1-3. (a) Kasi Ŵakhristu ŵakulongora wuli kuti maungano ngakuzirwa? (Wonani chithuzi chakwamba.) (b) Kasi mu nkhani iyi tidumbiskanenge vichi?

APO mudumbu munyake zina lake Korina wakaŵa na vyaka 17, anyina ŵakakakika na kuluta ku msasa wakusuzgirako ŵanthu. Pamanyuma, Korina nayo wakatolekera ku Siberia uko kukaŵa kutali chomene na kukwake. Ku Siberia, ŵakamugwiliskanga ntchito pa famu ya viŵeto nga ni muzga. Nyengo zinyake ŵakamugwiliskanga ntchito nanga ni para kukuzizima uku walije champhepo. Nangauli vikaŵa nthena, kweni Korina pamoza na mudumbu munyake ŵakaŵikapo mtima kuti ŵalute ku maungano gha mpingo.

² Korina wakati: “Tikanyamuka ku mise na kwenda mtunda wa makilomita 25 (mamayilosi 15) kuti tifike pakukwelera tireni. Tireni yikanyamuka 2 koloko usiku, ndipo yikati yenda kwa maora 6, tikakhira na kwamba kwendaso pasi mtunda wa makilomita 10 (mamayilosi 6) kuti tifike pa malo gha maungano.” Korina wakakondwa na ulendo uwu. Iyo wakati: “Pa ungano tikasambira Gongwe la Mulinda kweniso tikimba sumu za Ufumu. Ungano  uwu ukakhozga chomene chipulikano chithu.” Ŵadumbu ŵaŵiri aŵa ŵakawelera ku famu pati pajumpha mazuŵa ghatatu, kweni mweneko wa famu wakamanya yayi kuti ŵakawukapo.

³ Nyengo zose ŵanthu ŵa Yehova ŵakunweka chomene kuwungana na ŵanyawo. Mwachiyelezgero, Ŵakhristu ŵakwambilira ‘ŵakawungananga pamoza’ kuti ŵasope Yehova. (Mil. 2:42) Tikumanya kuti namwe mukughatemwa chomene maungano. Kweni nyengo zinyake chikuŵa chipusu chara kuti mulute ku maungano. Mungatangwanika na ntchito yakulembeka panji vinthu vinyake, panjiso mungapulika waka vyakulema. Kweni kasi ntchivichi icho chingatovwira kuti nyengo zose tisangikenge pa maungano? ^[1] Kasi tingawovwira wuli awo tikuŵasambizga Baibolo na ŵanji kuti ŵawunganenge nyengo zose? Nkhani iyi yilongosorenge vifukwa 8 ivyo tikwenera kusangikira pa maungano nyengo zose. Vifukwa ivi vyaŵikika mu magulu ghatatu: Umo ise tikukhwaskikira, umo ŵanji ŵakukhwaskikira, kweniso umo Yehova wakukhwaskikira. ^[2]

4. Kasi maungano ghakutovwira wuli?

⁴ Maungano ghakutisambizga. Ungano uliwose ukutovwira kuti timumanye makora Yehova. Mwachiyelezgero, mwasonosono apa, mipingo yinyake yasambiranga buku la Sendelerani kwa Yehova pa Sambiro la Baibolo la Mpingo. Pa nyengo iyi, tikawovwirika kuti tilutilire kutemwa chomene Yehova chifukwa tikamanya mikhaliro yake yiwemi. Kweniso tikakhozgekanga chomene na fundo za ŵabali na ŵadumbu. Mazgu gha Chiuta tingaghapulikiska makora pa maungano usange tikutegherezga nkhani, viyelezgero, kweniso para tikuŵazga Baibolo. (Neh. 8:8) Usange sabata yiliyose tikunozgekera maungano gha mpingo na kutegherezga fundo za ŵabali na ŵadumbu, tikusambira vinthu vinandi.

5. Kasi imwe maungano ghamovwirani wuli?

⁵ Maungano ghakutovwira kuti nyengo zose tilondezgenge fundo za Yehova. (1 Tes. 4:9, 10) Mwachiyelezgero, Sambiro la Gongwe la Mulinda likulembeka mwakuyana na ivyo ŵanthu ŵa Chiuta ŵakukhumba. Kasi Sambiro ili lamovwirani wuli kusanda ivyo mukukhumba kuchita pa umoyo? Kasi lamovwirani wuli pa nkhani yakugowokera ŵanji ndiposo umo mungalombera? Maungano ghanyake ghakutovwira umo tingapharazgira makora makani ghawemi kweniso umo tingasambizgira makora fundo za mu malemba.—Mat. 28:19, 20.

6. Kasi maungano ghakutovwira wuli kuti tilutilire kuŵa ŵakukhora?

⁶ Maungano ghakutikozga. Charu cha Satana ichi chikuyezgayezga kuti chilopweske chipulikano chithu, ndipo nyengo zinyake tikusuzgika maghanoghano na kugongowa. Kweni maungano ghakutikhozga na kutovwira kuti tilutilire kuteŵetera Yehova. (Ŵazgani Milimo 15:30-32.) Kanandi pa maungano ghithu tikudumbiskana umo mauchimi gha mu Baibolo ghakufiskikira. Mauchimi agha ghakutovwira kumanya kuti vinyake vyose ivyo Yehova walayizga kuti wachitenge munthazi, vifiskikenge nadi. Ŵabali na ŵadumbu ŵakutikhozga para ŵakudumba nkhani, kuzgorapo pa maungano, kweniso para ŵakwimba sumu zakulumba Yehova kufumira pasi pa mtima. (1 Kor. 14:26) Ŵabali na ŵadumbu ŵakutikhozgaso para tikuchezga nawo pambere maungano ghandambe ndiposo para ghamara.—1 Kor. 16:17, 18.

7. Chifukwa wuli nyengo zose tikwenera kusangika pa maungano?

 ⁷ Para tili pa maungano tikulongozgeka na mzimu utuŵa. Yesu Khristu wakati: “Uyo wali na khutu wapulike icho mzimu ukuyowoya ku mipingo.” (Chivu. 2:7) Yesu wakugwiliskira ntchito mzimu utuŵa pakulongozga mipingo. Mzimu utuŵa ukutovwira kuti tikane viyezgo kweniso kuti tipharazgenge mwachikanga. Ukutovwiraso kuti tisankhenge vinthu mwamahara. Lekani nyengo zose tikwenera kusangika pa maungano kuti tilutilire kulongozgeka na mzimu utuŵa.

8. Kasi ŵanji ŵakovwirika wuli para tikusangika pa maungano, tikuzgorapo, ndiposo para tikwimba sumu? (Wonaniso bokosi lakuti “Nyengo Zose Wakaweranga Wakukondwa.”)

⁸ Maungano ghakutipa mwaŵi wakulongora kuti tikutemwa ŵabali na ŵadumbu ŵithu. Ŵabali na ŵadumbu ŵanyake mu mpingo ŵakuzizipizga masuzgo ghanandi. Mphake kuti Paulosi wakati “tifipiranenge mtima.” (Heb. 10:24, 25; mazgu ghamusi) Para tikuwungana tikulongora kuti tikufipira mtima ŵabali ŵithu. Ntheura para tili pa maungano tikwenera kuchezga na ŵabali ŵithu na kuŵakhozga. Ŵabali ŵithu ŵakukhozgekaso para tikuzgorapo na kwimba sumu kufumira pasi pa mtima.—Kol. 3:16.

9, 10. (a) Kuyana na mazgu gha Yesu gha pa Yohane 10:16, chifukwa wuli maungano ngakuzirwa? (b) Kasi awo ŵabali ŵawo ŵali kuŵakana, ŵakukhwaskika wuli para ise tikusangika pa maungano nyengo zose?

⁹ Maungano ghakutovwira kuti tiŵe pamoza na Ŵakhristu ŵanyithu. (Ŵazgani Yohane 10:16.) Yesu wakajiyaniska na muliska, ndipo ŵalondezgi ŵake wakaŵayaniska na mskambo wa mberere. Tiyelezgere kuti mberere ziŵiri zili pachanya pa phiri, zinyake ziŵiri zili mu dambo, ndipo yimoza yili kwayekha. Kasi mberere zinkhondi izi tingati ni mskambo? Chara, chifukwa mskambo ni gulu la mberere izo zili pamoza ndipo zikulongozgeka na muliska. Mwakuyana waka, tikwenera kusangika pa maungano, chifukwa ghakutovwira kuti tiŵe pamoza na ŵabali ŵithu. Para tawungana na Ŵakhristu ŵanyithu, tikuŵa “mskambo umoza” pasi pa “muliska yumoza.”

¹⁰ Maungano ghakutovwiraso kuti tiŵe ŵakukolerana na ŵabali ŵithu. (Sal. 133:1) Ŵakhristu ŵanyake mu mpingo, ŵabali ŵawo ŵali kuŵakana. Kweni Yesu wakalayizga kuti waŵapenge ŵabali na ŵadumbu. (Mrk. 10:29, 30) Ntheura para nyengo zose mukusangika pa maungano, mukuŵa dada, mama, mulongosi, mukuru na munung’una wa ŵabali aŵa. Fundo iyi yikuchiska tose kuti nyengo zose tisangikenge pa maungano.

11. Kasi maungano ghakutipa mwaŵi wuli?

¹¹ Pa maungano tikusopa Yehova. Tikwenera kuwonga, kuchindika, na kulumba Yehova chifukwa ndiyo wali kutilenga. (Ŵazgani Chivumbuzi 7:12.) Para tili pa maungano, tikulomba kwa Yehova, tikumwimbira sumu, na kuyowoya viwemi vya iyo. Tikuwonga chomene kuti sabata yiliyose tikuŵa na mwaŵi wakusopa Yehova.

12. Kasi Yehova wakujipulika wuli para tikuwungana?

¹² Yehova wakukhumbaso kuti timupulikirenge. Iyo wakutiphalira kuti nyengo zose tiwunganenge, chomenechomene apo tikusendelera kuumaliro wa charu ichi. Yehova wakukondwa chomene para tikuwungana chifukwa vikulongora kuti tikumupulikira. (1 Yoh. 3:22) Wakuwona vyose ivyo tikujumphamo kuti tisangike pa maungano, ndipo wakuwonga chomene.—Heb. 6:10.

13, 14. Kasi maungano ghakutovwira wuli kuŵa pafupi na Yehova kweniso Yesu?

¹³ Para tili pa maungano, tikulongora kuti tikukhumba kuŵa pafupi na Yehova kweniso Yesu. Yehova, uyo ni Msambizgi withu Mukuru, wakutisambizga kwizira mu Mazgu ghake Baibolo. (Yes. 30:20, 21) Nanga ni awo nkhakwamba kwiza ku maungano yithu, ŵakuwona kuti “Chiuta wali nadi pakati” pithu. (1 Kor. 14:23-25) Yehova wakugwiliskira ntchito mzimu utuŵa pakulongozga maungano yithu, ndipo vyose ivyo tikusambira pa maungano vikufuma kwa iyo. Ntheura para tili pa maungano, tikutegherezga kwa Yehova ndipo tikuwona umo wakutitemwera. Nadi, maungano ghakutovwira kuti tiŵe pafupi chomene na Yehova.

¹⁴ Yesu wakati: “Apo pali ŵaŵiri panji ŵatatu ŵawungana pamoza mu zina lane, nane nili pakati pawo.” (Mat. 18:20) Baibolo likutiso Yesu “wakwenda pakati” pa mipingo. (Chivu. 1:20–2:1) Yehova na Yesu ŵakuŵa nase pa maungano yithu, ndipo ŵakutikhozga. Kasi mukughanaghana kuti Yehova wakujipulika wuli para mukuyezgayezga kuwungana kuti muŵe pafupi na iyo kweniso Yesu?

15. Kasi tikulongora wuli kuti tikupulikira Yehova para tikuwungana?

¹⁵ Para tili pa maungano tikulongora kuti tikupulikira Yehova. Nangauli Yehova wali kuŵika dango lakuti tiwunganenge, kweni wakutichichizga yayi. (Yes. 43:23) Ntheura para tikumupulikira na kusangika pa maungano, tikulongora kuti tikumutemwa kweniso tikugomezga kuti iyo ndiyo wali na mazaza pa ise. (Rom. 6:17) Mwachiyelezgero, kasi tingachita wuli usange bwana withu wakukhumba kuti pa nyengo ya maungano ghanyake tigwirenge ntchito? Wuli usange boma layowoya kuti litikakenge, kutilipiska, panji kutilanga munthowa yinyake para tasangika pa maungano? Kweniso wuli usange takhala ku maungano chifukwa chakuti tikukhumba kuchita vinthu vinyake? Pa vyakuchitika ivi, tikukhumbikwira kuzgora fumbo lakuti, kasi tipulikirenge njani? (Mil. 5:29) Para tasankha kupulikira Yehova na kuŵa ku chigaŵa cha Ufumu wake, tikukondweska mtima wake.—Zinth. 27:11.

16, 17. (a) Kasi Ŵakhristu ŵakwambilira ŵakaghawonanga wuli maungano? (b) Kasi Mubali George Gangas wakaghawonanga wuli maungano?

¹⁶ Kufuma waka pa Pentekoste 33 C.E., Ŵakhristu ŵakwambilira ŵakawungananga pamoza kuti ŵasope Yehova. Baibolo likuti: “Ŵakalutilira kusambira ku ŵapositole. Ŵakawungana pamoza.” (Mil. 2:42) Ŵakalekapo yayi kuwungana pamoza nanga ni apo ŵakayuzgikanga na boma la Ŵaroma ndiposo ŵalongozgi ŵa chisopa cha Ŵayuda. Nangauli chikaŵa chipusu yayi, kweni nyengo zose  ŵakawungananga pamoza.

¹⁷ Mazuŵa ghano napo, ŵateŵeti ŵanandi ŵa Yehova ŵakukondwa ndipo ŵakuwonga chomene para ŵali pa maungano. Mubali George Gangas, uyo wakateŵetera mu Wupu Wakulongozga kwa vyaka vyakujumpha 22, wakati: “Ine, umoyo wane ukukondwa na kukhozgeka chomene para nawungana na ŵabali. Nkhutemwa kufika mwakutendekera pa Nyumba ya Ufumu, ndiposo kanandi nkhuŵa yumoza wa ŵanthu awo ŵakuwera paumaliro. Mtima wane ukukondwa chomene para nkhuchezga na ŵanthu ŵa Chiuta. Para nili pakati pa ŵanthu ŵa Chiuta vikuŵa nga kuti nili na ŵamumbumba yane pa nyumba, ndipo nkhujiwona kuti nili nadi mu paradiso wauzimu.” Kweniso wakati: “Nyengo zose mtima na maghanoghano ghane vikuŵa ku maungano.”

18. Kasi maungano mukughawona wuli, ndipo mulutilirenge kuchita vichi?

¹⁸ Kasi namwe mukuwona kuti maungano ghakumovwirani pakusopa Yehova? Usange ni nthena, ipo ŵikanipo mtima kuti nyengo zose muwunganenge na ŵabali na ŵadumbu. Mulongorani Yehova kuti namwe muli na mtima wakuyana na wa Davide, uyo wakati: “Yehova, nkhutemwa nyumba iyo mukukhalamo, malo agho mukukhala uchindami winu.”—Sal. 26:8.