1. Chifukwa wuli tingayowoya kuti Abrahamu wakaŵa na chigomezgo chakukhora?

 YEHOVA wakalayizga mubwezi wake Abrahamu kuti mitundu yose ya ŵanthu yizamutumbikika kwizira mu mphapu yake. (Gen. 15:5; 22:18) Chifukwa chakuti Abrahamu wakaŵa na chipulikano chikuru mwa Chiuta, wakakhorwa kuti ivyo Chiuta wamulayizga vizamuchitika nadi. Nangauli vikaŵa nthena, apo Abrahamu wakaŵa na vyaka 100 kweniso muwoli wake vyaka 90, ŵakaŵa kuti ŵalije mwana. (Gen. 21:​1-7) Kweni Baibolo likutiphalira kuti: “Abrahamu wakaŵa na chigomezgo kweniso chipulikano kuti wazamuŵa wiske wa mitundu yinandi nangauli vikaŵa nga ni vyambura machitiko.” (Rom. 4:18) Imwe mukumanya kuti ivyo Abrahamu wakakhazganga vikafiskika nadi. Wakababa mwana msepuka uyo wakamulindilira kwanyengo yitali, zina lake Yisake. Chifukwa wuli Abrahamu wakaŵa na chigomezgo kuti Yehova wafiskenge ivyo wakamulayizga?

2. Chifukwa wuli Abrahamu wakakhorwa kuti layizgo la Yehova lifiskikenge?

² Chifukwa chakuti wakaŵa paubwezi wakukhora na Yehova, Abrahamu “wakakhorwa kuti Chiuta wangafiska icho walayizga.” (Rom. 4:21) Yehova wakamutemwa Abrahamu chifukwa cha chipulikano chake, ndipo wakamupima kuti ni murunji. (Yak. 2:23) Nga umo tikuwonera pa lemba la Ŵaroma 4:​18, Abrahamu wakaŵa na vyose, chipulikano na chigomezgo. Sono tiyeni tiwone ivyo mpositole Paulosi wakayowoya pa nkhani ya chigomezgo mu chaputara 5 cha buku la Ŵaroma.

3. Kasi Paulosi wakalongosora vichi vyakukhwaskana na chigomezgo?

³ Paulosi wakulongosora chifukwa icho tingaŵira ŵakusimikizga  kuti “chigomezgo” chingatikoleska libwe yayi. (Rom. 5:5) Kweniso wakutovwira kumanya umo chigomezgo chithu Chachikhristu chingakulira mwa ise. Apo tikusambira umo chigomezgo chikukulira kuyana na ivyo Paulosi wakalemba pa Ŵaroma 5:​1-5, yaniskani na ivyo namwe vikumuchitikirani. Para muchitenge nthena, muwonenge kuti chigomezgo chinu Chachikhristu chakura chomene kufuma apo mukasambilira unenesko. Kweniso kudumbiskana nkhani iyi kumovwiraninge kuwona umo mungachitira kuti chigomezgo chinu chikhore chomene kuluska umo chiliri pasono. Kweni chakwamba, tiyeni tiwone chigomezgo chiwemi chomene icho tili nacho, icho Paulosi wakati chikutigongoweska yayi.

4. Kasi lemba la Ŵaroma 5:​1, 2 likulongosora vichi?

⁴ Ŵazgani Ŵaroma 5:​1, 2. Mazgu agha Paulosi wakalembera ŵabali ŵa mpingo wa ku Romu. Ŵabali na ŵadumbu aŵa, ŵakasambira vya Yehova na Yesu, ndipo ŵakalongora chipulikano, na kuzgoka Ŵakhristu. Ntheura Chiuta ‘wakaŵapima kuŵa ŵarunji chifukwa cha chipulikano’ ndipo wakaŵaphakazga na mzimu wake utuŵa. Nadi, apa sono ŵakaŵa na chigomezgo chanadi icho chingatondeka yayi.

5. Kasi ntchigomezgo wuli icho ŵakuphakazgika ŵali nacho?

⁵ Pamanyuma Paulosi wakalembera kalata Ŵakhristu ŵakuphakazgika ŵa ku Efeso vyakukhwaskana na chigomezgo icho Chiuta wakaŵapa. Chigomezgo ichi chikasazgangapo kupokera ‘chiharo icho chasungikira ŵatuŵa.’ (Efe. 1:18) Kweniso Paulosi wakaphalira Ŵakolose uko ŵazamupokera njombe yawo. Iyo wakati ‘chigomezgo ichi chasungikira imwe kuchanya.’ (Kol. 1:​4, 5) Ipo chigomezgo cha Ŵakhristu ŵakuphakazgika ntchakuti ŵakuwuskikira ku umoyo wamuyirayira kuchanya, uko ŵamuwusa na Khristu.​—1 Tes. 4:​13-17; Chivu. 20:6.

6. Kasi mubali munyake wakuphakazgika wakayowoya vichi vya chigomezgo chake?

⁶ Ŵakhristu ŵakuphakazgika ŵakuzirwiska chomene chigomezgo ichi. Yumoza wa Ŵakhristu aŵa, Mubali Frederick Franz, wakayowoya umo  wakajipulikiranga pakuŵa na chigomezgo ichi. Iyo wakati: “Chigomezgo chithu chizamufiskika nadi, ndipo waliyose wa ise ŵa 144,000 wazamupokera ivyo Chiuta wali kutilayizga. Nakuti njombe yithu njiwemi chomene kuluska chilichose icho tingaghanaghanira.” Wati wateŵetera Chiuta mwakugomezgeka kwa vyaka vinandi, mu 1991 Mubali Franz wakayowoya kuti: “[Tichali] kuzirwiska chomene chigomezgo chithu ichi . . . . Apo tikulutilira kulindilira chigomezgo chithu kwanyengo yitali, vikutovwira kuti tiŵengeso ŵakuwonga chomene pakuŵa na chigomezgo ichi. Ndise ŵakukhumbisiska kuchilindilira chigomezgo ichi, nanga vingaŵa kuti tikukhumbikwira kulindilira vyaka mamiliyoni ghanandi. Sono nkhuchizirwiska chomene chigomezgo chithu kuluska kumasinda kose.”

7-8. Kasi ŵanandi mazuŵa ghano ŵali na chigomezgo wuli? (Ŵaroma 8:​20, 21)

⁷ Mazuŵa ghano ŵanandi awo ŵakuteŵetera Yehova ŵali na chigomezgo chakupambanako na ichi. Ŵali na chigomezgo cha nga icho Abrahamu wakaŵa nacho, chakuzakaŵa na umoyo wamuyirayira pa charu chapasi, pasi pa Ufumu wa Chiuta. (Heb. 11:​8-10, 13) Paulosi wakalemba vyakukhwaskana na chigomezgo chiwemi ichi. (Ŵazgani Ŵaroma 8:​20, 21.) Mukati mwasambira kakwamba vya malayizgo gha mu Baibolo, kasi ni layizgo wuli ilo mukamba kulilindilira mwakunweka? Kasi likaŵa lakuti zuŵa linyake muzamuŵa ŵakufikapo? Panji kasi likaŵa lakuti ŵakutemweka ŵinu awo ŵali kufwa ŵazamuŵaso ŵamoyo mu paradiso pa charu chapasi? Ivi vikapangiska kuti muŵe na vifukwa vyakukwana vyakuti mulindilire mwakunweka ivyo vikwiza munthazi.

⁸ Kwali tikulindilira kuti tizamuŵa na umoyo wamuyirayira kuchanya panji pa charu chapasi, tose tili na chigomezgo chiwemi chomene icho chikutipa vifukwa vyakuŵira ŵakukondwa. Ndipo chigomezgo chithu chingalutilira kuŵa chakukhora. Paulosi wakalongosora umo tingachitira kuti chigomezgo chithu chilutilire kuŵa chakukhora. Tiyeni sono tiwone ivyo wakalemba vyakukhwaskana na chigomezgo chithu. Kuchita nthena kutovwirenge kuti tigomezgenge chomene kuti ivyo tikulindilira vizamufiskika nadi.

9-10. Nga umo vikaŵira kwa Paulosi, kasi Ŵakhristu mazuŵa ghano ŵakwenera kukhazga vichi? (Ŵaroma 5:3) (Wonaniso vithuzi.)

⁹ Ŵazgani Ŵaroma 5:3. Wonani kuti Paulosi wakati para tikukumana na visuzgo vingawovwira kuti chigomezgo chithu chiŵe chakukhora. Fundo iyi yingatizizika. Ndipouli, unenesko ngwakuti ŵalondezgi wose ŵa Khristu ŵakwenera kukhazga kuti ŵatambuzgikenge. Wonani chiyelezgero cha Paulosi. Wakayowoya ku Ŵatesalonika kuti: “Apo tikaŵa na imwe, tikamuphaliraninge kuti tikumanenge na masuzgo, ndipo ndivyo nadi vyachitika nga umo mukumanyira.” (1 Tes. 3:4) Ndipo ku Ŵakorinte wakalemba kuti: “Ŵabali, tikukhumba kuti mumanye suzgo iyo yikatiwira . . . Tikamanyanga yayi kuti tingaŵa ŵamoyo.”​—2 Kor. 1:8; 11:​23-27.

¹⁰ Mazuŵa ghano napo, Ŵakhristu ŵakwenera kukhazga kuti ŵatambuzgikenge. (2 Tim. 3:12) Kasi namwe muli kutambuzgikapo chifukwa cha kuŵa na chipulikano mwa Yesu na kumulondezga? Nyengo zinyake ŵabwezi panji ŵachibali ŵinu ŵali kumunyozanipo. Panji ŵali kumuchitiranipo nkhaza. Kasi abwana ŵinu panji awo mukugwira nawo ntchito ŵali kumutambuzganipo chifukwa chakuti mukuchita vinthu mwaunenesko? (Heb. 13:18) Kasi boma lili kumutambuzganipo chifukwa chakuti mukaphalirangako ŵanji vya chigomezgo chinu? Mulimose umo vingaŵira, kwali tingakumana na suzgo wuli, kweni Paulosi wakati tikwenera kuŵa ŵakukondwa. Chifukwa wuli?

11. Chifukwa wuli tikukhumbikwira kuŵikapo mtima kuzizipizga chiyezgo chilichose icho tingakumana nacho?

¹¹ Tikwenera kukondwa para tikutambuzgika chifukwa pakuŵa vyakufumapo viwemi. Lemba la Ŵaroma 5:3 likuyowoya kuti, “suzgo yikubaba chizizipizgo.” Ŵakhristu wose ŵasanganenge na masuzgo. Ntheura, tose tikwenera kuŵikapo mtima kuzizipizga suzgo yiliyose iyo tingasangana nayo. Pekha para tichitenge nthena ndipo tizamupokera njombe yithu iyo tikulindilira. Tikwenera yayi kuŵa nga ni ŵanthu awo Yesu wakaŵayaniska na mbuto izo zikawira pa libwe. Pakwamba ŵakapokera mazgu na chimwemwe kweni ŵati ŵakumana na “suzgo panji nthambuzgo,” ŵakakhuŵara. (Mat. 13:​5, 6, 20, 21) Mbunenesko nadi kuti tikukondwa yayi para tikususkika panji kutambuzgika, kweni tikupindura para tazizipizga vinthu ivi. Kasi tikupindura wuli?

12. Kasi tikupindura wuli para tikuzizipizga viyezgo?

¹² Msambiri Yakobe wakayowoya vyandulo ivyo vikuŵapo para tazizipizga viyezgo. Wakalemba kuti: “Zomerezgani kuzizipizga kuti kufiske mulimo wake, mwakuti muŵe ŵakukwana na ŵambura kalema mu vyose, ŵambura kupeleŵera mu kanthu kalikose.” (Yak. 1:​2-4) Yakobe wakalongosora kuti kuzizipizga kuli na mulimo wakuti kufiske. Kasi ni mulimo wuli uwo kukufiska? Kukutovwira kuti tizikirenge chomene, tiŵe na chipulikano chikuru, kweniso tithembenge chomene Chiuta. Ndipouli, tikusangaso chandulo chinyake chifukwa cha kuzizipizga.

13-14. Kasi kuzizipizga kubaba vichi, ndipo vikukolerana wuli na chigomezgo chithu? (Ŵaroma 5:4)

¹³ Ŵazgani Ŵaroma 5:4. Paulosi wakayowoya kuti kuzizipizga kubaba “kuzomerezgeka na Chiuta.” Ntheura para mwazizipizga mukuŵa ŵakuzomerezgeka na Yehova. Kweni ichi chikung’anamura kuti Yehova wakukondwa para mukusangana na viyezgo panji masuzgo yayi. M’malo mwake wakukondwa na imwe chifukwa chakuti mwazizipizga mwakugomezgeka. Ntheura ntchakukhozga chomene kumanya kuti para tikuzizipizga tikukondweska Yehova.—Sal. 5:12.

¹⁴ Kumbukani kuti Abrahamu wakazizipizga viyezgo ndipo Chiuta wakakondwa nayo. Yehova wakamuwonanga kuŵa mubwezi wake kweniso kuti ni munthu wakunyoloka. (Gen. 15:6; Rom. 4:​13, 22) Ndimo vingaŵiraso kwa ise. Kuti Chiuta watitemwe vikuthemba pa unandi wa ivyo tachita mu gulu lake yayi panji mauteŵeti agho tingaŵa nawo. Iyo wakukondwa nase para tikuzizipizga mwakugomezgeka. Ndipo tose tingazizipizga, kwali tili ŵamsinkhu wuli, kwali vinthu  vili wuli kwa ise, panji tili na maluso wuli. Kasi pasono mukuzizipizga suzgo yinyake? Usange ni nthena, manyani kuti mukumukondweska Yehova. Para tamanya kuti Chiuta wakukondwa nase, chigomezgo chithu chakuti wazamutitumbika chikuŵa chanadi.

15. Kasi Paulosi wakayowoyaso fundo wuli, ndipo chifukwa wuli ŵanyake ŵangazizikika na fundo iyi?

¹⁵ Nga umo Paulosi wakalongosolera, Yehova wakukondwa nase para tikuzizipizga mwakugomezgeka viyezgo ivyo tikukumana navyo. Wonani umo Paulosi wakayowoyeraso pa nkhani iyi, iyo wakati: “Kuzomerezgeka na Chiuta, [kukubaba] chigomezgo, ndipo chigomezgo chikutigongoweska yayi.” (Rom. 5:​4, 5) Fundo iyi ŵanyake yingaŵazizika. Chifukwa wuli? Chifukwa ntchakuti kukwambilira, pa Ŵaroma 5:​2, Paulosi wakayowoya kuti Ŵakhristu ŵa ku Romu ŵakaŵa kale na “chigomezgo cha uchindami wa Chiuta.” Ntheura munyake wangafumba kuti, ‘Usange Ŵakhristu aŵa ŵakaŵa kale na chigomezgo, chifukwa wuli Paulosi wakayowoyaso vya chigomezgo mu nkhani yake?’

16. Kasi munthu chigomezgo chake chikwamba wuli kukura pachoko na pachoko? (Wonaniso vithuzi.)

¹⁶ Tingapulikiska ivyo Paulosi wakang’anamuranga para tingamanya kuti chigomezgo ntchinthu icho chikukura. Kuti mupulikiske makora ghanaghanirani fumbo ili: Kasi mukukumbuka apo kakwamba mukapulika za chigomezgo chakukondweska icho chili mu Mazgu gha Chiuta? Panji pa nyengo iyo mukaghanaghananga kuti fundo yakuti tizamukhala kwamuyirayira pa charu chapasi nangauli njiwemi kweni vingachitika yayi. Ndipouli, mukati mwamba kusambira vinandi vya Yehova na malayizgo gha mu Baibolo, mukakhorwa kuti vizamuchitika nadi kuzakakhala pa charu chapasi kwamuyirayira.

17. Kasi chigomezgo chinu chalutilira wuli kukura pamanyuma pa kujipeleka na kubatizika?

¹⁷ Nanga ni apo mukaŵa kuti mwabatizika, chigomezgo chinu chikalutilira kukura apo mukalutiliranga kusambira vinandi na kuŵa ŵakukhwima mwauzimu. (Heb. 5:13–6:1) Mukwenera kuti mwawona kuti mazgu agho ghakusangika pa Ŵaroma 5:​2-4 ngaunenesko. Mwasanganapo na masuzgo ghakupambanapambana, kweni mwazizipizga ndipo mwawona kuti Chiuta wakukondwa  namwe. Chifukwa chakuti mukumanya kuti Chiuta wakumutemwani na kukondwa namwe, sono muli na vifukwa vinandi chomene vyakukhazgira kuti muzamupika ivyo Chiuta wali kumulayizgani. Sono chigomezgo chinu ntchakukhora chomene kuluska pakwamba, ndipo ntchanadi kwa imwe. Chikumovwirani chomene umo mukwenera kuchitira vinthu pa umoyo winu, nga umo mukwenera kuchitira vinthu na ŵamumbumba yinu, umo mukusankhira vinthu, kweniso umo mukugwiliskilira ntchito nyengo yinu.

18. Kasi Yehova wakulayizga kuti vichi?

¹⁸ Mpositole Paulosi wakasazgirapo fundo yakuzirwa chomene yakukhwaskana na chigomezgo icho tili nacho padera pa kuŵa ŵakuzomerezgeka na Chiuta. Wakutisimikizgira kuti ivyo tikugomezga vizamufiskika nadi. Chifukwa wuli mukwenera kugomezga kuti vizamuchitika nadi? Paulosi wakaphaliraso Ŵakhristu fundo iyi, yakuti: “Chigomezgo chikutigongoweska yayi, chifukwa Chiuta watipungulira chitemwa chake mu mitima yithu kwizira mu mzimu utuŵa, uwo wali kutipa.” (Rom. 5:5) Muli na vifukwa vyakukwana vyakugomezgera kuti Yehova wazamufiska nadi ivyo wamulayizgani.

19. Kasi mungasimikizga vichi vya chigomezgo chinu?

¹⁹ Ghanaghanirani layizgo ilo Yehova wakaphalira Abrahamu kweniso umo wakaŵira wakuzomerezgeka kwa iyo na kumuwona kuŵa mubwezi wake. Ivyo Abrahamu wakalindiliranga vikafiskika nadi. Baibolo likuti: “Abrahamu wakati walongora kuzikira, wakapokera layizgo ili.” (Heb. 6:15; 11:​9, 18; Rom. 4:​20-22) Wakalindilira pawaka yayi. Namweso mukwenera kugomezga kuti para mulutilirenge kugomezgeka, muzamupokera njombe iyo mukulindilira. Chigomezgo chinu ntchanadi; chikumovwirani kuti muŵe ŵakukondwa, ndipo muzamukhuŵarapo yayi. (Rom. 12:12) Paulosi wakalemba kuti: “Mphanyi Chiuta uyo wakupeleka chigomezgo wamupani chimwemwe chikuru na mtende chifukwa mukumugomezga, mwakuti kwizira mu nkhongono ya mzimu utuŵa muŵe na chigomezgo chikuru.”—Rom. 15:13.