Mazgu Ghachihebere ghangang’anamulika mu munthowa zakupambanapambana. Fundo zakulondezgapo izi zikutovwira kupulikiska mavesi agha.

1. Wonani mavesi ghose gha salimo ili. Mazgu ghakuti “penepapo” agho ghali mu vesi 12 ghakulongora kuti vitumbiko ivyo vikuzunulika mu mavesi 12 m’paka 14 ni vya ŵanthu ŵarunji, awo ŵakupempha kuti ‘ŵathaskike na kuponoskeka’ ku ŵaheni (vesi 11). Fundo iyi ndiyo yikuyowoyekaso pa vesi 15, apo mazgu ghakuti “ŵakukondwa,” ghawerezgeka kaŵiri ndipo ghakuyowoya za ŵarunji ŵeneŵaŵa, awo “Chiuta wawo ni Yehova!”

2. Fundo iyi yikukolerana na mavesi ghanyake gha mu Baibolo agho ghakulayizga kuti Chiuta watumbikenge ŵanthu ŵake ŵakugomezgeka. Salimo ili likuyowoya chigomezgo chanadi icho Davide wakaŵa nacho chakuti para Chiuta wathaska ŵanthu ŵake ku ŵalwani ŵawo, waŵapenge chimwemwe na usambazi. (Lev. 26:9, 10; Doto. 7:13; Sal. 128:1-6) Mwachiyelezgero, lemba la Dotoronome 28:4 likuti “ŵamutumbikika ŵana ŵinu, vipambi vya charu chinu, ŵana ŵa viŵeto vinu, ŵana ŵa ng’ombe na mberere zinu.” Nadi, mu nyengo iyo Solomoni mwana wa Davide wakalamuliranga, mtundu wa Israyeli ukaŵa usambazi ndiposo ukaŵa na mtende ukuru. Kweniso, ufumu wa Solomoni ukimiranga Ufumu wa Mesiya.—1 Mathe. 4:20, 21; Sal. 72:1-20.

Fundo yaumaliro njakuti, kapulikiskiro aka ka mavesi agha gha mu Salimo 144 kakovwira kuti fundo yikuru ya salimo lose yipulikikwe makora. Fundo yake njakuti ŵateŵeti ŵa Yehova ŵali na chigomezgo chakuti iyo wazamuparanya ŵaheni na kupeleka mtende na usambazi wamuyirayira ku ŵarunji.—Sal. 37:10, 11.