Chifukwa wuli apo Yesu wakaŵa pafupi kufwa wakakora mazgu gha Davide gha pa Salimo 22:1?

Mazgu ghanyake agho Yesu wakayowoya apo wakaŵa pafupi kufwa ghakusangika pa Mateyu 27:46. Mazgu ghake ngakuti: “Chiuta wane, Chiuta wane, kasi mwanisidirachi?” Apo Yesu wakayowoya mazgu agha, wakafiska mazgu gha wamasalimo Davide, agho ghali pa Salimo 22:1. (Mrk. 15:34) Chingaŵa chakupulikikwa yayi kuyowoya kuti Yesu wakayowoya mazgu agha chifukwa chakuti wakakhuŵara panji chipulikano chake chikachepa. Yesu wakamanyanga makora chifukwa icho wakeneranga kufwira, nakuti iyo wakaŵa wakunozgeka kufwa. (Mat. 16:21; 20:28) Wakamanyangaso kuti panyengo iyo wafwirenge, Yehova wakwenera kuwuskako “m’panda” panji kuti chivikiliro kwa iyo. (Yobu 1:10) Yehova wakamuvikilira nadi yayi Yesu mwakuti Yesu walongore yekha pakweru kuti iyo nyengo zose waŵenge wakugomezgeka nanga wangafwa nyifwa yakuŵinya chomene.​—Mrk. 14:35, 36.

Ipo chifukwa wuli pera Yesu wakayowoya mazgu gha pa salimo ili? Nangauli chifukwa cheneko tikuchimanya yayi, kweni tiyeni tidumbiskane vinyake ivyo panji vikaŵa vifukwa. *

Pakuyowoya mazgu agha, kasi Yesu wakadidimizganga fundo yakuti Yehova wanjilirengepo yayi pa nyifwa yake? Yesu wakeneranga kupeleka sembe yakuwombora kwambura wovwiri wa Yehova. Yesu wakaŵa munthu nga ndise,  ndipo wakeneranga kufwa kuti “wachete nyifwa m’malo mwa munthu waliyose.”​—Heb 2:9.

Pakukora mazgu ghachoko waka gha pa salimo ili, kasi Yesu wakakhumbanga kuti ŵanthu ŵaghanaghanire za chaputara chose cha salimo ili? Kale, Ŵayuda ŵakatemwanga kusunga pamtima masalimo. Para ŵapulika waka vesi limoza la salimo, iwo ŵakakumbukiranga chaputara chose cha salimo. Usange ndivyo Yesu wakakhumbanga, ndikuti wakawovwira Ŵayuda awo ŵakamulondezganga kukumbukira mauchimi ghanandi agho ghakuyowoya za nyifwa yake agho ghali mu salimo ili. (Sal. 22:7, 8, 15, 16, 18, 24) Kweniso mavesi ghakuumaliro gha salimo ili, ghakulumba Yehova, ndipo ghakuti iyo ni themba la pa charu chapasi.​—Sal. 22:27-31.

Kasi Yesu wakakhumbanga kulongora kuti iyo walije mulandu pakukora mazgu gha Davide? Pambere Yesu wandafwe, ŵanthu ŵakamutolera ku khoti ndipo ŵakamuyimba mulandu wakuti wakuyuyura Chiuta. (Mat. 26:65, 66) Mulandu wake ŵakeruzga usiku, ndipo ŵakalondezga malango yayi pakweruzga. (Mat. 26:59; Mrk. 14:56-59) Ntheura apo Yesu wakafumba kuti “Chiuta wane, Chiuta wane, kasi mwanisidirachi?” wakwenera kuti wakang’anamuranga kuti iyo walije mulandu wakuti wakomekerepo.

Kasi Yesu ndikuti wakakumbuskangaso ŵanthu kuti nangauli Davide uyo wakalemba salimo ili nayo wakasuzgika, kweni chikang’anamuranga kuti Yehova waleka kumutemwa yayi? Davide pakufumba fumbo ili wakang’anamuranga kuti wakaŵavya chipulikano yayi. Davide wakati wafumba fumbo ili, wakayowoyaso kuti wakugomezga kuti Yehova wali na nkhongono zakuponoskera ŵanthu ŵake, ndipo Yehova wakalutilira kumutumbika. (Sal. 22:23, 24, 27) Mwakuyana waka, nangauli Yesu, “Mwana wa Davide,” wakasuzgika pa nkhuni lakusuzgikirapo, chikang’anamuranga kuti Yehova wakaleka kumutemwa yayi.​—Mat. 21:9.

Kasi Yesu wakakhumbanga kulongora chitima chake chifukwa chakuti Yehova wakaleka kumuvikilira mwakuti walongore kuti ngwakugomezgeka? Pakwamba ndilo likaŵa khumbo la Yehova yayi kuti Yesu wazakasuzgike na kufwa. Yesu wakafwa chifukwa chakuti munthu wakwamba wakaleka kupulikira. Palije icho Yesu wakananga, kweni wakeneranga kutambuzgika na kufwa kuti wasuske mautesi agho Satana wakayowoya, kweniso kuti wawezgerepo ivyo munthu wakwamba wakataya. (Mrk. 8:31; 1 Pet. 2:21-24) Kuti ivi vichitike, Yehova wakeneranga yayi kumuvikilira Yesu ku nyifwa iyi. Ndipo aka kakaŵa kakwamba kuti Yehova wachite nthena.

Kasi Yesu wakakhumbanga kuti ŵalondezgi ŵake ŵaghanaghanire chomene pa chifukwa icho Yehova wakazomerezgera kuti iyo wafwire pa khuni lakusuzgikirapo? * Yesu wakamanyanga kuti ŵanthu ŵanandi ŵakhuŵarenge chifukwa chakuti iyo wakomekenge nga ntchigeŵenga pa khuni lakusuzgikirapo. (1 Kor. 1:23) Ŵalondezgi ŵake ŵaghanaghanirenge pa chifukwa icho Yesu wakafwira, ŵakatenge ŵapulikiskenge makora kuzirwa kwa nyifwa yake. (Gal. 3:13, 14) Ŵakatenge ŵamuwonenge kuti ntchigeŵenga yayi, kweni Muponoski wawo.

Nangauli tikumanya yayi chifukwa cheneko icho Yesu wakayowoyera mazgu gha Davide, kweni wakamanyanga kuti pakufwira pa khuni lakusuzgikirapo, wakachitanga khumbo la Yehova. Pamanyuma pa kuyowoya mazgu gha mu salimo ili, Yesu wakati: “Chafiskika!” (Yoh. 19:30; Luka 22:37) Nadi, nyengo yichoko waka iyo Yehova wakaleka kumuvikilira Yesu, vikawovwira kuti wafiske chilato icho wakatumikira pa charu chapasi. Vikawovwiraso kuti vyose ivyo vikalembeka vyakukhwaskana na iyo “mu Dango la Mozesi na mu Ntchimi na Masalimo” vifiskike.​—Luka 24:44.