1. Kasi mukuchita wuli para mukukhumba kuŵa paubwezi wakukhora na munthu munyake?

KANANDI kuti muŵe paubwezi wakukhora na munthu munyake, mukwenera kuchezga nayo. Para mukuyowoyeskana, kuphalirana maghanoghano na ivyo vili kumuchitikiranipo, mukuŵa paubwezi. Kweni chikuŵa chipusu yayi para tikukhumba kuŵa paubwezi wakukhora na Yesu. Chifukwa wuli?

2. Kasi chifukwa chakwamba ntchakuti wuli?

² Chifukwa chakwamba ntchakuti Yesu tindamuwonepo. Ŵakhristu ŵanandi mu nyengo yakale nawo ŵakaŵa na suzgo lenelili. Nangauli ndimo vikaŵira, kweni mpositole Petrosi wakati: “Nangauli mundamuwonepo, kweni mukumutemwa. Nangauli pasono mukumulaŵiska yayi, kweni muli na chipulikano mwa iyo.” (1 Pet. 1:8) Ntheura vingachitika kuŵa paubwezi wakukhora na Yesu nangauli tindamuwonepo.

3. Kasi chifukwa chachiŵiri ntchakuti wuli?

³ Chifukwa chachiŵiri ntchakuti Yesu tikuyowoya nayo yayi. Para tikulomba, tikuyowoya na Yehova. Mbunenesko kuti tikulomba mu zina la Yesu, kweni tikuyowoya na Yesu yayi. Nakuti Yesu wakukhumba yayi kuti tilombenge kwa iyo. Chifukwa wuli? Chifukwa ntchakuti lurombo ntchigaŵa cha kusopa, ndipo ni Yehova pera uyo tikwenera kumusopa. (Mat. 4:10) Nangauli vili nthena, tingalongora nipera kuti tikumutemwa Yesu.

4. Kasi chifukwa chachitatu ntchakuti wuli, ndipo tidumbiskanenge vichi mu nkhani iyi?

 ⁴ Chifukwa chachitatu ntchakuti Yesu wakukhala kuchanya, ntheura tingachezga nayo yayi. Kweni nipera tingamanya vinandi vya Yesu nangauli tili nayo pafupi yayi. Tiwonenge vinthu vinayi ivyo tingachita kuti tikhozge ubwezi withu na iyo. Kweni chakwamba, tiyeni tiwone chifukwa icho ntchakuzirwa kuŵa paubwezi wakukhora na Khristu.

5. Chifukwa wuli tikwenera kuŵa paubwezi na Yesu? (Wonaniso bokosi lakuti “ Para Muli Paubwezi na Yesu, Muŵengeso Paubwezi na Yehova,” na lakuti “ Mumuwonenge Mwakwenelera Yesu.”)

⁵ Tikwenera kuŵa paubwezi na Yesu, para tikukhumba kuŵa paubwezi wakukhora na Yehova. Chifukwa wuli? Wonani vifukwa viŵiri ivi. Chakwamba, Yesu wakaphalira ŵasambiri ŵake kuti: “Adada ŵakumutemwani, pakuti imwe mukanitemwa ine.” (Yoh. 16:27) Wakayowoyaso kuti: “Palije uyo wakwiza kwa Adada kwambura kwizira mwa ine.” (Yoh. 14:6) Para munthu wakukhumba kuŵa paubwezi na Yehova kwambura kuŵa paubwezi wakukhora na Yesu vili nga ni para wakukhumba kunjira mu nyumba kwambura kugwiliskira ntchito mulyango. Yesu wakayowoya chiyelezgero chakuyana waka apo wakajilongosoranga kuti iyo ni “mulyango wa mberere.” (Yoh. 10:7) Chifukwa chachiŵiri ntchakuti Yesu wakayezga Awiske ndendende. Iyo wakaphalira ŵasambiri ŵake kuti: “Waliyose uyo wawona ine wawona na Adada wuwo.” (Yoh. 14:9) Ntheura nthowa yakuzirwa chomene yakumanyira Yehova nkhusambira vya umoyo wa Yesu. Apo tikusambira vinandi vya Yesu, chitemwa chithu pa iyo chikurenge. Ndipo para chitemwa chithu pa Yesu chikukura, tiŵatemwengeso chomene Adada ŵake.

6. Kasi ntchifukwa wuli chinyake icho tikwenera kuŵira paubwezi na Yesu? Longosorani.

 ⁶ Tikwenera kuŵa paubwezi na Yesu kuti malurombo ghithu ghazgoreke. Ichi chikung’anamura kuti tikwenera kuchita vinandi padera pakuyowoya waka kuti “mu zina la Yesu” kuumaliro wa malurombo ghithu. Tikwenera kumanya umo Yehova wakuzgolera malurombo ghithu kwizira mwa Yesu. Yesu wakaphalira ŵapositole kuti: “Chilichose icho mulombenge mu zina lane, nizamuchichita.” (Yoh. 14:13) Nangauli Yehova ndiyo wakupulika na kuzgora malurombo ghithu, kweni wali kumupa Yesu udindo wakuti wachite ivyo Yehova wakukhumba. (Mat. 28:18) Ntheura pambere Yehova wandazgore malurombo ghithu, wakuwona dankha usange ise tikulondezga ulongozgi uwo Yesu wakapeleka. Mwachiyelezgero, Yesu wakati: “Usange mukugowokera ŵanthu maubudi ghawo, Awiskemwe ŵakuchanya nawo ŵamugowokeraninge. Kweni usange mukugowokera chara ŵanthu maubudi ghawo, Awiskemwe nawo ŵamugowokeraninge chara maubudi ghinu.” (Mat. 6:14, 15) Ntheura ntchakuzirwa chomene kuti tichitenge vinthu na ŵanji mwalusungu nga umo Yehova na Yesu ŵakuchitira nase.

7. Kasi mbanjani ŵakupindura na sembe yakuwombora ya Yesu?

⁷ Ŵekha awo ŵali paubwezi wakukhora na Yesu ndiwo ŵangapindura na sembe yakuwombora. Kasi tikumanya wuli? Yesu wakati ‘wapelekenge umoyo wake chifukwa cha ŵabwezi ŵake.’ (Yoh. 15:13) Ŵanthu ŵakugomezgeka awo ŵakaŵako pambere Yesu wandize pa charu chapasi ŵazamusambira vya iyo kuti ŵawe nayo paubwezi. Ŵanthu nga Abrahamu, Sara, Mozesi, na Rahabi ŵazamuwuskika, kweni nanga ni ŵateŵeti ŵakugomezgeka aŵa wakwenera kuzakaŵa paubwezi na Yesu kuti ŵazakasange umoyo wamuyirayira.—Yoh. 17:3; Mil. 24:15; Heb. 11:8-12, 24-26, 31.

8-9. Kuyana na Yohane 15:4, 5, kasi ubwezi withu na Yesu ukutovwira kuchita vichi, ndipo chifukwa wuli ntchakuzirwa?

⁸ Ndise ŵakukondwa kuchitira pamoza na Yesu mulimo wakusambizga na kupharazga makani ghawemi gha Ufumu. Apo Yesu wakaŵa pa charu chapasi, wakaŵa msambizgi. Ndipo kufuma apo wakalutira kuchanya, Yesu pakuŵa mutu wa mpingo, wakulutilira kudangilira mulimo wakupharazga na kusambizga. Wakuwona ndipo wakuwonga chomene chifukwa cha kulimbikira kwinu kuti movwire ŵanthu ŵanandi kumumanya iyo na Awiske. Unenesko ngwakuti, tingafiska mulimo uwu na wovwiri wa Yehova na Yesu.—Ŵazgani Yohane 15: 4, 5.

⁹ Mazgu gha Chiuta ghakuyowoya mwakupulikikwa makora kuti tikwenera kulutilira kumutemwa Yesu kuti tikondweske Yehova. Sono tiyeni tiwone vinthu vinayi ivyo tingachita kuti tiŵe ŵabwezi ŵa Yesu.

10. Kasi chakwamba tikwenera kuchita vichi kuti tiŵe paubwezi na Yesu?

¹⁰ (1) Mumanyani Yesu. Tingachita nthena para tingaŵazga mabuku gha mu Baibolo gha Mateyu, Mariko, Luka, na Yohane. Apo tikughanaghanirapo nkhani zakuyowoya umoyo wa Yesu, timutemwenge na kumuchindika chifukwa cha umo wakachitiranga vinthu mwalusungu na ŵanthu. Mwachiyelezgero, nangauli wakaŵa Fumu yawo, kweni wakachitanga vinthu na ŵasambiri ŵake nga kuti mbazga yayi. M’malo mwake, wakaŵaphaliranga maghanoghano ghake kweniso umo wakujipulikira. (Yoh. 15:15) Para ŵali na chitima, Yesu nayo chitima chikamukoranga ndipo wakaliranga nawo. (Yoh. 11:32-36)  Nanga ŵangaŵa ŵalwani ŵake nawo ŵakamanyanga kuti Yesu wakaŵa paubwezi na ŵanthu awo ŵakazomera uthenga wake. (Mat. 11:19) Para tikuchita vinthu nga umo Yesu wakachitiranga na ŵasambiri ŵake, tikuŵa paubwezi uwemi na ŵanyithu, tikuŵa ŵakukhorwa na ŵakukondwa, ndipo chitemwa chithu pa Khristu chikukura chomene.

11. Kasi chachiŵiri icho tikwenera kuchita ntchivichi kuti tiŵe paubwezi na Yesu, ndipo chifukwa wuli ntchakuzirwa?

¹¹ (2) Mughanaghanenge na kuchita vinthu nga ni Yesu. Para tingamumanya makora na kuŵa na maghanoghano ghake tiŵenge nayo paubwezi wakukhora. (1 Kor. 2:16) Kasi tingamuyezga wuli Yesu? Wonani chiyelezgero ichi. Yesu wakaghanaghaniranga chomene umo wangawovwilira ŵanji kuluska kujikondweska waka yekha. (Mat. 20:28; Rom. 15:1-3) Chifukwa chakuti wakaŵa na maghanoghano agha, wakaŵa wakujipeleka na wakugowoka. Wakakhuŵaranga luŵiro yayi na ivyo ŵanthu ŵakamuyowoyeranga. (Yoh. 1:46, 47) Ndipo wakawonanga ŵanthu mwambura kwenelera yayi chifukwa cha ivyo ŵakabuda kumasinda. (1 Tim. 1:12-14) Yesu wakati: “Usange mukutemwana, wose ŵamanyenge kuti ndimwe ŵasambiri ŵane.” (Yoh. 13:35) Mungachita makora kujifumba kuti, “Kasi nkhuyezga Yesu mwakuchita chilichose icho ningafiska kuti niŵe pa mtende na ŵabali na ŵadumbu?”

12. Kasi chachitatu ntchivichi icho chingatovwira kuti tiŵe paubwezi na Yesu, ndipo tingachita wuli nthena?

¹² (3) Wovwirani ŵabali ŵa Khristu. Yesu wakuwona ivyo tikuchitira ŵabali ŵake ŵakuphakazgika nga ni para tikuchitira waka iyo. (Mat. 25:34-40) Nthowa yakuzirwa chomene iyo tikovwilira ŵakuphakazgika nkhuchitako mwakukwana mulimo wakupharazga Ufumu na kuzgora ŵanthu kuŵa ŵasambiri nga umo Yesu wakayowoyera. (Mat. 28:19, 20; Mil. 10:42) Ŵabali ŵa Khristu ŵangafiska mulimo ukuru wakupharazga pa charu chose uwo ukuchitika sono pekha para ‘ŵamberere zinyake’ ŵangaŵawovwira. (Yoh. 10:16) Para ndimwe ŵamberere zinyake, manyani kuti nyengo yiliyose iyo mukuchitako mulimo uwu, mukulongora kuti mukuŵatemwa ŵabali ŵa Khristu kweniso Yesu.

13. Kasi tingalondezga wuli ulongozgi wa Yesu uwo uli pa Luka 16:9?

¹³ Tikuŵaso paubwezi na Yehova na Yesu para tikupeleka ndalama zakovwilira pa ntchito iyo ŵakulongozga. (Ŵazgani Luka 16:9.) Mwachiyelezgero, tingapeleka ndalama kuti zovwire pa ntchito ya pa charu chose. Ndalama izi zikovwira pa mulimo wakupharazga makani ghawemi ku vigaŵa vyakutali, kuzenga na kunozga malo ghakusoperapo, na kugura katundu wa awo ŵakhwaskika na masoka gha chilengiwa panji ngozi yinyake. Tingapelekaso ndalama zakuti zovwire pa mpingo withu kweniso tingawovwira awo ŵakukhumbikwira wovwiri. (Zinth. 19:17) Umu ndimo tingawovwilira ŵabali ŵa Khristu.

14. Kuyana na Ŵaefeso 4:15, 16, kasi chachinayi ntchivichi icho chingatovwira kuti tiŵe paubwezi na Yesu?

¹⁴ (4) Khozgerani ndondomeko ya gulu la Yehova. Tikuŵa paubwezi wakukhora na Yesu uyo ni mutu wa mpingo para tikukolerana na awo ŵali kusoleka kuti ŵatipwelelerenge. (Ŵazgani Ŵaefeso 4:15, 16.) Mwachiyelezgero, pasono tikuyezga kuti Nyumba za Ufumu zose zigwirenge ntchito mwakukwana. Lekani mipingo yinyake yasazgika pamoza ndipo vigaŵa vyakupharazgako navyo vyasintha. Ndondomeko iyi yawovwira kuti ndalama zinandi izo zikupelekeka ku gulu la Yehova zileke kusakazika. Ndipouli, ivi vyapangiska kuti ŵapharazgi ŵanyake ŵasinthe  vinthu vinyake kuti ŵakolerane na ndondomeko yiphya iyi. Ŵapharazgi ŵakugomezgeka aŵa ŵangaŵa kuti ŵateŵetera mu mpingo unyake kwa vyaka vinandi ndipo ŵaŵa paubwezi wakukhora na ŵabali na ŵadumbu mu mpingo uwo. Kweni sono ŵakuphalirika kuti ŵakateŵeterenge mu mpingo unyakeso. Yesu wakukondwa chomene kuwona kuti ŵateŵeti ŵakugomezgeka aŵa ŵakukolerana na ndondomeko iyi.

15. Kasi ubwezi withu na Yesu uzamukhora wuli kunthazi?

¹⁵ Awo ŵali kuphakazgika na mzimu utuŵa ŵali na chilindizga cha kukakhala na Yesu kuchanya muyirayira, ndipo ŵamuwusa nayo lumoza mu Ufumu wa Chiuta. Ŵamuwona Khristu, kuyowoya nayo, na kukhala nayo. (Yoh. 14:2, 3) Awo ŵali na chigomezgo cha kuzakakhala pa charu chapasi nawo Yesu wazamuŵatemwanga. Ndipouli, ŵazamumuwona yayi Yesu, kweni ŵazamuŵa paubwezi wakukhora na iyo apo ŵazamusangwanga na umoyo uwo Yehova na Yesu ŵazamupeleka.—Yes. 9:6, 7.

16. Kasi tikupindura wuli chifukwa chakuŵa paubwezi na Yesu?

¹⁶ Para tazomera kuŵa paubwezi na Yesu, tikusanga vitumbiko vinandi chomene. Mwachiyelezgero, tikupindura na chitemwa chake na wovwiri uwo wakutipa sono. Tili na mwaŵi wakuzakakhala muyirayira. Chakuzirwa chomene kuluska vyose ntchakuti para tili paubwezi na Yesu tikuŵaso paubwezi na Yehova, awo Mbadada ŵake. Ni mwaŵi wapadera chomene kumanyikwa kuti ndise ŵabwezi ŵa Yesu.