ŴANTHU ŵanandi mazuŵa ghano ŵakukhumba kuti ŵanthu ŵaŵachitirenge vinthu munthowa yapadera chomene kuluska ŵanyawo. Nanga vingaŵa kuti ŵakuŵachitira kale vinthu munthowa yapadera, kweni ŵakukhazga kuti vijumphe apo. Kaghanaghaniro kanthena kakwiza chifukwa cha mzimu wakujighanaghanira wekha kweniso wakuleka kuwonga, ivyo ni vimanyikwiro vya mazuŵa ghaumaliro.—2 Tim. 3:2.

Unenesko ngwakuti mzimu wakujighanaghanira wekha ukamba nikale chomene. Adamu na Eva ŵakawona kuti ŵasankhenge ŵekha icho ntchiwemi na chiheni, ndipo ivi vikiziska masuzgo ghakuru chomene. Vyaka vinandi vyati vyajumphapo, Themba Uziya likaghanaghana kuti ndakwenelera kuwotcha vyakununkhira pa tempile, kweni chikaŵa chambura kwenelera kwa ilo kuchita nthena. (2 Mid. 26:​18, 19) Mwakuyana waka, Ŵafarisi na Ŵasaduki ŵakagomezganga kuti Chiuta wakuŵatemwa mwapadera chifukwa chakuti waka ŵakafuma mwa Abrahamu.—Mat. 3:9.

Tili kuzingilizgika na ŵanthu awo ŵakujighanaghanira ŵekha kweniso ŵakujikuzga, ndipo nase tingakhwaskika na nkharo iyi. (Gal. 5:26) Ntheura nyengo zinyake tingamba kughanaghana kuti ndise ŵakwenelera kupika mauteŵeti ghapadera panji ŵanthu ŵakwenera kutichitira vinthu munthowa yapadera. Kasi tingagega wuli kaghanaghaniro kanthena? Chakwamba, tikwenera kumanya umo Yehova wakuwonera nkhani iyi. Fundo ziŵiri za mu Baibolo zitovwirenge kuchita nthena.

Yehova ndiyo wakusankha ivyo tikwenera kupika. Wonani viyelezgero vinyake ivi.

•   Mu mbumba, Yehova wakukhumba kuti muwoli wachindikenge mfumu wake, ndipo mfumu watemwenge muwoli wake. (Efe. 5:33) Yehova wakuti ŵakutorana ŵakwenera kulongorana chitemwa icho ŵakwenera yayi kulongoraso kwa munthu munyake. (1 Kor. 7:3) Ŵapapi ŵakukhazga kuti ŵana ŵawo ŵaŵapulikirenge, ndipo ŵana nawo ŵakwenera kutemweka na kupwelelereka na ŵapapi ŵawo.—2 Kor. 12:14; Efe. 6:2.

• Mu mpingo, Yehova wakuti tikwenera kuŵachindika ŵabali ŵalara awo ŵakulimbikira. (1 Tes. 5:12) Ndipouli, ŵalara ŵakwenera yayi kuchita ufumu pa ŵabali na ŵadumbu ŵawo.—1 Pet. 5:​2, 3.

• Chiuta wali kupeleka mazaza ku maboma gha ŵanthu kuti ghatolerenge misonkho kweniso kupokera ntchindi kufuma ku ŵanthu awo ghakuŵawusa.—Rom. 13:​1, 6, 7.

Mwachitemwa Yehova wakutipa vinandi kuluska ivyo tikwenelera. Chifukwa chakuti ndise ŵakwananga, tikwenelera waka nyifwa. (Rom. 6:23) Kweni Yehova wakutipa vyawanangwa vinandi chifukwa cha chitemwa chake chakugomezgeka. (Sal. 103:​10, 11) Chawanangwa chilichose panji mwaŵi wa uteŵeti uliwose uwo tikupokera kufuma kwa iyo, ntchifukwa cha lusungu lwake lukuru.—Rom. 12:​6-8; Efe. 2:8.

Muŵe maso kuti muleke kutolera kaghanaghaniro ka charu. Kwambura kumanya, tingamba kughanaghana kuti ndise ŵakwenelera kupika vinandi kuluska ŵanyithu. Yesu wakalongora umo kaghanaghaniro kanthena kangambira mwambura kusuzga, apo wakalongosora chiyelezgero cha ŵantchito awo ŵakalipirika dinari. Ŵantchito ŵanyake ŵakamba mulenjilenji kugwira ntchito, ndipo muhanya ukamalirapo chifukwa ŵakagwira zuŵa lose, apo ŵanyake ŵakagwira waka kwa ora limoza. Gulu lakwamba la ŵantchito ili likaghanaghananga kuti ndakwenelera kupika malipiro ghanandi chifukwa cha ntchito iyo likagwira. (Mat. 20:​1-16) Sambiro ilo tikutorapo pa ntharika iyi ndakuti, Yesu wakalongora kuti ŵalondezgi ŵake ŵakwenera kukhorwa na ivyo Chiuta wakuŵapa.

Muwongenge, ndipo lekani kuchichizga ŵanji kuti ŵamuchitirani vinyake. (1 Tes. 5:18) Mukwenera kuyezga mpositole Paulosi, uyo wakapempha wovwiri wakuthupi yayi kufuma ku ŵabali ŵa ku Korinte nangauli wakaŵa na wanangwa wakuchita nthena. (1 Kor. 9:​11-14) Tikwenera kuwonga thumbiko lililose  ilo tikupokera na kukana mzimu wakukhumba vinandi.

Muŵe ŵakujiyuyura. Para munthu wakujighanaghanira chomene yekha, wakwamba kujipulika kuti ngwakwenelera vinandi kuluska ivyo wali navyo. Ntheura para tili ŵakujiyuyura, vitovwirenge kuleka kughanaghana munthowa yakofya iyi.

Ntchimi Daniyeli ntchiyelezgero chiwemi pa nkhani ya kujiyuyura. Wakafumanga mu mbumba yakumanyikwa, wakaŵa wakuwoneka makora, wamahara, kweniso wakaŵa na maluso ghanandi. Ivi vikate vimupangiskenge kujipulika kuti wakaŵa wakwenelera nadi kuchitirika vinthu mwapadera kweniso kupokera mauteŵeti agho wakapika. (Dan. 1:​3, 4, 19, 20) Ndipouli, Daniyeli wakalutira kuŵa wakujiyuyura, ndipo mukhaliro uwu ukamupangiska kuŵa wakuzirwa mu maso gha Yehova.—Dan. 2:30; 10:​11, 12.

Ntheura tiyeni tikane kuŵa na mzimu wakujighanaghanira tekha na wakujikuzga, uwo ngwakuzara chomene mu charu ichi mazuŵa ghano. M’malo mwake, tikwenera kulutilira kuŵa ŵakukondwa na thumbiko lililose ilo Yehova wakutipa chifukwa cha lusungu lwake lukuru.