Kasi Uteŵeti Winu Uli Nga Ni Jumi?
UTEŴETI withu ngwakuzirwa ndipo ngwakukhumbikwa chomene. Kweni ŵanthu ŵanyake awo tikuŵapharazgira ŵakumanya yayi fundo iyi. Nangauli ŵanyake ŵakunweka na uthenga uwo tikuŵapharazgira, kweni ŵakuwona kuti palije chifukwa chakuti tiŵasambizgirenge Mazgu gha Chiuta.
Mwachiyelezgero, Gavin wakamba kuwungana na Ŵakaboni ŵa Yehova, kweni wakakhumbanga yayi kuti ŵamusambizgenge Baibolo. Iyo wakati: “Nkhamanyanga vinandi yayi vya mu Baibolo, ndipo nkhakhumbanga yayi kuti ŵanthu ŵamanye fundo iyi. Nkhawopanga kupuluskika, kweniso nkhakhumbanga yayi kujipeleka na kuŵa Kaboni wa Yehova.” Kasi imwe mukumanenge na Gavin, mwate mudumurenge waka mu mtima winu kuti wangazomera yayi kusambira Baibolo? Usange ni nthena, ipo mazgu agho Chiuta wakaphalira Ŵaisrayeli ghangamovwirani kuti muŵawonenge mwakwenelera ŵanthu ŵanthena. Chiuta wakati: “Mazgu ghane ghanthonyenge nga ni jumi, nga ni vula yamswera pa utheka.” (Doto. 32:2) Tiyeni tiwone vinthu vinyake vyakukhwaskana na jumi ivyo vingatovwira apo tikupharazgira ŵanthu ŵakupambanapambana.—1 Tim. 2:3, 4.
UTEŴETI WITHU UKUYANA WULI NA JUMI?
Jumi likuwa pachokopachoko. Jumi likupangika para tumphepo twakotcha twakumana na tumphepo twakuzizima mu mlengalenga. Kasi mazgu gha Yehova ghakayana wuli na “jumi”? Pakuyowoya na ŵanthu ŵake, Yehova wakayowoyanga mwalusungu, mwakuzika panji kuti mwapachokopachoko, ndipo wakaŵaghanaghaniranga. Nase tingamuyezga para tikuleka kuchichizga ŵanthu kuti ŵasinthe ivyo ŵakugomezga. Tikwenera kuŵachiska kuti ŵaghanaghanirengepo na kusankha ŵekha chakuchita pa ivyo tikuŵapharazgira. Para tikughanaghanira ŵanthu awo tikuŵapharazgira, chiŵenge chipusu kuti ŵazomere uthenga wa mu Baibolo ndipo tovwirenge ŵanthu ŵanandi kumanya unenesko.
Jumi likusamphuska. Ŵanthu awo tikuŵapharazgira ŵakusamphuskika para tikughanaghanira nthowa izo tingaŵawovwilira. Mubali Chris uyo pakwamba wakakumana na Gavin kuti wamusambizgenge Baibolo, wakamuchichizga yayi wati wakana. M’malo mwake, Chris wakayezga nthowa zakupambanapambana kuti wawovwire Gavin kuti wazomere kusambira Baibolo. Iyo wakaphalira Gavin kuti pali fundo yikuru iyo yikuyowoyeka chomene mu Baibolo, ndipo wakati usange wangayimanya wapulikiskenge ivyo wakusambira pa maungano. Pamanyuma, Chris wakalongosora kuti uchimi unyake wa mu Baibolo ndiwo iyo ukamukhorweska kuti Baibolo ni buku launenesko. Ivi vikapangiska kuti Chris na Gavin ŵambe kudumbiskana mwakukwana umo mauchimi gha mu Baibolo ghakufiskikira. Ivyo ŵakadumbiskana vikamovwira Gavin kuti wazomere kusambira Baibolo.
Jumi likovwira vyamoyo. Kanandi pakujumpha myezi yinandi kuti vula yilokwe ku Israyeli. Ivi vikupangiska kuti kuŵe chilangalanga. Para pa nyengo iyi jumi kulije, vyakumera vinandi vikufota na kufwa. Yehova wakayowoyerathu kuti mu mazuŵa ghaumaliro, kuzamuŵa chilangalanga chauzimu panji kuti njara “ya kupulika mazgu gha Yehova.” (Am. 8:11) Iyo wakalayizga kuti Ŵakhristu ŵakuphakazgika ŵazamuŵa nga ni “jumi lakufuma kwa Yehova” para ŵakupharazga makani ghawemi. Mulimo uwu ŵakuchitira lumoza na ŵa “mberere zinyake.” (Mika 5:7; Yoh. 10:16) Uthenga wa Ufumu uwo tikupharazga ukovwira kuti ŵanthu awo ŵali na njara yauzimu, ŵazakasange umoyo wamuyirayira. Ipo tikwenera kuwuwona mwakupepuka yayi mulimo wakupharazga.
Jumi ni thumbiko lakufuma kwa Yehova. (Doto. 33:13) Ŵanthu awo ŵakuzomera uthenga withu ŵakutumbikika. Gavin wakatumbikika chomene wati wazomera kusambira Baibolo. Wakasanga mazgoro gha mafumbo ghake ghose agho wakaŵa nagho. Pasono wali kubatizika ndipo wakukondwa kupharazga makani ghawemi gha Ufumu pamoza na muwoli wake, Joyce.
Ŵakaboni ŵa Yehova ŵakunyeweska charu chose na makani ghawemi gha Ufumu
ZIRWISKANI UTEŴETI WINU
Usange mupharazgi waliyose wakuyaniska uteŵeti wake na jumi, vimovwirenge kumanya kuti ivyo wakuchita ni vyakuzirwa chomene. Dongo linganyewa chomene yayi na kanthonyezi kamoza, kweni pakwenera kuŵa manthonyezi ghanandi. Mwakuyana waka, ivyo waliyose wa ise wakuchita payekha mu uteŵeti vingayana waka na kanthonyezi kamoza ka jumi. Tikukwaniska kuchitira “ukaboni ku mitundu yose” chifukwa taŵateŵeti ŵa Yehova tose tikuŵikapo mtima pa ntchito yakupharazga. (Mat. 24:14) Mphanyi awo tikuŵapharazgira ŵasanga chandulo na uteŵeti withu. Para ŵanthu ŵakusanga chandulo, uteŵeti withu uŵenge nadi nga ni jumi ilo likuwa pachokopachoko, likusamphuska, na kovwira vyamoyo.