Mary na mfumu wake John, a ŵakukhala mu charu icho ŵanthu ŵanandi ŵakufuma ku Philippines ŵakwiza kuzakakhala kweniso kugwira ntchito, ndipo iwo mbakukondwa kuŵapharazgira. Mu nyengo ya muliri wa COVID-19, Mary wakambiska masambiro gha Baibolo mu charu chake kweniso na mu vigaŵa vinyake vya pa charu chapasi. Kasi wakachita wuli nthena?

Mary wakafumbanga masambiro ghake gha Baibolo kuti, “Kasi mukumanyapo munyake uyo wangatemwa kusambira Baibolo?” Para ŵazomera, wakaŵapemphanga kuti ŵamovwire kuyowoyeskana nawo. Kanandi kufumba fumbo lipusu waka ili kukuŵa na vyakufumapo viwemi. Chifukwa wuli? Chifukwa ŵanthu awo ŵakutemwa Mazgu gha Chiuta kanandi ŵakukhumba kuphalirako ŵamumbumba mwawo panji ŵabwezi ŵawo ivyo ŵakusambira. Kasi pakaŵa vyakufumapo wuli chifukwa chakuti Mary wakafumbanga fumbo ili?

Msambiri munyake wa Baibolo wa Mary zina lake Jasmin, wakamulongozgera ku ŵanthu ŵanayi awo ŵakakhumbanga kusambira Baibolo. Yumoza mwa ŵanthu aŵa, zina lake Kristine, wakavitemwa chomene ivyo wakasambiranga ndipo wakapempha Mary kuti wasambirenge nayo kaŵiri pa sabata. Apo Mary wakamufumba usange wakumanyapo waliyose uyo wangatemwa kusambira Baibolo, Kristine wakati, “Enya, namuŵapempha ŵabwezi ŵane.” Mu masabata ghachoko waka, Kristine wakamulongozgera Mary kwa ŵabwezi ŵake ŵanayi awo ŵakakhumbanga kusambira Baibolo. Kufuma apo, Kristine wakamulongozgeraso ku ŵabwezi ŵake ŵanyake, ndipo ŵabwezi aŵa nawo ŵakamulongozgeraso ku ŵanyawo.

Kristine wakakhumbangaso kuti mbumba yake ku Philippines yisambire vyakukhwaskana na Baibolo. Ntheura wakayowoya na mwana wake Andrea. Pakwamba, Andrea wakaghanaghananga kuti, ‘Ŵakaboni ŵa Yehova ntchisopa chachilendo, ŵakugomezga mwa Yesu yayi, ndipo ŵakugwiliskira ntchito Testamente Lakale pera.’ Kweni pamanyuma pa kusambira Baibolo ulendo umoza pera, wakawamo kuti vyose ivi ni vyautesi. Para sambiro lili mukati, wakatemwanga kuyowoya kuti, “Pakuti ni Baibolo layowoya, ntheura mbunenesko!”

Nyengo yikati yajumphapo, Andrea wakalongozgera Mary kwa ŵabwezi ŵake ŵaŵiri na munyake wa ku ntchito ndipo nawo ŵakamba kusambira Baibolo. Kweniso, nangauli Mary wakamanyanga yayi, kweni ankhazi ŵa Andrea awo ŵakalaŵiskanga yayi, zina lawo a Angela, nawo ŵakategherezganga para wakusambira Baibolo. Mbwenu zuŵa linyake, ankhazi ŵake ŵakamupempha Andrea kuti waŵalongozgere kwa Mary ndipo nawo ŵakapempha kuti ŵasambirenge Baibolo. Ankhazi ŵake aŵa ŵakavitemwa chomene ivyo ŵakasambiranga. Mu mwezi umoza pera, ŵakasunga pamtima malemba ghanandi ndipo ŵakakhumbanga kusambira kanayi pa sabata. Ndipo na  wovwiri wa Andrea, ŵakamba kuwungana kwizira pa vidiyokonferesi.

Mary wati wapulika kuti nyengo zose mfumu wa Kristine zina lake Joshua, wakaŵanga chapafupi para Kristine wakusambira Baibolo, wakamufumba usange wangatemwa kusambira nawo lumoza. Joshua wakazgora kuti, “Ine nitegherezgenge waka, kunifumba mafumbo cha; para muchitenge nthena, mbwenu nifumengepo waka.” Mu maminiti ghankhondi ghakwambilira apo tikasambiranga Baibolo, iyo ndiyo wakafumba mafumbo ghanandi chomene kuluska Kristine ndipo wakakhumbanga kulutilira kusambira Baibolo.

Fumbo lipusu waka ilo Mary wakafumbanga likawovwira kuti wambiske masambiro gha Baibolo ghanandi. Ndipo ghanyake mwa masambiro agha wakalekera Ŵakaboni ŵanyake kuti ŵalutilire kusambira nawo. Nakuti chifukwa cha fumbo lipusu ili, Mary wakambiska masambiro gha Baibolo 28 mu vyaru vinayi.

Jasmin, uyo tamuzunura kukwambilira kwa nkhani iyi, wakabatizika mu Epulero 2021. Kristine wakabatizika mu Meyi 2022 ndipo wakawelera ku Philippines kuti wakaŵe lumoza na mbumba yake. Ŵanthu ŵanyake ŵaŵiri awo Kristine wakaŵalongozgera kwa Mary nawoso ŵakabatizika. Ankhazi ŵa Andrea ŵakabatizika pati pajumpha myezi yichoko waka ndipo pasono mbapayiniya ŵanyengozose. Mfumu wa Kristine, Joshua, na mwana wawo msungwana Andrea, kweniso na ŵasambiri ŵanyake ŵa Baibolo nawo ŵakuluta panthazi mwauzimu.

Mu nyengo ya Ŵakhristu ŵakwambilira, makani ghawemi ghakathandazgikanga mwaluŵiro pakati pa ŵamumbumba yimoza kweniso ŵabwezi. (Yoh. 1:​41, 42a; Mil. 10:​24, 27, 48; 16:​25-33) Mwalekerachi kufumba ŵasambiri ŵinu ŵa Baibolo na ŵanyake ŵakunweka kuti, “Kasi mukumanyapo waliyose uyo wangatemwa kusambira Baibolo?” Mwamanya wuli, panji mungasanga ŵanthu ŵanandi awo ŵakukhumba kusambira Baibolo chifukwa cha fumbo lipusu ili!