NKHANI YAKUSAMBIRA 7
Udindo wa Ŵalara mu Mpingo
‘Khristu ni mutu wa mpingo, pakuŵa mponoski wa thupi ili.’—EFE. 5:23.
SUMU 137 Ŵanakazi Ŵakugomezgeka, Ŵadumbu Ŵachikhristu
IVYO VILI MU NKHANI IYI *
1. Kasi ntchifukwa wuli chimoza icho mbumba ya Yehova yiliri yakukolerana?
NDISE ŵakukondwa kuti nase tili mu mbumba ya Yehova. Kweni chifukwa wuli ndise ŵamtende kweniso ŵakukolerana? Chifukwa chimoza ntchakuti tose tikuyezgayezga kuchindika awo Yehova wali kuŵapa mazaza. Nakuti usange tikuchindika chomene awo Yehova wali kuŵapa mazaza, ndipo tikuŵa ŵakukolerana chomene.
2. Kasi tidumbiskanenge mafumbo wuli mu nkhani iyi?
2 Mu nkhani iyi, tidumbiskanenge za awo ŵakulongozga mu mpingo. Kweniso tizgorenge mafumbo agha: Kasi ŵadumbu ŵali na mulimo wuli? Kasi mbunenesko kuti mubali waliyose ni mutu wa mudumbu waliyose? Kasi mazaza agho ŵalara ŵali nagho pa ŵabali na ŵadumbu ghakuyana waka na mazaza agho dada wakuŵa nagho pa muwoli na ŵana ŵake? Chakwamba, tiyeni tidumbiskane umo tikwenera kuŵawonera ŵadumbu.
KASI TIKWENERA KUŴAWONA WULI ŴADUMBU?
3. Kasi ntchivichi chingatovwira kuti tizirwiskenge chomene mulimo uwo ŵadumbu ŵakuchita?
3 Ŵadumbu ŵithu awo ŵakulimbikira kupwelelera mbumba yawo, kupharazga makani ghawemi, na kovwira ŵanji mu mpingo, tikuŵawona kuti mbakuzirwa. Ndipo para tikughanaghanira umo Yehova na Yesu ŵakuŵawonera, ndipo tiŵazirwiskenge chomene. Nakuti tisambirengeko kwa mpositole Paulosi pa nkhani ya umo wakachitiranga vinthu na ŵadumbu.
4. Kasi Baibolo likulongora wuli kuti Yehova wakuzirwiska ŵanakazi nga umo wakuzirwiskira ŵanalume?
4 Baibolo likulongora kuti Yehova wakuzirwiska ŵanakazi nga umo wakuzirwiskira ŵanalume. Mwachiyelezgero, likulongora kuti mu nyengo ya ŵapositole, Yehova wakapeleka nkhongono ya mzimu utuŵa ku ŵanakazi na ŵanalume, kuti wose ŵachitenge vinthu vyakuzizwiska, nga nkhuyowoya mu viyowoyero vyakupambanapambana. (Mil. 2:1-4, 15-18) Kweniso wose ŵakusoleka na mzimu utuŵa kuti ŵakawuse na Khristu. (Gal. 3:26-29) Ŵanakazi na ŵanalume, wose ŵazamupokera umoyo wamuyirayira pa charu chapasi. (Chivu. 7:9, 10, 13-15) Kweniso wose ŵali kupika mulimo wakusambizga na kupharazga makani ghawemi. (Mat. 28:19, 20) Mwachiyelezgero, buku la Milimo likuyowoya za mudumbu munyake zina lake Prisila. Iyo na mfumu wake Akwila ŵakamulongosolera mwakupulikikwa makora unenesko Apolo, uyo wakaŵa munthu wakusambira chomene.—Mil. 18:24-26.
5. Kasi lemba la Luka 10:38, 39, 42, likulongora wuli kuti Yesu wakaŵachindikanga ŵanakazi?
5 Yesu wakachindikanga ŵanakazi. Iyo wakalondezga ivyo Ŵafarisi ŵakachitanga yayi, awo ŵakawonanga kuti ŵanakazi mbapasi, ndipo ŵakaŵayowoyeskanga yayi pagulu nanga nkhudumbiskana nawo Malemba. M’malo mwake, Yesu wakasambizganga unenesko ŵanakazi nga umo wakasambizgiranga ŵanalume. * (Ŵazgani Luka 10:38, 39, 42.) Kweniso wakazomerezga ŵanakazi kwenda nayo mu upharazgi. (Luka 8:1-3) Ndipo Yesu wakaŵapa mwaŵi wakuphalira ŵapositole kuti iyo wawuskika ku ŵakufwa.—Yoh. 20:16-18.
6. Kasi mpositole Paulosi wakalongora wuli kuti wakachindikanga ŵanakazi?
6 Mpositole Paulosi wakakumbuska Timote kuti wachindikenge ŵanakazi. Wakamuphalira kuti uwonenge “ŵanakazi ŵalara nga mbanyoko” ndipo uwonenge “ŵamwali nga mbadumbu ŵako.” (1 Tim. 5:1, 2) Nangauli Paulosi wakachita vinandi kuti wawovwire Timote kuŵa Mkhristu wakukhwima mwauzimu, kweni wakamanyanga kuti amama ŵa Timote na abuya ŵake ndiwo ŵakamba kumusambizga “malemba ghatuŵa.” (2 Tim. 1:5; 3:14, 15) Mu kalata yake yakuluta ku Romu, Paulosi wakatawuzga ŵadumbu ndipo wakaŵazunura mazina. Iyo wakamanyanga ivyo ŵadumbu aŵa ŵakachitanga, ndipo wakaŵawonga chomene chifukwa cha milimo yawo.—Rom. 16:1-4, 6, 12; Fil. 4:3.
7. Kasi tizgorenge mafumbo wuli sono?
7 Nga umo ndime za pamanyuma zayowoyera, palije mu Baibolo apo pakulongora kuti ŵadumbu mbapasi. Ŵadumbu ŵithu ŵachitemwa na ŵakupa aŵa, ŵakovwira chomene mpingo, ndipo ŵalara ŵakuŵagomezga chomene chifukwa ŵakovwira kuti mu mpingo mulutilire kuŵa mtende na kukolerana. Kweni nipera tikwenera kuzgora mafumbo ghakulondezgapo agha: Chifukwa wuli Yehova wakukhumba kuti ŵadumbu ŵavwarenge chinthu kumutu pa vyakuchita vinyake? Pakuti ŵabali pera ndiwo ŵakwimikika kuŵa ŵalara na ŵateŵeti ŵakovwira, kasi ivi vikung’anamura kuti mubali waliyose ni mutu wa mudumbu waliyose mu mpingo?
KASI MUBALI WALIYOSE NI MUTU WA MUDUMBU WALIYOSE?
8. Kuyana na Ŵaefeso 5:23, kasi mubali waliyose ni mutu kwa mudumbu waliyose? Longosorani.
8 Zgoro lakudumura ndakuti yayi! Mubali ni mutu wa ŵadumbu wose yayi mu mpingo, Khristu ndiyo. (Ŵazgani Ŵaefeso 5:23.) Mu mbumba, mwanalume ndiyo wali na mazaza pa muwoli wake. Mwana munyamata nanga wangaŵa wakubatizika ni mutu yayi kwa amama ŵake. (Efe. 6:1, 2) Ndipo mu mpingo, ŵalara mazaza ghawo ghali na mphaka pa ŵabali na ŵadumbu. (1 Tes. 5:12; Heb. 13:17) Ŵadumbu ŵambura kutengwa awo ŵakukhalaso na adada na amama ŵawo yayi ŵakwenera kulutilira kuchindika ŵapapi ŵawo na ŵalara mu mpingo. Kweni, nga umo viliri na ŵanalume wose mu mpingo, nawo ŵali na mutu umoza uyo ni Yesu.
Ŵadumbu ŵambura kutengwa awo ŵakukhala na ŵapapi ŵawo yayi, Yesu ndiyo ni mutu wawo (Wonani ndime 8)
9. Chifukwa wuli nyengo zinyake ŵadumbu ŵakwenera kuvwara chinthu ku mutu?
9 Kweni mbunenesko nadi kuti Yehova wali kusankha ŵanalume kuti ndiwo ŵalongozgenge na kusambizga mu mpingo, ndipo ŵadumbu wandaŵasankhe yayi kuchita ivi. (1 Tim. 2:12) Chifukwa wuli? Chifukwa chake chikuyana waka na icho wali kwimikira Yesu kuŵa mutu wa mwanalume, wakukhumba kuti vinthu vyendenge makora mu mpingo. Usange pa vifukwa vinyake mudumbu ndiyo wachitenge mulimo uwo ukwenera kuchitika na mubali, Yehova wakukhumba kuti mudumbu wavwarenge chinthu ku mutu. * (1 Kor. 11:4-7) Yehova wakukhumba kuti ŵadumbu ŵachitenge nthena kuti ŵalongore kuti ŵakuchindika ndondomeko ya umutu iyo wali kuŵika, ntchifukwa chakuti wakuŵawona kuti mbambura kuzirwa yayi. Uku tikughanaghanira fundo izi, sono tiyeni tizgore fumbo lakuti: Kasi mitu ya mbumba kweniso ŵalara ŵali na mazaza ghanandi wuli?
MAZAZA GHA MITU YA MBUMBA NA ŴALARA
10. Chifukwa wuli nyengo zinyake mulara wangakhumba kuŵika malango mu mpingo?
10 Ŵalara ŵakumutemwa Khristu kweniso ŵakutemwa ‘mberere’ izo Yehova na Yesu ŵali kuŵaŵikizga. (Yoh. 21:15-17) Chifukwa chakuti mulara wakupwelelera mpingo, wangaghanaghana kuti wali nga ni dada mu mpingo. Ndipo wangaghanaghana kuti, usange mutu wa mbumba wakuŵika malango kuti wavikilire mbumba yake, ipo mulara nayo wangaŵika malango agho wakuwona kuti ghangavikilira mberere za Chiuta. Ndipo ŵabali na ŵadumbu ŵanyake ŵangachiska ŵalara kuti ndimo ŵachitirenge mwakuŵapempha kuti ŵaŵasankhirenge vyakuchita. Kweni kasi ŵalara na mitu ya mbumba ŵali na udindo wakuyana waka?
Ŵalara ŵakovwira ŵanthu mu mpingo kuti ŵalutilire kuŵa paubwezi na Yehova kweniso kujipulika kuti ŵakutemweka. Yehova wali kuŵapa mulimo wakusezga ŵakwananga ŵambura kupera mu mpingo (Wonani ndime 11-12)
11. Kasi udindo uwo mitu ya mbumba yili nawo ukuyana wuli na uwo ŵalara ŵali nawo?
11 Mpositole Paulosi wakalongora kuti udindo wa mitu ya mbumba na ŵalara vikuyanako munthowa yinyake. (1 Tim. 3:4, 5) Mwachiyelezgero, Yehova wakukhumba kuti ŵanthu wose mu mbumba ŵapulikirenge mutu wa mbumba. (Kol. 3:20) Ndipo wakukhumba kuti wose mu mpingo ŵapulikirenge ŵalara. Yehova wakukhazga kuti mitu ya mbumba kweniso ŵalara, ŵawoneseskenge kuti awo ŵali pasi pawo ŵakuŵapwelelera mwauzimu. Ŵakuwoneseskaso kuti awo ŵali pasi pawo ŵakujipulika kuti ŵakutemweka. Ndipo nga umo viliri na mitu ya mbumba, ŵalara ŵakuwoneseska kuti ŵakovwira ŵanthu awo ŵali na masuzgo mu mpingo. (Yak. 2:15-17) Mwakusazgirapo, Yehova wakukhazga kuti ŵalara na mitu ya mbumba ŵawovwirenge ŵanji kupulikira malango ghake. Kweni wakuŵachenjezgaso kuti ŵaleke ‘kujumpha vinthu ivyo vili kulembeka’ mu Baibolo.—1 Kor. 4:6.
Mitu ya mbumba yili kupika udindo na Yehova wakulongozga mbumba zawo. Ndipo pambere wandasankhe chakuchita, mutu wa mbumba wachitemwa, wakudumbiskana dankha na muwoli wake (Wonani ndime 13)
12-13. Nga umo pakulongolera pa Ŵaroma 7:2, kasi mazaza agho mitu ya mbumba na ŵalara ŵali nagho ghakupambana wuli?
12 Kweni paliso mphambano pakati pa udindo uwo mulara wali nawo na uwo mutu wa mbumba wali nawo. Mwachiyelezgero, Yehova wali kuŵapa ŵalara mulimo wakweruzga na kusezga wakwananga mu mpingo uyo wakupera yayi.—1 Kor. 5:11-13.
13 Ndipouli, Yehova wali kupa mitu ya mbumba mazaza agho wandapeleke ku ŵalara. Mwachiyelezgero, wali kupa mutu wa mbumba mazaza gha kupanga malango mu mbumba yake na kuwoneseska kuti yikulondezga malango agha. (Ŵazgani Ŵaroma 7:2.) Mutu wa mbumba wangaŵika nyengo iyo ŵana ŵake ŵafikirenge pa nyumba. Waliso na wenelero wakulanga ŵana ŵake para ŵatondeka kupulikira dango ili. (Efe. 6:1) Ndipouli, mutu wa mbumba wachitemwa pambere wandaŵike malango agho mbumba yake yikwenera kwendera, wakudumbiskana dankha na muwoli wake chifukwa iwo ni “thupi limoza.” *—Mat. 19:6.
CHINDIKANI KHRISTU CHIFUKWA NI MUTU WA MPINGO
Yesu, uyo wali pasi pa mazaza gha Yehova, wakupeleka ulongozgi ku mpingo Wachikhristu (Wonani ndime 14)
14. (a) Kasi lemba la Mariko 10:45, likulongora wuli kuti chikaŵa chakwenelera kuti Yehova wimike Yesu kuŵa mutu wa mpingo? (b) Kasi Wupu Wakulongozga uli na mulimo wuli? (Wonani bokosi lakuti “ Mulimo wa Wupu Wakulongozga.”)
14 Chifukwa cha sembe yakuwombora, Yehova wali kugura umoyo wa waliyose mu mpingo kweniso waliyose uyo wali na chipulikano mwa Yesu. (Ŵazgani Mariko 10:45; Mil. 20:28; 1 Kor. 15:21, 22) Ntheura ntchakwenelera kuti Yehova wali kwimika Yesu, uyo wakapeleka umoyo wake chifukwa cha ise, kuŵa mutu wa mpingo. Lekani Yesu wali na mazaza ghakupanga fundo izo munthu waliyose, mbumba yiliyose, kweniso mpingo wose, ukwenera kwendera, ndipo wali na wenelero wakuwoneseska kuti tikulondezga fundo izi. (Gal. 6:2) Kweni Yesu wakuchita vinandi padera pakuŵika waka malango. Wakupwelelera kweniso kutemwa waliyose wa ise.—Efe. 5:29.
15-16. Kasi mwasambirako vichi ku ivyo wakayowoya Mudumbu Marley na Mubali Benjamin?
15 Ŵadumbu ŵakulongora kuti ŵakuchindika Khristu, para ŵakulondezga ulongozgi wa ŵanalume awo ŵali kwimikika na iyo kuti ŵaŵapwelelere. Ŵadumbu ŵanandi ŵakukolerana nayo Mudumbu Marley uyo wakukhala ku United States. Iyo wakuti: “Udindo wane pakuŵa muwoli kweniso mudumbu mu mpingo, ngwakuzirwa chomene kwa ine. Nakuti nkhwenera kulutilira kulimbikira kuti nichindikenge mazaza agho Yehova wali kupeleka kwa mfumu wane kweniso ku ŵalara. Kweni mfumu wane na ŵabali mu mpingo ndiwo ŵanovwira chomene kuti chiŵe chipusu kuchita nthena chifukwa ŵakunichindika na kuniwonga pa mulimo uwo nkhuchita.”
16 Ŵabali ŵakulongora kuti ŵakupulikiska ndondomeko ya umutu para ŵakuchindika na kuwonga ŵadumbu. Benjamin, mubali uyo wakukhala ku England wakuti: “Nasambirako vinandi chomene ku mazgoro gha ŵadumbu pa maungano kweniso pa masachizgo ghawo pa umo tikwenera kuchitira kuti tipharazgenge na kusambizga makora. Nkhuwona kuti ŵakuchita mulimo wakuzirwa chomene.”
17. Chifukwa wuli tikwenera kuchindika ndondomeko ya umutu?
17 Para tose mu mpingo, kwali mbanalume, ŵanakazi, mitu ya mbumba, na ŵalara tapulikiska makora ndondomeko ya umutu na kuyizirwiska, mu mpingo muŵenge mtende. Ndipo chakuzirwa chomene ntchakuti tikondweskenge Adada ŵithu ŵachitemwa ŵakuchanya, Yehova.—Sal. 150:6.
SUMU 123 Kujilambika ku Ndondomeko ya Chiuta
^ ndime 5 Kasi ŵadumbu ŵali na mulimo wuli mu mpingo? Kasi mubali waliyose ni mutu wa mudumbu waliyose? Kasi udindo wa ŵalara na mitu ya mbumba ngwakuyana waka? Mu nkhani iyi, Baibolo litovwirenge kusanga mazgoro gha mafumbo agha.
^ ndime 5 Wonani ndime 6 mu nkhani ya mutu wakuti “Wovwirani Ŵadumbu mu Mpingo Winu” iyo yili mu Gongwe la Mulinda la Seputembala 2020.
^ ndime 9 Wonani bokosi lakuti “ Kasi Mphawuli Apo Mudumbu Wakwenera Kuvwara Chinthu ku Mutu?”
^ ndime 13 Pa nkhani ya kusankha uko mbumba yikwenera kuwungana, wonani ndime 17-19 mu nkhani yakuti “Muchindikenge Waliyose mu Mpingo wa Yehova” iyo yili mu Gongwe la Mulinda la Ogasiti 2020.
^ ndime 59 Kuti mumanye vinandi pa nkhani iyi, wonani buku lakuti “Mujisungilire mu Chitemwa cha Chiuta,” peji 209-212.
^ ndime 64 Kuti mumanye vinandi vya mulimo wa Wupu Wakulongozga, wonani Gongwe la Mulinda la Julayi 15, 2013, pp. 20-25.
