Zuŵa linyake mudumbu munyake ku New Zealand wakawonelera vidiyo pa jw.org iyo yikulongosora kuti Yehova wakulongora lusungu mwakuchitapo kanthu. (Yes. 63:​7-9) Wakawona kuti walondezge ivyo wakasambira mwakovwira munthu munyake uyo wakakhumbi­kwiranga wovwiri. Pa zuŵa lenelili ili apo wakaguranga vinthu ku sitoro, wakakumana na mwanakazi munyake uyo wakakhumbikwiranga wovwiri ndipo wakamufumba usange wangamugulira chakurya. Mwanakazi uyu wakazomera. Mudumbu uyu wakati wafika na chakurya icho wakamugulira, wakamupharazgira mwanakazi uyu, ndipo wakamulongora thirakiti lakuti Kasi Masuzgo Ghamalenge?

Mwanakazi uyu wakamba kulira. Wakalongosora kuti wakaŵa Kaboni kweni wakaleka unenesko vyaka vinandi kumanyuma. Ndipouli, mwasonosono apa walombanga kwa Yehova kuti wamovwire kuti wawelere kwa iyo. Mudumbu uyu wakamupa mwanakazi uyu Baibolo, ndipo ŵakapangana kuti ŵambe kusambira. a

Nga ni Yehova, nase tingalongora lusungu ŵanthu, kusazgapo ŵachibali ŵithu kweniso ŵabali na ŵadumbu mu mpingo. Ndipo tingalongora lusungu mwakupenja mipata yakupharazgira ŵanji.