1, 2. Kasi mubali munyake wakaŵa na suzgo wuli, ndipo wakachitapo vichi?

ROBERT wakabatizika apo wakaŵa munyamata, kweni wakawutemwanga zanadi yayi unenesko. Iyo wakati: “Nkhachitapo ubudi uliwose yayi, kweni nkhachitanga vinthu mwachizgoŵi waka. Nkhawonekanga wakukhora mwauzimu. Nkhalutanga ku maungano ghose, ndipo nyengo zinyake nkhachitangako upayiniya wakanyengo. Kweni pakaŵa chinyake icho chikasoŵanga.”

² Robert wakalimanya yayi suzgo lake payekha. Wakazakalimanya wati watora. Pakupumura, iyo na muwoli wake ŵakafumbananga mafumbo ghakukhwaskana na Baibolo. Muwoli wake ngwakukhora mwauzimu, ndipo wakazgoranga makora mafumbo ghose, kweni kanandi Robert vikamusuzganga kuzgora. Iyo wakati: “Nkhawonanga kuti palije icho nkhumanyapo. Mu mtima nkhati, ‘Kuti niŵe nadi mutu wa muwoli wane pa vinthu vyauzimu, nkhwenera kuchitapo kanthu.’” Robert wakachitapo nadi kanthu. Iyo wakati: “Nkhamba kuŵerenga Baibolo. Nkhaŵerenga, kuŵerenga m’paka nkhamba kulipulikiska. Nkhamba kuŵa na vinjeru, ndipo chakuzirwa chomene ntchakuti nkhakhozga ubwezi wane na Yehova.”

3. (a) Kasi ivyo vikachitikira Robert vikutisambizga vichi? (b) Kasi ni mafumbo wuli agho ghazgorekenge mu nkhani iyi?

³ Pa ivyo vikachitikira Robert tingasambirapo kanthu. Tingamanyako  vinyake ivyo Baibolo likuyowoya na kuwungana na mpingo, kweni vinthu ivi pavyekha ni vyakukwana yayi kuti munthu walongozgeke na mzimu. Nyengo zinyake tingaŵa kuti takura mwauzimu, kweni para tikujisandaso tikuwona kuti pali vinyake ivyo tingasintha. (Fil. 3:16) Mu nkhani iyi tizgorenge mafumbo ghatatu kuti ghatovwire kulutilira kukura mwauzimu: (1) Kasi tingajipima wuli usange tili ŵakukhora mwauzimu? (2) Ni vichi vinyake ivyo tingachita kuti tikhore mwauzimu? (3) Kasi kuŵa wakukhora mwauzimu kungatovwira wuli zuŵa na zuŵa?

4. Kasi mbanjani awo ŵakwenera kulondezga fundo iyo yili pa Ŵaefeso 4:23, 24?

⁴ Kuti tiŵe ŵateŵeti ŵa Chiuta tikasintha vinthu vinandi. Nangauli tili kubatizika, kweni tichali kusintha. Baibolo likutiphalira kuti: “Mulutilire kuzgoka ŵaphya mu kaghanaghaniro kinu.” (Efe. 4:23, 24) Pakuti tili ŵambura kufikapo, tose tikwenera kulutilira kusintha. Nanga mbateŵeti ŵa Yehova awo ŵateŵetera nyengo yitali, nawo ŵakwenera kuvikilira umoyo wawo wauzimu.—Fil. 3:12, 13.

5. Kasi ni mafumbo wuli agho ghangatovwira kuti tijipime?

⁵ Tikwenera kujipima kufumira pasi pa mtima kuti tilutilire kuŵa ŵakukhora mwauzimu. Kwali tili ŵalara panji ŵana, tose tingajifumba mafumbo agha: ‘Kasi nkhusintha vinyake, kulongora kuti nkhulutilira kukura mwauzimu? Kasi wunthu wane ukukozgana na wa Khristu? Kasi vyakuchita vyane na nkharo yane pa maungano vikulongora kuti umoyo wane wauzimu uli wuli? Kasi ivyo nkhuyowoya vikulongora kuti mu mtima wane muli vichi? Kasi umo nkhusambilira Mazgu gha Chiuta, umo nkhuvwalira na umo nkhujitozgera, panji umo nkhuchitira para napika ulongozgi vikulongora kuti nili munthu wuli? Kasi nkhuchita wuli para nayezgeka? Kasi nakhwima nadi mwauzimu, ndipo ndine munthu mulara mwauzimu?’ (Efe. 4:13) Tingamanya usange tili ŵakukhwima nadi mwauzimu para tingaghanaghanirapo mazgoro gha mafumbo agha.

6. Kasi tingachitaso vichi vinyake kuti timanye umoyo withu wauzimu?

⁶ Kuti tijipime mwauzimu, nyengo zinyake tingakhumbikwira ŵanji kuti ŵatovwire. Mpositole Paulosi wakati munthu uyo wakulongozgeka na makhumbiro gha thupi wangamanya yayi usange Chiuta wakuleka kukondwa nayo. Kweni munthu uyo wakulongozgeka na mzimu wakumanya umo Chiuta wakuwonera vinthu kweniso uheni wa kulongozgeka na makhumbiro gha thupi. (1 Kor. 2:14-16; 3:1-3) Kanandi ŵalara awo ŵali na maghanoghano gha Khristu ŵakumanya para munthu wamba kulongozgeka na makhumbiro gha thupi. Usange ŵatiphalira, kasi tikupulikira ulongozgi wawo na kuwulondezga? Usange tikuchita nthena, tikulongora kuti tikukhumba kukura mwauzimu.—Muph. 7:5, 9.

7. Chifukwa wuli kumanya waka vinandi vya mu Baibolo nkhwakukwana yayi kuti tiŵe munthu wakulongozgeka na mzimu?

⁷ Kumbukani kuti kumanya waka vinandi vya mu Baibolo nkhwakukwana yayi kuti munthu walongozgeke na mzimu. Themba Solomoni likazimanyanga makora nthowa za Yehova. Ivyo likayowoya vili kulembeka mu Baibolo. Kweni paumaliro likalutilira yayi kugomezgeka kwa Yehova. (1 Mathe. 4:29, 30; 11:4-6) Ntheura, kasi padera pa kumanya vinandi vya mu Baibolo, ntchivichi chinyake icho chikukhumbikwa? Tikwenera kulutilira kukura mwauzimu. (Kol. 2:6, 7) Kweni kasi tingachita wuli nthena?

8, 9. (a) Kasi tingachita vichi kuti tikhazikike mwauzimu? (b) Kasi chilato chithu chiŵe chakuti wuli para tikusambira na kughanaghanirapo? (Wonani chithuzi chakwamba.)

⁸ Paulosi wakachiska Ŵakhristu kuti ‘ŵalimbikire kuti ŵaŵe ŵakukhwima.’ (Heb. 6:1) Kasi ise  tingalondezga wuli ulongozgi wa Paulosi? Chinthu chakwamba nkhusambira buku la “Mujisungilire mu Chitemwa cha Chiuta.” Para mungamalizga kusambira buku ili muwonenge umo mungalondezgera fundo za mu Baibolo pa umoyo winu. Usange muli kumalizga kale kusambira buku ili, kasi mungasambiraso mabuku ghanyake agho ghangamovwirani kuti mukhazikike mu chipulikano? (Kol. 1:23) Kasi mukulomba na kughanaghanirapo umo mungalondezgera ivyo mukusambira?

⁹ Kumbukani kuti pakusambira na kughanaghanirapo, khumbo lithu liŵe lakuti tikondweske Yehova na kupulikira malango ghake. (Sal. 40:8; 119:97) Kweniso tikugega vinthu ivyo vingatitondeska kukura mwauzimu.—Tito 2:11, 12.

10. Kasi ŵawukirano ŵangachita vichi kuti ŵaŵe ŵakukhora mwauzimu?

¹⁰ Usange ndimwe muwukirano, kasi muli na vilato vyauzimu? Pa maungano gha dera, kanandi pambere ungano undambe mubali uyo wakuteŵetera pa Beteli wakuchezga na awo ŵabatizikenge. Ŵanandi ŵakuŵa ŵawukirano. Mubali uyu wakuŵafumba vilato vyauzimu ivyo ŵali navyo. Ivyo ŵanandi ŵakuzgora vikulongora kuti ŵali kusankha kale ivyo ŵazamuchita pakuteŵetera Yehova, nga mbuteŵeti wanyengozose panji kukateŵetera uko ŵapharazgi ŵa Ufumu mbachoko. Ndipouli, nyengo zinyake pakuŵa ŵawukirano awo ŵakuŵavya vilato vyauzimu. Kasi vingaŵa kuti ŵandasimikizge mu mtima wawo kuti ŵaŵe na vilato vyauzimu? Ŵawukirano jifumbani kuti: ‘Kasi nkhuluta ku maungano na kupharazga chifukwa chakuti ndivyo ŵapapi ŵane ŵakukhumba? Kasi nkhusendelera kwa Chiuta na kuŵa nayo paubwezi?’ Ulongozgi wakuti tiŵenge na vilato vyauzimu ukukhwaska ŵawukirano pera yayi. Taŵalara nase ukutikhwaska. Taŵateŵeti ŵa Yehova tose tikhozgenge umoyo withu wauzimu para tikuŵa na vilato vyauzimu.—Muph. 12:1, 13.

11. (a) Kasi tikwenera kuchita vichi kuti tikure mwauzimu? (b) Kasi Baibolo likuzunura njani uyo tikwenera kusambirako?

¹¹ Para tawona apo pakukhumbikwira kusintha, tikwenera kusintha mwaluŵiro kuti tikure mwauzimu. Ntchakuzirwa chomene kulongozgeka na mzimu. Nakuti ni nkhani ya umoyo na nyifwa. (Rom. 8:6-8) Kweni kuŵa wakukhwima mwauzimu chikung’anamura kuŵa wakufikapo yayi. Mzimu wa Yehova ungatovwira kuti tisinthe apo mphakwenelera. Ndipouli, nase tikwenera kulimbikira kuti tisinthe. Apo Mubali John Barr, uyo wakateŵeterapo mu Wupu Wakulongozga wakalongosoranga lemba la Luka 13:24 wakati, “Ŵanandi ŵakutondeka kukura mwauzimu chifukwa chakuti ŵakulimbikira yayi.” Tikwenera kuŵa nga ni Yakhobe uyo wakavuka yayi pakulimbana na mungelo m’paka wakapokera vitumbiko. (Gen. 32:26-28) Nangauli Baibolo likunozga pakuŵerenga, kweni tikwenera yayi kuwona Baibolo nga ni buku waka la nkhani zakunozga. Para tikuŵerenga Baibolo tikwenera kuyezgayezga kusanga usambazi wauzimu kuti utovwire.

12, 13. (a) Kasi tingalondezga wuli lemba la Ŵaroma 15:5? (b) Kasi ivyo mpositole Petrosi wakachita, kweniso ulongozgi wake vingatovwira wuli? (c) Kasi imwe mungachita wuli kuti mukure mwauzimu? (Wonani bokosi lakuti “ Ivyo Mungachita Kuti Mukure Mwauzimu.”)

¹² Apo tikuyezgayezga kulongozgeka na mzimu utuŵa, utipenge nkhongono kuti tisinthe maghanoghano ghithu. Pachoko na pachoko tingamba kughanaghana nga ni Khristu. (Rom. 15:5) Kweniso, uzamutovwira kuti tileke kughanaghanira makhumbiro gha thupi ndipo tizamusambira mikhaliro iyo yikukondweska Chiuta. (Gal. 5:16, 22, 23) Usange tawona kuti maghanoghano ghithu ghakutichiska kuti titemwenge chomene usambazi, panji kuti tilondezgenge makhumbiro gha thupi, tikwenera yayi kuthera. Lutilirani kulomba Yehova kuti wamupani mzimu wake, ndipo Iyo  wamovwiraninge kuti mwambe kughanaghana vinthu viwemi. (Luka 11:13) Kumbukani mpositole Petrosi. Kanandi wakaghanaghananga nga ni munthu uyo wakulongozgeka na mzimu yayi. (Mat. 16:22, 23; Luka 22:34, 54-62; Gal. 2:11-14) Kweni wakathera yayi. Yehova wakamovwira Petrosi ndipo pachoko na pachoko wakamba kuŵa na maghanoghano gha Khristu. Nase tingachita nthena.

¹³ Nakuti pakati pajumpha nyengo, Petrosi wakazunura vinthu ivyo tikwenera kuchita kuti tikure mwauzimu. (Ŵerengani 2 Petrosi 1:5-8.) Apo ‘tikufwilirapo chomene’ kuŵa na mikhaliro nga ni kujikora, kuzizipizga, na kutemwa ŵabali, tovwirikenge kuti tikure mwauzimu. Zuŵa lililose jifumbani kuti, ‘Kasi muhanya uno ningachita vichi kuti nilutilire kukura mwauzimu?’

14. Kasi para tikulongozgeka na mzimu tichitenge wuli vinthu?

¹⁴ Para tiŵenge na maghanoghano gha Khristu tiŵenge na nkharo yiwemi ku ntchito panji ku sukulu. Kweniso tiyowoyenge viwemi, na kusankha makora vyakuchita zuŵa lililose. Para tikusankha makora vinthu tikulongora kuti tikuyezgayezga kulondezga Khristu. Pakuti tikulongozgeka na mzimu, tizomerezgenge chilichose chara kuti chitimbanizge ubwezi withu na Adada ŵithu ŵakuchanya. Chifukwa chakuti tikughanaghana nga ni Khristu, para tayezgeka chiŵenge chipusu kuti titonde chiyezgo icho tasangana nacho. Para tikusankha vyakuchita, tijifumbenge mafumbo agha: ‘Ni fundo wuli za mu Baibolo izo zinganovwira kuti nisankhe makora pa nkhani iyi? Kasi waŵenge Khristu mphanyi wanguchita wuli? Kasi ningakondweska Yehova para ningachita wuli?’ Kuti tisambire kuchita nthena, tiyeni tiwone vinthu vyakulondezgapo ivi. Pa chilichose tiwonenge fundo ya mu Malemba iyo yingatovwira kuti tisankhe mwavinjeru.

15, 16. Yowoyani umo maghanoghano gha Khristu ghangatovwilira para tikusankha chakuchita pa nkhani ya (a) kusankha munthu wakutorana nayo. (b) kusankha ŵanthu ŵakuchezga nawo.

¹⁵ Kusankha munthu wakutorana nayo. Fundo ya mu Malemba iyo yingatovwira pa nkhani iyi yili pa 2 Ŵakorinte 6:14, 15. (Ŵerengani.) Mazgu gha Paulosi ghakulongosora makora kuti munthu uyo wakulongozgeka na mzimu wakupambana chomene na munthu uyo wakulongozgeka na makhumbiro gha thupi. Kasi fundo iyi yingawovwira wuli pakusankha munthu wakutorana nayo?

¹⁶ Ŵanthu ŵakuchezga nawo. Pa nkhani iyi, fundo yakovwira ya mu Malemba yili pa 1 Ŵakorinte 15:33. (Ŵerengani.) Munthu uyo wakutemwa Chiuta wakwendezgana yayi na ŵanthu awo ŵangananga umoyo wake wauzimu. Kasi ni mafumbo wuli agho ghangamovwirani kuti mulondezge fundo iyi? Lakwamba ndakuti, kasi fundo iyi yingatovwira wuli para tili pa malo ghakuchezgerapo gha pa Intaneti? Lachiŵiri ndakuti, kasi tingachita wuli usange ŵanthu awo tikuŵamanya makora yayi ŵatipempha kuti tiseŵere nawo maseŵera gha pa Intaneti?

17-19. Kasi kuwona vinthu mwauzimu kungamovwirani wuli (a) kuti mugege vinthu vyambura chandulo? (b) kuti mujiŵikire vilato? (c) para mwapambana maghanoghano na ŵanyinu?

¹⁷ Milimo iyo yingatitondeska kukura mwauzimu. Mazgu agho Paulosi wakayowoya  ghali na chenjezgo. (Ŵerengani Ŵahebere 6:1.) Kasi “milimo yakufwa” iyo tikwenera kugega ni vichi? Ni vilato vyose ivyo mwauzimu ni vyakufwa, vyawakawaka, panji vyambura chandulo. Fundo iyi yingatovwira pa nkhani zinandi pa umoyo withu. Mwachiyelezgero, tingajifumba kuti: Kasi icho nkhukhumba kuchita apa chili mu gulu la milimo ya thupi? Usange tingaphalirika kuti tisangenge ndalama zinandi para tachita chinthu chinyake tingajifumba kuti, kasi nichite nadi chinthu ichi? Chifukwa wuli nkhwenera yayi kuŵa mu magulu agho ghakukhumba kunozga vinthu mu charu?

¹⁸ Vilato vyauzimu. Mazgu gha Yesu gha mu Upharazgi wa pa Phiri ghakutovwira kumanya vilato ivyo tingaŵa navyo. (Mat. 6:33) Munthu uyo wakulongozgeka na mzimu, wakuŵika vinthu vya Ufumu pakwamba. Para tikukumbuka fundo iyi tizgorenge makora mafumbo nga ngakuti: Kasi nisambire masambiro ghapachanya? Kasi nizomere ntchito iyi?

¹⁹ Kupambana maghanoghano. Kasi ulongozgi uwo Paulosi wakapeleka ku Ŵakhristu ŵa ku Romu ungatovwira wuli para tapambana maghanoghano? (Ŵerengani Ŵaroma 12:18.) Pakuti tili ŵalondezgi ŵa Khristu, tikufwilirapo kuti ‘tiŵe pamtende na ŵanthu wose.’ Kasi para tapambana maghanoghano na ŵanyithu tikuchita wuli? Kasi vikutisuzga kuzomerezga waka maghanoghano gha ŵanyithu, panji tikumanyikwa kuti tili ŵanthu “awo ŵakusungilira mtende”?—Yak. 3:18.

20. Chifukwa wuli mukukhumba kukura mwauzimu?

²⁰ Vinthu vichoko waka ivyo tawona vikulongora umo tikovwilikira para tikughanaghanirapo fundo za Chiuta apo tikusankha vyakuchita. Para tikuchita nthena, tikulongora kuti tikulongozgeka na mzimu. Para tikulongozgeka na mzimu tiŵenge ŵakukondwa kweniso ŵakukhorwa. Robert, uyo tamuzunura kukwambilira kwa nkhani iyi wakati: “Nkhati naŵa paubwezi wakukhora na Yehova, nkhaŵa mfumu muwemi kweniso dada muwemi. Nkhaŵa wakukhorwa kweniso wakukondwa.” Nase tingaŵa ŵakukondwa kweniso ŵakukhorwa usange tikukura mwauzimu. Para tikulongozgeka na mzimu, tikondwenge sono kweniso munthazi tizamusanga “umoyo wanadi.”—1 Tim. 6:19.