1-2. Kasi tingalondezga wuli mendero gha Yesu? Yowoyani chiyelezgero.

GHANAGHANIRANI kuti mukwenda mu mapopa ghakofya agho muli mchenga wekhawekha. Munthu munyake uyo wakughamanya makora mapopa agho wakumulongozgani. Munthu uyu wakwenda panthazi pinu. Apo wakwenda, malundi ghake ghakudinda pa mchenga. Pamanyuma mwaleka kumuwona munthu uyu. Kweni mukopa yayi. Imwe na ŵanthu awo muli nawo, mukulondezga waka umo malundi ghake ghadinda.

² Pakuŵa Ŵakhristu ŵaunenesko, nase tingayowoya kuti tikwenda mu mapopa ghakofya, agho ni charu chiheni ichi. Kweni chakukondweska ntchakuti Yehova watipa munthu muwemi wakuti watilongozge. Watipa Mwana wake, Yesu Khristu, uyo tingalondezga mendero ghake mwakugomezgeka. (1 Pet. 2:21) Buku linyake lakulongosora Baibolo likuti, apa Petrosi wakuyaniska Yesu na munthu uyo wakulongozga nthowa. Nga ni munthu wakulongozga nthowa uyo wakuleka malundi ghake ghadinda mumanyuma, Yesu nayo watilekera mwakuti tikandenge. Sono tiyeni tidumbiskane mafumbo ghatatu ghakukhwaskana na kulondezga mendero ghake. Mafumbo agha ni: Kasi kulondezga mendero gha Yesu chikung’anamurachi? Chifukwa wuli tikwenera kulondezga mendero ghake? Kasi tingachita wuli nthena?

3. Kasi kulondezga mendero gha munthu munyake chikung’anamurachi?

³ Kasi kulondezga mendero gha munthu munyake chikung’anamurachi? Mu Baibolo, mazgu ghakuti “kwenda,” na “malundi,” nyengo zinyake ghakung’anamura ivyo munthu wakuchita pa umoyo wake. (Gen. 6:9; Zinth. 4:26) Ivyo munthu wakuchita pa umoyo  wake tingaviyaniska na umo wakukanda panji vidindo vya malundi ghake. Ntheura kulondezga mendero gha munthu munyake chikung’anamurachi kulondezga ivyo wakuchita.

4. Kasi kulondezga mendero gha Yesu chikung’anamurachi?

⁴ Ipo kasi kulondezga mendero gha Yesu chikung’anamurachi? Mwakudumura, chikung’anamura kuchita ivyo iyo wakachitanga. Mu lemba ilo pajintha nkhani iyi, mpositole Petrosi wakayowoya kuti Yesu wakatilekera chakuwonerapo chiwemi pa nkhani ya kuzizipizga masuzgo. Kweni paliso vinthu vinandi ivyo Yesu wakachita ivyo tingalondezga. (1 Pet. 2:18-25) Titi waka vyose ivyo Yesu wakachitanga ni vyakuti ise tikwenera kulondezga.

5. Kasi ŵanthu ŵakwananga ŵangalondezga ndendende ivyo Yesu wakachitanga? Longosorani.

⁵ Pakuti tili ŵanthu ŵakwananga, kasi tingalondezga nadi ivyo Yesu wakachitanga? Enya tingalondezga. Kumbukani kuti Petrosi wakutichiska kuti ‘tilondezgenge mendero gha Yesu mwakugomezgeka,’ ndendende yayi. Para tikulondezga mendero ghake mwakugomezgeka, na kufwilirapo kuchita vyose ivyo tingafiska pakuŵa ŵanthu ŵakwananga, mbwe ndikuti tikulondezga mazgu gha mpositole Yohane ghakuti: ‘Lutilirani kwenda nga umo iyo Yesu wakenderanga.’—1 Yoh. 2:6.

6-7. Chifukwa wuli tingayowoya kuti tiŵenge paubwezi na Yehova para tilondezgenge mendero gha Yesu?

⁶ Para tikulondezga mendero gha Yesu, tiŵenge paubwezi na Yehova. Chifukwa wuli tikuyowoya nthena? Chakwamba, nyengo zose Yesu wakachitanga vinthu vyakukondweska Chiuta, ndipo ntchiyelezgero chiwemi kwa ise. (Yoh. 8:29) Ntheura tikondweskenge Yehova para tilondezgenge mendero gha Yesu. Ndipo tili na chigomezgo chose kuti Adada ŵithu ŵakuchanya ŵakusendelera ku ŵanthu awo ŵakuyezgayezga kuŵa ŵabwezi ŵawo.​—Yak. 4:8.

⁷ Chachiŵiri, Yesu wakalondezganga Adada  ŵake mwakufikapo. Lekani Yesu wakati: “Waliyose uyo wawona ine wawona na Adada wuwo.” (Yoh. 14:9) Tingayezga mikhaliro ya Yesu kweniso umo wakachitiranga vinthu na ŵanthu. Mwachiyelezgero, wakalongora lusungu wavyoni, wakachitira chitima mwanakazi uyo wakaŵa na ulwari wakofya, kweniso wakachitira chiwuravi awo ŵakutemweka ŵawo ŵakafwa. Ntheura para tikuyezga Yesu ndikuti tikulondezga Yehova. (Mrk. 1:40, 41; 5:25-34; Yoh. 11:33-35) Para nyengo zose tikulondezga Yehova, ubwezi withu na iyo uŵenge wakukhora chomene.

8. Chifukwa wuli kulondezga mendero gha Yesu kungatovwira kuti titonde charu?

⁸ Para tikulondezga mendero gha Yesu titimbanizgikenge yayi na charu chiheni ichi. Pa usiku wake waumaliro pa charu chapasi, Yesu wakayowoya kuti: “Ine nathereska charu.” (Yoh. 16:33) Wakang’anamuranga kuti wakakana kulongozgeka na maghanoghano, vilato, na vyakuchitika vya mu charu ichi. Yesu wakaluwa yayi chifukwa icho wakatumikira pa charu chapasi, icho nkhupanikizgira kuti Yehova ndiyo ngwakwenelera nadi kuwusa. Wuli pakuyowoya za ise? Mu charu ichi, muli vinthu vinandi ivyo vingatitimbanizga kuteŵetera Yehova. Kweni para tikuŵika mtima pakuchita khumbo la Yehova nga ni Yesu, nase ‘tithereskenge’ charu.​—1 Yoh. 5:5.

9. Kasi tikwenera kuchita vichi kuti tizakasange umoyo wamuyirayira?

⁹ Tizamusanga umoyo wamuyirayira para tikulondezga mendero gha Yesu. Apo munyamata munyake musambazi wakafumba ivyo wangachita kuti wazakasange umoyo wamuyirayira, Yesu wakazgora kuti: “Wize uŵe mulondezgi wane.” (Mat. 19:16-21) Yesu wakaphalira Ŵayuda awo ŵakagomezganga yayi kuti iyo ni Khristu, kuti: “Mberere zane . . . zikunilondezga. Nkhuzipa umoyo wamuyirayira.” (Yoh. 10:24-29) Yesu wakaphaliraso Nikodemo, uyo wakaŵa membara wa Sanihedirini ndipo wakakhumbanga kumanya visambizgo vya Yesu, kuti: “Uyo wakupulikana mwa [ine] . . . waŵenge na umoyo wamuyirayira.” (Yoh. 3:16) Tikupulikana mwa Yesu usange tikulondezga ivyo wakasambizga, na kuchita ivyo wakachitanga. Para tichitenge nthena, mbwenu tizamusanga umoyo wamuyirayira.​—Mat. 7:14.

10. Kasi tikwenera kuchita wuli kuti timumanye makora Yesu? (Yoh. 17:3)

¹⁰ Pambere tindambe kulondezga mendero gha Yesu mwakugomezgeka, tikwenera kumumanya dankha makora. (Ŵazgani Yohane 17:3.) ‘Kumumanya’ Yesu kukumara yayi. Tikwenera kulutilira kumumanya makora, ndipo kuti tichite nthena tikwenera kulutilira kusambira vinandi vyakukhwaskana na iyo, mikhaliro yake, umo wakughanaghanira, na umo wakuwonera vinthu. Kwali takhala vyaka vinandi mu unenesko panji yayi, kweni tikwenera kulutilira ‘kumumanya’ makora Yehova na Mwana wake.

11. Kasi mu mabuku gha Makani Ghawemi muli vichi?

¹¹ Kuti Yehova watovwire kumumanya makora Mwana wake, watipaso mabuku ghanayi gha Makani Ghawemi mu Baibolo. Mabuku agha ghakulongosora umoyo wa Yesu na uteŵeti wake.  Ghakulongosora ivyo Yesu wakayowoya, ivyo wakachita, na umo wakajipulikiranga. Mabuku ghanayi agha ghakutovwira kuti ‘tighanaghanire chomene’ chiyelezgero cha Yesu. (Heb. 12:3) Tingati mu mabuku agha muli mendero gha Yesu ghakuti tilondezge. Ntheura para tikusambira mabuku gha Makani Ghawemi, tilutilirenge kumumanya makora Yesu. Ndipo ivi viwovwirenge kuti tilondezgenge mendero ghake mwakugomezgeka.

12. Kasi tingachita wuli kuti tipindurenge chomene na mabuku gha Makani Ghawemi?

¹² Kuti tipindure chomene na mabuku gha Makani Ghawemi, tikwenera kuchita vinandi padera pakughaŵazga waka. Tikwenera kughasambira mwakupwelelera na kughanaghanirapo chomene ivyo tikusambira. (Yaniskani na Joshuwa 1:8, mazgu ghamusi.) Sono tiyeni tiwone masachizgo ghaŵiri agho ghangatovwira kuti tighanaghanirenge pa mabuku gha Makani Ghawemi na kulondezga ivyo tikuŵazga.

13. Kasi mungachita wuli kuti mupulikiske makora nkhani yakukhwaskana na umoyo wa Yesu?

¹³ Chakwamba, muŵenge nga mukuwona ivyo vikachitikanga. Muŵenge nga mukuwona, kupulika, na kukhwaskika na ivyo vikachitikanga pa nyengo iyo. Kuti muchite nthena, chitani kafukufuku mu mabuku agho gulu la Yehova likupeleka. Sandani nkhani yose. Mungawona ivyo vikachitika pambere nkhani iyo mukuŵazga yindachitike kweniso ivyo vikachitika pamanyuma pake. Manyani vinandi vyakukhwaskana na malo panji ŵanthu awo mukuŵazga. Para mulembi munyake wa Makani Ghawemi nayo wali kulembaso nkhani iyo mukuŵazga, ŵazgani kuti muyaniske. Nyengo zinyake mulembi munyake wa Makani Ghawemi wali kulongosora makora fundo zinyake izo munyake wakazilongosora yayi.

14-15. Kasi tingachita wuli kuti tilondezgenge ivyo tikusambira mu nkhani zakulongosora umoyo wa Yesu?

¹⁴ Chachiŵiri, londezgani fundo za mu mabuku gha Makani Ghawemi. (Yoh. 13:17) Para mwaŵazga mwakupwelelera nkhani yakukhwaskana na umoyo wa Yesu, jifumbani kuti: ‘Kasi mu nkhani iyi muli fundo yinyake iyo nkhwenera kuyilondezga pa umoyo wane? Kasi nkhani iyi ningawovwira nayo wuli ŵanyane?’ Ghanaghanirani za munthu munyake uyo mukuwona kuti wangawovwirika na nkhani iyo, ndipo panyengo  yakwenelera ndiposo mwaluso muphaliraniko ivyo mwasambira.

¹⁵ Tiyeni tiwone nkhani iyo yingatovwira umo tingalondezgera masachizgo ghaŵiri agha. Tidumbiskanenge za chokoro chikavu icho Yesu wakachiwona mu tempile.

16. Ŵazgani Mariko 12:41 na kulongosora ivyo vikwenera kuti vikachitika.

¹⁶ Muŵe nga mukuwona ivyo vikachitika. (Ŵazgani Mariko 12:41.) Muŵe nga mukuwona ivyo vikachitika. Mpha Nisani 11, 33C.E. ndipo kwakhala mazuŵa ghachoko waka kuti Yesu wakomeke. Zuŵa lose Yesu watandalira kusambizga mu tempile. Kweni ŵalongozgi ŵa chisopa ŵakhalira waka kumususka. Ŵanyake mwa iwo ŵangumufumbapo uko wakutora nkhongono zakuchitira milimo yake. Ŵanyake ŵayezgayezganga kumuphulunga na mafumbo kuti watondeke kuzgora. (Mrk. 11:27-33; 12:13-34) Sono Yesu waluta ku chigaŵa chinyake cha tempile. Ku malo agha, uko kukwenera kuti kukachemekanga kuti Luŵaza lwa Ŵanakazi, iyo wakuwona chakuponyamo vyakupeleka musi mwa chiwumba. Iyo wakukhala pasi na kwamba kuwona ŵanthu ŵakuponya vyakupeleka mu chakuponyamo vyakupeleka ichi. Wakuwona ŵasambazi ŵanandi ŵakuponyamo ndalama zinandi. Panji wakhala pafupi mwakuti wakupulika kulira kwa manjawara agho ghakuwa mukati.

17. Kasi chokoro chikavu icho chikuyowoyeka pa Mariko 12:42 chikachita vichi?

¹⁷ Ŵazgani Mariko 12:42. Pati pajumpha kanyengo, Yesu wakuwona mwanakazi munyake, uyo ni ‘chokoro chikavu.’ (Luka 21:2) Vinthu vili makora yayi pa umoyo wake, wakusuzgikira kuti wasange vyakukhumbikwa pa umoyo. Kweni wakuluta pa chakuponyamo vyakupeleka na kuponyamo tundalama tuŵiri twakuzirwa pachoko, uto panji tukalira na kulira wuwo yayi pakuwa mu chakuponyamo vyakupeleka. Yesu wamanya kuti chokoro ichi chaponyamo tundalama tuŵiri twakuchemeka lepita, uto tukaŵa tundalama tuchoko chomene pa nyengo yira. Tundalama utu tukakwananga yayi nanga nkhugulira mpheta yimoza, uto tukaŵa tuyuni twakutchipa chomene uto ŵanthu ŵakaryanga.

18. Kuyana na Mariko 12:43, 44, kasi Yesu wakayowoya vichi vyakukhwaskana na tundalama uto chokoro chikapeleka?

¹⁸ Ŵazgani Mariko 12:43, 44. Yesu wakakondwa chomene na chokoro ichi. Wakachema ŵasambiri ŵake na kuŵalongora chokoro ichi, ndipo wakati: “Chokoro chikavu ichi chaponyamo zinandi kuluska wose.” Ndipo wakalongosora kuti: “Wose [chomene ŵasambazi] ŵaponyamo kufuma pa unandi wa usambazi wawo, kweni chokoro ichi, mu ukavu wake, chaponyamo vyose ivyo chikaŵa navyo, vyose ivyo vyate vichovwirenge.” Apo chokoro ichi chikapeleka ndalama yekha iyo chikaŵa nayo, chikalongora kuti chikugomezga Yehova kuti wachipwelelerenge.—Sal. 26:3.

19. Kasi ni sambiro wuli lakuzirwa ilo tingasambirako ku mazgu agho Yesu wakayowoya ghakukhwaskana na chokoro chikavu?

¹⁹ Umo mungalondezgera nkhani iyi pa umoyo winu. Jifumbani kuti, ‘Kasi ningasambirako vichi ku mazgu agho Yesu wakayowoya ghakukhwaskana na chokoro chikavu?’ Ghanaghanirani za chokoro. Tikukayika yayi kuti chikakhumbanga kupeleka vinandi kwa Yehova. Kweni chikachita ivyo chingakwaniska; chikapeleka ivyo chikaŵa navyo. Ndipo Yesu wakamanya kuti ivyo chikapeleka vikaŵa vyakuzirwa chomene kwa Adada ŵake. Apa sambiro lakuzirwa kwa ise ndakuti: Yehova wakukondwa chomene para tikumupa vyose ivyo tingafiska. Wakukhumba kuti timuteŵeterenge na mtima withu wose ndiposo na umoyo withu wose. (Mat. 22:37; Kol. 3:23) Yehova wakukondwa chomene para wakuwona kuti tikuchita vyose ivyo tingafiska pakumusopa, kwali mpha nkhani ya kupharazga na kufika pa maungano.

20. Kasi mungalondezga wuli fundo za mu nkhani yakukhwaskana na chokoro? Yowoyani chiyelezgero.

²⁰ Kasi mungalondezga wuli fundo za mu  nkhani yakukhwaskana na chokoro? Ghanaghanirani za ŵanthu ŵanyake awo ŵangakhumbikwira kukhozgeka kuti ŵamanye kuti Yehova wakukondwa na ivyo ŵakukwaniska kuchita. Mwachiyelezgero, kasi mukumanyapo mudumbu muchekuru uyo panji wakujiyimba mulandu panji wakujiwona kuti ngwambura ntchito chifukwa chakuti sono wakutondeka kuchita vinandi mu uteŵeti chifukwa cha ulwari panji uchekuru? Panji mungaghanaghanira za mubali munyake uyo wakulwaralwara ndipo wakutondeka kufika ku maungano nyengo zose. Ŵawovwirani ŵanthu aŵa, mwakuŵayowoyera mazgu “ghawemi ghakuzenga.” (Efe. 4:29) Ŵaphaliraniko fundo zakukhozga izo tasambira mu nkhani ya chokoro chikavu. Fundo zakukhozga izo mungaŵaphalira zingaŵakumbuska kuti Yehova wakukondwa para tikumupa vyose ivyo tingakwaniska. (Zinth. 15:23; 1 Tes. 5:11) Para mukulumba ŵanyinu chifukwa cha kupeleka kwa Yehova ivyo ŵangafiska, nanga vingawoneka vichoko wuli, ndikuti mukulondezga mendero gha Yesu mwakugomezgeka.

21. Kasi mwaŵikapo mtima kuchita vichi?

²¹ Tikuwonga chomene kuti mu mabuku gha Makani Ghawemi muli nkhani zinandi zakuyowoya vya umoyo wa Yesu. Nkhani izi zikutovwira kuti timuyezgenge, na kulondezga mendero ghake mwakugomezgeka. Mwalekerachi kuti pa sambiro linu lamwaŵene panji pa Kusopa kwinu kwa Mbumba musambire mabuku agha? Tiyeni tikumbuke kuti tingasanga chandulo panyengo ya kusambira usange tikuŵa nga tikuwona ivyo vikachitikanga na kulondezga ivyo tasambira. Padera pa kulondezga ivyo Yesu wakachita, tikweneraso kutegherezga ivyo wakayowoya. Mu nkhani yakulondezgapo, tizamuwona ivyo tingasambirako ku mazgu ghaumaliro agho Yesu wakayowoya pambere wandafwe.