NKHANI YAKUSAMBIRA 19
Kasi Tingakhozga Wuli Chipulikano Chithu Kuti Yehova Wazamufiska Nadi Layizgo Lake la Charu Chiphya?
“Para [Yehova] wayowoya chinthu, asi wachichitenge?”—MAŴA. 23:19.
SUMU 142 Kukoleska Chigomezgo Chithu
IVYO VILI MU NKHANI IYI a
1-2. Kasi tikwenera kuchita vichi apo tikulindilira charu chiphya?
TIKUWONGA chomene kuti Yehova walayizga kuti wazamuwuskapo charu chiheni ichi na kuŵikapo charu chiphya icho muzamuŵa urunji pera. (2 Pet. 3:13) Nangauli tikumanya yayi apo charu chiphya chizirenge, kweni ukaboni ukulongora kuti chizenge sonosono apa.—Mat. 24:32-34, 36; Mil. 1:7.
2 Ndipouli, kwali unenesko tikamba nikale panji yayi, tose tikwenera kukhozga chipulikano chithu mu layizgo ili. Chifukwa wuli? Chifukwa ntchakuti nanga tingaŵa na chipulikano chakukhora, kweni chingalopwa. Nakuti mpositole Paulosi wakayowoya kuti kuŵavya chipulikano ‘nkhwananga uko kukutiwiska mwambura kusuzga.’ (Heb. 12:1) Kuti chipulikano chithu chileke kulopwa, nyengo na nyengo tikwenera kuweleramo ukaboni uwo ukulongora kuti charu chiphya chizenge sonosono apa.—Heb. 11:1.
3. Kasi tidumbiskanenge vichi mu nkhani iyi?
3 Mu nkhani iyi, tidumbiskanenge nthowa zitatu izo tingakhozgera chipulikano chithu mu layizgo la Yehova la charu chiphya: (1) mwakughanaghanirapo chomene pa sembe yakuwombora, (2) mwakughanaghanirapo pa nkhongono za Yehova, ndiposo (3) mwakupatura nyengo yakuchitira vinthu vyauzimu. Kufuma apo tidumbiskanenge umo uthenga wa Yehova wakuluta kwa Habakuku ungakhozgera chipulikano chithu mazuŵa ghano. Kweni chakwamba tiyeni tiwone vinthu vinyake ivyo tingakumana navyo mazuŵa ghano ivyo tikukhumbikwira kuŵa na chipulikano chakukhora mu layizgo la Chiuta la charu chiphya.
VINTHU IVYO TIKUKHUMBIKWIRA KUŴA NA CHIPULIKANO CHAKUKHORA
4. Kasi ni vyakusankha wuli ivyo vikukhumbikwira chipulikano chakukhora?
4 Zuŵa lililose, tikupanga vyakusankha ivyo vikukhumba kuŵa na chipulikano chakukhora. Mwachiyelezgero, tikusankha pa nkhani ya ŵanthu ŵakuchezga nawo, vyakusanguluska, masambiro, nthengwa, kuŵa na ŵana, kweniso kunjira ntchito yakulembeka. Tingachita makora kujifumba kuti: ‘Kasi ivyo nkhusankha vikulongora kuti nkhumanya kuti charu ichi ntchakanyengo waka ndipo sonosono apa charu chiphya cha Chiuta chinjirenge m’malo mwake? Panji kasi nkhusankha vinthu vyakuyana na ivyo awo ŵakugomezga yayi kuti kuli umoyo wamuyirayira ŵakusankha?’ (Mat. 6:19, 20; Luka 12:16-21) Tisankhenge makora vinthu para tikukhozga chipulikano chithu kuti charu chiphya chili pafupi chomene.
5-6. Chifukwa wuli tikukhumbikwira chipulikano chakukhora mu nyengo ya masuzgo? Longosorani.
5 Tikusanganaso na viyezgo ivyo vikukhumbikwira chipulikano chakukhora. Nyengo zinyake tingatambuzgika, kulwara nthenda yambura kukonda munkhwala, panji vinthu vinyake ivyo vingatipangiska kuti tigongowe. Panji pakwamba tingawona nga kuti tingazizipizga suzgo ilo tasangana nalo. Kweni kanandi masuzgo ghanthena ghakulutilira, ndipo ghangakhumbikwira kuti tiŵe na chipulikano chakukhora mwakuti tizizipizge kweniso tilutilire kuteŵetera Yehova mwakukondwa.—Rom. 12:12; 1 Pet. 1:6, 7.
6 Panyengo iyo tili mu suzgo, nyengo zinyake tingawona nga kuti charu chiphya cha Yehova chizenge yayi. Kweni kasi ichi chikung’anamura kuti tili na chipulikano chichoko? Viŵi yayi. Ghanaghanirani chiyelezgero ichi. Mu nyengo yakuzizima chomene, nyengo zinyake tingawona nga kuti chihanya chizenge yayi. Kweni chihanya chikuŵangako nipera. Mwakuyana waka, panyengo iyo tagongowa chomene, tingawona nga kuti charu chiphya chizenge yayi. Kweni para chipulikano chithu ntchakukhora, tikayikirenge yayi kuti malayizgo gha Chiuta ghafiskikenge nadi. (Sal. 94:3, 14, 15; Heb. 6:17-19) Para tili na chipulikano chanthena, tilutilirenge kudangizga kusopa Yehova mu umoyo withu.
7. Kasi tikwenera kugega maghanoghano wuli?
7 Tikukhumbikwiraso chipulikano chakukhora kuti tichiteko mulimo wakupharazga. Ŵanthu ŵanandi awo tikuŵapharazgira, ŵakuwona kuti “makani ghawemi” ghakuti kukwiza charu chiphya cha Chiuta ni maloto waka. (Mat. 24:14; Ezek. 33:32) Tikwenera yayi kuzomerezga kuti nase tambe kukayikira ivyo Yehova wakutisambizga nga umo iwo ŵakuchitira. Kweni kuti tigege kukayikira, tikwenera kulutilira kukhozga chipulikano chithu. Tiyeni tiwone nthowa zitatu izo tingakhozgera chipulikano chithu.
MUGHANAGHANIRENGEPO PA SEMBE YAKUWOMBORA
8-9. Kasi kughanaghanirapo pa sembe yakuwombora kungakhozga wuli chipulikano chithu?
8 Nthowa yimoza iyo tingakhozgera chipulikano chithu nkhughanaghanirapo pa sembe yakuwombora. Sembe yakuwombora yikutisimikizgira kuti malayizgo gha Chiuta ghazamufiskika nadi. Para tikughanaghanirapo mwakupwelelera pa chifukwa icho sembe yakuwombora yikapelekekera, kweniso umo Yehova wakajikomolera kuti wapeleke sembe iyi, tikukhozga chipulikano chithu kuti layizgo la Chiuta lakuti charu chiphya icho muzamuŵa umoyo uwemi lifiskikenge nadi. Chifukwa wuli tikuyowoya nthena?
9 Kasi vikenda wuli kuti sembe yakuwombora yipelekeke? Yehova wakatuma Mwana wake wapadera, uyo wakamutemwanga chomene, kufuma kuchanya na kuzakababika pa charu chapasi nga munthu wakufikapo. Apo wakaŵa pa charu chapasi, Yesu wakazizipizga masuzgo ghakupambanapambana gha mtundu uliwose. Pamanyuma wakatambuzgika na kufwa nyifwa yakuŵinya chomene. Apa Yehova wakapeleka mtengo wakudura chomene. Chiuta withu wachitemwa wakatenge wazomerezgenge yayi kuti Mwana wake wasuzgike na kufwa kuti waka tikhale umoyo uwemi kwakanyengo kachoko waka. (Yoh. 3:16; 1 Pet. 1:18, 19) Chifukwa chakuti wakapeleka mtengo wakudura chomene, Yehova wazamufiska nadi layizgo lake la charu chiphya umo ŵanthu ŵazamukhala kwamuyirayira.
MUGHANAGHANIRENGEPO PA NKHONGONO ZA YEHOVA
10. Kuyana na Ŵaefeso 3:20, kasi Yehova wangafiska vichi?
10 Nthowa yachiŵiri iyo tingakhozgera chipulikano chithu nkhughanaghanirapo pa nkhongono za Yehova. Iyo wali na nkhongono zakufiskira chilichose icho walayizga. Mbunenesko kuti layizgo lakuti kuzamuŵa umoyo wamuyirayira mu charu chiphya lingawoneka nga lingafiska yayi mukawonera ka taŵanthu. Kweni Yehova kanandi waka wakulayizga vinthu ivyo ŵanthu ŵangafiska yayi. Chifukwa chakuti iyo ni Chiuta Wankhongonozose wangafiska ivi kwambura kutondeka. (Yobu 42:2; Mrk. 10:27) Ntheura tikuzizwa yayi para wakulayizga vinthu vyakuzizwiska chomene.—Ŵazgani Ŵaefeso 3:20.
11. Pelekani viyelezgero vya malayizgo gha Yehova agho ghakawonekanga kuti ghangafiskika yayi. (Wonani bokosi lakuti “ Malayizgo Ghanyake Ghakuzizwiska Agho Ghakafiskika Nadi.”)
11 Wonani vinthu vinyake ivyo wakalayizga ŵanthu ŵake mu nyengo yakale ivyo vikawonekanga nga vingafiskika yayi. Wakaphalira Abrahamu na Sara kuti ŵaŵenge na mwana mu uchekuru wawo. (Gen. 17:15-17) Wakaphaliraso Abrahamu kuti mphapu yake yizamuhara charu cha Kenani. Panyengo yose iyo mphapu ya Abrahamu, awo ŵakaŵa ŵana ŵa Israyeli, ŵakaŵa ŵazga mu Eguputo, vikawonekanga nga kuti layizgo ili lingafiskika yayi. Kweni likafiskika. Pamanyuma, Yehova wakayowoya kuti Elizabeti waŵenge na mwana nangauli wakaŵa muchekuru. Wakaphaliraso Mariya, uyo wakaŵa wambura kugonapo na mwanalume, kuti wababenge Mwana wa Chiuta uyo Yehova wakalayizgirathu mu munda wa Edeni kuti wizenge, vyaka masauzandi ghanandi kumanyuma.—Gen. 3:15.
12. Kasi malemba gha Joshuwa 23:14 na Yesaya 55:10, 11 ghakutisimikizgira vichi vya nkhongono za Yehova?
12 Tikukhozga chipulikano chithu chakuti Yehova wali na nkhongono zakufiskira layizgo lake la charu chiphya, para tikughanaghanirapo pa malayizgo agho wakalayizgapo kumanyuma, na umo wakaghafiskira. (Ŵazgani Joshuwa 23:14; Yesaya 55:10, 11.) Kuchita nthena kukutovwiraso kuti tiŵe ŵakunozgeka kovwira ŵanji kuti ŵapulikiske kuti layizgo la Chiuta la charu chiphya ndanadi. Pa nkhani yakuti kukwiza machanya ghaphya na charu chiphya, Yehova iyo mwenecho wakayowoya kuti: “Mazgu agha ngakugomezgeka na ghaunenesko.”—Chivu. 21:1, 5.
MUŴENGE NA NYENGO YAKUCHITIRA VINTHU VYAUZIMU
MAUNGANO GHA MPINGO
Kasi maungano gha mpingo ghangamovwirani wuli kukhozga chipulikano chinu? (Wonani ndime 13)
13. Kasi maungano gha mpingo ghangakhozga wuli chipulikano chithu? Longosorani.
13 Nthowa yachitatu yakukhozgera chipulikano chithu nkhupatura nyengo yakuchitira vinthu vyauzimu. Mwachiyelezgero, ghanaghanirani umo tikupindulira na maungano gha mpingo. Anna, uyo wachita mauteŵeti ghakupambanapambana kwa vyaka vinandi wakuti: “Maungano ghakunovwira kuti chipulikano chane chiŵe chakukhora chomene. Nanga ni para uyo wakuyowoya nkhani ngwambura luso panji palije fundo yiphya iyo wayowoyapo, kanandi nkhupulika fundo yinyake iyo yikunovwira kuti nipulikiske makora Baibolo, kweniso iyo yikukhozga chipulikano chane.” b Tikukayika yayi kuti nase chipulikano chithu chikukhora chomene na mazgoro agho ŵabali na ŵadumbu ŵakupeleka.—Rom. 1:11, 12; 10:17.
MULIMO WA KUPHARAZGA
Kasi mulimo wa kupharazga ungamovwirani wuli kukhozga chipulikano chinu? (Wonani ndime 14)
14. Kasi mulimo wa kupharazga ukukhozga wuli chipulikano chithu?
14 Tikukhozgaso chipulikano chithu para nase tikuchitako mulimo wa kupharazga. (Heb. 10:23) Barbara, uyo wateŵetera Yehova kwa vyaka vyakujumpha 70, wakuti: “Nawona kuti mulimo wa kupharazga ukukhozga chomene chipulikano chane. Para nkhuphalirako chomene ŵanji vyakukhwaskana na malayizgo ghawemi gha Yehova, chipulikano chane nacho chikukhora chomene.”
SAMBIRO LATAŴENE
Kasi sambiro lamwaŵene lingamovwirani wuli kukhozga chipulikano chinu? (Wonani ndime 15)
15. Kasi sambiro la taŵene likukhozga wuli chipulikano chithu? (Wonaniso vithuzi.)
15 Wonaniso chinthu chinyake icho chikukhozga chipulikano chithu: sambiro lataŵene. Susan wakuwona kuti vikumovwira chomene para wali na ndondomeko yakuchitira vinthu vyauzimu. Iyo wakuti: “Pa Sabata, nkhunozgekera Sambiro la Gongwe la Mulinda la sabata yikwiza. Pa Mande na pa Chiŵiri, nkhunozgekera maungano gha mukati mwa sabata. Mazuŵa ghanyake agha, nkhuchita sambiro la namwene.” Chifukwa chakuti nyengo zose wakulondezga ndondomeko yake, Susan wakulutilira kukhozga chipulikano chake. Irene, uyo wateŵetera vyaka vinandi pa ofesi yithu yikuru, wakuti chipulikano chake chikukhora para wakusambira mauchimi gha mu Baibolo. Iyo wakuti: “Nkhuzizwa chomene kuti Yehova wakufiska mauchimi ghake nanga mpha tunthu tuchokotuchoko chomene uto wakayowoyerathu.” c
‘LIZAMUFISKIKA NADI’
16. Chifukwa wuli ivyo Yehova wakasimikizgira Habakuku nase vingatovwira mazuŵa ghano? (Ŵahebere 10:36, 37)
16 Ŵateŵeti ŵanyake ŵa Yehova ŵalindilira kwa nyengo yitali kuti charu ichi chimare. Mukawonero ka ise taŵanthu, layizgo la Chiuta ili lingawoneka nga likuchedwa kufiskika. Kweni Yehova wakumanya umo ŵateŵeti ŵake ŵakujipulikira. Nakuti wakasimikizgira ntchimi Habakuku kuti: “Mboniwoni iyi yikulindilira nyengo yake yakutemeka, ndipo yikuchimbilira kuumaliro wake, yitetenge chara. Nanga yingaziwulika, lindilira nipera! Pakuti yizamufiskika nadi. Yichedwenge chara!” (Hab. 2:3) Kasi apa Chiuta wakasimikizgiranga Habakuku kuti ndiyo pera wasangenge chandulo? Panji kasi mazgu agha nase ghangatovwira mazuŵa ghano? Yehova wakawovwira mpositole Paulosi kulemba mazgu ghakuyanako waka ku Ŵakhristu, awo ŵakulindilira mwakunweka charu chiphya. (Ŵazgani Ŵahebere 10:36, 37.) Ntheura tingaŵa na chigomezgo chose kuti nanga tingawona nga layizgo la Yehova lakuti watiponoskenge likuchedwa kufiskika, kweni ‘lifiskikenge nadi. Lichedwenge chara!’
17. Kasi mudumbu munyake wakalondezga wuli ulongozgi uwo Yehova wakapeleka kwa Habakuku?
17 Ŵateŵeti ŵa Yehova ŵanandi ŵalondezga ulongozgi wa Yehova wakuti ‘ŵalindilire nipera,’ ndipo ŵanyake ŵalindilira nadi kwa vyaka vinandi. Mwachiyelezgero, Louise wakamba kuteŵetera Yehova mu 1939. Iyo wakuti: “Panyengo iyo, nkhaghanaghananga kuti Aramagedoni yizenge pambere nindamalizge sukulu. Kweni vikachitika yayi. Vyaka vyose ivi, nasanga kuti ntchakovwira chomene kuŵazga nkhani zakukhwaskana na ŵanthu awo ŵakalindilira nyengo yitali kuti Yehova wafiske malayizgo ghake, ndipo pamanyuma ŵakatumbikikanga. Nkhuŵazga nkhani zakukhwaskana na Nowa, Abrahamu, Yosefe, na ŵanyake awo nawo ŵakalindilira nyengo yitali. Kugomezga kuti nyengo zose malayizgo gha Yehova ghakufiskika, vyanovwira ine na ŵanji kugomezga kuti charu chiphya chili pafupi chomene.” Ŵateŵeti ŵanandi ŵa Yehova awo ŵateŵetera nyengo yitali ŵakuzomerezga fundo iyi.
18. Kasi kuwona chilengiwa kungakhozga wuli chipulikano chithu kuti charu chiphya chikwiza nadi?
18 Mbunenesko kuti charu chiphya chindize nadi. Kweni ghanaghanirani za vinthu vinyake ivyo viliko nga ni nyenyezi, makuni, vinyama, na ŵanthu ŵanyithu. Palije uyo wangakayikira kuti vinthu ivi ni vyanadi, nangauli pakwamba vinthu ivi kukaŵavya. Viliko chifukwa chakuti Yehova ndiyo wakavilenga. (Gen. 1:1, 26, 27) Chiuta withu wakukhumbaso kuzgora charu ichi kuŵa chiphya. Wazamufiska nadi khumbo lake ili. Mu charu chiphya, ŵanthu ŵazamuŵa na umoyo wamuyirayira kweniso wambura kulwaralwara. Tili na chigomezgo chose kuti panyengo yake yakutemeka, Chiuta wazamufiska layizgo lake la charu chiphya.—Yes. 65:17; Chivu. 21:3, 4.
19. Kasi mungakhozga wuli chipulikano chinu?
19 Panyengo yasono, chitani vyose ivyo mungafiska kuti mukhozge chipulikano chinu. Nyengo zose muwongenge sembe yakuwombora. Mughanaghanirengepo nkhongono za Yehova. Muŵenge na nyengo yakuchitira vinthu vyauzimu. Para muchitenge nthena, muŵenge pakati pa “awo ŵakuhara malayizgo chifukwa ŵali na chipulikano ndiposo mbakuzikira.”—Heb. 6:11, 12; Rom. 5:5.
SUMU 139 Mujiwone Kuti Muli mu Charu Chiphya
a Ŵanthu ŵanandi mazuŵa ghano ŵakugomezga yayi ivyo Baibolo lili kulayizga vyakuti kuzamuŵa charu chiphya. Ŵakughanaghana kuti layizgo ili lingafiskika yayi, ni maloto waka. Kweni ise tili na chigomezgo chose kuti malayizgo ghose gha Yehova ghazamufiskika. Nangauli vili nthena, kuti tilutilire kuŵa na chipulikano chakukhora, tikwenera kulutilira kuchikhozga. Kasi tingachita wuli? Nkhani iyi yikulongosora.
b Mazina ghanyake ghasinthika.
c Nkhani zinandi zakulongosora uchimi wa mu Baibolo tingazisanga pa chigaŵa chakuti “Uchimi” mu Buku Lakupenjera Nkhani la Ŵakaboni ŵa Yehova. Mwachiyelezgero, wonani nkhani yakuti “Ivyo Yehova Wakuyowoya Vikufiskika” mu Gongwe la Mulinda la Janyuwale 1, 2008.
