NKHANI YAKUSAMBIRA 18
Mukhozganenge pa Maungano gha Mpingo
‘Tiyeni tighanaghaniranenge na kukhwimiskana.’—HEB. 10:24, 25.
SUMU 88 Nimanyiskani Mendero Ghinu
IVYO VILI MU NKHANI IYI a
1. Chifukwa wuli tikuzgorapo pa maungano?
CHIFUKWA wuli tikusangikapo pa maungano gha mpingo? Chifukwa chakwamba ntchakuti tisope Yehova. (Sal. 26:12; 111:1) Chinyake ntchakuti tikukhumba kukhozgana yumoza na munyake mu nyengo zakusuzga izi. (1 Tes. 5:11) Para tikuzgorapo pa maungano, ndikuti tikuchita vyose viŵiri ivi.
2. Kasi tili na mipata wuli ya kuzgorapo pa maungano?
2 Sabata yiliyose tikuŵa na mwaŵi wakuzgorapo pa maungano. Mwachiyelezgero, kuumaliro wa sabata yiliyose tikuŵa na mwaŵi wakuzgorapo pa Gongwe la Mulinda. Pa maungano ghamukati mwa sabata, tingazgorapo pa nkhani ya Ivyo Tasambira, pa Sambiro la Baibolo la Mpingo, na pa nkhani zinyake zakudumbiskana.
3. Chifukwa wuli chingaŵa chakusuzga kuzgorapo pa maungano, ndipo lemba la Ŵahebere 10:24, 25 lingatovwira wuli?
3 Tose tikukhumba kulumba Yehova, na kukhwimiska ŵasopi ŵanyithu. Kweni pangaŵa masuzgo ghanyake agho ghangatitondeska kuzgorapo. Masuzgo nga, kuchita wofi kuzgorapo, panji nyengo zinyake mubali uyo wakuchitiska wakutiwuska yayi nangauli tikukhumba kuzgorapo kanandi waka. Kasi tingachita wuli para vili nthena? Zgoro tikulisanga mu kalata iyo mpositole Paulosi wakalembera Ŵahebere. Apo wakayowoyanga za kuzirwa kwa kuwungana, wakayowoya kuti tiŵikengepo mtima “kuchiskana yumoza na munyake.” (Ŵazgani Ŵahebere 10:24, 25.) Para tamanya kuti ŵanji mu mpingo ŵangakhozgeka na zgoro lithu nanga lingaŵa lipusu waka, tichitenge wofi chomene yayi kuzgorapo. Para kanandi ŵakutiwuska yayi, tikondwenge chifukwa chakuti ŵanyithu ŵapika mwaŵi wakuzgorapo.—1 Pet. 3:8.
4. Kasi tidumbiskanenge vichi mu nkhani iyi?
4 Mu nkhani iyi, chakwamba tidumbiskanenge umo tingakhozgerana para tikuwungana mu mpingo uchoko, umo ŵanthu ŵakuzgorapo mbachoko. Kufuma apo, tidumbiskanenge umo tingakhozgerana mu mpingo ukuru, umo ŵanthu awo ŵakuzgorapo ŵakuŵa ŵanandi. Paumaliro, tidumbiskanenge umo tingachitira kuti mazgoro ghithu ghaŵenge ghakukhozga ku ŵanji.
KHOZGANANI MU MPINGO WA ŴANTHU ŴACHOKO
5. Kasi tingachiskana wuli na ŵanyithu para tili mu mpingo uchoko?
5 Mu mpingo uchoko panji kagulu, mukuŵa ŵanthu ŵachoko ŵakuzgorapo. Ndipo nyengo zinyake uyo wakuchitiska wakulindilirapo dankha kuti munyake wawuske kawoko. Ivi vikupangiska kuti maungano yawonekenge nga ngambura kunozga, ndipo vingaŵa vyakugongoweska. Kasi mungachita wuli panthena apa? Muzgorengepo pafupipafupi. Kuchita nthena kungachiskaso ŵanji kuti nawo ŵazgorengepo pafupipafupi.
6-7. Kasi tingachepeskako wuli wofi kuzgorapo?
6 Kasi mungachita wuli usange mukuchita wofi kuzgorapo? Ŵanandi ŵakuchita wofi kuzgorapo pa maungano. Kweni kuti mukhozgenge mwakukwana ŵabali na ŵadumbu ŵinu, mukwenera kusanga nthowa za umo mungachepeskerako wofi uwu. Kasi mungachita wuli nthena?
7 Nyengo zinyake vingamovwirani usange mungaŵerenga masachizgo agho ghali mu magazini gha Gongwe la Mulinda gha myezi yakumasinda. b Mwachiyelezgero, munozgekerenge makora. (Zinth. 21:5) Para mwayimanya makora nkhani iyo tisambirenge, muchitenge wofi yayi kuzgorapo. Kweniso muzgorenge mwakudumura. (Zinth. 15:23; 17:27) Para muzgorenge mwakudumura muchitenge wofi yayi. Zgoro lifupi, ilo panji lingaŵa waka na masentesi ghaŵiri, ŵabali na ŵadumbu ŵangalipulikiska luŵiro kuluska zgoro ilo muli fundo zinandinandi. Para muzgorenge mwakudumura kweniso mu mazgu ghinu na ghinu, mulongorenge kuti mwanozgekera makora kweniso kuti nkhani iyo mwayipulikiska makora.
8. Kasi Yehova wakuwona wuli kuyezgayezga kwithu?
8 Wuli usange mwayezga kulondezga masachizgo agha kweni muchali kuchita wofi kuti muzgorengepo pa maungano kujumpha pa kamoza? Manyani kuti Yehova wakuwonga chomene kuyezgayezga uko mukuchita kuti muzgorengepo. (Luka 21:1-4) Yehova wakutipempha kuchita vinthu ivyo tingatondeka kufiska yayi. (Fil. 4:5) Manyani ivyo mungafiska, na kujiŵikira chilato kuti mufiske, kweniso lombani Yehova kuti wamupani chikanga. Pakwamba, mungajiŵikira chilato cha kuzgorapo zgoro limoza lifupi.
KHOZGANANI MU MPINGO WA ŴANTHU ŴANANDI
9. Chifukwa wuli chingaŵa chakusuzga kuzgorapo mu mpingo ukuru?
9 Usange mu mpingo winu muli ŵapharazgi ŵanandi, mungasangana na suzgo lakupambanako. Panji ŵabali na ŵadumbu ŵanandi ŵakutemwa kuzgorapo, mwakuti para mwawuska woko kanandi ŵakumuwuskani yayi. Mwachiyelezgero, Danielle, wakukondwa chomene para wakuzgorapo pa maungano. c Mudumbu uyu wakuwona kuti kuzgorapo ntchigaŵa cha kusopa kwake Yehova, kukhozga ŵanji, kweniso vikumovwira kukhozga chipulikano chake kuti ivyo Baibolo likuyowoya ni vyanadi. Kweni wati wasamira mu mpingo ukuru, ŵakamuwuskanga viŵi yayi kuti wazgorepo, ndipo nyengo zinyake wakazgorangapo yayi na kamoza wuwo. Iyo wakuti: “Nkhakhuŵaranga chomene, nkhajipulikanga nga nataya mwaŵi unyake. Para vyachitika mwakuwerezgawerezga, ukwamba kuwona nga ŵakuchitira dala.”
10. Kasi tingachita wuli kuti tiŵe na mwaŵi unandi wakuzgorapo?
10 Kasi namwe muli kujipulikapo nga Danielle? Usange ni nthena, panji mungamba kughanaghana kuti ntchiwemi kuleka waka kuzgorapo ndipo mutegherezgenge waka pa maungano. Kweni mungalekanga yayi kuzgorapo. Kasi mungachita vichi? Mungachita makora kuti munozgekerenge mazgoro ghanandi pa maungano ghalighose. Ivi viwovwirenge kuti para ŵandamuwuskani kukwambilira, muŵeso na mwaŵi wakuzgorapo apo maungano ghakulutilira. Para mukunozgekera Gongwe la Mulinda, ghanaghanirani umo ndime yiliyose yikukolelerana na mutu wa nkhani. Para muchitenge nthena, musangenge mazgoro ghawemi, ndipo pafupifupi pa ndime yiliyose muŵenge na chakuzgorapo. Chinyake icho mungachita ndicho kunozgekera makora ndime izo zikulongosora visambizgo vyakunyang’amira ivyo ni vyakusuzga kuvilongosora. (1 Kor. 2:10) Chifukwa wuli? Chifukwa panji mbachoko awo ŵangakazgorapo pa ndime zanthena. Kweni kasi mungachita wuli usange mwayezgayezga kulondezga masachizgo agha, kweni vichali kusuzga kusanga mwaŵi wakuzgorapo, ndipo pa maungano ghanandi agho ghajumpha mwaŵavya mwaŵi wakuzgorapo? Mungayowoya na uyo wakuchitiska Gongwe la Mulinda pambere maungano ghandambe na kumuphalilirathu fumbo ilo mukukhumba kuzakazgorapo.
11. Kasi lemba la Ŵafilipi 2:4 likutichiska kuchitachi?
11 Ŵazgani Ŵafilipi 2:4. Mwakovwirika na mzimu utuŵa, mpositole Paulosi wakachiska Ŵakhristu kuti ŵaghanaghanirenge vyakukhumba vya ŵanji. Kasi tingalondezga wuli ulongozgi uwu pa maungano? Tikumbukenge kuti ŵanyithu nawo ŵakukhumba kuzgorapo nga umo ise tikukhumbira.
Nga umo tikupira m’pata ŵanyithu kuti nawo ŵayowoyengepo para tikuchezga, mwakuyana waka tikwenera kuŵapa m’pata ŵanyithu kuti nawo ŵazgorepo pa maungano (Wonani ndime 12)
12. Kasi nthowa yiwemi chomene yakukhozgera ŵanyithu pa maungano njakuti wuli? (Wonaniso chithuzi.)
12 Ghanaghanirani fundo iyi. Para mukudumbiskana na ŵabwezi ŵinu, kasi mungayowoyanga waka chomene mwekha kwambura kuŵapa m’pata ŵanyinu kuti nawo ŵayowoyepo? Yayi. Namwe mukukhumba kuti nawo ŵayowoyengepo. Mwakuyana waka, pa maungano napo, tikukhumba kuti ŵanandi ŵazgorengepo. Nakuti nthowa yiwemi chomene yakukhozgera ŵabali na ŵadumbu ŵithu nkhuŵapa mwaŵi wakuti ŵalongorenge chipulikano chawo. (1 Kor. 10:24) Tiyeni tiwone umo tingachitira nthena.
13. Kasi tingachita wuli kuti ŵanandi ŵazgorengepo pa ndime?
13 Chinyake ntchakuti, mazgoro ghithu ghakwenera kuŵa ghakudumura, ndipo para tachita nthena tikupeleka mwaŵi kuti ŵanyithu nawo ŵazgorepo. Ŵalara na ŵapharazgi ŵanyake ŵakukhwima mwauzimu ndiwo ŵakwenera kulongora chiyelezgero chiwemi. Nanga ni para zgoro lingaŵa lifupi, tigege kuyowoya fundo zinandi. Para tazgora vyose mu ndime, ntchakusuzga kuti ŵanyithu ŵazgorepo. Mwachiyelezgero, mu ndime iyi muli masachizgo ghaŵiri. Sachizgo lakwamba ndakuti mazgoro ghithu ghaŵenge ghakudumura, ndipo lachiŵiri ndakuti tigege kuzgora fundo zinandinandi panyengo yimoza. Usange ndimwe ŵakwamba kuzgorapo pa ndime iyi, mungachita makora kuyowoyapo waka fundo yimoza.
Kasi mphawuli apo tingasankha kuleka kuwuska woko pa maungano? (Wonani ndime 14) f
14. Kasi ntchivichi chingatovwira kumanya kuti tingawuska kalinga woko lithu kuti tizgorepo? (Wonaniso chithuzi.)
14 Tikweneraso kugwiliskira ntchito umanyi para tikughanaghanira unandi wa mafumbo agho tamuzgorapo. Para tikuwuska woko pafupipafupi, tingapangiska kuti uyo wakuchitiska wachichizgike kutiwuska mwakuwerezgawerezga nangauli ŵanyake ŵangaŵa kuti ŵandazgorepo. Kuchita nthena kungagongoweska ŵanji kuwuska mawoko ghawo kuti ŵazgorepo.—Muph. 3:7.
15. (a) Kasi tikwenera kuchita wuli usange ŵandatiwuske kuti tizgorepo? (b) Kasi awo ŵakuchitiska ŵangalongora wuli kuti ŵakughanaghanira waliyose? (Wonani bokosi lakuti “ Para Ndimwe Mukuchitiska.”)
15 Para ŵapharazgi ŵanandi ŵakuwuska mawoko ghawo kuti ŵazgorepo, tingatondeka kuzgorapo kanandi waka nga umo tikukhumbira. Nyengo zinyake, uyo wakuchitiska wangatiwuska na kutiwuska wuwo yayi. Ichi chingaŵa chakugongoweska chomene, kweni tikwenera yayi kukwiyira uyo wakuchitiska para wandatiwuske.—Muph. 7:9.
16. Kasi tingakhozga wuli ŵanji awo ŵazgorapo pa maungano?
16 Para tindazgorepo nga umo tikukhumbira, tikwenera kutegherezga waka mwakupwelelera para ŵanyithu ŵakuzgora na kuŵawonga pamanyuma pa maungano. Ŵabali na ŵadumbu ŵithu ŵangakhozgeka chomene para mungaŵawonga nga umo ŵatenge ŵakhozgekerenge muzgorengepo pa maungano. (Zinth. 10:21) Kuŵawonga ŵanyithu ni nthowa yinyake iyo tingakhozgerana yumoza na munyake.
NTHOWA ZINYAKE ZAKUKHOZGERANA
17. (a) Kasi ŵapapi ŵangawovwira wuli ŵana ŵawo kunozgekera mazgoro ghakwenelera? (b) Kuyana na vidiyo, kasi ni fundo wuli zinayi izo zingatovwira kunozgekera kukazgorapo? (Wonaniso mazgu ghamusi.)
17 Kasi tingachitaso wuli kuti tikhozganenge pa maungano? Usange ndimwe mupapi, wovwirani ŵana ŵinu kunozgekera mazgoro ghakwenelera ghakuyana na msinkhu wawo. (Mat. 21:16) Nyengo zinyake, nkhani zikuruzikuru, nga zakukhwaskana na masuzgo gha mu nthengwa panji nkhani zakukhwaskana na kugonana, zikusambirika pa sambiro, kweni kanandi pakuŵa waka ndime yimoza panji ziŵiri izo mwana wangazgorapo. Kweniso wovwirani ŵana ŵinu kumanya chifukwa icho ni nyengo zose yayi apo ŵaŵawuskenge para ŵawuska woko. Para mwaŵalongosolera fundo iyi ŵakhuŵarenge yayi para ŵasankha ŵanyake kuti ŵazgorepo m’malo mwa iwo.—1 Tim. 6:18. d
18. Kasi tingachita wuli kuti tigege kuti para tikuzgora, ŵanthu wose ŵaghanaghanenge waka vya ise? (Zintharika 27:2)
18 Tose tinganozgekera mazgoro ghakukhozga agho ghangachindika Yehova na kukhozga Ŵakhristu ŵanyithu. (Zinth. 25:11) Nangauli nyengo zinyake tingayowoyapo ivyo vikatichitikirapo, kweni tikwenera kugega kuyowoya chomene vya ise. (Ŵazgani Zintharika 27:2; 2 Kor. 10:18) Tikwenera kuyezgayezga kuŵika mtima pa Yehova, Mazgu ghake, kweniso ŵanthu ŵake nga ni gulu. (Chivu. 4:11) Kweni para ndime yatipempha kuti tiyowoyepo ivyo vikatichitikirapo, ntchiwemi waka kuchita nthena. Chiyelezgero cha fundo iyi chili mu ndime yakulondezgapo ya nkhani iyi.
19. (a) Kasi chichitikenge ntchivichi para tikughanaghanirana pa maungano? (Ŵaroma 1:11, 12) (b) Kasi ntchivichi icho imwe chikumukondweskani pa nkhani yakuzgorapo pa maungano?
19 Nangauli palije malango gha umo tingazgolera, kweni tose tingaŵikapo mtima kuti tizgorenge ivyo vingakhozga ŵanyithu. Ichi chingang’anamura kuti tileke kuzgora waka ndime yiliyose. Panji chingang’anamura kuti tikhorwenge na mipata iyo tapika yakuzgorapo kweniso kukondwa kuti ŵanyithu nawoso ŵali na mwaŵi wakuzgorapo. Para tikuŵika mtima pa vyakukhumba vya ŵanyithu pa maungano, tose ‘tingakhwimiskana.’—Ŵazgani Ŵaroma 1:11, 12.
SUMU 93 Tumbikani Ungano Withu
a Tikukhozgana para tikuzgorapo pa maungano. Ndipouli, ŵanyake wakuchita wofi kuzgorapo. Apo ŵanyake ŵakukondwa para ŵakuzgorapo ndipo ŵakukhumba nga ŵangazgorangapo kanandinandi waka. Pose paŵiri, kasi tingalongora wuli kuti tikughanaghanirana mwakuti tose tikhwimiskanenge? Ndipo kasi tingachita wuli kuti mazgoro ghithu ghachiskenge ŵabali na ŵadumbu ku chitemwa na ku milimo yiwemi? Nkhani iyi yikulongosora.
b Masachizgo ghanyake ghali mu Gongwe la Mulinda la Janyuwale 2019, peji 8-13; na la Seputembala 1, 2003, peji 19-22.
c Zina lasinthika.
d Wonelerani vidiyo pa jw.org ya mutu wakuti Ŵani Ŵabwezi ŵa Yehova—Kunozgekera Kukazgorapo.
e Wonani Gongwe la Mulinda la Julayi 15, 2013, p. 32; ndiposo la Seputembala 1, 2003, pp. 21-22.
f MAZGU GHAKULONGOSORA CHITHUZI: Mu mpingo uwo uli na ŵanthu ŵanandi, mubali uyo wazgorapo kale wakupeleka m’pata kuti ŵanyake nawo ŵazgorepo.
