŵa ghaumaliro agha, ngwakupharazga na kuzgora ŵanthu kuŵa ŵasambiri. Nakuti Yesu wakayowoyerathu kuti ŵasambiri ŵake ŵazamuchita milimo yikuru kujumpha iyo wakachita. (Ŵazgani Yohane 14:12.) Pakuyowoya nthena, wakang’anamuranga kuti tizamuchita minthondwe yayi. M’malo mwake, ŵalondezgi ŵake ŵazamupharazga na kusambizga mu malo ghanandi, ku ŵanthu ŵanandi, kweniso ŵazamupharazga nyengo yitali kuluska iyo.

15. Kasi tikwenera kujifumba mafumbo wuli, ndipo chifukwa wuli?

¹⁵ Para muli pa ntchito yakulembeka, jifumbani mafumbo agha: ‘Kasi nkhumanyikwa kuti ndine wakulimbikira pa ntchito? Kasi ntchito yane  nkhuyimalizga panyengo yake kweniso nkhuyezgayezga kuyigwira mwaluso?’ Usange zgoro ndakuti enya, mbwenu bwana winu wamugomezganinge. Kweniso ŵanthu awo mukugwira nawo ntchito ŵangategherezga para mukuŵapharazgira. Pa nkhani ya kupharazga na kusambizga, jifumbani mafumbo agha: ‘Kasi nkhulimbikira kupharazga? Kasi nkhunozgekera makora para namupharazga? Kasi nkhuwelerako mwaluŵiro ku ŵanthu ŵakunweka? Kasi nyengo zose nkhuchitako maupharazgi ghakupambanapambana?’ Usange zgoro ndakuti enya, mbwenu muŵenge ŵakukondwa apo mukuchita uteŵeti winu.

16. Kasi Yesu na ŵapositole ŵake ŵakayiwonanga wuli nkhani ya kupumura, ndipo kasi ŵanthu ŵanandi ŵakuyiwona wuli mazuŵa ghano?

¹⁶ Yesu wakamanyanga kuti iyo na ŵapositole ŵake nyengo zinyake ŵakakhumbikwiranga kupumura. Ndipouli, ŵanthu ŵanandi pa nyengo iyo kweniso mazuŵa ghano ŵali nga ni mwanalume musambazi wa mu ntharika ya Yesu. Mwanalume uyu wakati: “Sono nifwase, nirye, nimwe na kusangwa.” (Luka 12:19; 2 Tim. 3:4) Wakaghanaghananga kuti chakuzirwa chomene pa umoyo, nkhupumura na kusangwa. Kweni Yesu na ŵapositole ŵake ŵakaŵika mtima wawo pa kujikondweska ŵekha yayi.

17. Kasi tikwenera kuchita wuli na nyengo iyo tikuŵa pa ntchito yayi?

¹⁷ Mazuŵa ghano, tikuyezga Yesu para nyengo iyo taŵeruka ku ntchito tikuyigwiliskira ntchito pakupumura pera yayi. Kweni para tikuchita vinthu vya Ufumu nga nkhupharazga na kuwungana. Nakuti tikuwona kuti ntchakuzirwa chomene kupharazga na kuwungana. Ntheura tikuyezgayezga kuchita vyose ivyo tingafiska mwakuti tilutilire kuchita milimo yapadera iyi. (Heb. 10:24, 25) Nanga ni para taluta ku holide, tikulutilira kuwungana kulikose uko tingaŵa, ndipo tikuyezgayezga kupharazgira ŵanthu awo tikukumana nawo.—2 Tim. 4:2.

18. Kasi Themba lithu, Khristu Yesu, likukhumba vichi?

¹⁸ Tikuwonga chomene Themba lithu, Khristu Yesu, chifukwa likuchita nase vinthu mwamahara ndipo likutovwira kuti tiwonenge mwakwenelera ntchito na kupumura. (Heb. 4:15) Likukhumba kuti tipumulenge. Ndiposo likukhumba kuti tilimbikirenge ntchito kuti tisange vyakukhumbikwa pa umoyo withu kweniso tipharazgenge. Mu nkhani yakulondezgapo, tizamusambira ivyo Yesu wali kuchita kuti watifwature ku wuzga wakofya chomene.