Kasi Mukumumanya Yehova nga Ni Nowa, Daniyeli, na Yobu?
“Ŵanthu ŵaheni ŵakupulikiska yayi urunji, kweni awo ŵakupenja Yehova ŵakupulikiska chilichose.”—ZINTH. 28:5.
1-3. (a) Ntchivichi chingatovwira kuti tilutilire kugomezgeka kwa Chiuta mu mazuŵa ghaumaliro agha? (b) Kasi tidumbiskanenge vichi?
APO umaliro wa charu ichi ukusendelera, ŵaheni ŵakulutilira ‘kuphuka nga mbutheka.’ (Sal. 92:7) Lekani tikuzizwa yayi kuti nkharo za ŵanthu zanangika chomene. Pakuti tikukhala na ŵanthu ŵa nkharo ziheni, kasi tingachita wuli kuti tiŵe “ŵana ŵachoko ku viheni,” na kuŵa “ŵalara mu kapulikiskiro” kithu?—1 Kor. 14:20.
2 Zgoro la fumbo ili lili mu lemba ilo pajintha nkhani iyi. Chigaŵa chachiŵiri cha lemba ili chikuti: “Awo ŵakupenja Yehova ŵakupulikiska chilichose,” icho ntchakukhumbikwa kuti ŵamukondweske. (Zinth. 28:5) Fundo iyi yikusangikaso pa lemba la Zintharika 2:7, 9. Lemba ili likuti “ŵakunyoloka [Yehova] wakuŵasungira vinjeru viwemi.” Lekani ŵakunyoloka ‘ŵakumanya makora icho ntchaurunji, chakwenelera, na chakunyoloka, nthowa yose ya uwemi.’
3 Nowa, Daniyeli, na Yobu ŵakaŵa na vinjeru ivi. (Ezek. 14:14) Ŵanthu ŵa Chiuta mazuŵa ghano nawo mbavinjeru. Wuli imwe pamwekha? Kasi imwe ‘mukupulikiska chilichose’ icho ntchakukhumbikwa kuti mukondweske Yehova? Kuti muchite nthena, mukwenera kumumanya makora Yehova. Apo tikughanaghanira fundo izi tiyeni tidumbiskane ivi (1) kasi Nowa, Daniyeli, na Yobu ŵakamumanya wuli Chiuta? (2) kasi ivyo ŵakamanya vikaŵawovwira wuli? ndipo (3) tingachita wuli kuti nase tiŵe na chipulikano nga ntchawo?
NOWA WAKENDA NA CHIUTA MU CHARU CHIHENI
4. Kasi Nowa wakamumanya wuli Yehova, ndipo ivi vikamovwira wuli?
4 Kasi Nowa wakamumanya wuli Yehova? Pali nthowa zikuru zitatu izo kale ŵanthu ŵachipulikano ŵakamanyiranga Chiuta. Iwo ŵakawonanga chilengiwa, kusambira ku ŵanthu ŵanyake awo ŵakawopanga Chiuta, na kuwona vitumbiko ivyo ŵakasanganga para ŵalondezga fundo zaurunji za Chiuta. (Yes. 48:18) Apo Nowa wakawonanga chilengiwa, wakawonanga maukaboni ghanandi ghakuti Chiuta waliko nadi. Kweniso wakawonanga mikhaliro iyo Chiuta wali nayo nga ni “nkhongono yake yamuyirayira na Uchiuta wake.” (Rom. 1:20) Chifukwa cha kuwona chilengiwa, Nowa wakagomezganga kuti kuli Chiuta kweniso wakaŵa na chipulikano chankhongono mwa iyo.
5. Kasi Nowa wakamanya wuli ivyo Chiuta wakukhumba kuchitira ŵanthu?
5 “Munthu wakuŵa na chipulikano para wapulika.” (Rom. 10:17) Kasi Nowa wakapulika kwa njani za Yehova? Wakwenera kuti wakapulika ku ŵabali ŵake. Wakapulika kwa Adada ŵake a Lameki, awo ŵakaŵa na chipulikano chankhongono ndipo ŵakasangana na Adamu. (Wonani chithuzi chakwamba.) Kweniso wakapulika kwa asekuru ŵake a Metusela, na asekuru ŵake a Yaredi, awo ŵakasangana na Nowa. Yaredi wakakhala vyaka 366 kufuma apo Nowa wakababikira. * (Luka 3:36, 37) Nowa wakwenera kuti wakasambira za Chiuta ku ŵanthu aŵa panji ŵawoli ŵawo. Wakapulika umo ŵanthu ŵakalengekera, khumbo la Chiuta lakuti ŵanthu ŵarunji ŵazuzge charu, kweniso kugaluka uko kukachitika mu Edeni. Kweniso Nowa wakajiwoneranga yekha masuzgo agho ghaŵapo chifukwa cha kugaluka. (Gen. 1:28; 3:16-19, 24) Nowa wakakhwaskika chomene na ivyo wakasambira, ndipo vikamovwira kuti wateŵetere Chiuta.—Gen. 6:9.
6, 7. Kasi ivyo Nowa wakagomezganga vikakhozga wuli chipulikano chake?
6 Munthu wakuŵa na chipulikano chakukhora para wali na chigomezgo. Ghanaghanirani umo Nowa wakajipulikira wati wamanya kuti panji zina lake likung’anamura “Chipumulo; [panyake] Chipembuzgo.” Zina ili likamupa chigomezgo kuti vinthu vizamuŵa makora kunthazi. (Gen. 5:29, mazgu ghamusi) Lameki wakayowoya mazgu ghauchimi ghakuti: “Uyu [Nowa] ndiyo watipumuzgenge ku milimo . . . yakuvuska ya mawoko ghithu iyo tikuchita mu charu icho Yehova wali kuchitemba.” Nowa wakaŵa na chigomezgo mwa Chiuta. Nga ni Abelu na Enoki awo ŵakaŵako pambere iyo wandababike, Nowa wakagomezganga kuti “mphapu” yizamudinya mutu wa njoka.—Gen. 3:15.
7 Nangauli Nowa wakawupulikiska chomene yayi uchimi wa pa Genizesi 3:15, kweni wakwenera kuti wakamanyanga kuti ukuyowoya za chiponosko. Kweniso ivyo Yehova wakalayizga mu Edeni vikukolerana na ivyo Enoki wakayowoya. Enoki nayo wakayowoyerathu kuti Chiuta wazamweruzga ŵaheni. (Yuda 14, 15) Ivyo Enoki wakayowoya vizamufiskika chomene pa Aramagedoni, ndipo vikwenera kuti vikakhozga chomene chipulikano na chigomezgo cha Nowa.
8. Kasi kumumanya makora Chiuta kukamovwira wuli Nowa?
8 Kasi kumumanya makora Chiuta kukamovwira wuli Nowa? Nowa wakaŵa na chipulikano kweniso vinjeru chifukwa cha kumumanya makora Chiuta. Ivi vikamuvikilira kuti waleke kupwetekeka, chomenechomene mwauzimu. Mwachiyelezgero, pakuti Nowa “wakendanga na Chiuta,” wakendanga nawo yayi ŵanthu ŵambura kusopa Chiuta panji kuchezga nawo. Wakapuluskika yayi na Ŵanefili awo ŵakaŵa ŵana ŵa ŵangelo. Ŵanefili ŵakapangiska ŵanthu ŵanandi kuti ŵaŵavye chipulikano. Vikaŵa viŵanthu vyankhongono chomene ndipo vikachitanga vinthu vyakuzizika. Nakuti panji ŵanthu ŵakamba na kuvisopa wuwo. (Gen. 6:1-4, 9) Kweniso Nowa wakamanyanga kuti Chiuta wakaphalira ŵanthu kuti ndiwo ŵababane na kuzuzga charu. (Gen. 1:27, 28) Ntheura panji wakamanyanga kuti chikaŵa chakawiro yayi kweniso chambura kwenelera kuti ŵangelo ŵagone na ŵanakazi na kubaba ŵana. Nowa wati wawona umo vikaŵira viŵana ivyo ŵangelo ŵakababirana na ŵanthu, wakamanya kuti ivyo ŵangelo aŵa ŵakachita vikaŵa vyamuziro nadi. Pamanyuma Chiuta wakachenjezga Nowa kuti watumenge Chigumula pa charu. Nowa wakaŵa na chipulikano kuti Chiuta wachitenge nadi ivyo wayowoya. Lekani wakakhuka kukhoma chingalaŵa icho wakaponoskekeramo pamoza na banja lake.—Heb. 11:7.
9, 10. Kasi tingachita wuli kuti tiŵe na chipulikano nga ntcha Nowa?
9 Kasi tingachita wuli kuti tiŵe na chipulikano nga ntcha Nowa? Chinthu chakwamba ntchakuti tiŵerengenge Mazgu gha Chiuta nyengo zose, kughanaghanirapo ivyo taŵerenga, na kuvilondezga. (1 Pet. 1:13-15) Ndipo chipulikano na vinjeru vyakufuma kwa Chiuta vitivikilirenge kuti tileke kupuluskika na njomba za Satana ndiposo mzimu uheni wa charu. (2 Kor. 2:11) Mzimu wa charu ukupangiska ŵanthu kuti ŵatemwenge chomene nkhaza na nkharo zaukazuzi. Ukupangiskaso ŵanthu kuti ŵatemwenge kuchita makhumbiro gha thupi. (1 Yoh. 2:15, 16) Kweniso ukupangiska ŵanthu ŵambura kukhora mwauzimu kuti ŵakayikirenge maukaboni ghakuti zuŵa likuru la Chiuta lili pafupi. Kuluwa yayi kuti apo Yesu wakayaniskanga mazuŵa ghithu na gha Nowa, wakazunurapo yayi za nkhaza panji nkharo ziheni, kweni wakayowoya vya ngozi ya kuleka kuŵikako mahara ku vinthu vyauzimu.—Ŵerengani Mateyu 24:36-39.
10 Jifumbani kuti ‘Kasi nkharo yane yikulongora kuti nkhumumanya Yehova? Kasi chipulikano chikunituma kuti nilondezgenge fundo za Chiuta na kuphalirako ŵanji?’ Mazgoro ghinu ndigho ghakulongora usange namwe ‘mukwenda na Chiuta.’
DANIYELI WAKALONGORA VINJERU VYAKUFUMA KWA CHIUTA KU BABULONI
11. (a) Kasi mikhaliro yauzimu iyo Daniyeli wakaŵa nayo yikulongora kuti ŵakamulera wuli? (b) Ni mikhaliro wuli ya Daniyeli iyo yikumukondweskani?
11 Kasi Daniyeli wakamumanya wuli Yehova? Daniyeli wakwenera kuti wakasambizgika makora na ŵapapi ŵake. Ŵakamusambizga kutemwa Yehova na Mazgu ghake. Ivi vikamovwira kuti watemwe Yehova umoyo wake wose. Nanga ni apo Daniyeli wakaŵa kuti wachekura, wakaŵerenganga Malemba. (Dan. 9:1, 2) Umo Daniyeli wakachitiranga vinthu na Ŵaisrayeli ŵanyake kweniso lurombo lwake lwakuŵeya ulo luli pa Daniyeli 9:3-19 vikulongora kuti wakamumanyanga makora Chiuta. Mungapatura nyengo yichoko waka kuti muŵerenge lurombo ulu na kughanaghanirapo. Wonani ivyo lukumusambizgani vya Daniyeli.
12-14. (a) Kasi Daniyeli wakalongora wuli vinjeru vyakufuma kwa Chiuta? (b) Kasi Yehova wakamutumbika wuli Daniyeli chifukwa cha kugomezgeka kweniso chikanga?
12 Kasi kumanya Chiuta kukamovwira wuli Daniyeli? Umoyo ku Babuloni ukaŵa wakusuzga chomene ku Ŵayuda ŵakugomezgeka. Mwachiyelezgero Yehova wakaphalira Ŵayuda kuti: “Muwukhumbire mtende msumba uwo namutoleraniko.” (Yer. 29:7) Kweni wakakhumbanga kuti ŵakasopenge iyo pera. (Eks. 34:14) Ni vichi vikawovwira Daniyeli kuti wachite makora vyose viŵiri? Vinjeru vyakufuma kwa Chiuta vikamovwira kuti wapulikirenge ŵalara ŵa boma usange ntchakwenelera. Pakati pajumpha vyaka, Yesu nayo wakasambizga fundo yakuyana waka.—Luka 20:25.
13 Wonani ivyo Daniyeli wakachita apo boma likati paŵavye munthu wakulomba kwa chiuta munyake panji munthu munyake kwa mazuŵa 30, padera pa themba. (Ŵerengani Daniyeli 6:7-10.) Daniyeli wakhumbenge mphanyi wakaŵa na pakugwenthera. Mphanyi wakati, ‘Nilekenge kulomba mazuŵa 30 pera.’ Kweni wakaleka yayi kuchita ivyo Malemba ghakamuphaliranga chifukwa cha kukhumba kupulikira boma. Wakhumbenge mphanyi wakalomba kwambura kuwonekera. Kweni ŵanthu ŵakamanyanga makora nyengo iyo wakalomberanga. Ntheura wakakhumba yayi kuti ŵanthu ŵawone kuti waleka kusopa Chiuta wake, nangauli ivi vikaŵika umoyo wake pangozi.
14 Yehova wakamutumbika Daniyeli chifukwa chakuti wakagomezgeka kweniso wakaŵa wachikanga. Wakamuponoska mwamunthondwe ku nyifwa iyo yikate yiŵenge yakuŵinya chomene. Nakuti ŵanthu ŵakamumanya Yehova mu vigaŵa vyose vya Ufumu wa Medi na Peresiya chifukwa cha ivyo vikachitika.—Dan. 6:25-27.
15. Kasi tingachita wuli kuti tiŵe na chipulikano nga ni Daniyeli?
15 Kasi tingachita wuli kuti tiŵe na chipulikano nga ni Daniyeli? Chinthu chakwamba icho chingatovwira kuti tiŵe na chipulikano chakukhora nkhuŵerenga Mazgu gha Chiuta “na kumanya ng’anamuro lake.” (Mat. 13:23) Tikukhumba kumanya umo Yehova wakuwonera vinthu. Ichi chikung’anamura kuti tikwenera kumanya fundo za mu Baibolo. Ntheura tikwenera kughanaghanirapo ivyo tikuŵerenga. Kweniso ntchakuzirwa kulomba kufumira pasi pa mtima, chomenechomene para takumana na viyezgo panji masuzgo. Para tikulomba kwa Chiuta na chipulikano kuti watipe vinjeru na nkhongono, Yehova watipenge mwawanangwa.—Yak. 1:5.
YOBU WAKALONDEZGA FUNDO ZA YEHOVA PA MASUZGO NA PA MTENDE
16, 17. Kasi Yobu wakamumanya wuli Chiuta?
16 Kasi Yobu wakamumanya wuli Yehova? Yobu wakaŵa Muisrayeli yayi. Kweni wakaŵa mubali wa Abrahamu, Yisake, na Yakhobe, awo Yehova wakaŵavumbulira vinthu vyakukhwaskana na iyo ndiposo ivyo wakukhumba kuchitira ŵanthu. Yobu wakwenera kuti wakamanya ivyo Yehova wakavumbulira ŵanthu aŵa. (Yobu 23:12) Yobu wakati: “Makutu ghane ghakapulikanga waka vya imwe.” (Yobu 42:5) Kweniso Yehova wakayowoya kuti Yobu wakayowoya vinthu vyaunenesko vyakukhwaskana na Yehova.—Yobu 42:7, 8.
Chipulikano chithu chikukhora para tikusambira mikhaliro ya Chiuta kwizira mu ivyo wali kulenga (Wonani ndime 17)
17 Yobu wakasambiraso mikhaliro yinandi ya Chiuta chifukwa cha kuwona chilengiwa. (Yobu 12:7-9, 13) Pamanyuma, Yehova na Elihu ŵakazunura vinthu ivyo Yehova wali kulenga kuti ŵakumbuske Yobu kuti munthu ni muchoko chomene pakuyaniska na Yehova. (Yobu 37:14; 38:1-4) Mazgu gha Yehova ghakamuchontha Yobu, ndipo wakajiyuyura na kuyowoya kuti: “Sono namanya kuti mungachita vinthu vyose, nakuti chilichose icho mungaghanaghana, palije icho mungatondeka kuchita. . . . Nang’anamuka mtima ndipo nkhukhala mu fuvu na mu vyoto.”—Yobu 42:2, 6.
18, 19. Kasi Yobu wakalongora wuli kuti wakamumanyanga Yehova?
18 Kasi kumanya Chiuta kukamovwira wuli Yobu? Yobu wakazimanyanga makora fundo za Chiuta. Ivyo wakachitanga vikulongora kuti wakamumanyanga nadi Yehova. Ghanaghanirani fundo iyi: Yobu wakamanyanga kuti ungaŵa utesi usange wangati wakutemwa Chiuta kweni wakutondeka kulengera lusungu ŵanyake. (Yobu 6:14) Wakajikuzganga yayi kweni wakalengeranga lusungu ŵanthu wose, ŵakavu na ŵasambazi wuwo. Iyo wakati: “Asi uyo wakapanga ine mu nthumbo ndiyo wakapangaso na iwo?” (Yobu 31:13-22) Yobu wakajikuzganga yayi chifukwa cha usambazi na kumanyikwa na kwamba kuyuyura ŵanyake. Ŵanthu ŵanandi ŵasambazi na ŵamazaza mazuŵa ghano ŵakupambana chomene na Yobu.
19 Yobu wakakanirathu kusopa vikozgo kwamtundu uliwose nanga mungaŵa mu mtima wake. Wakamanyanga kuti kusopa kwautesi, nkhukana “Chiuta waunenesko wakuchanya.” Kugomezga chomene chuma nako nkhusopa kwautesi. (Ŵerengani Yobu 31:24-28.) Wakawonanga kuti nthengwa njakupatulika. Iyo wakachita phangano na maso ghake kuti waleke kulaŵiska mwali na khumbiro liheni. (Yobu 31:1) Kumbukani kuti pa nyengo iyo, Chiuta wakaŵakaniranga yayi ŵanthu kutora mitala. Yobu wakhumbenge mphanyi wakatora mwanakazi wachiŵiri. * Iyo wakwenera kuti wakakumbukanga nthengwa yakwamba iyo Chiuta wakambiska mu Edeni ndipo wakasambirapo kanthu. (Gen. 2:18, 24) Pakati pajumpha vyaka 1,600, Yesu Khristu wakasambizga ŵanthu kuti ŵenderenge fundo za Chiuta pa nkhani ya nthengwa na kugonana.—Mat. 5:28; 19:4, 5.
20. Kasi kumumanya makora Yehova na fundo zake kungatovwira wuli pa nkhani ya kusankha ŵabwezi na vyakusanguluska?
20 Kasi tingachita wuli kuti tiŵe na chipulikano nga ni Yobu? Apa napo icho chingatovwira nkhumumanya makora Yehova na kuchita ivyo wakukhumba nyengo zose. Mwachiyelezgero, wamasalimo Davide wakati Yehova “wakutinkha waliyose uyo wakutemwa nkhaza” ndipo Davide wakachenjezga za kwendezgana na “ŵanthu ŵapusikizgi.” (Ŵerengani Salimo 11:5; 26:4.) Kasi mavesi agha ghakumusambizgani kuti Chiuta wakughanaghana wuli? Kasi ivi vikwenera kumovwirani wuli pa nkhani ya ivyo mukuŵika pakwamba, umo mukugwiliskira ntchito Intaneti, ŵabwezi ŵinu, na vyakusanguluska ivyo mukutemwa? Mazgoro ghinu ghangalongora usange mukumumanya makora Yehova panji yayi. Kuti tilutilire kuŵa ŵambura kafukwa mu charu chiheni ichi, tikwenera kusambizga ‘nkhongono zakamanyiro’ kuti tipambaniskenge pakati pa chiwemi na chiheni ndiposo pakati pa chamahara na chambura mahara.—Heb. 5:14; Efe. 5:15.
21. Ntchivichi chingatovwira kuti ‘tipulikiske chilichose’ chakukhumbikwa mwakuti tikondweske Adada ŵithu ŵakuchanya?
21 Chifukwa chakuti Nowa, Daniyeli, na Yobu ŵakamupenjanga Yehova na mtima wose, ŵakamusanga. Yehova wakaŵawovwira kuti ‘ŵapulikiske chilichose’ icho ntchakukhumbikwa kuti ŵamukondweske. Ntheura ŵakaŵa chakuwonerapo pa nkhani ya urunji ndipo ŵakaŵa na umoyo uwemi. (Sal. 1:1-3) Ntheura jifumbani kuti, ‘Kasi nkhumumanya Yehova nga ni Nowa, Daniyeli, na Yobu? Nakuti ise tingamumanya makora chomene Yehova chifukwa cha ungweru wauzimu uwo ukulutilira kuŵaliraŵalira. (Zinth. 4:18) Ipo jimani mu Mazgu gha Chiuta. Ghanaghaniranipo ivyo mukuŵerenga. Pemphani Chiuta kuti wamupani mzimu utuŵa. Para muchitenge nthena, muŵenge paubwezi na Adada ŵinu ŵakuchanya, ndipo muchitenge vinthu mwavinjeru kweniso mwaumanyi mu charu chiheni ichi.—Zinth. 2:4-7.
^ ndime 5 Enoki sekuru wa Nowa nayo “wakalutilira kwenda na Chiuta waunenesko.” Kweni “Chiuta wakamutora” vyaka 69 pambere Nowa wandababike.—Gen. 5:23, 24.
^ ndime 19 Nowa nayo wakhumbenge mphanyi wakatora mitala. Wakaŵa na mwanakazi yumoza nangauli ŵanthu ŵakamba kutora mitala pakati pajumpha nyengo yichoko waka kufuma apo Adamu na Eva ŵakagalukira Chiuta mu Edeni.—Gen. 4:19.
