NYENGO zinyake awo ŵakalembako Baibolo ŵakawerezganga mazgu ghanyake. Wonani vifukwa vitatu ivyo panji vikapangiska kuti ŵachitenge nthena:

Nyengo iyo likalembekera. Mu nyengo ya Ŵaisrayeli, ŵanthu ŵanandi ŵakaŵavya mipukutu yawo na yawo ya Dango. Kanandi ŵakapulikanga Dango likuŵazgika para mtundu wose wa Israyeli wakumana pa chihema. (Doto. 31:​10-12) Ntchakumanyikwirathu kuti pakaŵa vyakutimbanizga apo ŵakategherezganga Dango ili. Ŵakimiliranga kwa maora ghanandi pakati pa mzinda ukuru. (Neh. 8:​2, 3, 7) Panyengo zanthena izi, kuwerezga mazgu ghanyake kukaŵa kwakuzirwa, chifukwa kukawovwiranga kuti chiŵe chipusu kuti ŵanthu ŵakumbukenge malemba na kughalondezga. Kweniso kukawovwiranga kuti ŵakumbukenge malango agho Yehova wakaŵapa.—Lev. 18:​4-22; Doto. 5:1.

Sitayelo ya kalembero. Vigaŵa vinyake vya Baibolo vili kulembeka nga ni sumu. Mwachiyelezgero, buku la Masalimo, Sumu ya Solomoni, na Chitengero cha Yeremiya. Nyengo zinyake sumu zikuŵa na mazgu agho ghakuwerezgeka kanandi waka. Mazgu agha ghakudidimizga fundo yikuru ya sumu kweniso kovwira ŵategherezgi kusunga pamtima. Mwachiyelezgero, wonani mazgu agho ghakusangika pa Salimo 115:​9-11: “We Israyeli, themba Yehova—Ni movwiri wawo na chiskango chawo. We nyumba ya Aroni, themba Yehova—Ni movwiri wawo na chiskango chawo. Imwe mukopa Yehova, thembani Yehova—Ni movwiri wawo na chiskango chawo.” Kuwerezga mazgu ghanyake gha mu mavesi agha kukwenera kukawovwira ŵanthu awo ŵakimbanga kusungilira pamtima mazgu ghakuzirwa agha.

Kuti ŵadidimizge nkhani zakuzirwa. Awo ŵakalembako Baibolo nyengo zinyake ŵakawerezganga mazgu agho ngakuzirwa. Mwachiyelezgero, apo Yehova wakalanguranga kuti Ŵaisrayeli ŵangaryanga ndopa yayi, wakayowoya kwa Mozesi chifukwa chake mwakuwerezgawerezga. Chiuta wakakhumbanga kudidimizga fundo yakuti umoyo wa nyama ni ndopa zake, kung’anamura kuti ndopa zikwimira umoyo. (Lev. 17:​11, 14) Pamanyuma, apo ŵapositole na ŵalara mu Yerusalemu ŵakalemba ivyo Ŵakhristu ŵakwenera kugega kuti ŵakondweske Chiuta, ŵakadidimizgaso kuzirwa kwa kuziŵizga ndopa.—Mil. 15:​20, 29.

Nangauli Baibolo likuwerezgawerezga mazgu ghanyake, kweni ichi chikung’anamura kuti Yehova wakukhumba kuti mbwe kaŵe waka kaluso kithu kakuwerezgawerezga mazgu ghanyake gha mu Baibolo yayi. Mwachiyelezgero, Yesu wakati: “Para ukulomba, ungayowoyanga vinthu vimoza pera mwakuwerezgawerezga chara.” (Mat. 6:7) Kufuma apo wakayowoya vinthu vyakwenelera ivyo tingavizunura mu malurombo ghithu. (Mat. 6:​9-13) Ntheura apo tikugega kuyowoya vinthu vimoza na vimoza mu malurombo ghithu, tiliso ŵanangwa kulomba pa nkhani zinyake mwakuwerezgawerezga.—Mat. 7:​7-11.

Ntheura Mazgu gha Chiuta ghakuwerezgawerezga mazgu ghanyake pa vifukwa vyakupulikikwa. Ni yimoza mwa nthowa izo Msambizgi withu Mukuru wakutisambizgira kuti tisange chandulo.—Yes. 48:​17, 18.