Yehova wakaphalira Ŵaisrayeli kuti ŵakwenera kuŵa ŵatuŵa. Kuti waŵawovwire kuŵa ŵatuŵa, wakaŵaphalira kuti: “Ungendendekanga na kusesa mu ŵanthu ŵakwako chara. Ungaŵendanga umoyo wa munyako chara. Ine ndine Yehova.”—Lev. 19:2, 16.

Lizgu lakuti “ungaŵendanga” lili kung’anamulika kufuma ku lizgu linyake Lachihebere. Kweni kasi likung’anamura vichi? Buku linyake la Chiyuda lakulongosora vya buku la Levitiko likuti: “Fundo ya pa vesi ili njakusuzga . . . kuyilongosora chifukwa ntchakusuzga kumanya ng’anamuro la lizgu lakufuma ku Chihebere ili, ilo lingapulikikwaso kuti ‘ungimiliranga pafupi yayi.’”

Nkhwantha zinyake zikughanaghana kuti mazgu gha mu vesi ili ghakukolerana na vesi 15, ilo likuti: “Pakweruzga milandu, ungachitanga mwambura urunji chara. Ungatemweranga mukavu chara panji kutemwera musambazi. Weruzgenge munyako mu urunji.” (Lev. 19:15) Ntheura, dango la mu vesi 16 lakuti “ungaŵendanga umoyo wa munyako chara,” likwenera kuti likang’anamuranga kuti ŵanthu ŵa Chiuta ŵakeneranga yayi kubendezga urunji ku khoti, pa nkhani za bizinesi, panji za mu banja. Ndipo Muisrayeli wakeneranga yayi kubendezga urunji na chilato chakuti wasangepo chandulo. Mbunenesko nadi kuti tikwenera yayi kuchita vinthu ivi, kweni paliso nthowa yinyake yiwemi chomene iyo yingatovwira kupulikiska makora fundo ya mu vesi 16.

Ghanaghanirani fundo iyo yili kukwambilira kwa vesi 16. Chiuta wakuphalira ŵanthu ŵake kuti ŵaleke kwendendeka na kusesa ŵanthu. Mbunenesko kuti kuyowoyera ŵanji utesi kungambiska masuzgo. Kweni kusesa ŵanthu ndiko nkhuheni chomene. (Zinth. 10:19; Muph. 10:12-14; 1 Tim. 5:11-15; Yak. 3:6) Munthu wakusesa, kanandi wakuyowoyera dala utesi na chilato chakuti wanange mbiri ya munthu munyake. Munthu wakusesa, wangapelekera ukaboni wautesi nanga ni para munthu uyo ŵakumupusikizgira wangakomekerapo. Kumbukani kuti ŵanalume ŵanyake ŵatesi ŵakapusikizgira Naboti m’paka wakakomeka mwakuchita kumudinya na malibwe. (1 Mathe. 21:8-13) Nadi, munthu wakusesa wangaŵenda umoyo wa munyake na kumukomeska, nga umo chikuyowoyera chigaŵa chachiŵiri cha Levitiko 19:16.

Kweniso munthu wangasesa munthu munyake chifukwa cha thinkho. Pa 1 Yohane 3:15, tikuŵazga kuti: “Waliyose uyo wakutinkha mubali wake ngwakukoma ŵanthu, ndipo mukumanya kuti uyo wakukoma ŵanthu wazamupokera yayi umoyo wamuyirayira.” Nakuti Chiuta wakati wayowoya mazgu gha mu vesi 16 ghakuti: “Ungaŵendanga umoyo wa munyako chara,” wakasazgiraposo kuti: “Ungatinkhanga mubali wako mu mtima wako chara.”—Lev. 19:17.

Ntheura dango ilo lili pa Levitiko 19:16 lili na ulongozgi wankhongono chomene ku Ŵakhristu. Tikwenera kukanizga maghanoghano ghalighose ghaheni na kusesa munthu munyake. Usange ‘tingaŵenda umoyo wa munyithu,’ panji kuti kumuyowoyera mautesi chifukwa chakuti tikumukhumba yayi, panji tikumuchitira sanji, mbukaboni wakuti tili na thinkho. Mkhristu wakwenera kugegerathu kutinkha ŵanji.—Mat. 12:36, 37.