KASI muli kwenjerwapo chifukwa chakuti mukasangana na suzgo kweni mukawona kuti palije waliyose uyo wangamovwirani? Tikukhala mu “nyengo zinonono na zakusuzga” izo zingatipangiska kugongoweskeka panji kujiwona kuti tili tekha. (2 Tim. 3:1) Ndipouli, tikwenera yayi kulimbana waka nagho tekha masuzgo agho tikusangana nagho pa umoyo withu. Baibolo likuyowoya uwemi wakuŵa na ŵabwezi ŵanadi ‘mu nyengo ya suzgo.’—Zinth. 17:17.

Mpositole Paulosi wakasanga chandulo chomene na ŵabwezi awo wakenderanga nawo lumoza pa maulendo ghake gha umishonale. (Kol. 4:​7-11) Paulosi wati wajalirika mu jele ku Romu, ŵabwezi ŵake ŵakamovwiranga kuchita milimo iyo wakaŵa kuti wangafiska yayi payekha. Mwachiyelezgero, Epafurodito wakamupasiranga Paulosi vinthu vyakukhumbikwa ivyo ŵabali na ŵadumbu ŵa ku Filipi ŵakatumizganga. (Fil. 4:18) Tikiko wakapelekeranga makalata gha Paulosi ku mipingo yakupambanapambana. (Kol. 4:7) Na wovwiri wa ŵabwezi ŵake, Paulosi wakafiska kuchita uteŵeti wake nangauli wakaŵa pa jele la panyumba kweniso apo wakajalirika mu jele. Kasi mungachita wuli kuti muŵe mubwezi wanadi?

Viyelezgero vya mazuŵa ghano vikulongora kuzirwa kwa kuŵa mubwezi wanadi. Ghanaghanirani vya mudumbu munyake uyo wakalongora kuti ni mubwezi wanadi kwa Elisabet, mupayiniya wanyengozose ku Spain. Apo amama ŵa Elisabet ŵakasangika na nthenda ya kansa, mudumbu uyu wakamutumira mameseji ghakukhozga ghanandi agho ghakaŵa na fundo za mu Baibolo. Elisabet wakuti: “Mameseji agha ghakanovwira kuti zuŵa lililose nileke kujipulika kuti nili nekha.”—Zinth. 18:24.

Tingakhozga ubwezi withu na Ŵakhristu ŵanyithu para tikuŵawovwira kuti ŵanjire mu uteŵeti panji kuluta ku maungano. Mwachiyelezgero, mungamunyamura mubali panji mudumbu muchekuru pa galimoto yinu na kuluta nayo ku maungano panji mu uteŵeti. Para muchitenge nthena, muzamukhozgana yumoza na munyake. (Rom. 1:12) Ndipouli, Ŵakhristu ŵanyake ŵakutondeka kufumapo pa nyumba. Kasi mungaŵa wuli mubwezi wanadi kwa iwo?

Ŵakhristu ŵanyithu ŵanyake mbalwari panji ŵali na masuzgo ghanyake agho ghakuŵatondeska kuwungana maso na maso. Ghanaghanirani chiyelezgero cha David uyo ŵakamusanga na nthenda ya kansa ya mu ndopa. Kwa myezi yakujumpha 6, wakapokeranga wovwiri wa chipatala. Pa nyengo yose iyi, David na muwoli wake Lidia, ŵakachitanga maungano kwizira pa vidiyokonferesi.

Kasi ŵabwezi ŵawo mu mpingo ŵakaŵawovwira wuli? Pamanyuma pa maungano ghalighose, ŵanyake  mwa ŵabali na ŵadumbu awo ŵakaŵanga ku Nyumba ya Ufumu ŵakayezgeskanga kuyowoyeskana na David na Lidia kwizira pa vidiyokonferesi. Padera pa ivi, usange David na Lidia ŵazgorapo pa maungano, ŵakapokeranga mameseji ghakukhozga kufuma ku ŵabali na ŵadumbu. Kasi pakaŵa uwemi wuli? David na Lidia ŵakajipulikanga kuti ŵali ŵekha yayi.

Nyengo zinyake tingasankha kupharazgira lumoza na awo ŵakufumapo yayi pa nyumba. Tingasintha vinthu vinyake pa ndondomeko yithu, mwakuti tipharazgire nawo lumoza. Ivi vingalongora kuti tikuŵakumbuka awo ŵali na suzgo lanthena. (Zinth. 3:27) Panji mungachitira nawo lumoza upharazgi wa makalata panji wa pa foni. Awo ŵakufumapo yayi pa nyumba ŵangajoyina ku ungano wakunozgekera uteŵeti kwizira pa vidiyokonferesi. David na Lidia ŵakawonga chomene ndondomeko iyi. David wakuti, “Tikakhozgekanga chomene chifukwa cha kuŵapo waka apo kagulu kithu ka uteŵeti kakanozgekeranga uteŵeti kweniso na lurombo ulo lukapelekekanga.” Kweniso para mphakwenelera, nyengo na nyengo mungalutiranga lumoza na msambiri winu wa Baibolo ku nyumba ya mudumbu panji mubali uyo wakufumapo yayi pa nyumba na kukasambilira kwenekuko Baibolo.

Usange tikuchitira lumoza vinthu na ŵabali na ŵadumbu ŵithu awo ŵakufumapo yayi pa nyumba, na kuwona mikhaliro yawo yakukondweska, tiŵenge nawo paubwezi wakukhora chomene. Mwachiyelezgero, para mukupharazgira nawo lumoza na kuwona umo ŵakugwiliskira ntchito mwaluso Mazgu gha Chiuta kuti ŵamufike munthu pamtima, mukwamba kuŵatemwa chomene. Para mukovwira Ŵakhristu ŵanyinu kuchitako vinthu vyauzimu, muŵengeso na ŵabwezi ŵanandi.—2 Kor. 6:13.

Paulosi wakakhozgeka chomene chifukwa chakuti mubwezi wake Tito wakiza kuzakamuwona. (2 Kor. 7:​5-7) Chiyelezgero cha Tito chikutikumbuska kuti padera pa kuŵalongora waka lusungu awo ŵali mu suzgo, tingaŵakhozgaso mwa kuluta kukaŵa nawo lumoza na kuchita vyose ivyo tingafiska kuti tiŵawovwire.—1 Yoh. 3:18.

Ŵabali na ŵadumbu ŵithu ku Russia ŵalongora chiyelezgero chiwemi chomene pa nkhani ya kovwirana yumoza na munyake. Ghanaghanirani ivyo vikachitikira Sergey na muwoli wake Tatyana. Pamanyuma pakuti ŵapolisi ŵasecha nyumba yawo, ŵakatolekera ku polisi kuti ŵakafumbike mafumbo. Tatyana ndiyo wakamba kufumiskika na kuwelera kunyumba. Sergey wakuti: “Apo [Tatyana] wakafikanga waka pa nyumba, kukiza mudumbu munyake uyo wakaŵa wachikanga. Pamanyuma ŵabwezi ŵithu ŵanandi ŵakiza kuzakawovwirapo kuŵikaso makora vinthu mu nyumba yithu.”

Sergey wakutiso: “Nkhutemwa chomene lemba la Zintharika 17:​17, ilo likuti: ‘Mubwezi wanadi wakutemwa nyengo zose, ndipo ni mubali uyo wali kubabikira kovwira mu suzgo.’ Mazgu agha nawona kuti ghakufiskika chomene pa nyengo iyi ya nthambuzgo, apo nkhukhumbikwira chomene wovwiri wa ŵabwezi ŵane kuti nizizipizge. Yehova wanipa ŵabwezi awo mbachikanga chomene ndipo nyengo zose mbakunozgeka kunovwira.” a

Apo masuzgo ghakulutilira mu charu chiheni ichi, tikukhumbikwira ŵabwezi awo ŵangatovwira. Nakuti tizamuŵakhumba chomene pa suzgo yikuru. Ntheura tiyeni tiŵikepo mtima kuŵa mubwezi wanadi sono!—1 Pet. 4:​7, 8.