1. Chifukwa wuli mpositole Paulosi wakaphalira Ŵakhristu Ŵachihebere kuti ŵakhwimiskanenge “chomene”?

CHIFUKWA wuli sono ndipo tikwenera kukhwimiska chomene ŵanyithu? Mpositole Paulosi wakayowoya chifukwa mu kalata iyo wakalembera Ŵakhristu Ŵachihebere. Wakaŵaphalira kuti: “Tiyeni tighanaghaniranenge na kuchiskana kuti titemwanenge na kuchita milimo yiwemi. Tingalekanga yayi kuwungana pamoza nga umo ŵakuchitira ŵanyake, kweni tikhwimiskanenge, tichitenge vyose ivi chomene apo tikuwona zuŵa likuneng’enera.” (Heb. 10:24, 25) Pambere vyaka vinkhondi vindakwane kufuma apo Paulosi wakalembera mazgu agha, Ŵakhristu Ŵachiyuda awo ŵakakhalanga mu Yerusalemu ŵakamanya kuti ‘zuŵa la Yehova’ laneng’enera chifukwa ŵakawona chimanyikwiro icho Yesu wakaŵaphalira. Ntheura ŵakeneranga kuchimbira mu msumba uwu. (Mil. 2:19, 20; Luka 21:20-22) Zuŵa la Yehova likiza mu 70 C.E. apo Ŵaroma ŵakaparanya Yerusalemu. Ili likaŵa pharanyiko lakufuma kwa Yehova.

2. Chifukwa wuli mazuŵa ghano ntchakuzirwa chomene kuti tifipiranenge mtima?

² Mazuŵa ghano, tili na ukaboni wose wakulongora kuti ‘zuŵa la  Yehova likuru na lakofya chomene’ lili pafupi. (Joye. 2:11) Ntchimi Zefaniya yikati: “Zuŵa likuru la Yehova lili pafupi! Laneng’enera, ndipo likwiza mwaluŵiro chomene!” (Zef. 1:14) Nase uchimi uwu ukutikhwaska. Pakuti zuŵa la Yehova laneng’enera, Paulosi wakati “tifipiranenge mtima na kuchiskana kuti titemwanenge na kuchita milimo yiwemi.” (Heb. 10:24, mazgu ghamusi) Ntheura sono ndipo tikwenera kughanaghanira chomene ŵabali ŵithu kuti tiŵakhwimiskenge nyengo yiliyose apo mphakwenelera.

3. Kasi mpositole Paulosi wakayowoya vichi pa nkhani ya kukhwimiskana? (Wonani chithuzi chakwamba.)

³ “Mtima wa munthu ukulopwa chifukwa cha kwenjerwa, kweni mazgu ghawemi ghakuwukondweska.” (Zinth. 12:25) Mazgu agha ngaunenesko nadi. Tose tikukhumba kukhozgeka panji kukhwimiskika nyengo na nyengo. Mazgu agho Paulosi wakayowoya ghakulongora kuti nanga ni awo ŵali na udindo wa kukhwimiska ŵanji, nawo ŵakukhumba kukhozgeka nyengo zinyake. Paulosi wakalembera Ŵakhristu awo ŵakakhalanga mu Romu kuti: “Nkhukhumba chomene kumuwonani, kuti nizakamupaniko chawanangwa chauzimu kuti mukhozgeke, panji kuti tizakakhwimiskane, waliyose kwizira mu chipulikano cha munyake, chinu na chane.” (Rom. 1:11, 12) Mazgu agha ghakulongora kuti nanga ni Paulosi, uyo kanandi wakakhwimiskanga ŵanyake, nyengo zinyake nayo wakakhumbanga kukhwimiskika.—Ŵerengani Ŵaroma 15:30-32.

4, 5. Mbanjani awo tingaŵakhwimiska mazuŵa ghano, ndipo chifukwa wuli?

⁴ Ŵakhristu awo ŵakuchita uteŵeti wanyengozose ŵakwenera kuwongeka chomene. Ŵanyake mwa iwo ŵakuchita upayiniya. Ŵanandi ŵajinora vinandi kuti ŵachite upayiniya. Ndimo ŵachitiraso ŵamishonale, awo ŵakuteŵetera pa Beteli, ŵalaŵiliri ŵa dera na ŵawoli ŵawo, na awo ŵakuteŵetera mu maofesi gha kung’anamura mabuku. Wose aŵa ŵajinora vinthu vinyake kuti ŵaŵe na nyengo yinandi yakuteŵetera Yehova. Ntheura tikwenera kuŵakhwimiska panji kuti kuŵakhozga. Paliso ŵanyake awo ŵangatemwa kulutizga uteŵeti wanyengozose kweni ŵangafiska yayi chifukwa cha umo vinthu viliri pa umoyo wawo. Aŵa nawo tikwenera kuŵakhwimiska.

⁵ Pali ŵabali na ŵadumbu ŵanyake awo ŵandatore panji kutengwa chifukwa ŵakukhumba kupulikira ulongozgi ŵa kutora panji kutengwa “mu Fumu pera.” Nawo tikwenera kuŵakhozga. (1 Kor. 7:39) Kweniso ŵawoli awo ŵakuyezgayezga kuchita makora ŵakuwonga chomene para ŵafumu ŵawo ŵakuŵakhozga na kuŵalumba. (Zinth. 31:28, 31) Ŵanyake awo tingaŵakhozga Mbakhristu awo ŵakulutilira kugomezgeka nangauli ŵakutambuzgika panji ŵakulwara. (2 Tes. 1:3-5) Yehova na Yesu Khristu ŵakusanguluska ŵanthu ŵakugomezgeka aŵa.—Ŵerengani 2 Ŵatesalonika 2:16, 17.

6. Kasi ŵalara awo ŵakuyowoyeka pa Yesaya 32:1, 2 ŵali na mulimo wuli?

⁶ Ŵerengani Yesaya 32:1, 2. Yesu Khristu wakukhozga na kupeleka ulongozgi kwa awo ŵakugongowa panyengo iyo ŵakukhumbikwira ulongozgi. Wakuchita nthena kwizira mu ŵabali ŵake ŵakuphakazgika ndiposo “ŵakaronga” awo mbamberere zinyake. Nakuti ndimo vikwenera kuŵira, chifukwa ŵalara aŵa ni “mafumu” gha chipulikano chithu yayi, kweni ‘mbantchito ŵanyithu’ awo ŵakutovwira kuti tiŵe ŵachimwemwe.—2 Kor. 1:24.

7, 8. Padera pa kuyowoya mazgu gha kukhozga ŵabali, kasi ŵalara ŵangachitaso vichi?

⁷ Mpositole Paulosi ntchakuwonerapo chiwemi chomene pa nkhani ya kukhwimiska ŵanji. Ŵakhristu ŵa ku Tesalonika awo ŵakatambuzgikanga wakaŵalembera kuti: “Pakumutemwani chomene, tikakhumbisiska kumupani waka makani ghawemi gha Chiuta yayi, kweniso umoyo withu, chifukwa tikamutemwani chomene.”—1 Tes. 2:8.

 ⁸ Kweni ni nyengo zose yayi apo kuyowoya waka mazgu ghakukhozga nkhwakukwana. Paulosi wakaphalira ŵalara ŵa ku Efeso kuti: ‘Mukwenera kovwira awo ŵakukhumbikwira wovwiri, ndipo mukumbukenge mazgu gha Fumu Yesu, ghakuti: ‘Uyo wakupeleka wakukondwa chomene kuluska uyo wakupokera.’’ (Mil. 20:35) Paulosi wakaŵakhozganga ŵabali ŵake, kweniso wakaŵa wakunozgeka “kutaya vyake vyose na kujipeleka nkhanira” chifukwa cha iwo. (2 Kor. 12:15) Ndimo ŵalara ŵakwenera kuchitira. Ŵakwenera kukhwimiska na kupembuzga ŵabali, kweniso ŵakwenera kuchita vinthu vyakulongora kuti ŵakuŵafipira mtima.—1 Kor. 14:3.

9. Kasi ŵalara ŵakwenera kupeleka wuli ulongozgi kuti uŵe wakukhozga?

⁹ Nyengo zinyake ŵalara ŵangakhumbikwira kupeleka ulongozgi kuti ŵakhozge ŵanji. Kweni ŵakwenera kulondezga fundo za mu Baibolo pakupeleka ulongozgi kuti uŵe wakukhozga. Yesu wakati wafwa na kuwuskika, wakatipa chiyelezgero chiwemi chomene pa nkhani ya kupeleka ulongozgi. Iyo wakaŵa na ulongozgi wankhongono wakuti wapeleke ku mipingo ya ku Asia Minor. Kweni wonani umo iyo wakachitira. Pambere wandapeleke ulongozgi, wakawonga mpingo wa Efeso, Peregamo, na Tiyatira. Wakayiwonga mwakufumira pasi pa mtima. (Chivu. 2:1-5, 12, 13, 18, 19) Yesu wakaphalira mpingo wa ku Lawodikeya kuti: “Wose awo nkhuŵatemwa nkhuŵachenya na kuŵalanga.” (Chivu. 3:19) Ŵalara ŵakwenera kuchita nga ni Yesu para ŵakukhumba kupeleka ulongozgi.

10. Kasi tose tingachita wuli kuti tikhozgane?

¹⁰ Mbalara pera yayi awo ŵakwenera kukhozga ŵanji. Paulosi wakachiska Ŵakhristu kuti ŵayowoyenge ‘mazgu ghawemi ghakuzenga ŵanyawo mwakuyana na icho chikukhumbikwa, kuti ghakhozge’ ŵanji. (Efe. 4:29) Tose tikwenera kuŵa maso kuti tiwonenge “icho chikukhumbikwa” ku ŵanji. Paulosi wakapeleka ulongozgi ku Ŵakhristu Ŵachihebere, wakati: “Khozgani mawoko ghakulepweteka na makongono ghakuteluka. Ndipo lutilirani kunyoloska nthowa izo malundi  ghinu ghakwendamo, mwakuti icho ntchakupendera chileke kuguzguka mu findo, kweni chichizgike.” (Heb. 12:12, 13) Tose, na ŵawukirano wuwo tikwenera kuyowoya mazgu ghakukhozga kuti tikhozgane.

11. Kasi Mariya wakawovwirika wuli panyengo iyo wakasuzgikanga maghanoghano?

¹¹ Nyengo yinyake mudumbu Mariya * wakasuzgikanga maghanoghano. Iyo wakalemba kuti: “Zuŵa linyake nkhalombanga kuti nkhukhumba kukhozgeka ndipo nkhakumana na mudumbu wachilara uyo wakanilongora chitemwa na lusungu. Ivi ndivyo nkhakhumbanga panyengo iyi. Kweniso wakanilongosolera ivyo iyo wakajumphamo ndipo vikaŵa vyakuyanako na ivyo ine nkhajumphangamo. Nkhajiwona kuti nili nekha yayi.” Panji mudumbu wachilara uyu wakamanya yayi umo mazgu ghake ghakamukhozgera Mariya.

12, 13. Kasi tingalondezga wuli ulongozgi wa pa Ŵafilipi 2:1-4?

¹² Ku Ŵakhristu wose ŵa mpingo wa Filipi, Paulosi wakapeleka ulongozgi wakuti: “Usange pali chikhwimisko chilichose mwa Khristu, usange pali chipembuzgo cha chitemwa, usange pali umoza wa mzimu, usange pali mtima wachitemwa ndiposo chiwuravi, chitani nthena kuti niŵe na chimwemwe chikuru, pakulongora kuti muli na maghanoghano ghakuyana, chitemwa chakuyana, ndipo mukukolerana chomene na kuŵa na maghanoghano ghamoza. Lekani kuchita kanthu chifukwa cha mphindano panji chifukwa cha kujiwona, kweni muŵe ŵakujiyuyura na kuwona ŵanyinu kuti ŵakumuluskani. Kulaŵiska pa ivyo imwe mukukhumba pera yayi, kweniso ivyo ŵanyinu ŵakukhumba.”—Fil. 2:1-4.

¹³ Mbunenesko nadi. Tose tikwenera kuyezgayezga kulaŵiska pa ivyo ŵanyithu ŵakukhumba, kuŵapa “chipembuzgo cha chitemwa,” kulongora “umoza wa mzimu” na “mtima wachitemwa ndiposo chiwuravi” kuti tikhozge ŵabali na ŵadumbu ŵithu.

14. Ni vinthu wuli ivyo vingakhozga ŵanji?

¹⁴ Tingakhozgeka chomene para tingapulika kuti awo tikaŵawovwirapo kumanyuma ŵakulutilira kugomezgeka. Mpositole Yohane nayo wakakhozgekanga. Iyo wakalemba kuti: “Palije chinyake icho chikunikondweska chomene kuluska ichi, chakuti nipulikenge kuti ŵana ŵane ŵakulutilira kwenda mu unenesko.” (3 Yoh. 4) Ŵapayiniya ŵanandi ŵangazomerezga kuti ŵakukhozgeka chomene para ŵakasambizga ŵanthu unenesko na kupulika kuti ŵachali kuchita makora mwauzimu ndipo panji sono nawo mbapayiniya. Mupayiniya uyo wamba kugongowa wangakhozgeka chomene para tingamukumbuska za chimwemwe icho wakaŵanga nacho kumanyuma.

15. Kasi tingachita wuli kuti tikhozge awo ŵakuteŵetera mwakugomezgeka?

¹⁵ Ŵalaŵiliri ŵa dera ŵanandi ŵakuti iwo na ŵawoli ŵawo ŵakukhozgeka chomene para ŵapokera kalata kufuma ku mpingo uwo ŵakachezgera, nanga mungaŵa mazgu ghachoko waka ghakuwonga. Ŵalara, ŵamishonale, ŵapayiniya, na awo ŵakuteŵetera pa Beteli nawo ŵakukhozgeka chomene para taŵawonga.

16. Kasi pakukhumbikwa vichi kuti tikhozge munthu?

¹⁶ Tileke kughanaghana kuti tingakhwimiska yayi ŵanyithu chifukwa tikumanya yayi kuyowoya. Pakukhumbikwa vinandi yayi kuti tikhozge ŵanyithu. Chinthu chimoza icho chikukhumbikwa nkhumwemwetera pakutawuzga munthu. Para iyo wakumwemwetera yayi, tingamanya kuti wali na suzgo linyake, ndipo wangakhozgeka chomene para tingamutegherezga.—Yak. 1:19.

17. Kasi mubali munyake muwukirano wakawovwirika wuli apo wakasuzgikanga maghanoghano?

 ¹⁷ Mubali muwukirano zina lake Henri wakasuzgika chomene maghanoghano chifukwa ŵabali ŵake ŵapafupi, kusazgapo adada ŵake, awo ŵakaŵa mulara wakuchindikika, ŵakaleka unenesko. Henri wakakhozgeka chomene apo mulaŵiliri wa dera wakamuchema kuti ŵakarye ku resitiranti na kumupa mwaŵi kuti walongosore umo wakajipulikiranga. Ŵati ŵadumbiskana, Henri wakamanya kuti para wangalutilira kugomezgeka, ŵanthu aŵa ŵangawelera mu unenesko. Wakapembuzgika chomene kuŵerenga Salimo 46; Zefaniya 3:17; na Mariko 10:29, 30.

18. (a) Kasi Fumu Solomoni yikalemba vichi? (b) Kasi mpositole Paulosi wakayowoya vichi?

¹⁸ Ivyo vikachitikira Mariya na Henri vikulongora kuti tingakhozga ŵabali na ŵadumbu ŵithu awo ŵakukhumbikwira kusanguluskika. Fumu Solomoni yikalemba kuti: “Lizgu ilo layowoyeka pa nyengo yakwenelera ndiwemi nadi. Kalaŵiskiro kawemi kakukondweska mtima. Nkhani yiwemi yikukhozga viwangwa.” (Zinth. 15:23, 30 mazgu ghamusi) Kweniso munthu uyo wakusuzgika maghanoghano wangakhozgeka para wangaŵerenga magazini gha Gongwe la Mulinda panji mabuku ghanyake pa webusayiti yithu. Paulosi wakayowoyaso kuti kwimbira lumoza sumu za Ufumu kungatikhozga. Iyo wakalemba kuti: “Lutilirani kusambizga na kuchiskana na masalimo, malumbo kwa Chiuta, ndiposo na kwimba sumu zauzimu na mtima wakuwonga, kwimbira Yehova mu mitima yinu.”—Kol. 3:16; Mil. 16:25.

19. Chifukwa wuli kukhozgana nkhwakuzirwa chomene sono na munthazi, ndipo tikwenera kulutilira kuchitachi?

¹⁹ Apo tikuwona “zuŵa [la Yehova] likuneng’enera” tikwenera kulutilira kukhozgana. (Heb. 10:25) Nga umo Paulosi wakaphalilira Ŵakhristu mu nyengo yira, “lutilirani kukhwimiskana na kuzengana, nga umo mukuchitira kale.”—1 Tes. 5:11.