1, 2. Kasi ŵapositole ŵakwenera kuti ŵakajifumbanga fumbo wuli Yesu wati waluta kuchanya?

ŴASAMBIRI ŵa Yesu ŵakimilira pa Phiri la Maolive, ndipo ŵakadodoliskanga kuchanya. Iwo ŵakawonanga Yesu uyo wakaŵa Fumu kweniso mubwezi wawo wakukwera kuchanya na kuzgeŵelekera mu mabingu. (Mil. 1:9, 10) Vyaka viŵiri pambere wandalute kuchanya, Yesu wakasambizga, kukhozga, kweniso kulongozga ŵasambiri ŵake. Pakuti wakaluta kuchanya, kasi ŵasambiri ŵake ŵakeneranga kuchita vichi?

² Yesu wakaphalira ŵasambiri ŵake kuti: “Muzamuŵa ŵakaboni ŵane mu Yerusalemu, mu Yudeya mose na Samariya, na ku vigaŵa vyakutali chomene vya charu chapasi.” (Mil. 1:8) Kasi ŵakate ŵakwaniskenge wuli ntchito iyi? Yesu wakaŵalayizga kuti ŵapokerenge mzimu utuŵa. (Mil. 1:5) Kuti ŵapharazge pa charu chose, pakakhumbikwiranga ŵanthu kweniso gulu kuti lilongozgenge. Kale, Yehova wakasankha ŵanthu kuti ŵalongozgenge ŵanthu  ŵake. Ŵapositole ŵakwenera kuti ŵakajifumbanga kuti, ‘Kasi Yehova wasankhenge mulongozgi munyake?’

3. (a) Kasi ŵapositole ŵakugomezgeka ŵakachita vichi, Yesu wati wakwera kuchanya? (b) Kasi tisambirenge vichi mu nkhani iyi?

³ Pakati pajumpha mazuŵa ghachoko waka kufuma apo Yesu wakakwelera kuchanya, ŵasambiri ŵakasanda Malemba na kulomba ulongozgi kwa Yehova. Pamanyuma ŵakasankha Matiya uyo wakanjira m’malo mwa Yudasi Isikariyoti kuti ŵakwane ŵapositole 12. (Mil. 1:15-26) Chifukwa wuli Yehova na ŵapositole ŵakawona kuti ntchakuzirwa kusankha Matiya? Matiya wakagwira ntchito yikuru chomene. * Yesu wakasankha ŵapositole kuti wendenge waka nawo mu uteŵeti yayi. Kweni kuti ŵachite ntchito yakuzirwa chomene pakati pa ŵanthu ŵa Chiuta. Kasi yikaŵa ntchito wuli, ndipo Yehova kwizira mwa Yesu, wakaŵawovwira wuli kuti ŵafiske ntchito iyi? Kasi pali kuyana wuli na ivyo ŵanthu ŵa Chiuta ŵakuchita mazuŵa ghano? Kasi ‘tingakumbuka wuli awo ŵakulongozga’ pakati pithu, chomenechomene awo ŵakupanga “muzga wakugomezgeka na wavinjeru”?—Heb. 13:7; Mat. 24:45.

4. Kasi ŵapositole na ŵalara ŵanyake mu Yerusalemu ŵakagwiranga ntchito wuli?

⁴ Pa Pentekoste 33 C.E., ŵapositole ndiwo ŵakamba kulongozga mpingo Wachikhristu. Pa nyengo iyi, “Petrosi wakimilira pamoza na ŵapositole 11,” ndipo wakamba kupharazgira Ŵayuda na ŵakung’anamukira ku Chiyuda. (Mil. 2:10, 14, 15) Ŵanthu ŵanandi ŵakagomezga. Kufuma apo, Ŵakhristu aŵa, “ŵakalutilira kusambira ku ŵapositole.” (Mil. 2:42) Ŵapositole ŵakawovwirapo chomene kuti ndalama zigwire ntchito makora mu mpingo. (Mil. 4:34, 35) Iwo ŵakawovwiranga ŵanthu ŵa Chiuta pa vinthu vyauzimu. Iwo ŵakati: “Ise tiŵikenge mtima pa kulomba na uteŵeti wa mazgu gha Chiuta.” (Mil. 6:4) Ndipo ŵapositole ŵakasankha Ŵakhristu awo ŵakachitanga makora kuti ŵakapharazge ku vigaŵa vinyake. (Mil. 8:14, 15) Pakati pajumpha nyengo, ŵalara ŵanyake ŵakuphakazgika ŵakamba kovwirana na ŵapositole kulongozga mipingo. Pakuŵa wupu wakulongozga, ŵakapelekanga ulongozgi ku mipingo yose.—Mil. 15:2.

5, 6. (a) Kasi mzimu utuŵa ukawovwira wuli wupu wakulongozga? (Wonani chithuzi chakwamba.) (b) Kasi ŵangelo ŵakawovwira wuli wupu wakulongozga? (c) Kasi Mazgu gha Chiuta ghakawovwira wuli wupu wakulongozga?

⁵ Ŵakhristu ŵakwambilira ŵakamanyanga kuti wupu wakulongozga ukalongozgekanga na Yehova Chiuta kwizira mwa Mulongozgi wawo, Yesu. Kasi ŵakamanya wuli kuti ŵakalongozgekanga na Yehova? Chakwamba, mzimu utuŵa ndiwo ukawovwiranga wupu wakulongozga. (Yoh. 16:13) Ŵakhristu ŵakuphakazgika wose ŵakapokera mzimu utuŵa, kweni ukawovwira chomene ŵapositole na ŵalara ŵanyake mu Yerusalemu kuti ŵafiske makora mulimo wawo wakulongozga. Mu 49 C.E., mzimu utuŵa ukawovwira wupu wakulongozga kuti udumure makora nkhani ya ukotoli. Mipingo yikalondezga ulongozgi wa wupu wakulongozga ndipo “yikalutilira kukhozgeka mu chipulikano ndipo zuŵa lililose ŵanthu ŵakasazgikiranga mu mpingo.” (Mil. 16:4, 5) Kalata iyo wupu wakulongozga ukalemba, yikulongora kuti wupu uwu ukaŵa na vipambi vya mzimu, nga ntchitemwa na chipulikano.—Mil. 15:11, 25-29; Gal. 5:22, 23.

⁶ Chachiŵiri, ŵangelo ŵakawovwiranga wupu wakulongozga. Pambere wandabatizike, Koroneliyo uyo wakaŵa Wamitundu kweniso  wambura kukotoleka, mungelo wakamuphalira kuti wacheme Petrosi kuti wize ku nyumba kwake. Petrosi wati wapharazgira Koroneliyo na ŵabali ŵake, ŵakapokera mzimu utuŵa nangauli ŵakaŵa ŵambura kukotoleka. Ichi chikawovwira ŵapositole kweniso ŵabali ŵanyake kuti ŵapulikire khumbo la Chiuta. Kweniso vikawovwira Ŵakhristu kuzomerezga Ŵamitundu ŵambura kukotoleka kunjira mu mpingo Wachikhristu. (Mil. 11:13-18) Nakuti ŵangelo ŵakawovwira chomene pa ntchito yakupharazga iyo wupu wakulongozga ukalongozganga. (Mil. 5:19, 20) Chachitatu, Mazgu gha Chiuta ghakawovwira wupu wakulongozga. Wupu wakulongozga ukapenjanga ulongozgi mu Mazgu gha Chiuta pakudumura nkhani zakukhwaskana na ivyo ŵakugomezga panji para ukupeleka ulongozgi.—Mil. 1:20-22; 15:15-20.

7. Chifukwa wuli tikugomezga kuti Yesu ndiyo wakalongozganga Ŵakhristu ŵakwambilira?

⁷ Nangauli wupu wakulongozga ndiwo ukalongozganga mpingo, kweni ukamanyanga kuti Yesu ndiyo wakaŵa Mulongozgi wawo. Mpositole Paulosi wakalemba kuti: “[Khristu] wakapeleka ŵanyake kuŵa ŵapositole. Tiyeni tikurenge mu vinthu vyose mu chitemwa mwakuyana na uyo ni mutu, Khristu.” (Efe. 4:11, 15) M’malo mwa kujipa mazina gha ŵapositole, “ŵasambiri mwakulongozgeka na Chiuta ŵakamba kuchemeka Ŵakhristu.” (Mil. 11:26) Paulosi wakamanyanga uwemi wa ‘kukoleska,’ panji kulondezga ulongozgi wa mu Baibolo, wa ŵapositole, kweniso ŵanalume awo ŵakalongozganga. Paulosi wakayowoyaso kuti: “Kweni nkhukhumba kuti mumanye kuti mutu wa mwanalume waliyose [na wa mu wupu wakulongozga wuwo] ni Khristu, . . . ndipo mutu wa Khristu ni Chiuta.” (1 Kor. 11:2, 3) Yehova Chiuta na Yesu Khristu, ndiwo ŵakalongozganga mpingo.

8, 9. Kuyambira mu 1900, kasi Mubali Russell wakagwira ntchito wuli yakuzirwa?

⁸ Kuumaliro kwa 1900, Mubali Charles Taze Russell na ŵanyake ŵakaŵikapo mtima kuti kusopa kwaunenesko kwambireso. Kuti ŵanthu ŵanandi ŵasambire unenesko wa mu Baibolo mu viyowoyero vinandi, ŵabali ŵakalembeska wupu wa Zion’s Watch Tower Tract Society ku boma mu 1884, ndipo Mubali Russell ndiyo wakaŵa pulezidenti wa wupu uwu. * Mubali Russell wakalimbikiranga chomene kusambira Baibolo. Wakasuska visambizgo vyautesi vyakuti kuli Ŵachiuta ŵatatu, kweniso kuti mzimu ukufwa yayi. Iyo wakamanya kuti Khristu wazamwiza kwambura kuwoneka, kweniso kuti “nyengo zakutemeka za ŵamitundu” zimarenge mu 1914. (Luka 21:24) Mubali Russell wakamalirapo nyengo, nkhongono, kweniso ndalama zake pa kupharazga makani ghawemi. Panyengo iyi, Yehova na Yesu uyo ni mutu wa mpingo, ndiwo ŵakamovwira Mubali Russell kuti walongozgenge.

⁹ Mubali Russell wakajipenjeranga ntchindi yayi. Mu 1896, Mubali Russell wakalemba kuti: “Tikukhumba yayi kuti ŵanthu ŵatichindikenge mwapadera chifukwa cha ivyo tikulemba, kweniso tikukhumba yayi kuchemeka Muliska panji Rabi. Kweniso tikukhumba yayi kuti pa chinthu chithu chilichose paŵenge mazina ghithu.” Wakayowoyaso kuti: “Iyi ni ntchito ya munthu yayi.”

10. (a) Kasi mphawuli apo Yesu wakasora “muzga wakugomezgeka na wavinjeru”? (b) Kasi vikenda wuli kuti wupu wakulongozga uleke kuchitira lumoza vinthu na wa Watch Tower Society? Longosorani.

¹⁰ Mu 1919, pakati pajumpha vyaka vitatu kufuma apo Mubali Russel wakafwira, Yesu wakasora “muzga wakugomezgeka na wavinjeru.” Chifukwa wuli Yesu wakasora muzga wakugomezgeka  na wavinjeru? Kuti ŵapelekenge “chakurya pa nyengo yakwenelera” ku ŵateŵeti ŵake ŵa pa nyumba. (Mat. 24:45) Panyengo iyo, pakaŵa gulu lichoko waka la Ŵakhristu ŵakuphakazgika ilo likateŵeteranga pa ofesi yikuru ku Brooklyn, New York, ilo likanozganga na kupeleka chakurya chauzimu ku ŵalondezgi ŵa Yesu. Mazgu ghakuti “wupu wakulongozga” ghakamba kulembeka mu mabuku ghithu cha m’ma 1940. Pa nyengo iyo, wupu wakulongozga ukachitiranga lumoza vinthu na Watch Tower Bible and Tract Society. Kweni mu 1971, Wupu Wakulongozga ukaleka kuchitira lumoza vinthu na wupu wa Watch Tower Society uwo ukapweleleranga nkhani za milandu pera. Kufuma waka pa nyengo iyi, Ŵakhristu ŵakuphakazgika ŵakaleka kulongozga Watch Tower Society, ndipo ŵakamba kuŵa mu Wupu Wakulongozga. Mazuŵa ghano, ŵabali ŵanyake ŵakwenelera awo mba “mberere zinyake,” ndiwo ŵakwendeska wupu wa Watch Tower Society na mawupu ghanyake agho gulu likugwiliskira ntchito. Ivi vyawovwira kuti Wupu Wakulongozga uŵikenge chomene mtima pa kupeleka chakurya chauzimu na ulongozgi. (Yoh. 10:16; Mil. 6:4) Gongwe la Mulinda la Julayi 15, 2013, likalongosora kuti “muzga wakugomezgeka na wavinjeru” nkhagulu kachoko waka ka ŵabali ŵakuphakazgika awo ŵakupanga Wupu Wakulongozga.

11. Kasi Wupu Wakulongozga ukugwira wuli ntchito yake?

¹¹ Wupu Wakulongozga ukupeleka ulongozgi wa umo vinthu vikwenera kwendera mu gulu la Yehova. Kasi ukuchita wuli? Ŵabali ŵa mu wupu wakulongozga, ŵakukumana sabata yiliyose kuti ŵadumbiskane. Ivi vikovwira kuti ŵaŵe ŵakukolerana kweniso paŵe mtende. (Zinth. 20:18) Pakuti wose awo ŵali mu Wupu Wakulongozga ŵakuyana waka, chaka chilichose ŵakusinthana ucheyamani pa maungano ghawo. (1 Pet. 5:1) Wupu Wakulongozga uli na makomiti 6, ndipo awo ŵali mu makomiti agha ŵakusinthana ucheyamani chaka chilichose. Waliyose uyo wali mu wupu wakulongozga, wakuwona kuti ndiyo wakulongozga ŵanyake yayi. Kweni wakujiwona kuti ni ‘muteŵeti wa pa nyumba’ uyo wakwenera kulyeskeka na muzga wakugomezgeka na kujilambika kwa iyo.

12. Pakuti Wupu Wakulongozga ngwambura kufikapo, kasi tidumbiskanenge mafumbo wuli?

¹² Wupu Wakulongozga ngwakufikapo yayi. Lekani nyengo zinyake ungabudiska pakulongosora fundo zinyake za mu Baibolo, panji umo ungendeskera vinthu vinyake mu gulu. Mwachiyelezgero, Watch Tower Publications Index pasi pa mutu wakuti “Beliefs Clarified” * pakulongosora ivyo vyasintha pa umo tikapulikiskiranga Malemba kufuma mu 1870. Yesu wakayowoyapo yayi kuti muzga wakugomezgeka wazamupeleka chakurya chauzimu chakufikapo. Ntheura kasi tingazgora wuli fumbo la Yesu, lakuti: “Kasi muzga wakugomezgeka na wavinjeru ni njani?” (Mat. 24:45) Kasi tikugomezga wuli kuti Wupu Wakulongozga ni muzga wakugomezgeka? Tiyeni tiwone vinthu vitatu ivyo vikawovwira wupu wakulongozga wa mu nyengo ya ŵapositole.

13. Kasi mzimu utuŵa ukovwira wuli Wupu Wakulongozga?

¹³ Mzimu utuŵa. Mzimu utuŵa ukovwira chomene Wupu Wakulongozga kupulikiska Malemba kuluska kale. Ghanaghanirani waka ivyo vyalongosoreka mu buku Lakupenjera Nkhani, pa mutu wakuti “Kulongosora Ivyo Tikugomezga.” Palije munthu uyo wate wapulikiskenge na kulongosora makora “vinthu vyakubisika vya Chiuta” ivi. (Ŵerengani 1 Ŵakorinte 2:10.) Wupu Wakulongozga ukujipulika nga ni  Paulosi, uyo wakati: “Tikuyowoya vinthu ivi na mazgu ghakusambizgika na vinjeru vya ŵanthu yayi, kweni na mazgu ghakusambizgika na mzimu.” (1 Kor. 2:13) Pakuti ŵanthu ŵapusikika na visambizgo vyautesi vyaka vinandi, ntchivichi chawovwira Wupu Wakulongozga kuti upulikiske makora Baibolo kufuma mu 1919? Mzimu utuŵa wa Chiuta ndiwo ukuŵawovwira.

14. Kuyana na Chivumbuzi 14:6, 7, kasi ŵangelo ŵakovwira wuli ŵanthu ŵa Chiuta mazuŵa ghano?

¹⁴ Wovwiri wa Ŵangelo. Wupu Wakulongozga uli na ntchito yikuru yakulongozga ntchito yakupharazga pa charu chose. Pali ŵapharazgi ŵakujumpha 8 miliyoni awo ŵakuchitako ntchito iyi. Chifukwa wuli ntchito iyi yikwenda makora? Chifukwa cha wovwiri wa ŵangelo. (Ŵerengani Chivumbuzi 14:6, 7.) Pali ukaboni wakuti ŵangelo ŵakulongozgera ŵapharazgi ku ŵanthu awo ŵakulomba wovwiri kwa Chiuta. * Mu vyaru vinyake ŵapharazgi ŵakutambuzgika. Kweni ntchito yakupharazga na kupanga ŵasambiri yikulutilira kwenda makora chifukwa cha wovwiri wa ŵangelo.

15. Kasi Wupu Wakulongozga ukupambana wuli na ŵalongozgi ŵa matchalitchi Ghachikhristu? Yowoyani chiyelezgero.

¹⁵ Wovwiri wa Mazgu gha Chiuta. (Ŵerengani Yohane 17:17.) Wonani ivyo vikachitika mu 1973. Gongwe la Mulinda la Juni 1, likaŵa na fumbo lakuti: “Kasi munthu uyo wandaleke kukhweŵa hona wangabatizika?” Zgoro likaŵa lakuti: “Malemba ghakulongora kuti munthu  wanthena wangabatizika yayi.” Gongwe la Mulinda ili likalongosora Malemba ghanandi, ndipo paumaliro likayowoya chifukwa icho munthu wambura kupera uyo wakukhweŵa wakwenera kusezgekera mu mpingo. (1 Kor. 5:7; 2 Kor. 7:1) Gongwe la Mulinda ili likatiso: “Ulongozgi uwu wafuma kwa munthu yayi, kweni wafuma kwa Chiuta uyo wali kuyowoya yekha kwizira mu Mazgu ghake, Baibolo.” Palije gulu linyake la chisopa ilo likulondezga Mazgu gha Chiuta para lawona kuti fundo zake zikhwaskenge ŵanthu ŵanyake mu mpingo wawo. Buku linyake la chisopa ku United States, likuti: “Ŵalongozgi ŵa matchalitchi Ghachikhristu ŵakusintha visambizgo vyawo kuti vikolerane na vigomezgo ivyo ŵanthu ŵa mu mpingo panji mu chigaŵa chawo ŵakukhumba.” Wupu Wakulongozga ukulondezga waka ivyo ŵanthu ŵanandi ŵakukhumba yayi. Kweni ukwendera ivyo Mazgu gha Chiuta ghakuyowoya. Fundo iyi yikulongora kuti Chiuta ndiyo wakulongozga nadi ŵanthu ŵake.

16. Kasi tingalongora wuli kuti tikukumbuka ŵabali awo ŵali mu Wupu Wakulongozga?

¹⁶ Ŵerengani Ŵahebere 13:7. Mazgu ghakuti “kumbukani” ghangang’anamuraso kuti “zunurani.” Lekani nthowa yimoza iyo tingalongolera kuti ‘tikukumbuka awo ŵakulongozga,’ nkhuzunura ŵa Wupu Wakulongozga mu lurombo. (Efe. 6:18) Wupu Wakulongozga uli na ntchito yikuru yakupeleka chakurya chauzimu, kulongozga ntchito yakupharazga, kweniso kuwona umo ndalama izo ŵabali na ŵadumbu ŵakupeleka zikwendera. Ntheura tikwenera kulutilira kuŵalombera ŵabali awo ŵali mu Wupu Wakulongozga.

17, 18. (a) Kasi tingalongora wuli kuti tikupulikira Wupu Wakulongozga? (b) Kasi tikovwira wuli muzga wakugomezgeka na Yesu?

¹⁷ Para tikukumbuka Wupu Wakulongozga tipulikirenge ulongozgi uwo ukutipa. Wupu Wakulongozga ukupeleka ulongozgi mu mabuku ghithu, pa maungano gha mpingo, gha dera, na gha chigaŵa. Kweniso ukwimika ŵalaŵiliri ŵa dera, awo ŵakwimika ŵalara mu mpingo. Ŵalaŵiliri ŵa dera pamoza na ŵalara mu mpingo ŵakukumbuka Wupu Wakulongozga para ŵakulondezga ulongozgi wawo. Tose tikuchindika Mulongozgi withu, Yesu, para tikupulikira na kujilambika ku ŵabali awo ŵakutilongozga.—Heb. 13:17.

¹⁸ Tingalongoraso kuti tikukumbuka Wupu Wakulongozga para tikulimbikira kupharazga. Paulosi wakaphalira Ŵakhristu kuti ŵayezgenge chipulikano cha awo ŵakulongozga pakati pawo. Muzga wakugomezgeka wali na chipulikano chakukhora chifukwa wakuŵikapo mtima kuti makani ghawemi gha Ufumu ghapharazgike pa charu chose. Kasi muli mu gulu la ŵamberere zinyake awo ŵakovwira Ŵakhristu ŵakuphakazgika pa ntchito yakuzirwa iyi? Muzamukondwa chomene para Mulongozgi winu, Yesu, wazamumuphalirani kuti: “Pakuti mukachitira ichi yumoza wa ŵabali ŵane ŵachoko chomene aŵa, mukachitira ine.”—Mat. 25:34-40.

19. Chifukwa wuli mwaŵikapo mtima kulondezga Mulongozgi withu, Yesu?

¹⁹ Nangauli Yesu wakawelera kuchanya, kweni wakaŵaleka yayi ŵalondezgi ŵake. (Mat. 28:20) Apo Yesu wakaŵa pa charu chapasi, wakamanya makora kuti mzimu utuŵa, ŵangelo, kweniso Mazgu gha Chiuta ndivyo vikamovwira kuti walongozge makora. Lekani mazuŵa ghano wakovwira muzga wakugomezga na vinthu ivi. Ŵakhristu ŵakuphakazgika, awo ŵakupanga Muzga Wakugomezgeka “ŵakulutilira kulondezga Mwana wa mberere kulikose uko wakuya.” (Chivu. 14:4) Para tikulondezga ulongozgi wawo, tikulondezga Mulongozgi withu, Yesu. Sonosono apa, watilongozgerenge ku umoyo wamuyirayira. (Chivu. 7:14-17) Palije mulongozgi wa ŵanthu uyo wangatilayizga fundo iyi.