PA CHITATU, Janyuwale 18, 2023, pa jw.org pakaŵikika chipharazgo chapadera chakuti Mubali Gage Fleegle na Jeffrey Winder, ŵimikika kuŵa mu Wupu Wakulongozga wa Ŵakaboni ŵa Yehova. Ŵabali wose ŵaŵiri aŵa ŵateŵetera Yehova mwakugomezgeka kwanyengo yitali.

Mubali Fleegle wakakulira kumanjiliro gha dazi kwa Pennsylvania, U.S.A., ndipo wakasambira unenesko kufuma ku ŵapapi ŵake. Apo wakaŵa msepuka, mbumba yakwake yikasamira ku chigaŵa chinyake cha kumizi uko kukakhumbikwanga wovwiri. Nyengo yichoko waka yati yajumphapo, wakabatizika pa Novembala 20, 1988.

Mubali Fleegle nyengo zose ŵapapi ŵake ŵakamuchiskanga kuti wambe uteŵeti wanyengozose. Kanandi ŵakachemerangako ku nyumba kwawo ŵalaŵiliri ŵadera na ŵabali ŵa pa Beteli, ndipo Mubali Fleegle wakawonanga umo ŵabali na ŵadumbu aŵa ŵakakondweranga. Wati wabatizika waka pakatora na nyengo yayi, pa Seputembala 1, 1989 wakamba kuchita upayiniya wanyengozose. Vyaka viŵiri vyati vyajumphapo wakafiska chilato chake cha kuteŵetera pa Beteli icho wakajiŵikira apo wakaŵa na vyaka 12. Wakamba kuchita uteŵeti wa pa Beteli mu Okutobala 1991, ku Brooklyn.

Pa Beteli, Mubali Fleegle wakateŵetera ku Dipatimenti Yakupanga Mabuku kwa vyaka 8, ndipo kufuma apo, wakamba kuteŵetera ku Dipatimenti ya Uteŵeti. Pa nyengo iyo, wakawungananga mu mpingo wa chiyowoyero cha ku Russia kwa vyaka vichoko waka. Mu 2006 wakatorana na Nadia, ndipo nayo wakamba kuteŵetera pa Beteli. Ŵateŵeterapo lumoza ku chigaŵa icho ŵakuyowoya Chiphwitikizi kweniso Chisipanishi kwa vyaka vyakujumpha 10. Mubali Fleegle wati wateŵetera kwa vyaka vinandi mu Dipatimenti ya Uteŵeti, wakamba kuteŵetera mu Ofesi ya Komiti Yakusambizga, ndipo pamanyuma wakamba kuteŵetera mu Ofesi ya Komiti ya Uteŵeti. Mu Malichi  2022 wakimikika kuŵa movwiri wa mu Komiti ya Uteŵeti ya Wupu Wakulongozga.

Mubali Winder wakakulira ku Murrieta, California, U.S.A. Wakasambira unenesko kufuma ku ŵapapi ŵake ndipo wakabatizika pa Malichi 29, 1986. Mu mwezi wakulondezgapo wakamba upayiniya wakanyengo. Wakawutemwa chomene ndipo wakakhumbanga kulutilira. Wati wateŵeterapo kwa myezi, wakamba upayiniya wanyengozose pa Okutobala 1, 1986.

Apo Mubali Winder wakaŵa msepuka, wakaluta kukawona ŵakuru ŵake ŵaŵiri awo ŵakateŵeteranga pa Beteli pa nyengo iyo. Ivyo wakawona uku ndivyo vikamupangiska kuŵa wakukhumbisiska kuzakateŵetera pa Beteli para nayo wakura. Mu Meyi 1990, wakachemeka kuti wakambe uteŵeti wa pa Beteli ku Wallkill.

Pa Beteli, Mubali Winder wateŵetera madipatimenti ghakupambanapambana, kusazgapo Dipatimenti Yakutozga, Dipatimenti ya Vyaulimi, na Dipatimenti Yakupwelelera Awo Ŵakuteŵetera pa Beteli. Wakatorana na Angela mu 1997, ndipo ŵateŵetera pa Beteli lumoza m’paka sono. Mu 2014 ŵakasamira ku Warwick, uko Mubali Winder wakawovwirangapo pa ntchito ya kuzenga likuru lithu. Mu 2016 ŵakasamira ku Watchtower Educational Center ku Patterson, uko Mubali Winder wakamba kuteŵetera mu Dipatimenti ya Mavidiyo. Pamanyuma pa vyaka vinayi, ŵakaweleraso ku Warwick, ndipo Mubali Winder wakamba kuteŵetera mu Ofesi ya Komiti Yakulaŵilira Ŵateŵeti ŵa pa Beteli. Mu Malichi 2022 wakimikika kuŵa movwiri wa mu Komiti Yakulaŵilira Ŵateŵeti ŵa pa Beteli ya Wupu Wakulongozga.

Tikulomba kuti mphanyi Yehova waŵatumbika ŵabali aŵa, awo ni “vyawanangwa mu ŵanthu” apo ŵakulutilira kulutiska panthazi vinthu vya Ufumu.—Efe. 4:8.