Yayi. Ivyo Davide wakalemba apa vikaŵa vyanadi kweniso vyaunenesko.

Wonani ivyo wakalemba mu vesi ili kweniso mu mavesi ghanyake ghakuyanako: “Penepapo nimbirenge malumbo zina linu muyirayira, apo nkhufiska vilapo vyane zuŵa na zuŵa.” “Nkhumulumbani, A Yehova Chiuta wane, na mtima wane wose, ndipo nipelekenge uchindami ku zina linu muyirayira.” “Nilumbenge zina linu muyirayira swii.”—Sal. 61:8; 86:12; 145:1, 2.

Apa Davide wakang’anamuranga kuti walekenge kufwa yayi. Wakaŵa kuti wakumanya kale ivyo Yehova wakayowoya kuti njombe ya kwananga ni nyifwa, kweniso wakamanyanga kuti nayo ngwakwananga. (Gen. 3:3, 17-19; Sal. 51:4, 5) Wakamanyanga kuti nanga ni ŵanthu awo ŵakaŵa na chipulikano, nga ni Abrahamu, Yisake, na Yakhobe, ŵali kufwa. Nayo wakamanyanga kuti wafwenge. (Sal. 37:25; 39:4) Kweni mazgu ghake agho ghali pa Salimo 61:8 ghakulongora waka kuti wakaŵa wakukhumbisiska kweniso wakaŵikapo mtima kulumba zina la Chiuta muyirayira pa nyengo yose iyo wakaŵira na umoyo.—2 Sam. 7:12.

Nyengo zinyake Davide wakalembanga ivyo vikamuchitikiranga paumoyo wake nga umo tikuwonera pa Salimo 18, 51, na 52. Mu Salimo 23, Davide wakamuyaniska Yehova na muliska uyo wakulongozga, kusamphuska na kuvikilira mberere zake. Davide wakaŵa nga ni muliska uyu, ndipo wakakhumbanga kuteŵetera Yehova ‘mazuŵa ghose gha umoyo wake.’—Sal. 23:6.

Kumbukani kuti ni Yehova uyo wakamovwira Davide kuti walembe vyose ivi. Ivyo wakalemba vikusazgaposo mauchimi agho ghakaŵa kuti ghafiskikenge munthazi. Mwachiyelezgero, mu Salimo 110, Davide wakalemba za nyengo iyo Fumu yake ‘yizamukhalira ku woko la malyero (la Chiuta)’ kuchanya na kupokera nkhongono zikuru. Kuti yichite vichi? Kuthereska ŵalwani ŵa Chiuta na ‘kweruzga mitundu’ pa charu. Davide wakaŵa sekuru wa Mesiya uyo wakeneranga kuzakawusa kufuma kuchanya na kuzakaŵa “wasembe muyirayira.” (Sal. 110:1-6) Yesu wakasimikizgira kuti uchimi uwo uli mu Salimo 110 ukayowoyanga za iyo ndipo uzamufiskika kunthazi.—Mat. 22:41-45.

Nadi, Yehova wakamovwira Davide kuti walembe vyose, vya mu nyengo yake kweniso ivyo vizamumuchitikira munthazi apo wazamuwuskika na kulumba Yehova muyirayira. Ivi vikutovwira kupulikiska kuti ivyo vili pa Salimo 37:10, 11, 29 vikafiskika mu nyengo yakale ku Ŵaisrayeli kweniso vizamufiskika chomene munthazi para Chiuta wazakafiska ivyo wali kulayizga.—Wonani ndime 8 mu nkhani yakuti “Uzamuŵa na Ine mu Paradiso” mu magazini iyi.

Pa Salimo 61:8 na mavesi ghanyake ghakuyanako ghakulongora kuti Davide wakakhumbanga kulumba Yehova umoyo wake wose. Ndipo ghakulongora ivyo Davide wazamuchita kunthazi para Yehova wazakamuwuska.