1-2. Chifukwa wuli Yesu wakakweŵeka?

PA ZUŴA laumaliro la umoyo wake wa pa charu chapasi, Yesu wakakweŵeka. Wakaŵa pafupi kutambuzgika na kukomeka na ŵanthu ŵaheni. Kweni pakaŵa chinyake icho chikamufipiskanga mtima chomene kuluska nyifwa yake. Wakaŵatemwanga chomene Awiske ndipo wakakhumbanga kuŵakondweska. Yesu wakamanyanga kuti wachindikenge zina la Yehova para walutilira kugomezgeka pa masuzgo agho wakaŵa pafupi kukumana nagho. Kweniso Yesu wakatemwanga ŵanthu, ndipo wakamanyanga kuti ŵangaŵa na chigomezgo cha umoyo wamuyirayira pekha para iyo wangalutilira kuŵa wakugomezgeka kwa Yehova m’paka nyifwa.

² Nangauli Yesu wakakweŵeka kweni wakaŵa na mtende. Iyo wakaphalira ŵapositole ŵake kuti “nkhumupani mtende wane.” (Yoh. 14:27) Wakaŵa na “mtende wa Chiuta,” ndipo mtima wake ukaŵa m’malo chifukwa chakuti wakaŵa paubwezi wakukhora na Yehova. Mtende uwu, ndiwo ukawovwira Yesu kuti waleke kwenjerwa.—Fil. 4:6, 7.

3. Kasi mu nkhani iyi tiwonenge vichi?

³ Palije uyo wakumanengepo na masuzgo kujumpha agho Yesu wakakumana nagho, ndipouli wose awo ŵakulondezga Yesu nawo ŵasanganenge na viyezgo. (Mat. 16:24, 25; Yoh. 15:20) Nga ni Yesu, nase nyengo zinyake tikusuzgika maghanoghano. Kasi tingachita wuli kuti tileke kwenjerwa chomene na kulutilira kuŵa na mtende wamumtima? Tiyeni tiwone vinthu vitatu ivyo Yesu wakachita pa nyengo iyo wakachitanga uteŵeti wake pa charu chapasi kweniso umo tingamuyezgera para takumana na viyezgo.

4. Kuyana na 1 Ŵatesalonika 5:17, yowoyani viyelezgero ivyo vikulongora kuti Yesu wakalomba kanandi waka pa zuŵa laumaliro la umoyo wake pa charu chapasi.

⁴ Ŵazgani 1 Ŵatesalonika 5:17. Pa zuŵa laumaliro la umoyo wake pa charu chapasi Yesu wakalomba kanandi waka. Apo wakalongoranga umo ŵasambiri ŵake ŵakwenera kukumbukira nyifwa yake, wakalomba pa nyengo ya chingwa na pa nyengo ya vinyo. (1 Kor. 11:23-25) Pambere ŵandafumepo pa malo agho ŵakachitiranga Paska, wakalomba pamoza na ŵasambiri ŵake. (Yoh. 17:1-26) Iyo na ŵasambiri ŵake ŵakati ŵafika ku Phiri la maolive pa usiku uwu, wakalomba mwakuwerezgawerezga. (Mat. 26:36-39, 42, 44) Nanga ni mazgu ghake agho wakayowoya apo wakaŵa pafupi kufwa likaŵa lurombo. (Luka 23:46) Chilichose icho chikamuchitikiranga pa zuŵa ilo wakafwira wakamuphaliranga Yehova mu lurombo.

5. Chifukwa wuli chikanga cha ŵapositole chikachepa?

⁵ Chinthu chimoza icho chikawovwira Yesu kuzizipizga chiyezgo ntchakuti wakathembanga Awiske, ndipo wakachita nthena mwa kulomba pafupipafupi. Kweni ŵapositole ŵakatondeka kulutilira kulomba pa usiku wura. Chifukwa chakuti ŵakalutilira yayi kulomba, chikanga chawo chikachepa ŵakati ŵasangana na chiyezgo. (Mat. 26:40, 41, 43, 45, 56) Para tasangana na viyezgo, tilutilirenge kuŵa ŵakugomezgeka pekha para tikuchita nga ni Yesu na “kulomba kwambura kuleka.” Kasi tingalomba vichi?

6. Kasi chipulikano chitovwirenge wuli kuti tilutilire kuŵa na mtende?

⁶ Tingalomba kuti Yehova ‘watisazgireko chipulikano.’ (Luka 17:5; Yoh. 14:1) Tikwenera kuŵa na chipulikano chifukwa Satana wakuyezga wose awo ŵakulondezga Yesu. (Luka 22:31) Kasi chipulikano chingatovwira wuli kuŵa na mtende nanga tingaŵa kuti tikusangana na  masuzgo ghambura kukata? Para tayezgayezga kuchita ivyo tingafiska pakulimbana na masuzgo, chipulikano chitovwirenge kuti tilekere Yehova kuti ndiyo wachitepo kanthu. Chifukwa chakuti tikugomezga kuti Yehova ndiyo wakumanya vinandi kuluska ise, tikuŵa na mtende wamumtima.—1 Pet. 5:6, 7.

7. Kasi mwasambirako vichi ku ivyo Robert wakayowoya?

⁷ Lurombo lungatovwira kuti tilutilire kuŵa na mtende wamumtima nanga tingakumana na viyezgo vikuru wuli. Ghanaghanirani za Robert, mulara wakugomezgeka wa vyaka vya m’ma 80. Iyo wakuti: “Ulongozgi uwo uli pa Ŵafilipi 4:6, 7 wanovwira kuzizipizga viyezgo vinandi. Nkhaŵa na suzgo la kusoŵa kwa ndalama kweniso nkhalekeskeka kuteŵetera nga mulara kwakanyengo.” Ntchivichi chamovwira Robert kuti walutilire kuŵa na mtende wa mu mtima? Iyo wakuti: “Para namba waka kwenjerwa nkhalombanga. Nkhuwona kuti para nkhulomba pafupipafupi nkhuŵa na mtende chomene.”

8. Nga umo likuyowoyera lemba la Yohane 8:29, ntchivichi chinyake icho chikamovwira Yesu kuŵa na mtende wamumtima?

⁸ Ŵazgani Yohane 8:29. Nanga mphanyengo iyo wakasuzgikanga, Yesu wakaŵa na mtende wamumtima chifukwa wakamanyanga kuti wakakondweskanga Adada ŵake. Wakalutilira kugomezgeka na pa nyengo iyo chikaŵa chakusuzga kuchita nthena. Wakaŵatemwanga Awiske, ndipo kuteŵetera Yehova ndicho chikaŵa chinthu chakuzirwa chomene pa umoyo wake. Pambere wandize pa charu chapasi, wakaŵa “misiri” wa Chiuta. (Zinth. 8:30) Apo wakaŵa pa charu chapasi, wakalimbikira kusambizga ŵanthu vya Adada ŵake. (Mat. 6:9; Yoh. 5:17)  Mulimo wakupharazga ukamupanga chimwemwe chikuru.—Yoh. 4:34-36.

9. Chifukwa wuli tikuŵa na mtende wamumtima para tikutangwanika na mulimo wakupharazga?

⁹ Tingamuyezga Yesu para tikupulikira Yehova ndiposo para ‘nyengo zose tikuŵa na vyakuchita vinandi mu mulimo wa Fumu.’ (1 Kor. 15:58) Para ‘tikutangwanika chomene’ na ntchito ya kupharazga, masuzgo ghithu tambenge kughawona mwakwenelera. (Mil. 18:5) Mwachiyelezgero, awo tikuŵapharazgira, kanandi ŵakusangana na masuzgo ghakuru kupambana na ise. Kweni para ŵasambira kutemwa Yehova na kuchita ivyo wakukhumba, umoyo wawo ukusintha ndipo ŵakuŵa ŵakukondwa. Para tikuwona vinthu vyanthena ivi vikuchitika, tikuŵa na chigomezgo chose kuti Yehova watipwelelerenge. Chigomezgo ichi ndicho chikutovwira kuŵa na mtende wamumtima. Mudumbu munyake uyo wakajiwonanga wawakawaka ndiposo wakasuzgikanga maghanoghano, wakawona kuti uwu mbunenesko. Iyo wakati: “Para nkhutangwanika na uteŵeti nkhuluwako masuzgo ghane ndipo nkhuŵa wakukondwa chomene. Nkhuwona kuti para nkhupharazga nkhuŵa pafupi chomene na Yehova.”

10. Kasi mwasambirako vichi ku ivyo Brenda wakayowoya?

¹⁰ Wonaniso ivyo vikachitikira mudumbu Brenda. Iyo pamoza na mwana wake msungwana ŵakaŵasanga na nthenda yakukoma viŵaro. Brenda wakutondeka kwenda chifukwa nkhongono ni zichoko, ndipo ŵakumwendeska pa kanjinga ka ŵanthu ŵakupendera. Nyengo zinyake wakupharazga nyumba na nyumba, kweni kanandi wakuchita upharazgi wakulemba makalata. Iyo wakuti: “Nkhachizomerezga kuti nthenda yane yingachizgika yayi mu charu ichi, ntheura nkhasankha kuŵikapo mtima kupharazga makani ghawemi. Upharazgi ukunovwira kuluwako masuzgo ghane. Nkhughanaghanira chomene umo ningawovwilira ŵanthu mu chigaŵa cha mpingo withu. Kanandi para nkhupharazga nkhughanaghanira ivyo Chiuta walayizga kuti wazamutichitira munthazi.”

11-13. (a) Kasi ŵapositole na ŵanthu ŵanyake ŵakalongora wuli kuti ŵakaŵa ŵabwezi ŵanadi ŵa Yesu? (b) Kasi Yesu wakajipulikanga wuli chifukwa cha ŵabwezi ŵake?

¹¹ Panyengo yose iyo Yesu wakachita uteŵeti wake pa charu chapasi, ŵapositole ŵake ŵakugomezgeka ŵakalongora kuti ŵakaŵa ŵabwezi ŵanadi. Ŵakaŵa nga ni mubwezi uyo Baibolo likuyowoya kuti: “Pali mubwezi uyo wakudemelera kuluska mubali wako.” (Zinth. 18:24) Ŵabwezi aŵa ŵakaŵa ŵakuzirwa chomene kwa Yesu. Apo wakachitanga uteŵeti, pakaŵavya nanga njumoza wa ŵabali ŵake ŵakuthupi uyo wakapulikana mwa iyo. (Yoh. 7:3-5) Nyengo yinyake, ŵabali ŵake ŵakaghanaghananga kuti wafuntha. (Mrk. 3:21) Kweni pambere wandafwe, Yesu wakaphalira ŵapositole ŵakugomezgeka kuti: “Imwe ndimwe mwakhala nane mu viyezgo vyane.”—Luka 22:28.

¹² Nyengo zinyake ŵapositole ŵakamukhuŵazganga Yesu, kweni iyo wakasurangako waka maubudi ghawo ndipo wakawonanga kuti ŵakaŵa na chipulikano mwa iyo. (Mat. 26:40; Mrk. 10:13, 14; Yoh. 6:66-69) Pa usiku wakuti namachero wafwenge, Yesu wakaphalira ŵanalume ŵakugomezgeka aŵa kuti: “Namuchemani ŵabwezi, chifukwa namumanyiskani vinthu vyose ivyo napulika kwa Adada.” (Yoh. 15:15) Tikukayika yayi kuti ŵabwezi aŵa, ŵakamukhozga chomene Yesu. Ivyo ŵakachitanga pakumovwira mu uteŵeti, vikamukondweskanga chomene Yesu.—Luka 10:17, 21.

¹³ Padera pa ŵapositole, Yesu wakaŵa na ŵabwezi ŵanyake ŵanalume na ŵanakazi awo ŵakamovwiranga pa ntchito yakupharazga munthowa zapadera chomene. Ŵanyake ŵakamuchemeranga ku nyumba zawo kuti ŵakarye nayo chakurya. (Luka 10:38-42; Yoh. 12:1, 2)  Ŵanyake ŵakendanga nayo ndipo ŵakamuteŵeteranga na vyuma vyawo. (Luka 8:3) Yesu wakaŵa na ŵabwezi ŵawemi chifukwa chakuti nayo wakaŵa mubwezi muwemi kwa iwo. Wakaŵachitiranga vinthu viwemi ŵabwezi ŵake ndipo wakakhazganga vinandi yayi kwa iwo. Yesu wakaŵa wakufikapo, kweni wakawonganga chomene wovwiri uwo ŵabwezi ŵake ŵambura kufikapo ŵakamupanga. Tikukayika yayi kuti ŵakamovwira kuti waŵe na mtende wamumtima.

14-15. Kasi tingasanga wuli ŵabwezi ŵawemi, ndipo ŵangatovwira wuli?

¹⁴ Ŵabwezi ŵawemi ŵatovwirenge kuti tilutilire kuŵa ŵakugomezgeka kwa Yehova. Usange ndise mubwezi muwemi tisangenge ŵabwezi ŵawemi. (Mat. 7:12) Mwachiyelezgero, Baibolo likutichiska kuti tigwiliskirenge ntchito nyengo na nkhongono zithu pakovwira ŵanji, chomenechomene awo mbakusoŵerwa. (Efe. 4:28) Kasi mu mpingo winu walimo uyo mungamovwira? Kasi mungamovwirako kukagura tunthu tunyake munthu uyo wakukhala waka pa nyumba chifukwa cha uchekuru panji ulwari? Kasi mungayipako chakurya mbumba iyo yikusuzgikira kusanga ndalama? Para mukumanya kugwiliskira ntchito webusayiti ya jw.org na JW Library app, kasi mungawovwirako ŵanji mu mpingo winu kuti nawo ŵamanye umo ŵangagwiliskira ntchito vinthu ivi? Para tikutangwanika kovwira ŵanyithu, tiŵenge ŵakukondwa chomene.—Mil. 20:35.

¹⁵ Ŵabwezi ŵithu ŵatovwirenge para tasangana na viyezgo, kweniso ŵatovwirenge kuti tilutilire kuŵa na mtende wamumtima. Nga ni Elihu uyo wakategherezganga apo Yobu wakayowoyanga vyamasuzgo ghake, ŵabwezi withu nawo ŵakutitegherezga para tikuyowoya umo tikujipulikira. (Yobu 32:4) Tikwenera kukhazga kuti  ŵabwezi ŵithu ndiwo ŵatisankhirenge vyakuchita yayi, kweni tingachita makora kulondezga ulongozgi wa mu Baibolo uwo ŵatipa. (Zinth. 15:22) Nga umo Themba Davide likachitira, nase tikwenera kujiyuyura na kupulikira ulongozgi uwo ŵabwezi ŵithu ŵangatipa. Tikwenera yayi kuŵa ŵakujiŵikamo na kukana wovwiri wawo. (2 Sam. 17:27-29) Nadi, ŵabwezi ŵawemi aŵa ntchawanangwa chakufuma kwa Yehova.—Yak. 1:17.

16. Kuyana na Ŵafilipi 4:6, 7, kasi ni nthowa wuli yimoza iyo tingasangira mtende? Longosorani.

¹⁶ Ŵazgani Ŵafilipi 4:6, 7. Chifukwa wuli Yehova wakuti tingasanga mtende uwo wakupeleka kwizira “mwa Khristu Yesu”? Chifukwa ntchakuti tingasanga mtende wamumtima na kulutilira kuŵa nawo pekha para tingapulikiska udindo wa Yesu pakufiska khumbo la Yehova, kweniso kuŵa na chipulikano mwa iyo. Mwachiyelezgero, chifukwa cha sembe yakuwombora ya Yesu, zakwananga zithu zose zingagowokereka. (1 Yoh. 2:12) Para tikughanaghanira fundo iyi tikupembuzgika. Pakuŵa Themba la Ufumu wa Chiuta, Yesu wazamumazga masuzgo ghose agho tikusangana nagho chifukwa cha Satana na charu chake. (Yes. 65:17; 1 Yoh. 3:8; Chivu. 21:3, 4) Ili ni layizgo liwemi chomene ilo tikulilindilira mwakunweka. Nangauli mulimo uwo Yesu wali kutipa ngunonono, kweni iyo wali nase ndipo wakutovwira mu mazuŵa ghaumaliro agha. (Mat. 28:19, 20) Fundo iyi yikutipa chikanga. Nakuti chikanga na chigomezgo ni vinthu vinyake vyakuzirwa chomene ivyo vingatovwira kuti tiŵe na mtende wamumtima.

17. (a) Kasi Mkhristu wangachita wuli kuti waŵe na mtende wamumtima? (b) Nga umo likuyowoyera lemba la Yohane 16:33, kasi tifiskenge kuchitachi?

¹⁷ Ipo kasi mungachita wuli kuti mulutilire kuŵa na mtende wamumtima para mwasangana na viyezgo vikuru? Mungaŵa nawo mtende wa mumtima para mungayezga Yesu. Chakwamba, lombani, ndipo mulimose umo vingaŵira lutilirani kulomba kwambura kuleka. Chachiŵiri, pulikirani Yehova na kulimbikira kupharazga nanga ni para ntchakusuzga kuchita nthena. Ndipo chachitatu, gomezgani ŵabwezi kuti ŵamovwirani para mwasangana na viyezgo. Para mwachita nthena, mtende wa Chiuta uvikilirenge maghanoghano na mtima winu. Nga ni Yesu, namwe mutondenge chiyezgo chilichose.—Ŵazgani Yohane 16:33.