Kasi mwaŵazga mwakupwelelera magazini gha Gongwe la Mulinda gha chaka chino? Yezgani kuzgora mafumbo agha:

Kasi Ŵakhristu ŵakuphakazgika tikwenera kuŵawona wuli?

Nangauli tikwenera kuyezga chipulikano chawo, kweni tikwenera kuŵapa ntchindi zapadera yayi. Tikwenera kugega kuŵawona kuti mbapachanya chomene kuluska ŵanji. (Yuda 16) Kweniso tikwenera yayi kuŵafumba mafumbo agho ghakutikhwaska yayi ghakukhwaskana na chilindizga chawo.—w20.01, p. 29.

Kasi ntchivichi chikwenera kumukhorweskani kuti Yehova wakumuwonani imwe pamwekha?

Baibolo likulongora kuti Yehova wakamuwonani nanga ni apo mukaŵa kuti mundababike. Kweniso wakupulika malurombo ghinu. Wakumanya ivyo mukughanaghana na ivyo vili mu mtima winu, ndipo ivyo mukuchita vikumukhwaska. (1 Mid. 28:9; Zinth. 27:11) Kweniso ndiyo wali kumuguzani.—w20.02, p. 12.

Kasi ni viyelezgero wuli ivyo vingatovwira kumanya apo tikwenera kuyowoya na apo tikwenera kukhala chete?

Tikuyowoya mwakukondwa vyakukhwaskana na Yehova. Tikuyowoya para tawona munyake wakupuluka. Ŵalara ŵakuyowoya para ŵawona kuti ntchakukhumbikwa kupeleka ulongozgi. Tikufumba yayi panji kuyowoya umo mulimo withu ukwendera mu vyaru ivyo ngwakukanizgika. Ndipo tikuyowoya yayi vinthu vyachisisi.—w20.03, pp. 20-21.

Kasi zombe ilo likuyowoyeka pa Joyeli chaputara 2 likupambana wuli na ilo likuyowoyeka pa Chivumbuzi chaputara 9?

Pa Joyeli 2:20-29 pakuyowoya kuti Chiuta wazamulichimbizgira kutali zombe ndipo wazamuwezgerapo ivyo likananga. Kufuma apo, Chiuta wazamupungura mzimu wake. Vinthu ivi, vinyake vikafiskika apo Ŵababuloni ŵakawukira Ŵaisrayeli kweniso vinyake vikafiska pamanyuma pake. Pa Chivumbuzi 9:1-11 pakulongosora kuti zombe mbakuphakazgika ndipo ŵakupharazga cheruzgo cha Chiuta mu charu chiheni ichi, ndipo ŵanthu wose awo ŵakukhozgera charu ichi vikuŵaŵinya chomene.—w20.04, pp. 3-6.

Kasi themba lakumpoto ni njani mazuŵa ghano?

Ni charu cha Russia na vyaru ivyo chikukolerana navyo. Ŵali kuwukira ŵanthu ŵa Chiuta, ŵali kukanizga mulimo withu wakupharazga kweniso ŵakulongora kuti ŵakutinkha chomene Ŵakaboni. Themba lakumpoto na themba lakumwera ŵakulutilira kulimbana.—w20.05, p. 13.

Kasi mikhaliro 9 iyo yili pa Ŵagalatiya 5:22, 23 ndiyo pera iyo yili mu gulu la “vipambi vya mzimu”?

Yayi. Mzimu utuŵa ukutovwira kuti tiŵeso na mikhaliro yinyake yiwemi nga ni urunji. (Efe. 5:8, 9)—w20.06, p. 17.

Kasi kuŵika vinthu vyakukhwaskana na imwe pa malo ghakuchezgerapo gha pa Intaneti nkhwakofya wuli?

Ivyo mukuŵika pa malo ghakuchezgerapo gha pa Intaneti vingalongora kuti ndimwe ŵakujikuzga, ŵakujiyuyura yayi.—w20.07, pp. 6-7.

Kasi Ŵakhristu ŵangasambirako vichi kwa ŵalovi ŵaluso?

Ŵalovi ŵaluso ŵakuluta pa malo apo ŵangasanga somba kweniso pa nyengo iyo zingasangika. Ŵali kusambizgika kuti ŵagwiliskirenge ntchito viteŵetero vyakwenelera. Ŵakulutilira kukora somba nanga pa nyanja pangaŵa kuti pakusinthasintha. Nase tingachita mwakuyana waka mu upharazgi.—w20.09, p. 5.

Kasi ni nthowa wuli zinyake izo tingawovwilira awo tikusambira nawo Baibolo kuti ŵatemwenge chomene Yehova?

Tikwenera kuŵachiska kuti ŵaŵazgenge Baibolo zuŵa lililose na kughanaghanirapo. Kweniso tiŵasambizge kulomba.—w20.11, p. 4.

Kasi Paulosi wakayowoyanga za anjani apo wakati: “Mwa Khristu wose ŵazamuzgoka ŵamoyo.”—1 Kor. 15:22.

Mpositole Paulosi wakang’anamuranga kuti munthu waliyose wazamuwuskika yayi. Apa wakayowoyanga vya Ŵakhristu ŵakuphakazgika, awo ŵali ‘kutuŵiskika mwa Khristu Yesu.’ (1 Kor. 1:2; 15:18)—w20.12, pp. 5-6.

Kasi ŵakuphakazgika ŵazamuchita mulimo wuli para ‘ŵasinthika mu kanyengo ka kuphayira kwa jiso, pakulira kwa mbata yaumaliro’?—1 Kor. 15:51-53.

Ŵazamovwirana na Yesu pakuliska ŵanthu na ndodo yachisulo. (Chivu. 2:26, 27)—w20.12, pp. 12-13.