NKHANI YAKUSAMBIRA 16
“Mudumbu Wako Wawukenge”!
“Yesu wakati kwa [Mariya]: ‘Mudumbu wako wawukenge.’”—YOH. 11:23.
SUMU 151 Wazamuchema
IVYO VILI MU NKHANI IYI a
1. Kasi msepuka munyake wakalongora wuli kuti wakagomezganga nadi kuti kuli chiwuka?
MUSEPUKA munyake zina lake Matthew wali na suzgo linyake likuru la matenda mwakuti ŵamuchitapo opareshoni kanandi waka. Apo wakaŵa na vyaka 7, iyo pamoza na mbumba yakwake ŵakawoneleranga pulogiramu ya mwezi na mwezi ya JW Broadcasting®. Kuumaliro wa pulogiramu iyi, kukaŵa vidiyo ya sumu iyo yikalongoranga kuti ŵakutemweka ŵithu awo ŵali kufwa ŵakuweleraso ku umoyo. b Pamanyuma pa pulogiramu iyi, Matthew wakaluta pafupi na ŵapapi ŵake, na kuŵakora mawoko, ndipo wakati: “Mwawona Adada na Amama, nanga ine ningafwa, nizamuwuskika ku ŵakufwa! Para nafwa munilindilire pa chiwuka, ine nkhuwonapo suzgo yayi, vili makora waka.” Ghanaghanirani waka umo ŵapapi ŵake ŵakakondwera ŵati ŵamanya kuti mwana wawo wakaŵa na chipulikano chakukhora kuti chiwuka chiliko nadi.
2-3. Chifukwa wuli ntchiwemi kughanaghanira kuti chiwuka chizamuŵako nadi?
2 Ntchiwemi kuti tose nyengo na nyengo tighanaghanirenge ivyo Baibolo lalayizga vyakukhwaskana na chiwuka icho chizamuchitika munthazi. (Yoh. 5:28, 29) Chifukwa wuli? Chifukwa tikumanya yayi usange nase tikumanenge na ulwari ukuru panji usange mwamabuchi munthu uyo tikumutemwa wangafwa. (Muph. 9:11; Yak. 4:13, 14) Chigomezgo chithu cha chiwuka chingatovwira kuti tizizipizge masuzgo ghanthena agha. (1 Tes. 4:13) Malemba ghakutisimikizgira kuti Adada ŵithu ŵakuchanya ŵakutimanya makora ndipo ŵakutitemwa chomene. (Luka 12:7) Kuti Yehova watiwuske na wunthu withu kweniso maghanoghano ghithu, wakwenera kutimanya makora nadi. Yehova wakutitemwa chomene lekani watipa mwaŵi wakuti tizakakhale kwamuyirayira, ndipo usange tingafwa wazamutiwuska.
3 Mu nkhani iyi, chakwamba tidumbiskanenge chifukwa icho tikwenera kugomezgera kuti chiwuka chiliko nadi. Kufuma apo, tidumbiskanenge nkhani ya mu Baibolo iyo yingakhozga chipulikano chithu, iyo yili na mazgu gha pa lemba ilo pajintha nkhani iyi. Mazgu agha ngakuti: “Mudumbu wako wawukenge.” (Yoh. 11:23) Paumaliro, tisambirenge umo tingachitira kuti chigomezgo cha chiwuka chiŵe chanadi kwa ise.
CHIFUKWA ICHO TINGAGOMEZGERA LAYIZGO LA CHIWUKA
4. Kuti tigomezge layizgo linyake, kasi tikwenera kukhorwa na vichi? Longosorani.
4 Kuti tigomezge layizgo linyake, tikwenera kukhorwa dankha kuti uyo walayizga ngwakukhumbisiska nadi, kweniso wali na nkhongono zakufiskira layizgo ilo. Tiyelezgere kuti nyumba yinu yanangika chomene na chimphepo. Mbwenu mubwezi winu wakwiza kwa imwe na kumulayizgani kuti, ‘Nimovwiraninge kuzengaso nyumba iyi.’ Wakuyowoya kufumira pasi pamtima, ndipo mwakhorwa kuti ngwakukhumbisiska nadi kumovwirani. Usange ni misiri waluso ndipo wali navyo viteŵetero vyakukhumbikwa, mukumanya kuti wangafiska nadi. Ntheura mukugomezga ivyo wamulayizgani. Ipo wuli pakuyowoya za layizgo la chiwuka ilo Chiuta walayizga? Kasi ngwakukhumbisiska nadi kweniso wali na nkhongono kufiska layizgo ili?
5-6. Chifukwa wuli tingaŵa na chigomezgo chose kuti Yehova ngwakukhumbisiska kuzakawuska awo ŵali kufwa?
5 Kasi Yehova ngwakukhumbisiska nadi kuwuska ŵakufwa? Enya. Wakawovwira na mzimu utuŵa ŵanthu ŵanandi awo ŵakalembako Baibolo kuti ŵalembe layizgo lake la chiwuka cha munthazi. (Yes. 26:19; Hos. 13:14; Chivu. 20:11-13) Ndipo para Yehova walayizga, nyengo zose wakufiska. (Josh. 23:14) Nakuti Yehova ngwakukhumbisiska chomene kuwuska awo ŵali kufwa. Chifukwa wuli tikuyowoya nthena?
6 Ghanaghanirani ivyo Yobu wakayowoya. Wakagomezganga na mtima wose kuti nanga wangafwa, Yehova wakudokera kuzakamuwonaso kuti ngwamoyo. (Yobu 14:14, 15, mazgu ghamusi) Yehova wakudokeraso chomene kuzakaŵawonaso ŵateŵeti ŵake wose awo ŵali kufwa. Ngwakukhumbisiska kuŵawuska, mwakuti ŵaŵe na umoyo uwemi kweniso wakukondweska. Wuli pakuyowoya za ŵanthu mabiliyoni ghanandi awo ŵali kufwa kwambura kuŵa na mwaŵi wakumanya unenesko wakukhwaskana na Yehova? Chiuta withu wachitemwa wakukhumbaso kuŵawuska ŵanthu aŵa. (Mil. 24:15) Wakukhumba kuti nawo ŵazakaŵe na mwaŵi wakuŵa ŵabwezi ŵake na kukhala kwamuyirayira pa charu chapasi. (Yoh. 3:16) Ntchakuwonekerathu kuti Yehova ngwakukhumbisiska chomene kuwuska awo ŵali kufwa.
7-8. Chifukwa wuli tili na chigomezgo chose kuti Yehova wali na nkhongono zakuwuskira awo ŵali kufwa?
7 Kasi Yehova waliso na nkhongono zakuwuskira ŵakufwa? Enya! Iyo ‘Ngwankhongonozose.’ (Chivu. 1:8) Ntheura wali na nkhongono zakuthereskera mulwani waliyose, nanga ni nyifwa. (1 Kor. 15:26) Tikukhozgeka chomene na kupembuzgika pakumanya fundo iyi. Wonani ivyo vikachitikira Mudumbu Emma Arnold. Iyo na mbumba yake ŵakasangana na chiyezgo chikuru chomene mu nyengo ya Nkhondo Yachiŵiri ya pa Charu Chose. Kuti wamupembuzge mwana wake msungwana chifukwa cha kutaya ŵabwezi ŵake ku misasa yakuyuzgirako ŵanthu ya Nazi, Emma wakati: “Viŵenge kuti ŵanthu awo ŵali kufwa ŵazamuwuskika yayi, mbwenu mphanyi vyalongoranga kuti mulwani withu nyifwa ngwankhongono kuluska Chiuta.” Kweni palije chinthu icho ntchankhongono kuluska Yehova. Chiuta wankhongonozose uyo wakalenga umoyo wali na nkhongono zakuwezgerapo umoyo wa ŵanthu awo ŵali kufwa.
8 Chifukwa chinyake icho tikumanyira kuti Chiuta wali na nkhongono zakuwuskira ŵakufwa ntchakuti iyo wakuluwa yayi, wakukumbukira chilichose. Nyenyezi yiliyose wakuyichema zina. (Yes. 40:26) Kweniso wakukumbukira awo ŵali kufwa. (Yobu 14:13; Luka 20:37, 38) Ntheura wakukumbukiraso chilichose chakukhwaskana na awo wazamuŵawuska, kusazgapo umo ŵakawonekeranga, wunthu wawo, ivyo ŵakakumana navyo, kweniso maghanoghano ghawo.
9. Chifukwa wuli mukugomezga layizgo la Yehova lakukhwaskana na chiwuka?
9 Apa ntchakuwonekerathu kuti tingagomezga layizgo la Yehova lakukhwaskana na chiwuka chifukwa tikumanya kuti wali na khumbo na nkhongono zakufiskira layizgo ili. Wonani chifukwa chinyake icho tikugomezgera layizgo la Chiuta lakuti wazamuwuska ŵakufwa: Yehova wali kuwuskapo kale ŵakufwa. Mu nyengo yakale, wakapeleka nkhongono ku ŵanalume ŵanyake ŵakugomezgeka, kusazgapo Yesu, kuti ŵaŵuske ŵakufwa. Tiyeni tiwonepo nkhani yimoza yakuyowoya vya chiwuka icho wakachita Yesu, iyo yili kulembeka mu Yohane chaputara 11.
MUBWEZI WA YESU WAPAMTIMA WAKAFWA
10. Kasi ntchivichi chikachitika apo Yesu wakapharazganga kusirya linyake la Yorodani kufupi na Betaniya, ndipo kasi wakachita vichi? (Yohane 11:1-3)
10 Ŵazgani Yohane 11:1-3. Muŵe nga mukuwona ivyo vikachitika ku Betaniya chakuumaliro kwa 32 C.E. Mu muzi uwu ndimo Yesu wakaŵa na ŵabwezi ŵapamtima, Lazaro na ŵadumbu ŵake ŵaŵiri, Mariya na Marita. (Luka 10:38-42) Kweni Lazaro wakalwara ndipo ŵadumbu ŵake ŵakafipa mtima chomene. Ntheura ŵakatumizga uthenga kwa Yesu, uyo wakaŵa ku sirya la Yorodani, mtunda wakwenda pasi mazuŵa ghaŵiri kufuma ku Betaniya. (Yoh. 10:40) Chachitima ntchakuti Lazaro wakafwa panyengo iyo thenga likafikanga kwa Yesu. Nangauli Yesu wakamanya kuti mubwezi wake wafwa, kweni wakakhalira dankha kwenekuku mazuŵa ghaŵiri panji kujumpha ndipo wakizanga ku Betaniya. Ntheura panyengo iyo Yesu wakafikanga, pakaŵa kuti pajumpha mazuŵa ghanayi kufumira apo Lazaro wakafwira. Yesu wakachita chinthu chinyake icho ŵabwezi ŵake ŵakapindura nacho kweniso icho chikapeleka uchindami kwa Chiuta.—Yoh. 11:4, 6, 11, 17.
11. Kasi tikusambirapo fundo wuli yakukhwaskana na ubwezi pa nkhani iyi?
11 Tikusambirapo fundo yinyake yakukhwaskana na ubwezi pa nkhani iyi. Ghanaghanirani fundo iyi: Apo Mariya na Marita ŵakatumizga uthenga kwa Yesu, ŵakayowoyapo yayi kuti Yesu wize ku Betaniya. Iwo ŵakayowoya waka kuti mubwezi wake wapamtima ni mulwari. (Yoh. 11:3) Apo Lazaro wakafwa, Yesu wakatenge wamuwuskenge uku wali kutali. Kweni ndimo wakachitira yayi, iyo wakasankha kuluta ku Betaniya kuti wakaŵe pamoza na ŵabwezi ŵake Mariya na Marita. Kasi namwe muli na mubwezi uyo wangamovwirani kwambura kumupempha dankha? Para muli nayo mukumanya kuti mungamugomezga kuti wamovwiraninge mu nyengo za masuzgo. (Zinth. 17:17) Nga ni Yesu, nase mphanyi taŵa mubwezi wanthena ku ŵanji. Sono tiyeni tiwoneso nkhani yithu iyi na kuwona ivyo vikachitika.
12. Kasi Yesu wakamulayizga vichi Marita, ndipo chifukwa wuli wakaŵa na chifukwa chakukwana chakugomezgera layizgo ili? (Yohane 11:23-26)
12 Ŵazgani Yohane 11:23-26. Marita wakamanya kuti Yesu wali pafupi na ku Betaniya. Mwaluŵiro wakamuchimbilira na kuyowoya kuti: “Fumu, muŵenge kuno mphanyi mudumbu wane wandafwe.” (Yoh. 11:21) Unenesko ngwakuti mphanyi wakamuchizga nadi Lazaro. Kweni Yesu wakakhumbanga kuchita chinthu chinyake chakuzizwiska. Wakamulayizga kuti: “Mudumbu wako wawukenge.” Wakamuphaliraso Marita chifukwa chinyake icho wakwenera kugomezgera ivyo wamulayizga. Wakati: “Ndine chiwuka na umoyo.” Nadi, Chiuta wakamupa nkhongono Yesu zakuwuskira ŵakufwa. Pambere Lazaro wandafwe, Yesu wakaŵa kuti wawuskapo kale mwana msungwana uyo wakafwa waka, kweniso wakawuska msepuka pa zuŵa lenelilo wakafwira. (Luka 7:11-15; 8:49-55) Kweni apa pakaŵa fumbo lakuti kasi wangamuwuska munthu uyo pajumpha mazuŵa ghanayi kufuma apo wakafwira kweniso uyo wamba kuvunda?
“LAZARO, FUMA!”
Yesu wakalengera chomene lusungu ŵabwezi ŵake awo ŵakaŵa na chitima (Wonani ndime 13-14)
13. Nga umo likuyowoyera lemba la Yohane 11:32-35, kasi Yesu wakachita wuli wati wawona Mariya na ŵanyake ŵakulira? (Wonaniso chithuzi.)
13 Ŵazgani Yohane 11:32-35. Muŵe nga mukuwona ivyo vikachitika kufuma apa. Mariya, mudumbu munyake wa Lazaro, wakuluta kukakumana na Yesu. Mariya wakuyowoyaso ivyo munung’una wake wanguyowoya pakwamba, wakuti: “Fumu, muŵenge kuno, mphanyi mudumbu wane wandafwe.” Iyo na ŵanyake ŵakulira chomene. Yesu nayo chitima chamukora chomene, wati wawona na kupulika kuti ŵakulira. Nayoso wakuthiska masozi chifukwa cha kuŵalengera lusungu ŵabwezi ŵake. Wakumanya makora umo vikuŵinyira para munthu wakutemweka wake wafwa. Apa ngwakukhumbisiska kuwuskapo suzgo ilo lapangiska kuti ŵabwezi ŵake ŵaŵe na chitima na kuthiska masozi.
14. Kasi tingasambirapo vichi vyakukhwaskana na Yehova pa umo Yesu wakachitira wati wawona kuti Mariya wakulira?
14 Umo Yesu wakachitira wati wawona Mariya wakulira vikutisambizga kuti Yehova ni Chiuta wachiwuravi. Chifukwa wuli tikuyowoya nthena? Nga umo tikawonera mu nkhani iyo yajumpha, Yesu wakuyezga Awiske mwakufikapo pa nkhani ya umo ŵakujipulikira kweniso umo ŵakughanaghanira. (Yoh. 12:45) Ntheura para tikuŵazga kuti Yesu wakathiska masozi na kuŵalengera lusungu ŵabwezi ŵake awo ŵakaŵa na chitima, tingasimikizga kuti Yehova nayo wakukhwaskika chomene para wakuwona kuti tikuthiska masozi chifukwa cha masuzgo. (Sal. 56:8) Tili na chigomezgo chose kuti ivi vikumupangiskani kuti musendelere kufupi chomene na Chiuta withu wachiwuravi.
Yesu wakalongora kuti wali na nkhongono zakuwuskira ŵakufwa (Wonani ndime 15-16)
15. Kuyana na Yohane 11:41-44, kasi chikachitika ntchivichi ku dindi la Lazaro? (Wonaniso chithuzi.)
15 Ŵazgani Yohane 11:41-44. Yesu wafika pa dindi ilo ŵasungamo Lazaro ndipo wakuphalira ŵanthu kuti ŵawuskepo libwe. Marita wakukana, ndipo wakuti sono wakwenera kuti wakununkha. Yesu wakuzgora kuti: “Asi nangukuphalira kuti usange ukugomezga uwonenge uchindami wa Chiuta?” (Yoh. 11:39, 40) Kufuma apo Yesu wakwinuska maso kuchanya ndipo wakulomba uku ŵanthu ŵakupulika. Wakuchita nthena kuti uchindami wose ulute kwa Yehova pa ivyo wachitenge. Wati walomba wakuchemerezga kuti: “Lazaro, fuma!” Lazaro wakufuma nadi mu dindi. Apa Yesu wakachita chinthu icho ŵanandi ŵakawonanga kuti chingachitika yayi.
16. Kasi nkhani ya mu Yohane chaputara 11 yikukhozga wuli chipulikano chithu kuti chiwuka chiliko nadi?
16 Nkhani ya mu Yohane chaputara 11 yikukhozga chipulikano chithu mu chigomezgo cha chiwuka. Kasi yikutikhozga wuli? Kumbukani layizgo ilo Yesu wakaphalira Marita lakuti: “Mudumbu wako wawukenge.” (Yoh. 11:23) Nga Mbawiske, Yesu wali na khumbo kweniso nkhongono zakufiskira layizgo ili. Masozi agho wakathiska ghakulongora kuti ngwakukhumbisiska chomene kuwuska ŵanthu awo ŵali kufwa na kuwuskapo nyifwa iyo yikupangiska kuti taŵanthu tiŵenge na chitima. Pakuti Lazaro wakafuma nadi mu dindi, Yesu wakalongora nadi kuti wali na nkhongono zakuwuskira ŵakufwa. Kweniso ghanaghanirani ivyo Yesu wakamukumbuska Marita ivyo wakamuphalira pakwamba, vyakuti: “Asi nangukuphalira kuti usange ukugomezga uwonenge uchindami wa Chiuta?” (Yoh. 11:40) Tili na vifukwa vyakukwana vyakugomezgera kuti Chiuta wazamufiska nadi layizgo lake lakuti wazamuwuska ŵakufwa. Ipo kasi tingachita wuli kuti chigomezgo ichi chilutilire kuŵa chanadi kwa ise?
UMO TINGACHITIRA KUTI CHIGOMEZGO CHA CHIWUKA CHILUTILIRE KUŴA CHANADI KWA ISE
17. Kasi tikwenera kukumbuka vichi para tikuŵazga nkhani za chiwuka mu Baibolo?
17 Ŵazgani na kughanaghanirapo pa viwuka vyakumanyuma. Baibolo likulongosora viwuka 8 vya ŵanthu awo ŵakawuskika pa charu chapasi. c Mungachita makora kuti musande mwakupwelelera nkhani izi. Apo mukusanda nkhani izi, kumbukani kuti ŵanthu awo ŵakawuskika ŵakaŵa ŵanadi, ŵakaŵa ŵanalume, ŵanakazi na ŵana wuwo. Yezgayezgani kusanga ivyo mungasambirapo. Ghanaghanirani umo chiwuka chilichose chikulongolera kuti Chiuta wali na khumbo kweniso nkhongono kuwuska ŵakufwa. Chakuluska vyose, ghanaghaniranipo chomene pa chiwuka cha Yesu icho ntchakuzirwa chomene kuluska vyose. Kumbukani kuti ŵanthu ŵanandi ŵakachitira ukaboni kuti Yesu wakawuskika nadi ndipo ivi vikutipa vifukwa vyakukwana vyakuŵira na chipulikano chakukhora.—1 Kor. 15:3-6, 20-22.
18. Kasi mungagwiliskira wuli ntchito makora sumu zithu izo zikuyowoya vya chigomezgo cha chiwuka? (Wonaniso mazgu ghamusi.)
18 Mwimbenge na kutegherezga “sumu zauzimu” izo zikuyowoya vya chigomezgo cha chiwuka. d (Efe. 5:19) Sumu izi zikovwira kuti chigomezgo cha chiwuka chilutilire kuŵa chanadi kwa ise ndipo zikovwira kuti tiŵe na chipulikano chakukhora mu chigomezgo chakuzirwa ichi. Muzitegherezgenge. Sambirani sumu izi na kudumbiskana ng’anamuro lake pa kusopa kwa mbumba. Zisungani pamtima na kughanaghanirapo chomene mwakuti zikhozge chipulikano chinu. Usange mwakumana na suzgo ilo lingaŵika umoyo winu pangozi panji wakutemweka winu wafwa, mzimu wa Yehova umovwiraninge kukumbukira sumu izi ndipo zimupembuzganinge na kumukhozgani.
19. Kasi mungaghanaghanira vichi vyakukhwaskana na chiwuka? (Wonani bokosi lakuti “ Kasi Imwe Mungazakaŵafumba Vichi?”)
19 Muŵe nga mukuwona kuti chiwuka chikuchitika. Yehova wali kutipa luso lwakuti tingajiwona nga kuti tili mu charu chiphya. Mudumbu munyake wakuti: “Kanandi nkhujiwona nga nili mu charu chiphya ndipo para nachita nthena nkhuŵa nga nili mu Paradiso nadi.” Ghanaghanirani umo vizamuŵira kuzakakumana na ŵanalume na ŵanakazi ŵakugomezgeka. Kasi imwe mukulindilira mwakunweka kuzakakumana na njani? Kasi ni mafumbo wuli agho muzamumufumba? Ghanaghaniraniso umo vizamuŵira kuzakakumana na ŵakutemweka ŵinu awo ŵali kufwa. Ndipo yezgani kughanaghanira mazgu ghakwamba agho muzamuyowoya, umo muzamuŵahagira, kweniso chimwemwe icho muzamuŵa nacho.
20. Kasi tikwenera kuŵikapo mtima kuchita vichi?
20 Tikumuwonga chomene Yehova chifukwa cha kutilayizga kuti wazamuwuska ŵakufwa. Tili na chigomezgo chose kuti layizgo ili lizamufiskika nadi, chifukwa Yehova wali na khumbo kweniso nkhongono zakufiskira layizgo lake ili. Tiyeni tilutilire kuŵikapo mtima kukhozga chipulikano chithu mu chigomezgo chakuzirwa ichi. Para tichitenge nthena, tiŵenge paubwezi wakukhora na Chiuta, uyo tingati wakulayizga waliyose wa ise kuti, ‘Ŵakutemweka ŵinu ŵazamuwuka.’
SUMU 147 Umoyo Wamuyirayira Walayizgika
a Usange munthu uyo mukumutemwa wali kufwa, tikukayika yayi kuti mukukhozgeka chomene na layizgo la chiwuka. Kweni kasi mungaŵalongosolera wuli ŵanji chifukwa icho mukugomezgera layizgo ili? Ndipo kasi mungachita wuli kuti chigomezgo cha chiwuka chilutilire kuŵa chanadi kwa imwe? Chilato cha nkhani iyi ntchakuti yimovwirani kukhozga chipulikano chinu mu layizgo la chiwuka.
b Mutu wa vidiyo ya sumu ngwakuti Dziko Latsopano Lili Pafupi ndipo yikaŵa mu pulogiramu ya Jw Broadcasting ya Novembala 2016.
c Wonani bokosi lakuti “Ŵanthu 8 Awo Baibolo Likuti Ŵakawuka ku Ŵakufwa” mu Gongwe la Mulinda la Ogasiti 1, 2015 peji 4.
d Wonani sumu zakulondezgapo izi mu buku lakuti “Yimbirani Yehova Mwakukondwa”: “Mujiwone Kuti Muli mu Charu Chiphya” (Sumu 139), “Laŵiskaninge pa Njombe” (Sumu 144), na “Wazamuchema” (Sumu 151). Wonaniso pa jw.org sumu za mutu wakuti “Dziko Latsopano Lili Pafupi,” “Charu Chiphya Icho Chizenge,” na “Mwamuwona.”
