1-2. Kasi Yesu wakang’anamuranga vichi apo wakayowoya mazgu agho ghali pa Yohane 4:35, 36?

YESU wakendanga mu minda, iyo yikwenera kuti tirigu wakaŵa wamera waka. (Yoh. 4:3-6) Ndipo tirigu kuti wavunike pakeneranga kujumpha myezi pafupifupi yinayi. Ntheura chikwenera kuti chikaŵa chakuzizika apo Yesu wakati: “Inuskani maso ghinu na kuwona minda kuti yacha kale kuti yivunike.” (Ŵazgani Yohane 4:35, 36.) Kasi wakang’anamuranga vichi?

² Apa Yesu wakwenera kuti wakayowoyanga vyakuvuna tirigu mwenecho yayi kweni wakang’anamuranga mulimo wakuvuna ŵanthu. Wonani ivyo vikachitika pambere wandayowoye mazgu agha. Nangauli Ŵayuda ŵakageganga Ŵasamariya kweni Yesu wakaŵa kuti wapharazgira mwanakazi Musamariya. Ndipo mwanakazi uyu wakategherezga. Ntheura apo Yesu wakatenge minda “yacha kale kuti yivunike,” wakang’anamuranga mzinda wa Ŵasamariya uwo ukapulika vya Yesu kwa mwanakazi uyo wakamupharazgira, ndipo ukizanga kwa iyo kuti uzakapulike vinandi. (Yoh. 4:9, 39-42) Pa nkhani iyi, munthu munyake wakulongosora vya Baibolo wakati: “Pakuti ŵanthu ŵakiza mwaluŵiro kuti ŵategherezge kwa Yesu, ŵakaŵa nga ni tirigu uyo ukwenera kuvunika.”

3. Para mukuwona ŵanthu nga ni umo Yesu wakaŵawoneranga, kasi vingamovwirani wuli kuti muŵe mupharazgi muwemi?

³ Kasi mukuŵawona wuli ŵanthu awo mukuŵapharazgira makani ghawemi? Kasi mukuŵawona nga ni tirigu uyo wacha kale kuti wavunike? Usange ni nthena, muchitenge vinthu vitatu ivi: Chakwamba, muŵapharazgirenge mwaluŵiro. Nyengo yakuvunira njichoko; tikwenera yayi kutaya nyengo pawaka. Chachiŵiri, mukondwenge para mwawona kuti ŵanthu ŵakutegherezga makani ghawemi. Baibolo likuti:  ‘Ŵanthu ŵakusekelera mu nyengo ya vuna.’ (Yes. 9:3) Ndipo chachitatu, muwonenge kuti munthu waliyose wangaŵa msambiri, ndipo pakuŵapharazgira mudumbiskanenge nawo nkhani izo ŵanganweka nazo.

4. Kasi mu nkhani iyi tisambirengeko vichi kwa mpositole Paulosi?

⁴ Ŵasambiri ŵanyake ŵa Yesu ŵakaghanaghananga kuti Ŵasamariya ŵangasintha yayi na kuŵa ŵasambiri, kweni ndimo Yesu wakaghanaghaniranga yayi. M’malo mwake, wakaŵawonanga kuti nawo ŵangaŵa ŵasambiri ŵake. Nase tikwenera kuwona ŵanthu ŵa mu chigaŵa chithu kuti ŵangasintha na kuŵa ŵasambiri ŵa Khristu. Mpositole Paulosi wakalongora chiyelezgero chiwemi chomene icho nase tingatolerako. Kasi tingasambirako vichi kwa iyo? Mu nkhani iyi, tidumbiskanenge (1) umo Paulosi wakamanyiranga vigomezgo vya ŵanthu awo wakaŵapharazgiranga, (2) umo wakamanyiranga nkhani izo ŵanganweka nazo, na (3) wakaŵawonanga kuti nawo ŵangaŵa ŵasambiri ŵa Yesu.

5. Chifukwa wuli Paulosi wakaŵapulikiskanga ŵanthu awo wakaŵapharazgiranga mu sunagoge?

⁵ Kanandi Paulosi wakapharazganga mu masunagoge gha Ŵayuda. Mwachiyelezgero, mu sunagoge la ku Tesalonika, kwa “mazuŵa ghatatu gha sabata wakadumbirana nawo [Ŵayuda] kufuma mu Malemba.” (Mil. 17:1, 2) Paulosi wakwenera kuti wakafwatukanga mu sunagoge. Wakaŵa Muyuda. (Mil. 26:4, 5) Ntheura Paulosi wakaŵapulikiskanga Ŵayuda, ndipo ivi vikamovwira kuti waŵapharazgirenge makora.—Fil. 3:4, 5.

6. Kasi ŵanthu awo ŵakaŵa mu msika wa ku Ateni ŵakapambananga wuli na awo Paulosi wakaŵapharazgiranga mu sunagoge?

⁶ Paulosi wati wachichizgika na ŵanthu ŵakutambuzga kuti wafumemo mu Tesalonika na Bereya, wakaluta ku Ateni. Uku nako, “wakamba kudumbirana nawo mu sunagoge, Ŵayuda na ŵanthu ŵanyake awo ŵakasopanga Chiuta.” (Mil. 17:17) Kweni apo wakapharazganga mu msika, Paulosi wakasangananga na ŵanthu ŵakupambanako. Pakati pa ŵanthu aŵa, pakaŵa ŵanthu awo ŵakasambira vinjeru vya charu kweniso pakaŵa Ŵamitundu awo ŵakawonanga kuti uthenga wa Paulosi ‘ntchisambizgo chiphya.’ Ŵakati kwa iyo: ‘Ukutiphalira vinthu ivyo ni vyachilendo mu makutu ghithu.’—Mil. 17:18-20.

7. Kuyana na Milimo 17:22, 23, kasi Paulosi wakasinthanga wuli upharazgi wake?

⁷ Ŵazgani Milimo 17:22, 23. Paulosi wakapharazgira Ŵamitundu ku Ateni nga ni umo wakapharazgira Ŵayuda mu sunagoge yayi. Paulosi wakwenera kuti wakajifumbanga kuti, ‘Kasi ŵanthu ŵa ku Ateni aŵa ŵakugomezga vichi?’ Wakalaŵisiskanga vinthu ivyo vikaŵa pafupi na kumanya mitheto yawo ya chisopa. Pamanyuma, para  Paulosi wakuŵapharazgira unenesko wa mu Malemba, wakambanga kudumbiskana nawo vinthu ivyo ŵangakolerana navyo. Munthu munyake wakulongosora vya Baibolo wakati, “Pakuŵa Mkhristu Wachiyuda, wakamanyanga kuti Ŵagiriki awo ŵakasopanga ŵangoza, ŵakusopa Chiuta ‘waunenesko’ yayi uyo Ŵayuda na Ŵakhristu ŵakasopanga. Ndipouli, wakayezgayezganga kuŵaphalira kuti Chiuta uyo iyo wakupharazga ngwachilendo yayi ku ŵanthu ŵa mu Ateni.” Ntheura Paulosi wakaŵa wakunozgeka kusintha. Wakaphalira ŵanthu ŵa ku Ateni kuti uthenga uwo wakupharazga ukufuma kwa “Chiuta Wambura Kumanyikwa” uyo ŵakayezgayezganga kumusopa. Nangauli Ŵamitundu ŵakaghamanyanga makora yayi Malemba, kweni Paulosi wakaghanaghanapo yayi kuti ŵanthu aŵa ŵangasintha yayi na kuŵa Ŵakhristu. M’malo mwake wakaŵawonanga nga ni tirigu uyo wacha kale kuti wavunike, ndipo wakasinthanga para wakuŵapharazgira makani ghawemi.

8. (a) Kasi ntchivichi chingamovwirani kumanya ivyo ŵanthu mu chigaŵa chinu ŵakugomezga? (b) Para munyake wakuti wali kale na chisopa chake, kasi mungamuzgora wuli?

⁸ Nga ni Paulosi, muwoneseskenge. Wonani vinthu ivyo vingamovwirani kumanya ivyo ŵanthu mu chigaŵa chinu ŵakugomezga. Kasi mwenecho wanyumba wayitozga na vichi nyumba yake panji galimoto yake? Kasi zina lake, umo wakuvwalira, umo wakujitozgera, panji umo wakuyowoyera vikulongora chisopa icho wali? Panji wamuphalirani kuti wali kale na chisopa chake. Mupayiniya munyake wapadera zina lake Flutura wakuti usange ndimo munthu wamuphalilira, wakumuzgora kuti, “Niza pano kuti nimuchichizgani kugomezga ivyo ine nkhugomezga yayi, kweni kuti nidumbiskane namwe nkhani iyi . . . ”

9. Kasi ni nkhani wuli izo mungasanga kuti mukolerane na munthu uyo wakutemwa vyakusopa?

⁹ Kasi munthu uyo wakutemwa vyakusopa mungadumbiskana nayo nkhani wuli? Yezgani kusanga nkhani iyo mose mungakolerana. Panji wangaŵa kuti wakusopa Chiuta yumoza pera, wakuwona kuti Yesu ni Mponoski wa ŵanthu wose, panji wangaŵa kuti wakugomezga kuti tikukhala mu nyengo ziheni ndipo sonosono apa charu chimarenge. Gwiliskirani ntchito vinthu ivyo mose mungakolerana kuti mupharazge uthenga wa mu Baibolo munthowa yakuti munthu wanweke nawo.

10. Kasi tikwenera kuyezga kuchita vichi, ndipo chifukwa wuli?

¹⁰ Kumbukani kuti nyengo zinyake ŵanthu ŵakugomezga waka chilichose yayi icho chisopa chawo chikusambizga. Ntheura nanga ni para mungamanya chisopa icho munthu wali, yezgani kumanya ivyo iyo payekha wakugomezga. Mupayiniya munyake wapadera ku Australia wakuti, “Ŵanandi mazuŵa ghano ŵakusazga vinjeru vya charu na vigomezgo vya chisopa chawo.” Donalta, uyo wakukhala ku Albania, wakuti, “Ŵanyake awo tikusangana nawo ŵakuti ŵali mu chisopa, kweni pamanyuma ŵakuti ŵakugomezga yayi mwa Chiuta.”  Ndipo mubali munyake uyo ni mishonale ku Argentina wakuti ŵanthu ŵanyake ŵakuti ŵakugomezga chisambizgo cha Utatu, kweni ŵangaŵa kuti ŵakugomezga nadi yayi kuti Dada, Mwana, na mzimu utuŵa ni Chiuta yumoza. Mishonale uyu wakutiso, “Para nakumbuka kuti ŵanthu ŵakugomezga yayi vyose ivyo chisopa chikusambizga, chikuŵa chipusu kusanga nkhani izo tose tingakolerana na munthu uyo nkhudumbiskana nayo.” Ntheura yezgani kumanya ivyo ŵanthu ŵakugomezga nadi. Ndipo nga ni Paulosi, namwe mungaŵa “vinthu vyose ku ŵanthu ŵa mitundu yose.”—1 Kor. 9:19-23.

11. Nga umo pakuyowoyera pa Milimo 14:14-17, kasi Paulosi wakachita wuli pakupharazgira ŵanthu awo ŵakakhalanga mu Lisitira?

¹¹ Ŵazgani Milimo 14:14-17. Paulosi wakamanyanga ivyo ŵanthu awo wakuŵapharazgira ŵakutemwa, ndipo pamanyuma wakasinthanga umo wangapharazgira. Mwachiyelezgero, ŵanthu awo wakayowoya nawo ku Lisitira ŵakamanyanga vichoko panji ŵakamanyangapo chilichose yayi chakukhwaskana na Malemba. Ntheura Paulosi wakayowoya nawo munthowa yakuti ŵangapulikiska. Wakayowoya vya nyengo za vipambi na umo ŵangaŵira ŵakukondwa. Wakayowoyanga mazgu na viyelezgero vipusu ivyo ŵanthu awo ŵakamutegherezganga ŵakavimanyanga makora.

12. Kasi mungamanya wuli ivyo munthu wakutemwa ivyo vingamovwirani kuti musinthe upharazgi?

¹² Chitani mwamahara kuti mumanye ivyo ŵanthu ŵa mu chigaŵa chinu ŵanganweka navyo ndipo sinthani upharazgi winu. Kasi mungamanya wuli vinthu ivyo munthu wanganweka navyo? Nga ni umo tayowoyera kale, mukwenera kuwoneseska. Vingaŵa kuti wakutemwa kupwelelera maluŵa, kuŵazga mabuku, kunozga galimoto, panji wakugwira ntchito yinyake waka. Para ntchakwenelera, mungachita makora kwambiska chidumbirano kwizira mu ivyo wakuchita. (Yoh. 4:7) Nanga ni vyakuvwara vingamuphalirani vinandi vya munthu, vingalongora charu icho wafuma, ntchito iyo wakugwira panji maseŵera agho wakutemwa. Gustavo wakuti, “Nkhayambiska chidumbirano na munyamata munyake wa vyaka 19 uyo wakavwara tisheti iyo pakaŵa chithuzi cha wakwimba munyake wakumanyikwa chomene. Nkhamufumba vya tisheti iyo wakavwara, ndipo wakaniphalira chifukwa icho wakutemwera wakwimba uyu. Ivyo tikadumbiskana  apa vikapangiska kuti wayambe kusambira Baibolo, ndipo sono nayo ni Kaboni wa Yehova.”

13. Kasi mungachita wuli kuti mwambiske sambiro la Baibolo munthowa yakuti munthu wanweke?

¹³ Para mukupempha munthu kuti mwambe kusambira nayo Baibolo, movwirani kuti wanweke; mulongorani umo kusambira Baibolo kumovwilirenge. (Yoh. 4:13-15) Mwachiyelezgero, mudumbu munyake zina lake Poppy, mwanakazi munyake uyo wakaŵa wakunweka wakamunjizga mu nyumba yake. Poppy wati wawona kuti pa chiliŵa cha nyumba iyi pali satifiketi yakulongora kuti mwanakazi uyu wakaŵa purofesa wamasambiro, wakadidimizga chomene kuti nase tikusambizga ŵanthu Baibolo, kweniso tikusambira Baibolo ku maungano ghithu. Mwanakazi uyu wakazomera sambiro la Baibolo, ndipo zuŵa lakulondezgapo wakiza ku maungano gha mpingo. Pamanyuma wakaluta ku ungano wadera. Pati pajumpha chaka chimoza, wakabatizika. Jifumbani kuti: ‘Kasi ŵanthu awo nkhuwelerako ŵakutemwa vichi? Kasi ningalongosora uwemi wakusambira Baibolo munthowa yakuti munthu wanweke?’

14. Kasi mungachita wuli kuti mumufikenge pamtima munthu waliyose uyo mukusambira nayo Baibolo?

¹⁴ Para mwamba kusambira Baibolo na munthu, nozgekerani makora sambiro lililose ilo mwamusambizga. Ghanaghanirani vya mbumba ya uyo mukusambira nayo Baibolo, masambiro ghake, ivyo wakumana navyo, na ivyo wakutemwa. Apo mukunozgekera, sankhani malemba agho mwamuŵazga, mavidiyo agho mwamumuwoneska, na viyelezgero ivyo mwamuyowoya kuti mukalongosore unenesko wa mu Baibolo. Jifumbani kuti, ‘Kasi ntchivichi chomene icho wamunweka nacho kweniso chamumufika pamtima msambiri uyu?’ (Zinth. 16:23) Ku Albania, mupayiniya munyake zina lake Flora wakasambiranga na mwanakazi munyake uyo wakatenge, “Ningachita yayi kugomezga kuti kuli chiwuka.” Flora wakamuchichizga yayi mwanakazi uyu. Iyo wakuti, “Nkhawona kuti pambere nindamovwire kuti wambe kugomezga kuti kuzamuŵa chiwuka, chakwamba wakwenera kumanya dankha Chiuta uyo wakulayizga kuti kuli chiwuka.” Kufuma waka panyengo iyi, nyengo yiliyose para wakuchitiska sambiro la Baibolo, Flora wakadidimizganga vya chitemwa, vinjeru, na nkhongono za Yehova. Pamanyuma, mwanakazi uyu wakagomezga kuti chiwuka chiliko. Ndipo sono ni Kaboni wa Yehova wakulimbikira chomene.

15. Kuyana na Milimo 17:16-18, kasi ŵanthu ŵa ku Girisi ŵakachitanga vichi ivyo vikamukondweskanga yayi Paulosi, ndipo chifukwa wuli wakaleka yayi kuŵapharazgira ŵanthu ŵa ku Ateni?

¹⁵ Ŵazgani Milimo 17:16-18. Paulosi wakaleka yayi kuŵapharazgira ŵanthu ŵa ku Ateni, nangauli ŵakamunenanga, ŵakasopanga vikozgo, ŵakachitanga uzaghali, kweniso ŵakagomezganga vinjeru vya ŵanthu ŵambura kusopa Chiuta. Paulosi nayo wakazgoka Mkhristu, nangauli pakwamba wakaŵa “wakuyuyura Chiuta na wakutambuzga ŵanthu ŵake kweniso munthu wamsinjiro.” (1 Tim. 1:13) Nga ni umo Yesu wakagomezgeranga kuti Paulosi wangasintha, Paulosi nayo wakagomezganga kuti ŵanthu ŵa ku Ateni nawo ŵangaŵa ŵasambiri. Nakuti ivyo wakagomezganga vikaŵa vyaunenesko.—Mil. 9:13-15; 17:34.

16-17. Ntchivichi chikulongora kuti ŵanthu ŵa mitundu yose ŵangaŵa ŵasambiri ŵa Khristu? Pelekani chiyelezgero.

¹⁶ Mu nyengo ya Ŵakhristu ŵakwambilira, ŵanthu ŵa mitundu yose ŵakazgoka ŵasambiri ŵa Yesu. Apo Paulosi wakalemberanga Ŵakhristu awo ŵakakhalanga mu msumba wa Ŵagiriki ku Korinte, wakati ŵanyake mu mpingo uwu pambere ŵandasambire unenesko ŵakaŵa vigeŵenga panji ŵakaŵa na nkharo zinyake zakuseluska. Kufuma apo wakatiso: “Kweni mwageziskika mwatowa.” (1 Kor. 6:9-11) Kasi muŵenge imwe mphanyi mukawona kuti ŵanthu aŵa ŵangasintha na kuŵa ŵasambiri?

¹⁷ Mazuŵa ghano, ŵanandi ŵakukhumba kusintha kuti ŵawe ŵasambiri ŵa Yesu. Mwachiyelezgero, ku Australia, mupayiniya munyake wapadera zina lake Yukina wakamanya kuti ŵanthu ŵa mitundu yose ŵangapulika uthenga wa mu Baibolo.  Zuŵa linyake apo wakaŵa pa malo gha bizinesi, wakawona msungwana munyake uyo wakajilembalemba muthupi ndipo wakavwara malaya ghakuru chomene. Yukina wakuti, “Nkhakhala dankha chete kwakanyengo, pamanyuma nkhamuyowoyeska. Nkhasanga kuti msungwana uyu wakalitemwanga Baibolo, nakuti vinyake mwa ivyo wakajilembalemba muthupi ghakaŵa mavesi ghanyake gha mu buku la Masalimo.” Msungwana uyu wakamba kusambira Baibolo na kwiza ku maungano. *

18. Chifukwa wuli tikwenera yayi kweruzga ŵanthu?

¹⁸ Kasi Yesu wakati minda yacha kale chifukwa chakuti wakakhazganga kuti ŵanthu ŵanandi ŵamulondezgenge? Yayi. Malemba ghakayowoyerathu kuti ŵachoko waka ndiwo ŵazamupulikana mwa iyo. (Yoh. 12:37, 38) Nakuti Yesu wakamanyanga ivyo vili mu mitima ya ŵanthu. (Mat. 9:4) Nangauli wakaŵikanga mtima pa ŵanthu ŵachoko waka awo ŵangapulikana mwa iyo, kweni wakalimbikiranga kupharazgira waliyose. Pakuti ise tikumanya yayi ivyo vili mu mitima ya ŵanthu, ipo tikwenera yayi kweruzga ŵanthu ŵa mu chigaŵa chithu panji munthu uyo tikumupharazgira. M’malo mwake, tiŵawonenge kuti nawo ŵangasintha. Marc, uyo ni mishonale ku Burkina Faso, wakati: “Ŵanthu awo nkhuwona kuti ŵangakura mwauzimu, kanandi ŵakuleka kusambira. Kweni awo nkhuwona kuti ŵangakura yayi ndiwo ŵakukura mwauzimu. Ntheura nili kusambira kuti ntchiwemi kuthemba mzimu wa Yehova kuti ndiwo utilongozgenge.”

19. Kasi tikwenera kuŵawona wuli ŵanthu ŵa mu chigaŵa chithu?

¹⁹ Pakwamba mungawona nga kuti mu chigaŵa chinu mulije ŵanthu ŵanandi awo ŵali nga ni tirigu uyo wacha kale kuti wavunike. Kweni kumbukani ivyo Yesu wakaphalira ŵasambiri ŵake. Wakati minda yacha kale, kung’anamura kuti yikwenera kuvunika. Ŵanthu ŵangasintha na kuŵa ŵasambiri ŵa Khristu. Yehova wakuwona kuti ŵanthu ŵa mu chigaŵa chithu ŵangaŵa ŵasambiri na kuŵa “vinthu vyakuzirwa.” (Hag. 2:7) Para tikuwona ŵanthu nga umo Yehova na Yesu ŵakuŵawonera, timanyenge ivyo ŵakugomezga na ivyo ŵakutemwa. Tiŵawonenge kuti mbalendo yayi, kweni tiŵawonenge kuti nawo ŵangaŵa ŵabali na ŵadumbu.