CHAKA chamara, ŵabali masauzandi ghanandi ŵakimikika kuŵa ŵalara panji ŵateŵeti ŵakovwira pa charu chose. Para namwe muli kwimikika sonosono kuŵa mulara panji muteŵeti wakovwira, mukwenera kuti mukukondwa na uteŵeti winu.

Panji mukufipa mtima na uteŵeti winu uphya, ndipo ichi ntchakupulikikwa. Jason, uyo ni mulara wachinyamata wakati, “Nkhati nimikika waka kuŵa mulara, nkhafipanga mtima chomene na umo nichitirenge uteŵeti wane uphya.” Mozesi na Yeremiya nawo ŵakafipa mtima apo Yehova wakaŵapa uteŵeti uphya. (Eks. 4:10; Yer. 1:6) Para namwe mukufipa mtima na uteŵeti winu, kasi mungachita wuli kuti muleke kufipa mtima na kulutilira kukura mwauzimu? Tiyeni tiwone umo wakachitira msambiri munyake, zina lake Timote.—Mil. 16:1-3.

Timote wakwenera kuti wakaŵa na vyaka vyapakati pa 17 na 19 panji vya m’ma 20 apo mpositole Paulosi wakamupempha kuti wendenge nayo. Pakuti Timote wakaŵa muchoko apo wakambanga uteŵeti uwu, wakwenera kuti wakajikayikiranga kweniso wakwenera kuti wakawopanga pakuchita uteŵeti wake. (1 Tim. 4:11, 12; 2 Tim. 1:1, 2, 7) Kweni pakati pajumpha vyaka 10, Paulosi wakaphalira mpingo wa ku Filipi kuti: “Nkhugomezga mwa Fumu Yesu kutuma Timote kwa imwe sonosono . . . Pakuti nilije munyake uyo wali na maghanoghano ghakuyana na ghake.”—Fil. 2:19, 20.

Chifukwa wuli Timote wakaŵa mulara muwemi? Tiyeni tiwone vifukwa 6 kweniso ivyo tingasambirako kwa Timote.

1. Wakatemwanga nadi ŵanthu. Paulosi wakaphalira ŵabali ku Filipi kuti: “[Timote] wazamupwelelera nadi vya imwe.” (Fil. 2:20) Timote wakatemwanga ŵanthu. Wakakhumbanga kuti ŵaŵe paubwezi na Yehova, ndipo wakajipeleka chomene kuti waŵawovwire.

Lekani kuŵa nga ni dilayivala wa basi uyo wakughanaghanira chomene za kufika pa siteji yiliyose pa nyengo yake m’malo mwa kunyamura ŵanthu. William, uyo waŵa mulara kwa vyaka vyakujumpha 20 ndipo ŵabali na ŵadumbu ŵakumuchindika chomene, wakuphalira ŵalara ŵaphya kuti: “Mutemwenge ŵabali. Muŵikenge chomene mahara pa kovwira ŵabali m’malo mwa kuŵika chomene mahara pa kendeskero ka vinthu mu mpingo.”

2. Wakaŵikanga vinthu vyauzimu pa malo ghakwamba. Paulosi wakapambaniska umo Timote wakachitiranga na umo ŵanji ŵakachitiranga. Wakati: “Ŵanyake wose ŵakupenja vyakukhumba vyawo, vya Yesu Khristu yayi.” (Fil. 2:21) Paulosi wakaŵa ku Romu apo wakalembanga kalata iyi. Wakawona kuti ŵabali ŵa ku Romu, ŵakatangwanikanga na milimo yawo yakuthupi. Ŵakalimbikiranga yayi vinthu vyauzimu. Kweni Timote wakachitanga nthena yayi. Mwaŵi wakuti wangapharazgira makani ghawemi mwakukwana ukati wasangika, iyo wakachita nga ni Yesaya, uyo wakati: “Ndine pano. Nitumani!”—Yes. 6:8.

Kasi mungagaŵa wuli nyengo yakuchitira milimo yinu yakuthupi na yauzimu? Chakwamba, chitani dankha icho ntchakuzirwa. Paulosi wakati: “Musande ivyo ni vinthu vyakuzirwa chomene.” (Fil. 1:10) Ŵikani vinthu vyauzimu pa malo ghakwamba. Chachiŵiri, kutangwanika na vinthu vyawakawaka yayi. Lekani kuchita vinthu ivyo vingamulyerani  waka nyengo. Paulosi wakaphalira Timote kuti: “Chimbirako ku makhumbiro ghauwukirano, kweni londezga urunji, chipulikano, chitemwa, mtende.”—2 Tim. 2:22.

3. Wakalimbikiranga chomene uteŵeti wakupatulika. Paulosi wakakumbuska ŵabali ŵa ku Filipi kuti: “Mukumanya ukaboni uwo [Timote] wakalongora, kuti nga ni mwana na wiske, wakateŵetera pamoza na ine pakupharazga makani ghawemi.” (Fil. 2:22) Timote wakaŵa mukata yayi. Wakalimbikiranga chomene apo wakateŵeteranga na Paulosi ndipo ichi chikawovwira kuti ŵatemwanenge chomene.

Mazuŵa ghano mu gulu la Chiuta muli ntchito zinandi. Mungaŵa ŵakukhorwa nadi para mukuchita ntchito izi ndipo mungaŵa paubwezi na ŵabali na ŵadumbu ŵinu. Ntheura nyengo zose woneseskani kuti muli na “vyakuchita vinandi mu mulimo wa Fumu.”—1 Kor. 15:58.

4. Wakachitanga ivyo wasambira. Paulosi wakalembera Timote kuti: “Iwe walondezga makora chisambizgo chane, makhaliro ghane, khumbo lane, chipulikano chane, kuzikira kwane, chitemwa chane, chizizipizgo chane.” (2 Tim. 3:10) Pakuti Timote wakachitanga ivyo wasambira, lekani wakapika mauteŵeti ghakuru.—1 Kor. 4:17.

Kasi muli na mubwezi wakukhwima mwauzimu mwakuti mukukhumba kuchita nga ndiyo? Para mulije, mwalekerachi kuŵa nayo? Tom, uyo waŵa mulara kwa vyaka vinandi, wakati: “Mulara munyake wakukhwima mwauzimu wakaŵa mubwezi wane ndipo wakanisambizga vinandi. Nyengo zose nkhafumbangako ulongozgi ndipo nkhawulondezganga. Ichi chikanovwira kuti niŵe wachikanga.”

5. Wakalutilira kujisambizga. Paulosi wakaphalira Timote kuti: “Chilato chako chiŵe chakuti ujizgoŵezge kusopa Chiuta mwakujipeleka.” (1 Tim. 4:7) Munthu uyo wakuchita maseŵera wangaŵa na kochi, kweni wakweneraso kujisambizga yekha. Paulosi wakaphalira Timote kuti: “Lutilira kuŵazga pa wumba, kuchiska, na kusambizga. . . . Ughanaghanirepo vinthu ivi, utangwanikenge navyo, mwakuti ŵanthu wose ŵawone umo ukukulira.”—1 Tim. 4:13-15.

Namwe mukwenera kulutilira kukuzga maluso ghinu. Mulutilire kukura mwauzimu ndipo mwenderenge lumoza na ivyo gulu likusambizga. Lekani kujithemba, kughanaghana kuti mukumanya kale vinandi mwakuti mungachita chilichose kwambura kupenjerezga dankha fundo mu mabuku ghithu. Nga ni Timote, mukwenera ‘kuŵa maso na ivyo mukuchita na kusambizga.’—1 Tim. 4:16.

6. Wakagomezganga mzimu wa Yehova. Paulosi wati waghanaghanirapo za uteŵeti wa Timote, wakamuphalira kuti: “Mzimu utuŵa uwo ukukhala mwa ise ukovwire kusungilira usambazi uwu.” (2 Tim. 1:14) Timote wakeneranga kugomezga mzimu wa Chiuta kuti umovwire kusungilira uteŵeti wake.

Mulara munyake uyo wateŵetera vyaka vinandi, zina lake Donald, wakati: “Ŵalara na ŵateŵeti ŵakovwira ŵakwenera kumanya kuti ubwezi wawo na Chiuta ngwakuzirwa chomene. Awo ŵakuchita nthena ŵendenge ‘kufuma ku nkhongono kuya ku nkhongono.’ Ŵaŵenge thumbiko ku ŵabali usange ŵakulomba Chiuta kuti waŵape mzimu wake na kuŵa na vipambi vya mzimu.”—Sal. 84:7; 1 Pet. 4:11.

Ntchakukhozga chomene kuwona ŵalara na ŵateŵeti ŵakovwira ŵanandi awo ŵimikika sono nga ndimwe ŵakulutilira kukura mwauzimu. Jason, uyo tangumuzunura kukwambilira wakati: “Nasambira vinandi chomene mu nyengo yose iyo naŵira mulara, ndipo ichi chanovwira kuti niŵe wachikanga. Sono nkhukondwa chomene na uteŵeti wane ndipo nkhuwona kuti ni mwaŵi ukuru kuchita uteŵeti uwu.”

Kasi mulutilirenge kukura mwauzimu? Lutilirani kusambira kwa Timote. Para muchitenge nthena, namwe muŵenge thumbiko ku ŵanthu ŵa Chiuta.