Adada na Amama ŵakaŵa Ŵakatolika ŵakujipeleka chomene. Kweni ŵakati ŵasambira kufuma mu Baibolo kuti zina la Chiuta ni Yehova, wose ŵakazgoka Ŵakaboni ŵa Yehova ŵamwamphu chomene. Adada ŵakaleka kuŵaja vikozgo vya Yesu. M’malo mwake, ŵakagwiliskira ntchito luso lwawo lwa ukalipentara pakunozga chipinda chithu chapasi, kuti chiŵe Nyumba ya Ufumu yakwamba ku San Juan del Monte, kachigaŵa ako kali ku Manila, msumba ukuru wa Philippines.

Nati nababika mu 1952, ŵapapi ŵane ŵakamba kunisambizga vyakukhwaskana na Yehova nga umo ŵakachitiranga na ŵakuru ŵane ŵanayi kweniso ŵadumbu ŵane ŵatatu. Apo nkhakuranga, adada ŵakanichiska kuti niŵazgenge chaputara chimoza cha mu Baibolo zuŵa lililose, ndipo ŵakasambiranga nane mabuku ghithu ghakupambanapambana. Kweniso nyengo zinyake ŵapapi ŵane ŵakachemanga ŵalaŵiliri ŵakwendakwenda na ŵabali ŵanyake awo ŵakateŵeteranga pa Beteli kuti ŵazakakhale ku nyumba kwithu. Nga mbumba, tikakondwanga chomene kweniso kukhozgeka na vinthu vyakukhozga ivyo ŵabali aŵa ŵakatiphaliranga, ndipo ivi vikatichiska tose kuti tiŵikenge pakwamba uteŵeti pa umoyo withu.

Nkhasambirako vinandi ku chiyelezgero chiwemi cha ŵapapi ŵane awo ŵakaŵa ŵakugomezgeka chomene kwa Yehova. Pamanyuma pakuti Amama ŵafwa chifukwa cha ulwari unyake, ine na Adada tikamba kuchitira lumoza upayiniya mu 1971. Kweni mu 1973 apo nkhaŵa na vyaka 20, adada ŵakatayika. Nkhaŵa na chitima chomene kweniso nkhaŵa na phukwa chifukwa cha kutaya ŵapapi wose ŵaŵiri. Kweni chigomezgo ‘chanadi na chakukhora’ icho chili mu Baibolo chikanovwira kuti niŵe wakukhora, nileke kusuzgika chomene maghanoghano, kweniso kuti nilutilire kuŵa paubwezi wakukhora na Yehova. (Heb. 6:19) Pati pajumpha nyengo yichoko waka kufuma apo adada ŵakafwira, nkhatumika kuti nkhambe upayiniya wapadera ku Chilwa cha Coron, mu chigaŵa cha Palawan.

Nkhaŵa na vyaka 21 apo nkhafikanga ku Coron. Pakuti nkhakulira mu tawuni, nkhazizwa chomene kuwona  kuti ku chilwa ichi kukaŵavya magesi ghakulongosoka, mipopi yinandi ya maji, panji magalimoto na njinga zamoto zinandi. Nangauli kukaŵa ŵabali ŵachoko waka, kweni nkhaŵavya mupayiniya munyane ndipo nyengo zinyake nkhanjiranga nekha mu upharazgi. Mu mwezi wakwamba, nkhaŵasoŵa chomene ŵamumbumba yakwithu kweniso ŵabwezi ŵane. Nausiku nkhalaŵiskanga nyenyezi kuchanya, ndipo masozi ghakakhiranga waka yekha. Nkhaghanaghananga vya kuleka waka uteŵeti na kuwelera kunyumba.

Ntheura panyengo yakusuzga iyi, nkhamukhutuliranga Yehova mu lurombo vyose ivyo vikaŵa mu mtima wane. Nkhakumbukiranga na kughanaghanirapo fundo zakukhozga izo nkhaŵazga mu Baibolo kweniso mu mabuku ghithu. Kanandi nkhakumbukanga lemba la Salimo 19:14. Nkhamanya kuti Yehova wangaŵa “Jalawe lane na Muwomboli wane” usange nkhughanaghanirapo pa vinthu ivyo vikumukondweska, nga ni milimo yake na mikhaliro yake. Nkhani ya mu Gongwe la Mulinda ya mutu wakuti “Uli Wekha Yayi” (You Are Never Alone) a yikanovwira chomene. Nkhayiŵazganga mwakuwerezgawerezga. Para nili nekha, nkhajiwonanga kuti nili na Yehova, ndipo ivi vikanipanga mwaŵi wakuti nilombe, nisambire panekha, kweniso kughanaghanirapo pa ivyo naŵazga.

Pati pajumpha nyengo yichoko waka kufuma apo nkhafikira ku Coron, nkhimikika kuŵa mulara. Pakuti nkhaŵa nekha mulara, sabata yiliyose ndine nkhachitiskanga Sukulu ya Uteŵeti wa Ufumu, Ungano wa Uteŵeti, Sambiro la Buku la Mpingo, na Sambiro la Gongwe la Mulinda. Nkhadumbangaso nkhani yachisanisani sabata yiliyose. Chifukwa chakuti nkhaŵanga wakutangwanika chomene, nkhachitangaso phukwa yayi.

Uteŵeti ukendanga makora ku Coron, ndipo nyengo yikati yajumphapo ŵasambiri ŵane ŵanyake ŵa Baibolo ŵakabatizika. Kweni pakaŵaso masuzgo. Nyengo zinyake nkhendanga maora ghanandi kuti nkhafike ku chigaŵa icho nkhuluta, ndipo nkhamanyanga yayi kuti namugona nkhu para nakafika. Chigaŵa cha mpingo withu chikaŵaso na tuvilwa tunandi tuchokotuchoko. Kanandi nkhendanga pa boti la injini ndipo tikajumphanga mu nyanja zakuŵinduka kuti nkhafike uko nkhuluta, nangauli nkhamanyanga yayi kuskamba (kushuwa). Mu nyengo zose zakusuzga izi, Yehova wakanivikiliranga kweniso kunovwira. Paumaliro nkhamanya kuti Yehova wakaninozgekereskanga kuti nkhazizipizge masuzgo ghakuru pa uteŵeti uwo nkhapikaso pamanyuma.

Mu 1978, nkhatumika ku Papua New Guinea, kumpoto kwa Australia. Charu cha Papua New Guinea ntchamapiri ndipo chikuyanako waka ukuru na charu cha Spain. Nkhazizwa chomene kupulika kuti ŵanthu pafupifupi 3 miliyoni awo ŵakaŵa mu charu ichi, ŵakayowoyanga viyowoyero vyakujumpha 800. Kweni chakukondweska ntchakuti ŵanthu ŵanandi ŵakayowoyanga Chipidgin Melanesia, icho chikumanyikwa kuti Chitok Pisin.

Kwakanyengo nkhatumika kukawungana na mpingo wa Chingelezi mu msumba ukuru wa Port Moresby. Kweni pamanyuma nkhasamira mu mpingo wa Chitok Pisin ndipo nkhamba kusambira kuti nichimanye makora chiyowoyero ichi. Ivyo nkhasambiranga nkhavigwiliskiranga ntchito mu upharazgi. Ivi vikanovwira kuti nisambire luŵiro chiyowoyero ichi. Pakatora na nyengo yayi, mbwenu nkhamba kufiska kudumba nkhani yachisanisani mu Chitok Pisin. Nkhazizwa chomene kuti pambere na chaka chindamare kufuma apo nkhafikira ku Papua New Guinea, nkhimikika kuŵa mulaŵiliri wadera wa mipingo ya Chitok Pisin, iyo yikaŵa mu vigaŵa vyakupambanapambana vikuruvikuru.

Chifukwa chakuti mipingo yikaŵa patali na patali, nkhanozganga maungano gha dera ghanandi chomene  kweniso nkhendanga maulendo ghanandi. Pakwamba, nkhachitanga phukwa chomene chifukwa nkhaŵa mu charu chachilendo, icho ŵanthu ŵakayowoyanga chiyowoyero chachilendo, kweniso ŵakaŵa na mitheto yakupambana na kwithu. Para nkhwendera mipingo, chikaŵa chakusuzga kuti niyende pa galimoto, njinga zamoto, panji wapasi chifukwa cha mapiri kweniso kujimikajimika kwa charu. Ntheura pafupifupi sabata yiliyose nkhendanga pa ndege. Nyengo zinyake nkhaŵanga waka nekha munthu wakuti nikwere ndege, iyo yikaŵanga yichoko kweniso yambura kulongosoka. Pa maulendo agha nkhaŵanga na wofi chomene nga umo vikaŵirangaso para nakwera boti.

Mbanthu ŵachoko waka awo ŵakaŵa na mafoni, ntheura mipingo nkhayowoyeskananga nayo kwizira mu makalata. Nakuti kanandi nkhambanga ndine kufika pambere kalata yindaŵafike ŵabali, ndipo nkhachitanga kufumba ŵanthu ŵa kwenekuko kuti nisange uko kuli ŵabali. Kweni ulendo uliwose para naŵasanga ŵabali, ŵakanipokeleranga makora chomene ndipo ivi vikanovwiranga kuti nikumbuke chifukwa icho nkhajipelekeranga kuchita nthena. Yehova wakanovwiranga munthowa zakupambanapambana, ndipo ubwezi wane na iyo ukakhora chomene.

Nati naluta ku maungano kakwamba pa Chilwa cha Bougainville, mbumba yinyake yikiza kwa ine uku yikumwemwetera na kunifumba kuti: “Kasi mwatikumbuka nthena?” Nkhakumbuka kuti mbumba iyi nkhayipharazgirapo nati nafika waka kakwamba ku Port Moresby. Nkhamba kusambira nayo Baibolo, ndipo pamanyuma nkhalekera mubali munyake wa kwenekuku kuti walutilire kusambira nayo. Kweni apa wose ŵakaŵa kuti mbakubatizika! Ichi ntchimoza mwa vitumbiko vinandi ivyo Yehova wakanipa mu vyaka vitatu ivyo nkhateŵeteranga ku Papua New Guinea.

Pambere nindafumeko ku Coron mu 1978, nkhamanyana na mudumbu munyake wakutowa chomene zina lake Adel. Mudumbu uyu wakaŵa wakujipata chomene. Wakachitanga upayiniya wanyengozose uku wakulera yekha ŵana ŵake ŵaŵiri, Samuel na Shirley. Kweni panyengo yimozamoza wakapwelelerangaso amama ŵake awo ŵakaŵa ŵachekuru. Mu Meyi 1981, nkhawelera ku Philippines kuti nkhatorane na Adel. Tati tatorana, tikachitiranga lumoza upayiniya wanyengozose kweniso kupwelelera lumoza mbumba yithu.

Nangauli nkhaŵa na mbumba, kweni mu 1983, nkhatumikaso kukachita upayiniya wapadera ku Chilwa cha Linapacan, mu chigaŵa cha Palawan. Mbumba yithu yose yikasamira ku chilwa ichi ndipo kukaŵavya Kaboni waliyose. Amama ŵa Adel ŵakatayika pati pajumpha chaka chimoza. Ndipouli, tikalutilira kutangwanika na uteŵeti, ivyo vikatovwira kuzizipizga chitima icho tikaŵa nacho. Tikambiska masambiro gha Baibolo ghanandi ghakuluta panthazi ku Linapacan, mwakuti pakatora na nyengo yayi, mbwenu Nyumba ya Ufumu yichoko waka yikakhumbikwanga. Ntheura tikazenga waka tekha. Pamanyuma pa vyaka vitatu pera kufuma apo tikafikira ku chilwa ichi, tikakondwa chomene kuwona kuti ŵanthu 110 ŵakiza pa Chikumbusko, ndipo ŵanandi mwa iwo ŵakaluta panthazi na kubatizika tati tafumako.

Mu 1986, nkhatumika ku chilwa cha Culion, icho chikaŵa na ŵanthu awo ŵakalwaranga vyoni. Kufuma apo, Adel nayo wakazomerezgeka kuŵa mupayiniya wapadera. Pakwamba tikachitanga wofi kupharazgira ŵanthu awo ŵakaŵa na nthenda ya vyoni. Kweni ŵapharazgi ŵa mu chigaŵa ichi ŵakatisimikizgira kuti ŵanthu awo ŵakaŵa na nthenda iyi, ŵakapokera wovwiri wakwenelera wa chipatala ndipo pakaŵa pakusuzga kuti nthenda iyi yitiyambukire. Nakuti ŵanyake mwa ŵanthu aŵa ŵakachitanga maungano ku nyumba  ya mudumbu munyake. Nyengo yati yajumphapo tikazgoŵera, ndipo tikawona kuti ni mwaŵi wapadera kuŵaphalirako chigomezgo cha mu Baibolo, ŵanthu awo ŵakajiwonanga kuti ŵakugegeka na Chiuta kweniso ŵanthu ŵanyawo. Chikaŵa chakukondweska chomene kuwona ŵanthu awo ŵakaŵa ŵalwari chomene ŵakwamba kuŵa ŵakukondwa, pakumanya kuti zuŵa linyake ŵazamuŵa makora waka na mathupi ghawemiso.—Luka 5:​12, 13.

Kasi ŵana ŵithu ŵakazgoŵera wuli umoyo wa ku Culion? Ine na muwoli wane Adel, tikachema ŵadumbu ŵawukirano ŵaŵiri kufuma ku Coron kuti ŵazakakhale nase, mwakuti ŵana ŵithu ŵaŵe na ŵanyawo ŵawemi ŵakuchezga nawo. Samuel, Shirley, na ŵadumbu ŵaŵiri ŵawukirano aŵa, ŵakakondwanga chomene na uteŵeti wawo ndipo ukendanga makora. Iwo ŵakasambiranga na ŵana ŵanandi, apo ine na Adel tikasambiranga na ŵapapi ŵa ŵana aŵa. Nakuti ulendo unyake tikasambiranga Baibolo na mbumba zakukwana 11. Mu nyengo yichoko waka, tikaŵa kuti tikuchitiska masambiro gha Baibolo ghanandi agho ghakalutanga panthazi. Ivi vikapangiska kuti tipange mpingo uphya!

Pakwamba, nkhaŵa nekha mulara mu chigaŵa ichi. Ntheura ofesi ya munthavi yikanipempha kuti nichitiskenge maungano sabata yiliyose gha ŵapharazgi 8 awo ŵakaŵa ku Culion. Kufuma apo nkhachitiskengeso maungano gha ŵapharazgi 9 awo ŵakaŵa mu muzi wa Marily, uwo ukaŵa pa mtunda wa maora ghatatu para wenda pa boti. Para tamalizga maungano, tose nga mbumba tikendanga mu chigaŵa cha mapiri kwa maora ghanandi, kuti tikachitiske masambiro gha Baibolo mu muzi unyake wakuchemeka Halsey.

Nyengo yati yajumphapo, ŵanthu ŵanandi ŵa mu mizi ya Marily na Halsey ŵakasambira unenesko ndipo tikazenga Nyumba za Ufumu mu mizi yose yiŵiri. Apo ku Linapacan, ŵabali kweniso ŵanthu ŵakunweka ŵakajipeleka na kovwirapo na vinthu vyawo kuti ŵazenge Nyumba ya Ufumu, nakuti katundu munandi wakuzengera ŵakapeleka ndiwo. Nyumba ya Ufumu ya ku Marily yikaŵa yakuti yingakwana ŵanthu 200 ndipo yikazengeka munthowa yakuti yingasanuzgika, ivyo vikawovwiranga kuti tichitirengemoso maungano gha dera.

Mu 1993, ŵana ŵithu ŵati ŵaŵa ŵalara, ine na Adel tikambiraso uteŵeti wakwendera dera ku Philippines. Pamanyuma, mu 2000, nkhanjira Sukulu Yakusambizga Uteŵeti kuti nisambizgike umo ningasambizgira sukulu iyi. Nkhajiwonanga wambura kwenelera kuchita uteŵeti uwu, kweni muwoli wane Adel wakanikhozganga  nyengo zose. Iyo wakanikumbuska kuti Yehova wanipenge nkhongono kuti nifiske kuchita uteŵeti uphya uwu. (Fil. 4:13) Adel wakayowoyanga ivi chifukwa cha ivyo vikamuchitikirapo, nayo wakafiskanga kuchita uteŵeti wake uku wakulimbana na masuzgo ghanyake gha mu thupi.

Mu 2006, apo nkhaŵa nichali msambizgi wa sukulu iyi, muwoli wane Adel wakasangika na nthenda ya mu wongo iyo yikuchemeka Parkinson. Tikazizwa chomene! Apo nkhasachizga kuti tiyime dankha uteŵeti kuti nimupwelelere, Adel wakati, “Chonde nipenjerani waka dokotala uyo wanganovwira pa ulwari wane, ndipo nili na chigomezgo chose kuti Yehova watovwirenge kuti tilutizge uteŵeti withu.” Kwa vyaka vyakulondezgapo 6, Adel wakalutilira kuchita uteŵeti wake kwambura kudandawura. Apo wakaŵa kuti waleka kwenda, wakapharazganga uku wali pa kanjinga ka ŵakupendera. Ndipo apo wakaŵa kuti wamba kuyowoya mwakusuzgikira chomene, wakazgoranga mu lizgu limoza panji ghaŵiri pa maungano. Kanandi Adel wakapokeranga mameseji ghakumuwonga chifukwa cha chiyelezgero chake chiwemi cha kuzizipizga m’paka apo wakafwira mu 2013. Nkhakhala na muwoli wane wakutemweka kweniso wakugomezgeka kwa vyaka vyakujumpha 30, ntheura wati wagona tulo mu nyifwa, nkhambiraso kuŵa na chitima kweniso kuchita phukwa.

Adel wakakhumbanga kuti nilutilire kuchita uteŵeti wane, ntheura ndivyo nkhachita nadi. Nkhatangwanikanga chomene, ndipo ivi vikanovwira kuti nileke kuchita phukwa. Kufuma mu 2014 m’paka 2017, nkhatumika kukendera mipingo ya Chitagalog mu vyaru ivyo ntchito yithu yikaŵa yakukanizgika. Kufuma apo, nkhaluta kukendera mipingo ya Chitagalog ku Taiwan, United States, na Canada. Mu 2019, nkhasambizganga makilasi gha Chingelezi gha Sukulu ya Ŵapharazgi ŵa Ufumu ku India na Thailand. Mauteŵeti ghose agha ghanovwira kuŵa wakukondwa. Nakuti nkhukondwa chomene para nkhutangwanika kuteŵetera Yehova.

Pa uteŵeti uliwose uwo ningapika, nkhwamba kutemwana chomene na ŵabali na ŵadumbu awo naŵasanga, ntheura chikuŵa chakusuzga kulekana nawo. Panyengo zanthena izi, nasambira kumugomezga chomene Yehova. Kanandi waka najiwonera nekha umo wanovwilira pa umoyo wane, ndipo ivi vyanovwira kuzomerezga na mtima wose para vinthu vyasintha. Pasono ndine mupayiniya wapadera ku Philippines. Nawuzgoŵera mpingo wane uphya, ndipo ŵabali na ŵadumbu ŵakunitemwa chomene ndipo ŵakunovwira. Nkhunothaso kuwona Samuel na Shirley ŵakuyezga chipulikano icho amama ŵawo ŵakaŵa nacho.—3 Yoh. 4.

Enya, nasanganapo na masuzgo ghanandi pa umoyo wane, kusazgapo kuwona muwoli wane wakulwara na kufwa na nthenda yakofya chomene. Kweniso pa umoyo wane vinthu vyasinthapo kanandi waka. Kweni najiwonera nekha kuti Yehova “wali kutali yayi na waliyose wa ise.” (Mil. 17:27) Woko la Yehova “ndifupi chara” kuti lileke kovwira na kukhozga ŵateŵeti ŵake, nanga kungaŵa ku vigaŵa vyakutali chomene. (Yes. 59:1) Yehova uyo ni Jalawe lane, waŵa nane umoyo wane wose, ndipo nkhumuwonga chomene. Nadi, nkhaŵa nekha yayi.