NKHANI YAKUSAMBIRA 14
Kasi Mukufiska Uteŵeti Winu Mwakukwana?
“Lutilira kupharazga makani ghawemi, ufiske uteŵeti wako mwakukwana.”—2 TIM. 4:5, mazgu ghamusi.
SUMU 57 Kupharazgira Ŵanthu ŵa Mitundu Yose
CHILATO CHA NKHANI IYI *
Yesu wati wawuskika, wakakumana na ŵasambiri ŵake ndipo wakaŵaphalira kuti “lutaninge mukazgore ŵanthu . . . kuŵa ŵasambiri” (Wonani ndime 1)
1. Kasi ŵateŵeti ŵa Chiuta ŵakugomezgeka ŵakukhumba kuchita vichi, ndipo chifukwa wuli? (Wonani chithuzi cha pa chikopi.)
KHRISTU YESU wakaphalira ŵalondezgi ŵake kuti “lutaninge mukazgore ŵanthu ŵa mitundu yose kuŵa ŵasambiri.” (Mat. 28:19) Ŵateŵeti ŵa Chiuta ŵakugomezgeka ŵakukhumba kusambira umo ‘ŵangafiskira mwakukwana’ uteŵeti uwu. (2 Tim. 4:5) Nakuti mulimo uwu ngwakuzirwa, ngwakunozga, kweniso ukwenera kuchitika mwaluŵiro chomene kuluska vinyake vyose. Ndipouli, nyengo zinyake chingaŵa chakusuzga kumalira nyengo yinandi mu uteŵeti nga umo ise takhumbiranga.
2. Kasi tikusangana na masuzgo wuli apo tikuyezgayezga kuti tifiske uteŵeti withu?
2 Paliso milimo yinyake yakuzirwa iyo yikukhumba nyengo na nkhongono zithu. Nyengo zinyake tingakhumbikwira kugwira ntchito maora ghanandi kuti tijipwelelere pamoza na banja lithu. Panji tikusuzgikira kupwelelera banja lithu, tikulwara, tikusuzgika maghanoghano, panji tikupulika vyakuŵinya chifukwa cha uchekuru. Kasi tingachita wuli kuti tifiske uteŵeti withu mwakukwana apo tikulimbana na masuzgo agha?
3. Kuyana na mazgu gha Yesu agho ghali pa Mateyu 13:23, kasi tose tingapambika vipambi vya Ufumu mwakuyana?
3 Tingagongowanga yayi usange masuzgo agho tikukumana nagho ghakutitondeska kuchita vinandi pakuteŵetera Yehova. Yesu wakamanya kuti tingapambika mwakuyana yayi vipambi vya Ufumu. (Ŵazgani Mateyu 13:23.) Yehova wakuwona vyose ivyo tikuchita, chikuru tikuchita na mtima wose. (Heb 6:10-12) Kweni nyengo zinyake tingawona kuti umo vinthu viliri pa umoyo withu, tingachita vinandi pakumuteŵetera. Mu nkhani iyi tiwonenge umo tingachitira kuti tiŵikenge uteŵeti withu pakwamba, tileke kukhumba vinandi pa umoyo withu, na umo tingachitira kuti tipharazgenge na kusambizga mwaluso. Kweni kasi kufiska uteŵeti withu mwakukwana chikung’anamurachi?
4. Kasi kufiska uteŵeti withu mwakukwana chikung’anamurachi?
4 Mwakudumura, kufiska uteŵeti withu mwakukwana chikung’anamura kuchita mulimo wakupharazga na kusambizga ŵanthu kuyana na umo ise tingafiskira. Kweni kuti tifiske uteŵeti withu mwakukwana, vikuthemba pa unandi wa nyengo iyo tikumalira pakupharazga pera yayi. Chakuzirwa chomene kwa Yehova ntchifukwa icho tikupharazgira. Tikupharazga na mtima wose chifukwa chakuti tikutemwa Yehova na ŵazengezgani ŵithu. * (Mrk 12:30, 31; Kol 3:23) Kuteŵetera Chiuta na mtima wose chikung’anamura kujipeleka kweniso kumuteŵetera na nkhongono zithu kuyana na umo tingafiskira. Para tikuwona kuti ni mwaŵi kupharazgira ŵanji, tiŵikengepo mtima kupharazgira ŵanthu ŵanandi makani ghawemi.
5-6. Kasi munthu uyo wali na nyengo yichoko yakupharazgira wangalongora wuli kuti wakuŵika pakwamba mulimo wakupharazga? Yowoyani chiyelezgero.
5 Tiyelezgere kuti munyamata munyake wakutemwa chomene kulizga gitara. Nyengo zose wakukondwa para wakwimba. Zuŵa linyake munyamata uyu wasanga ntchito yakuti wakalizgenge gitara kuumaliro wa sabata pa resitiranti. Kweni wakusanga ndalama zinandi yayi mwakuti wakutondeka kugura vinthu vinyake. Ntheura wakugwira ntchito yakuguliska mu sitoro kwamba pa Mande m’paka pa Chinkhondi. Nangauli wakumalira nyengo yake yinandi mu sitoro, kweni mtima wake wose wuli pa kwimba. Wakuŵikapo mtima kuti wasazgireko luso lwake lwa kwimba kuti ndiyo yiŵe waka ntchito yake. Wakuyezga kusanga nyengo nanga yingaŵa yichoko kuti wimbepo.
6 Mwakuyana waka, nyengo zinyake mungatondeka kumalira nyengo yinandi pa mulimo wakupharazga. Kweni mukuwutemwa chomene mulimo uwu. Mukuyezgayezga kusazgirako luso lwinu mwakuti muŵafikenge pamtima ŵanthu na makani ghawemi. Pakuti muli kale na vyakuchita vinandi, nyengo zinyake mungajifumba kuti: ‘Kasi ningachita wuli kuti niŵikenge pakwamba mulimo wakupharazga?’
UMO MUNGAŴIKIRA PAKWAMBA UTEŴETI WINU
7-8. Kasi tingamuyezga wuli Yesu pa nkhani ya umo tikuwonera uteŵeti?
7 Yesu wakaŵa chiyelezgero chiwemi chomene pa nkhani ya umo wakawoneranga uteŵeti. Chinthu chakuzirwa chomene kwa iyo chikaŵa kupharazga Ufumu wa Chiuta. (Yoh 4:34, 35) Wakendanga mitunda yitali kuti wapharazgire ŵanthu ŵanandi. Nyengo zose wakapenjanga mipata yakuti wapharazgire ŵanthu mu nyumba zawo kweniso kulikose uko ŵakasangikanga. Yesu wakaŵikanga pakwamba mulimo wakupharazga pa umoyo wake.
8 Tingamuyezga Yesu para tikusanga mipata yakupharazgira ŵanthu makani ghawemi nyengo yiliyose na kulikose uko tingaŵa. Tikujinora vinthu vinyake kuti tichiteko mulimo wakupharazga. (Mrk. 6:31-34; 1 Pet. 2:21) Ŵanyake mu mpingo ŵakukwaniska kuchita upayiniya wapadera, wanyengozose, panji wakanyengo. Ŵanyake ŵasambira chiyowoyero chinyake panji kusamukira ku malo agho ŵapharazgi mbachoko. Ndipouli, ntchito yikuru yakupharazga yikuchitika na ŵapharazgi awo ŵangafiska yayi kuchita upayiniya, kweni ŵakuyezgayezga kuchita ivyo ŵangafiska. Icho Yehova wakukhumba ntchakuti tichitenge ivyo tingafiska. Wakukhumba kuti tikondwenge na uteŵeti apo tikupharazga “makani ghawemi ghauchindami wa Chiuta wakukondwa.”—1 Tim. 1:11; Doto. 30:11.
9. (a) Kasi Paulosi wakachita wuli kuti waŵike mulimo wa kupharazga pakwamba nanga ni apo wakagwirangaso ntchito yakulembeka? (b) Kasi lemba la Milimo 28:16, 30, 31 likulongora wuli umo Paulosi wakawoneranga uteŵeti wake?
9 Mpositole Paulosi wakalongora chiyelezgero chiwemi pa nkhani ya kuŵika uteŵeti pakwamba. Apo wakaŵa ku Korinte paulendo wake wachiŵiri wa umishonale, ndalama zikamuchepera ndipo wakamba kupanga mahema. Ndipouli, Paulosi wakawonanga ntchito yakupanga mahema kuŵa yakuzirwa chomene yayi. Wakagwiranga ntchito iyi kuti wasange ndalama zakuti zimovwire pakuchita uteŵeti mwakuti wapharazge makani ghawemi ku Ŵakorinte ‘kwambura kuŵalipiliska.’ (2 Kor. 11:7) Nangauli Paulosi wakagwirangaso ntchito zinyake zakulembeka, kweni wakalutilira kuŵika uteŵeti pakwamba, ndipo wakapharazganga zuŵa lililose la Sabata. Vinthu vikati vyaŵako makora, Paulosi wakaŵikapo mtima chomene pa mulimo wa kupharazga. “Wakamba kutangwanika chomene na kupharazga mazgu, wakapelekanga ukaboni ku Ŵayuda kulongora kuti Yesu ni Khristu.” (Mil. 18:3-5; 2 Kor. 11:9) Pamanyuma, wakakakika ndipo wakakhala pa jele la panyumba vyaka viŵiri ku Romu. Paulosi wakapharazgiranga ŵalendo kweniso wakalembanga makalata. (Ŵazgani Milimo 28:16, 30, 31.) Paulosi wakaŵikapo mtima kuti paŵavye chinthu chilichose chakumujandizga kuchita uteŵeti wake. Iyo wakalemba kuti: “Pakuti tili na uteŵeti uwu . . . , tikugongowa yayi.” (2 Kor. 4:1) Nga ni Paulosi, nanga tingaŵa kuti tikumalira nyengo yinandi pakugwira ntchito yakulembeka, kweni nase tingadangizga mulimo wa Ufumu.
Pali nthowa zinandi izo tingafiskira uteŵeti withu mwakukwana (Wonani ndime 10-11)
10-11. Kasi tingafiska wuli uteŵeti withu mwakukwana para tili ŵalwari?
10 Para tikutondeka kupharazga mwakukwana ku nyumba na nyumba chifukwa cha uchekuru panji ulwari, tingasanga nthowa zinyake zakupharazgira. Ŵakhristu ŵakwambilira ŵakapharazgiranga ŵanthu kulikose uko ŵakaŵa. Ŵakapharazganga nyengo yiliyose kweniso kulikose uko kukasangikanga ŵanthu, kwali nkhu nyumba na nyumba panji ku malo uko kukusangika ŵanthu ŵanandi. (Mil. 17:17; 20:20) Para tikutondeka kwenda, tingakhala apo pakusangika ŵanthu ŵanandi na kupharazgira awo ŵakujumpha pafupi nase. Panji tingapharazga para mwaŵi wasangika, tingalemba makalata, panji kupharazga pa telefoni. Ŵapharazgi ŵanandi awo ŵakutondeka kupharazga nyumba na nyumba chifukwa cha ulwari panji vifukwa vinyake, ŵangasanga chimwemwe na nthowa izi zakupharazgira.
11 Nangauli mungaŵa ŵalwari, kweni mungafiska uteŵeti winu mwakukwana. Ghanaghaniraniso chiyelezgero cha mpositole Paulosi. Iyo wakati: “Mu vinthu vyose, nkhusanga nkhongono mwa uyo wakunipa nkhongono.” (Fil. 4:13) Paulosi wakakhumbikwiranga nkhongono zanthena izi apo wakalwara paulendo wake unyake waumishonale. Paulosi wakaphalira Ŵagalatiya kuti: “Nkhapharazga makani ghawemi kwa imwe chifukwa chakuti nkhalwara.” (Gal. 4:13) Mwakuyana waka, ulwari ungamupani mwaŵi wakuti mupharazgire ŵanthu nga ni madokotara, manesi, na ŵanyake awo ŵakumupwelelerani. Ŵanandi mwa ŵanthu aŵa ŵakuŵa kuti ŵali ku ntchito para tiza pa nyumba zawo kuti tiŵapharazgire.
UMO MUNGACHITIRA KUTI MULEKE KUKHUMBA VINANDI PA UMOYO
12. Kasi kuŵa na jiso la ‘kudodoliska’ pa chimoza chikung’anamurachi?
12 Yesu wakati: “Nyali ya thupi ni jiso. Ntheura usange jiso lako likudodoliska pa chimoza, thupi lako lose liŵenge lakungweluka.” (Mat. 6:22) Kasi wakang’anamurangachi? Wakang’anamuranga kuti tikwenera kuŵika mahara pa chinthu chimoza panji kuleka kutimbanizgika na chinthu chinyake. Nakuti Yesu ntchakuwonerapo chiwemi pa nkhani iyi, wakaŵika mtima pa uteŵeti, ndipo wakasambizga ŵasambiri ŵake kuŵika mtima pa Ufumu kweniso pakuteŵetera Yehova. Nase tikuyezga Yesu para ntchito yakupharazga tikuyiwona kuŵa yakuzirwa chomene kweniso tikupenja “dankha Ufumu na urunji [wa Chiuta].”—Mat. 6:33.
13. Kasi ntchivichi chingatovwira kuti tiŵikenge mtima pa uteŵeti withu?
13 Nthowa yimoza iyo yingatovwira kuŵika mtima pa uteŵeti withu nja kuleka kukhumba vinandi mwakuti tiŵe na nyengo yakukwana yakovwilira ŵanthu kuti ŵamumanye Yehova na kumutemwa. * Mwachiyelezgero, kasi tingachepeskako yayi nyengo iyo tikugwilira ntchito yakulembeka mwakuti timalirenge nyengo yinandi mu uteŵeti mukati mwasabata? Kasi tingachepeskako yayi vyakusanguluska vinyake ivyo vikutilyera nyengo yinandi?
14. Kasi mbumba yinyake yikasintha vichi kuti yiŵe na nyengo yinandi yakupharazgira?
14 Wonani ivyo wakachita mulara munyake zina lake Elias na muwoli wake. Iyo wakati: “Nangauli vikatisuzganga kuchita upayiniya, kweni tikawona kuti pali vinyake ivyo tingachita kuti timalirenge nyengo yinandi mu uteŵeti. Ntheura tikamba kusintha tunthu tunyake tuchokotuchoko kuti tisange nyengo yinandi yakupharazgira. Mwachiyelezgero, tikachepeskako vyakugura, nyengo iyo tikamaliranga pa vyakusanguluska, kweniso tikapempha abwana ŵithu kuti ŵatichepeskereko nyengo iyo tikagwiliranga ntchito. Ivi vikatovwira kuti tipharazgenge kumise chomene, kuchitiska masambiro gha Baibolo, kweniso kuti tipharazgenge mukati mwasabata kaŵiri pa mwezi. Tikukondwa chomene.”
UMO MUNGACHITIRA KUTI MUŴE ŴALUSO PAKUPHARAZGA NA KUSAMBIZGA
Para tikulondezga ivyo tikusambira pa maungano ghamukati mwasabata vitovwirenge kuti tilutilire kuŵa na luso mu uteŵeti (Wonani ndime 15-16) *
15-16. Kuyana na ivyo vili pa 1 Timote 4:13, 15, kasi tingachita wuli kuti tisazgireko luso pakuŵa ŵapharazgi? (Wonaniso bokosi la mutu wakuti “ Vilato Ivyo Vinganovwira Kuti Nifiske Uteŵeti Wane Mwakukwana.”)
15 Nthowa yinyake iyo tingafiskira uteŵeti withu mwakukwana, nkhusazgirako luso lwithu pakupharazga na kusambizga mu uteŵeti. Ŵanthu awo ŵakugwira ntchito zinyake zakulembeka ŵakwenera kusambizgika pafupipafupi kuti ŵasazgireko luso lwawo pa ntchito yawo. Ndimoso viliri na ŵapharazgi ŵa Ufumu. Tikwenera kulutilira kusambira umo tingaŵira ŵaluso mu uteŵeti.—Zinth. 1:5; ŵazgani 1 Timote 4:13, 15.
16 Kweni kasi tingachita wuli kuti tilutilire kuŵa ŵaluso mu uteŵeti? Tikwenera kutegherezga chomene ulongozgi uwo tikupokera pa ungano wa Uteŵeti na Umoyo Wachikhristu. Pa ungano uwu tikupokera ulongozgi wakuzirwa uwo ukutovwira kuti tilutilire kuŵa na luso mu uteŵeti. Mwachiyelezgero, para cheyamani wakupeleka ulongozgi ku awo ŵanguŵa na nkhani mu sukulu, tikwenera kuwona masachizgo agho ghangatovwira kuti tipharazgenge mwaluso. Tikulondezga masachizgo agha para tikupharazga. Tingafumbaso mulaŵiliri wa kagulu kuti watovwire panji kwenda na iyo mu uteŵeti panji na mupharazgi waluso, mupayiniya, panji mulaŵiliri wa dera. Para tiŵenge ŵaluso pakugwiliskira ntchito ivyo tikusambizgira ŵanthu Baibolo, tikondwenge chomene na mulimo withu wakupharazga na kusambizga.
17. Kasi chichitikenge ntchivichi para mukufiska uteŵeti winu mwakukwana?
17 Ni mwaŵi ukuru chomene kuti Yehova watizomerezga kuŵa “ŵantchito ŵanyake.” (1 Kor. 3:9) Para mukusanda “ivyo ni vinthu vyakuzirwa chomene,” na kuŵika mtima pa uteŵeti, ‘muteŵeterenge Yehova na kusekelera.’ (Fil. 1:10; Sal. 100:2) Pakuŵa ŵateŵeti ŵa Chiuta mungaŵa na chigomezgo chose kuti wamupaninge nkhongono izo mukukhumbikwira kuti mufiske uteŵeti winu mwakukwana nanga mungakumana na masuzgo ghanandi wuli. (2 Kor. 4:1, 7; 6:4) Kwali muli na nyengo yakukwana yakupharazgira panji yayi, kweni ‘mungaŵa na chifukwa chakukondwera’ para mukuchita na mtima wose uteŵeti winu. (Gal. 6:4) Para mukufiska uteŵeti winu mwakukwana, mukulongora kuti mukutemwa Yehova na ŵazengezgani ŵinu. ‘Usange mukuchita vinthu ivi, mujiponoskenge mwekha na awo ŵakupulika.’—1 Tim. 4:16.
SUMU 58 Kupenja Ŵabwezi ŵa Mtende
^ ndime 5 Yesu wali kutipa mulimo wakupharazga makani ghawemi gha Ufumu na kuzgora ŵanthu kuŵa ŵasambiri. Mu nkhani iyi tiwonenge umo tingafiskira uteŵeti withu mwakukwana nangauli tikusangana na masuzgo. Tisambirenge umo tingachitira kuti tipharazgenge mwaluso kweniso kuti tikondwenge na uteŵeti.
^ ndime 4 MAZGU GHALONGOSOREKA: Ghanyake mwa mauteŵeti agho tingachitira Yehova nkhupharazga na kusambizga, kuzenga na kunozga malo ghithu ghakusoperapo na malo ghanyake ghakuchitirapo vinthu vyauzimu, kweniso kovwirapo para kwachitika masoka.—2 Kor. 5:18, 19; 8:4.
^ ndime 13 Wonani nthowa 7 izo zili pa kabokosi ka mutu wakuti “Umo Mungachepeskera Vyakuchita Vinu” mu Gongwe la Mulinda la Julayi 2016, peji 10.
^ ndime 62 MAZGU GHAKULONGOSORA CHITHUZI: Mudumbu wali pa ungano wamukati mwasabata ndipo wakuyezgelera umo tingachitira paulendo wakuwelerako. Kufuma apo, cheyamani wakupeleka ulongozgi, ndipo mudumbu wakulemba manosi mu kabuku ka Jipelekani pa Kuŵazga na Kusambizga. Pamanyuma, wakulondezga ulongozgi uwo wakapokera ku maungano apo wakupharazga.
