NKHANI YAKUSAMBIRA 52
Umo Mungachitira Para Mwagongowa
“Katundu wako umuthwikiske Yehova, ndipo wakovwirenge.”—SAL. 55:22.
SUMU 33 Katundu Wako Umuthwikiske Yehova
CHILATO CHA NKHANI IYI *
1. Kasi ntchivichi chingachitika para tagongowa?
ZUŴA lililose tikusangana na masuzgo ndipo tikuchita vyose ivyo tingafiska kuti tizizipizge. Kweni mungazomerezga kuti ntchakusuzga chomene kuzizipizga masuzgo para tagongowa. Ntheura tikwenera kukumbuka kuti kugongowa kungatipangiska kuti tiŵe ŵambura kukondwa kweniso tijiwonenge kuti ndise ŵambura ntchito. Lemba la Zintharika 24:10 na mazgu ghamusi likuti: “Usange ukulopwa mu nyengo ya suzgo, nkhongono zako ziŵenge zichoko.” Uwu mbunenesko nadi, kugongowa kungatigulura nkhongono ndipo chingaŵa chakusuzga kuzizipizga masuzgo.
2. Kasi ni vichi ivyo vingatipangiska kuti tigongowe, ndipo tidumbiskanenge vichi mu nkhani iyi?
2 Pali vinandi ivyo vingatigongoweska, vinyake vingaŵa ivyo tachita tekha apo vinyake vingaŵa ivyo vyatichitikira. Mwachiyelezgero, ghangaŵa maubudi ghithu, kutondeka kufiska vinthu vinyake, kweniso ulwari. Panji tingagongowaso para tikupika yayi uteŵeti uwo tikuwukhumba chomene mu gulu la Yehova, kweniso para ŵanthu ŵakutegherezga viŵi yayi uthenga uwemi. Mu nkhani iyi tidumbiskanenge ivyo tingachita para tagongowa.
PARA TIKUTONDEKA KUCHITA MAKORA VINTHU VINYAKE
3. Kasi ntchivichi chingatovwira para tamba kujiwona mwambura kwenelera chifukwa chakuti tikutondeka kuchita makora vinthu vinyake?
3 Ntchipusu kwamba kujiwona ŵambura kwenelera para tikutondeka kuchita makora vinthu vinyake. Ntheura tingamba kughanaghana kuti Yehova wazamutinjizga yayi mu charu chiphya chifukwa chakuti tikutondeka kuchita makora vinthu vinyake. Kweni kaghanaghaniro aka nkhakofya. Kasi tikwenera kuviwona wuli ivyo tikubudiska? Baibolo likuyowoya kuti kupaturako Yesu, ŵanthu wose “ŵali kwananga.” (Rom. 3:23) Kweni Yehova wakuŵika chomene mahara pa ivyo tikunangiska yayi, panji kukhazga kuti tichitenge vinthu mwakufikapo. M’malo mwake wakuŵika mahara pa ivyo tikuchita makora, ndipo ni Dada wachitemwa uyo wakukhumba kutovwira. Kweniso ngwakuzikira. Wakumanya umo tikusuzgikira kuti tichite vinthu mwakwenelera kweniso kuti tileke kujiwona mwambura kwenelera, ndipo iyo ngwakunozgeka kutovwira.—Rom. 7:18, 19.
Yehova wakumanya viwemi vyose ivyo tikachita kumanyuma na ivyo tikuchita sono (Wonani ndime 5) *
4-5. Kasi lemba la 1 Yohane 3:19, 20 likuyowoya vichi ivyo vikawovwira ŵadumbu ŵaŵiri kuti ŵaleke kugongowa?
4 Wonani chiyelezgero cha Deborah na Maria. * Apo Deborah wakaŵa mwana, kanandi ŵakamuchitiranga vinthu mwambura chitemwa ndipo ivi vikamupangiskanga kuti wajiwonenge kuti ngwambura kukhumbikwa. Wakalumbikanga viŵi yayi. Lekani wati wakura wakajikayikiranga chomene. Para wabudiska waka kanthu kachoko wakajiwonanga kuti ngwakutondeka chomene. Maria nayo wakaŵa na suzgo lakuyana waka. Ŵabali ŵake ŵakamuyuyuranga chomene. Ntheura wakajiwonanga kuti ngwambura ntchito. Nanga ni apo wakaŵa kuti wabatizika, wakajiwonanga kuti ngwakwenelera yayi kuŵa yumoza wa Ŵakaboni ŵa Yehova.
5 Kweni ŵadumbu ŵaŵiri aŵa, ŵakaleka yayi kuteŵetera Yehova. Chifukwa wuli? Chifukwa ŵakalomba kwa Yehova na kumuphalira umo ŵakajipulikiranga. (Sal. 55:22) Ŵakamanya kuti Adada ŵithu ŵakuchanya ŵakumanya kuti vinthu viheni ivyo vili kutichitikirapo vingatipangiska kuti tijiwonenge ŵambura ntchito. Kweniso ŵakuwona mikhaliro yiwemi iyo tili nayo, nanga ise tingawona nga tilije mikhaliro yiwemi.—Ŵazgani 1 Yohane 3:19, 20.
6. Kasi munthu wakwenera kuchita wuli para wawerezgaso vinthu ivyo wakabudiskapo kale?
6 Munthu munyake wangaŵa kuti wakulimbikira kuti waleke kuchita chinthu chinyake chiheni. Kweni wangachitaso chinthu icho ndipo wangagongowa. Ndipo kanandi tikujipa mulandu para tachita kwananga. (2 Kor. 7:10) Kweni tileke kujumphizga m’paka kufika pakwamba kujiwona kuti ndise ŵakutondekerathu mwakuti Yehova wangatigowokera yayi. Kaghanaghaniro aka nkhawemi yayi ndipo kangatipangiska kuti tileke kuteŵetera Yehova. Kumbukani ivyo tanguŵerenga pa Zintharika 24:10 kuti nkhongono zithu ziŵenge zichoko para tagongowa. Ntheura tikwenera ‘kudumbiskana na Yehova’ mu lurombo na kumupempha kuti watigowokere. (Yes. 1:18) Para Yehova wawona kuti mwalapa nadi, wamugowokeraninge. Kweniso kumanani na ŵalara mu mpingo. Ŵamovwiraninge mwakuzikira kuti muŵeso makora mwauzimu.—Yak. 5:14, 15.
7. Chifukwa wuli tikwenera kugongowa yayi para tikusuzgika kuchita icho ntchiwemi?
7 Jean-Luc, mulara ku France, wakuti “Munthu murunji mu maso gha Yehova kuti ni uyo nyengo zose wakuleka kubudiska yayi, kweni ni uyo wakujinyumwa para wananga na kulapa.” (Rom. 7:21-25) Ntheura kujiwona ŵawakawaka yayi para mukutondeka kuchita makora vinthu vinyake. Tikwenera kukumbuka kuti tose tikubudiska, ndipo tikukhumbikwira lusungu lukuru lwa Yehova ulo wakutipa kwizira mu sembe yakuwombora.—Efe. 1:7; 1 Yoh. 4:10.
8. Usange tagongowa, kasi ni nkhu uko tingapempha wovwiri?
8 Pemphani wovwiri ku ŵabali na ŵadumbu mu mpingo. Iwo ŵangamutegherezgani para mukukhumba kuyowoya nawo, ndipo ŵangamukhozgani. (Zinth. 12:25; 1 Tes. 5:14) Joy, mudumbu wa ku Nigeria uyo nayo wakagongowapo, wakuti: “Mphanyi ndine njani ine kuŵavyenge ŵabali na ŵadumbu? Umo ŵabali na ŵadumbu ŵakanikhozgera, mbukaboni wakuti Yehova wakuzgora malurombo ghane. Ndipo nane nili kusambirako kwa iwo umo ningakhozgera awo ŵagongowa.” Kweni tikwenera kukumbuka kuti ni nyengo zose yayi apo ŵabali na ŵadumbu ŵithu ŵangamanya kuti tikukhumbikwira kukhozgeka. Ntheura tingakhumbikwira kuluta kwa mubali panji mudumbu wakukhwima mwauzimu kukamuphalira kuti tikukhumbikwira wovwiri.
PARA TIKUSUZGIKA NA ULWARI
9. Kasi lemba la Salimo 41:3 na 94:19 likutikhozga wuli?
9 Pemphani Yehova kuti wamovwirani. Para tikujipulika makora yayi mu thupi, chomenechomene para talwara kwa nyengo yitali chikuŵa chakusuzga kuti tighanaghanenge mwakwenelera. Mbunenesko kuti Yehova wakutichizga mwamunthondwe yayi pasono, kweni wakutipembuzga na kutipa nkhongono kuti tizizipizge. (Ŵazgani Salimo 41:3; 94:19.) Mwachiyelezgero, wangapangiska ŵabali na ŵadumbu kuti ŵazakatovwireko milimo yinyake panyumba panji kutovwira kukagura vinthu vinyake, kweniso kulomba nase. Wangatovwiraso kukumbukira mazgu ghakupembuzga gha mu Baibolo, agho ghakuyowoya za chilindizga cha umoyo uwemi wambura kulwara kweniso wambura vyakuŵinya mu charu chiphya icho chikwiza.—Rom. 15:4.
10. Chifukwa wuli Isang wakalutilira yayi kugongowa nangauli wakachita ngozi?
10 Isang uyo wakukhala ku Nigeria, wakachita ngozi iyo yikamupangiska kuti wafwe viŵaro vinyake. Ndipo dokotala wake wakamuphalira kuti wazamwendaso yayi. Isang wakati: “Mtima wane ukasweka kweniso mzimu wane ukateketeka.” Kweni kasi wakalutilira kujipulika nthena? Yayi. Kasi ntchivichi chikamovwira? Iyo wakulongosora kuti: “Ine na muwoli wane tikalekapo yayi kulomba kwa Yehova na kusambira Mazgu ghake. Kweniso tikaŵikapo mtima kuwonga vinthu viwemi ivyo tili navyo, kusazgapo chigomezgo cha umoyo uwemi mu charu chiphya cha Chiuta.”
Nanga ni awo ŵakutondeka kuchita vinandi ŵangasanga nthowa kuti ŵapharazgenge na kuŵa ŵakukondwa apo ŵakuchita uteŵeti (Wonani ndime 11-13)
11. Kasi ntchivichi chikawovwira Cindy kuŵa wakukondwa nangauli wakalwara chomene?
11 Cindy uyo wakukhala ku Mexico, dokotala wakamuphalira kuti wasangika na nthenda iyo yingamukoma. Kasi wakazizipizga wuli? Apo wakapokeranga wovwiri wa chipatala, wakaŵikapo mtima kupharazga zuŵa lililose. Iyo wakalemba kuti: “Kuchita nthena kukanovwira kuti nighanaghanirenge ŵanji m’malo mwa opareshoni, ulwilwi, panji umo nkhajipulikiranga. Ivyo nkhachitanga ni ivi: “Para nkhuyowoyeskana na madokotala panji manesi, nkhaŵafumbanga vya mbumba zawo. Kufuma apo nkhaŵafumbanga chifukwa icho ŵakasankhira ntchito yakusuzga iyi. Kuchita nthena kukanovwira kumanya nkhani iyo yingaŵafika pamtima. Ŵanandi mwa iwo ŵakayowoya kuti ni viŵi yayi kuti ŵalwari ŵafumbenge za umoyo wawo. Ŵakaniwonga chifukwa nkhalongora kuti nkhuŵaghanaghanira. Ŵanyake ŵakanipa na manambara gha foni wuwo kweniso maadiresi ghawo. Pa ulwari wane uwu, nangauli nkhamanyanga kuti Yehova wanovwirenge kuzizipizga, kweni nkhazizwa chomene umo wakanovwilira kuti niŵe wakukondwa.”—Zinth. 15:15.
12-13. Kasi ŵanyake awo mbalwari ŵakuchita wuli kuti ŵapharazgenge, ndipo paŵa uwemi wuli?
12 Ŵalwari ŵangagongowa chifukwa chakuti ŵakutondeka kupharazga nga umo iwo ŵakukhumbira. Kweni nipera ŵanandi ŵakusanga nthowa zakupharazgira. Ku United States, mudumbu munyake zina lake Laurel, ŵakamuŵika ku mashini agho ghakamovwiranga kuthuta kwa vyaka 37. Wakaŵaso na kansa, ndipo ŵakamupangapo maopareshoni ghakurughakuru kanandi waka kweniso wakaŵaso na matenda ghanyake. Kweni masuzgo ghakuru agha ghakamutondeska yayi kupharazga. Wakapharazgiranga manesi kweniso ŵanyake awo ŵakizanga kunyumba kwake. Kasi ntchivichi chikachitika? Wakawovwira ŵanthu 17 kumumanya makora Yehova. *
13 Richard, mulara ku France, wali na masachizgo ghawemi kwa awo ŵakwenda yayi chifukwa cha ulwari kweniso awo ŵakukhala ku malo agho ŵakupwelelerako ŵalwari. Iyo wakuti: “Nkhusachizga kuti ŵaŵikenge mabuku na magazini pa malo ghakuwonekera apo ŵanthu ŵangaghawona. Para ŵanthu ŵaghawona ŵangaŵa na mafumbo, ndipo ivi vingawovwira kuti ŵambe kudumbiskana nawo. Kuchita nthena kungaŵakhozga chomene ŵabali na ŵadumbu ŵithu awo ŵakutondeka kupharazga nyumba na nyumba.” Awo ŵakufumapo yayi panyumba ŵangapharazgaso kwizira mu makalata panji pa foni.
PARA TIKUPIKA YAYI UTEŴETI UWO TIKUKHUMBA
14. Kasi Davide wakalongora chiyelezgero wuli chiwemi?
14 Pali vifukwa vinandi ivyo vingapangiska kuti tileke kupika uteŵeti uwo tikuwukhumba mu gulu la Yehova. Mwachiyelezgero panji tingaŵa kuti tili ŵachekuru, ŵalwari, panji pangaŵa masuzgo ghanyake. Usange vinthu vili nthena kwa ise, tingasambirako kwa Themba Davide. Davide wakakhumbanga chomene kuti ndiyo wazenge tempile la Chiuta, kweni Yehova wakasankha munthu munyake kuti ndiyo wazenge. Ndipouli, Davide wakamovwira uyo wakapika mulimo uwu mwakumupa golide na siliva linandi kuti liwovwire pa ntchito iyi. Ichi ntchiyelezgero chiwemi chomene ndipo tingasambirako.—2 Sam. 7:12, 13; 1 Mid. 29:1, 3-5.
15. Kasi Hugues wakachita wuli kuti waleke kugongowa?
15 Chifukwa cha ulwari, mubali munyake wa ku France zina lake Hugues, wakaleka kuŵa mulara mu mpingo, ndipo wakatondekanga kuchita na milimo yichokoyichoko wuwo ya pa nyumba. Iyo wakalemba kuti: “Pakwamba nkhajiwonanga kuti ndine wambura ntchito, ndipo nkhagongowa chomene. Kweni pati pajumpha nyengo, nkhawona kuti chakuzirwa nkhuzomerezga waka umo vinthu viliri kwa ine, ndipo sono nili wakukondwa pakuteŵetera Yehova chifukwa nkhuchita ivyo ningakwaniska. Nakuti naŵikapo mtima kuti ningagongowanga chara. Nga ni Gidiyoni na ŵanalume ŵake 300 awo ŵakavuka, nane nilutilirenge kurwa.”—Ŵeru. 8:4.
16. Kasi tingasambirako vichi kwa ŵangelo?
16 Ŵangelo ŵakugomezgeka nawo ntchiyelezgero chiwemi chomene. Panyengo iyo Themba Ahabu likawusanga, Yehova wakafumba ŵangelo kuti ŵapeleke masachizgo gha umo ŵangakapusikira Themba liheni Ahabu. Ndipo ŵangelo ŵanyake ŵakapeleka masachizgo ghawo. Kweni Chiuta wakasankha mungelo yumoza na kumuphalira kuti sachizgo lake lamumwendera. (1 Mathe. 22:19-22) Kasi ŵangelo ŵanyake ŵakagongowa na kwamba kughanaghana kuti ‘najisuzganga waka kupeleka sachizgo lane?’ Yayi. Ŵangelo mbakujiyuyura chomene ndipo ŵakukhumba kuti ntchindi zose zilutenge kwa Yehova.—Ŵeru. 13:16-18; Chivu. 19:10.
17. Kasi tikwenera kuchita vichi para tagongowa chifukwa chakuti tikupika yayi uteŵeti uwo tikukhumba?
17 Kumbukani mwaŵi uwo tili nawo wakumanyikwa na zina la Chiuta na kupharazga vya Ufumu wake. Mauteŵeti ghakwiza na kuluta, ndipo ndigho ghakutipangiska kuti tiŵe ŵakuzirwa mu maso gha Chiuta yayi. Kweni para tili ŵakujiyuyura ndipo tikuŵa ŵakuzirwa kwa Yehova kweniso ku ŵabali na ŵadumbu. Ntheura lombani Yehova kuti wamovwirani kuti mulutilire kuŵa ŵakujiyuyura. Ghanaghanirani viyelezgero vya ŵateŵeti wose ŵakujiyuyura ŵa Yehova ivyo vili mu Baibolo. Teŵeterani ŵabali mwakukhumbisiska munthowa yiliyose iyo mungafiska.—Sal. 138:6; 1 Pet. 5:5.
PARA ŴANTHU ŴAKUNWEKA YAYI NA UTHENGA UWEMI
18-19. Kasi mungachita wuli kuti mulutilire kuŵa ŵakukondwa nanga ni para ŵanthu mu chigaŵa chinu ŵakunweka yayi na uthenga uwemi?
18 Kasi nyengo yinyake muli kugongowapo chifukwa chakuti mu chigaŵa chinu ŵanthu ŵakunweka yayi na uthenga withu, kweniso panji chifukwa ŵanthu ŵakusangika viŵi yayi panyumba? Usange ndimo viliri, kasi tingachita wuli kuti tilutilire kuŵa ŵakukondwa? Masachizgo ghanyake ghakovwira ghali mu bokosi la mutu wakuti: “ Umo Mungachitira Kuti Mukondwenge mu Uteŵeti.” Ntchakuzirwaso chomene kuti tiwuwonenge mwakwenelera upharazgi. Kasi ichi chikung’anamurachi?
19 Ŵikani maghanoghano ghinu pakupharazga zina la Chiuta na Ufumu wake. Yesu wakayowoya mwambura kubisa kuti mbachoko awo ŵazamusanga nthowa iyo yikuya ku umoyo. (Mat. 7:13, 14) Para tili mu upharazgi, tikuŵa na mwaŵi wakugwira ntchito na Yehova, Yesu, na ŵangelo. (Mat. 28:19, 20; 1 Kor. 3:9; Chivu. 14:6, 7) Yehova wakuguza ŵanthu awo ŵakukhumba kumuteŵetera. (Yoh. 6:44) Ntheura para munthu wandategherezge uthenga withu sono, nyengo yinyake wangazategherezga.
20. Kasi lemba la Yeremiya 20:8, 9 lingatovwira wuli para tagongowa?
20 Tingasambirako vinandi kwa ntchimi Yeremiya. Wakatumika kupharazga mu chigaŵa icho chikaŵa chakusuzga chomene. Ŵanthu ŵakamuchitiranga msinjiro na kumuhoya “zuŵa lose.” (Ŵazgani Yeremiya 20:8, 9.) Nyengo yinyake wakagongowa chomene mwakuti wakakhumba kuleka waka kupharazga. Kweni wakaleka yayi. Chifukwa wuli? “Mazgu gha Yehova” ghakaŵa nga ni moto mu mtima wake ndipo wakatondeka kuzizipizga. Ndimo vingaŵiraso kwa ise para tikuŵazga Baibolo na kughanaghanirapo chomene. Usange tachita nthena tilutilirenge kuŵa ŵakukondwa para tikupharazga ndipo ŵanthu ŵanandi ŵangamba kutegherezga.—Yer. 15:16.
21. Kasi tingachita wuli kuti tileke kugongowa nanga tingakumana na masuzgo?
21 Deborah uyo tamuzunura kukwambilira wakati: “Kugongowa ntchilwero cha nkhongono icho Satana wakugwiliskira ntchito kuti walimbane nase.” Kweni Yehova Chiuta ngwankhongono chomene kuluska Satana na vilwero vyake vyose. Ntheura para mwamba kugongowa pa chifukwa chilichose, lombani Yehova kuti wamovwirani. Iyo wamovwiraninge kulimbana na vinthu ivyo mukutondeka kuchita makora. Kweniso wamovwiraninge para mukulwara. Wamovwiraningiso kuti muwonenge mwakwenelera mauteŵeti mu gulu lake. Kweniso wamovwiraninge kuti muwonenge upharazgi mwakwenelera nangauli ŵanthu ŵangaŵa kuti ŵakunweka yayi na makani ghawemi. Ntheura lombani kwa Adada ŵinu ŵakuchanya na kuŵaphalira umo mukujipulikira. Iwo ŵamovwiraninge kuti muleke kugongowa nanga mungakumana na masuzgo.
SUMU 41 Mupulike Lurombo Lwane
^ ndime 5 Tose nyengo zinyake tikugongowa. Mu nkhani iyi, tidumbiskanenge vinthu ivyo tingachita para tagongowa. Nga umo tiwonerenge, na wovwiri wa Yehova tingazizipizga masuzgo nanga tingaŵa kuti tagongowa.
^ ndime 4 Mazina ghanyake ghasinthika mu nkhani iyi.
^ ndime 12 Ŵazgani nkhani yakulongosora umoyo wa Laurel Nisbet iyo yili mu Wukani! ya Chingelezi ya Janyuwale 22 1993.
^ ndime 69 MAZGU GHAKULONGOSORA CHITHUZI: Mudumbu uyo wagongowa kwa nyengo yitali, wakughanaghanirapo uteŵeti uwo wakachitanga kumanyuma ndipo wakulomba kwa Yehova. Wakugomezga kuti Yehova wakukumbuka ivyo wakachitanga kweniso ivyo wakuchita sono.
