NKHANI YAKUSAMBIRA 8
SUMU 130 Gowokerani Ŵanyinu
Umo Tingamuyezgera Yehova pa Nkhani ya Kugowoka
“Nga umo Yehova wakamugowokelerani na mtima wose, ndimo namweso muchitirenge.”—KOL. 3:13.
FUNDO YIKURU
Mu nkhani iyi tidumbiskanenge ivyo tingachita kuti timugowokere uyo watikhuŵazga.
1-2. (a) Kasi mphawuli apo chingaŵa chakusuzga chomene kugowokera munthu? (b) Kasi Denise wakalongora wuli mtima wakugowokera?
KASI vikumusuzgani kugowokera ŵanji? Taŵanandi vikutisuzga, chomenechomene para munyake watiyowoyera panji kuchita chinthu chinyake icho chatikhuŵazga chomene. Ndipouli, tingatonda suzgo ili na kuŵa ŵanthu ŵakugowoka. Mwachiyelezgero, ghanaghanirani ivyo vikachitikira mudumbu munyake zina lake Denise, a uyo wakagowoka munthowa yapadera chomene. Mu 2017, Denise na ŵamumbumba yake ŵanyake, ŵakaluta kukawona Ofesi yithu yikuru yiphya iyo yikaŵa kuti yajulika waka. Apo ŵakaweleranga kukwawo, dilayivala munyake galimoto yake yikataya mabuleki ndipo wakaganda galimoto yawo. Pa ngozi iyi, Denise wakazemphuka panji kuti kufenta. Wati wasisipuka, wakaphalirika kuti ŵana ŵake ŵapwetekeka uheni chomene, ndipo mfumu wake Brian wafwirathu. Para wakukumbuka za nyengo iyo, Denise wakuti, “Mtima wane ukasweka, ndipo nkhaŵa na chitima chomene.” Pamanyuma, wakapulika kuti dilayivala uyo wakaŵaganda wandapwetekeke pa ngozi iyi, ntheura wakalomba mtende kwa Yehova.
2 Dilayivala uyo wakaŵaganda ŵakamwimba mulandu wakukoma munthu. Ndipo khoti likayowoya kuti usange ŵamusangenge wakubuda, wajalirikenge. Ndipouli, khoti likamuphalira Denise kuti vikuthemba pa ivyo wayowoyenge kuti munthu uyu wajalirike. Denise wakuti: “Vikaŵa nga ŵanithira mchere pa chilonda, chifukwa nkhaŵa kuti niyowoyenge vinthu ivyo vikaŵa vyakuŵinya chomene pa umoyo wane.” Pati pajumpha masabata ghachoko waka, Denise wakimilira panthazi pa khoti kuti wapelekere ukaboni wakukhwaskana na mwanalume uyo wakiziska suzgo likuru ku mbumba yake. Kasi wakayowoya vichi? Denise wakapempha mweruzgi kuti wamulongore lusungu mwanalume uyu. b Wati wamara kuyowoya, mweruzgi wakathiska masozi. Wakati: “Mu vyaka vyose 25 ivyo naŵira mweruzgi, vyanthena ivi nindaviwonepo. Nindapulikepo kuti munthu uyo wabudilika wapemphe kuti nimuchitire lusungu munthu uyo wamubudira. Nindawonepo munthu wakulongora chitemwa nthena kweniso kugowoka.”
3. Kasi ntchivichi chikamutuma Denise kuti wagowoke?
3 Kasi ntchivichi chikamovwira Denise kugowoka? Wakaghanaghanirapo pa umo Yehova wakugowokelera. (Mika 7:18) Usange tikumuwonga chomene Yehova chifukwa chakuti wakutigowokera, nase tiŵenge ŵakukhumbisiska kuti tigowokerenge ŵanji.
4. Kasi Yehova wakukhumba kuti tichitenge vichi? (Ŵaefeso 4:32)
4 Yehova wakukhumba kuti tigowokerenge ŵanji na mtima withu wose nga umo iyo wakutigowokelera na mtima wose. (Ŵazgani Ŵaefeso 4:32.) Iyo wakukhumba kuti tiŵenge ŵakunozgeka kugowokera awo ŵatikhuŵazga. (Sal. 86:5; Luka 17:4) Mu nkhani iyi, tiwonenge vinthu vitatu ivyo vitovwirenge kuti tigowokenge chomene.
KUSULAKO WAKA YAYI UMO MUKUJIPULIKIRA
5. Kuyana na Zintharika 12:18, kasi tingajipulika wuli para munthu watikhuŵazga?
5 Nyengo zinyake vingatiŵinya chomene chifukwa cha ivyo munyake wayowoya panji kuchita, chomenechomene para munthu uyo ni mubwezi withu panji wamumbumba yithu. (Sal. 55:12-14) Nyengo zinyake umo vingatiŵinyira, vingaŵa nga munthu watigwaza na chimayi. (Ŵazgani Zintharika 12:18.) Ndipo panji tingayezga kuti tisuleko waka umo tikujipulikira. Kweni kuchita nthena vingayana waka kuti ŵatigwaza na chimayi, mbwenu ise tikuchileka penepapo. Mwakuyana waka, tileke kukhazga kuti tijipulikenge makora usange tasulako waka umo tikujipulikira.
6. Kasi nyengo zinyake tingachita wuli para munthu watikhuŵazga?
6 Para munyake watikhuŵazga, pakwamba nyengo zinyake tingakwiya. Nakuti Baibolo likuzomerezga kuti vingachitika kuti nyengo zinyake tikwiye. Ndipouli, likutichenjezga kuti tileke kukhalilira waka ŵakukwiya. (Sal. 4:4; Efe. 4:26) Chifukwa wuli? Chifukwa kanandi tikuchita chinthu chinyake chifukwa cha umo tikujipulikira. Nakuti kanandi ukali ukwiziska vyakufumapo viwemi yayi. (Yak. 1:20) Kumbukani kuti munthu wangakwiya chifukwa cha ivyo vyachitika, kweni wakuchita kusankha kukhalilira wakukwiya.
Munthu wangakwiya chifukwa cha ivyo vyachitika, kweni wakuchita kusankha kukhalilira wakukwiya
7. Kasi tingajipulikaso wuli para munthu munyake watikhuŵazga?
7 Para ŵanyithu ŵandatichitire makora vinthu, vingatiŵinya mu mtima. Mwachiyelezgero, mudumbu munyake zina lake Ann wakuti: “Apo nkhaŵa mwana, adada ŵakaleka amama na kutorana na wantchito uyo wakanileranga. Nkhawona kuti ŵanijowola. Ŵati ŵaŵa na ŵana, sono ndipo nkhawona nga najowolekerathu. Apo nkhakuranga, nkhajipulikanga wambura kukhumbikwa.” Mudumbu munyake zina lake Georgette wakulongosora umo wakajipulikira mfumu wake wati wamwenda pasi, wakuti: “Tikaŵa paubwezi wakukhora kufuma waka pa wanichi. Tikachitiranga lumoza upayiniya. Ntheura mtima wane ukasweka.” Ndipo mudumbu munyake zina lake Naomi wakuti: “Nkhaghanaghanangako yayi vyakuti mfumu wane wanganikhuŵazga. Ntheura apo wakajivumburanga kuti wakawoneleranga vyamuziro mwakubisirizga, nkhawona kuti nimupusikizgi kweniso wanendera mphiska.”
8. (a) Kasi ni vifukwa wuli vinyake ivyo tikwenera kugowokelera ŵanji? (b) Kasi pakuŵa uwemi wuli para tikugowokera ŵanyithu? (Wonani bokosi lakuti “ Kasi Tingachita Wuli Para Munyake Watikhuŵazga Chomene?”)
8 Tingapangiska yayi ŵanji kuleka kutiyowoyera panji kutichitira vinyake, kweni ise tingajikora na ivyo ŵangatichitira. Nakuti kanandi nthowa yiwemi ya umo tingachitira, nkhugowoka. Chifukwa wuli? Chifukwa tikutemwa Yehova, ndipo iyo wakukhumba kuti tigowokenge. Para tikukhalilira ŵakukwiya na kuleka kugowoka, tingachita vinthu mwambura mahara ndipo nyengo zinyake tingajipwetekaso tekha. (Zinth. 14:17, 29, 30) Wonani chiyelezgero cha mudumbu munyake zina lake Christine. Iyo wakuti: “Para nakhuŵara, nkhuseka na munthu yayi. Nkhutondeka kusankha makora chakurya chakwenelera. Nkhutondeka kugona, kweniso chikuŵa chakusuzga kujikora, ndipo ivi vikutimbanizga nthengwa yane ndiposo ubwezi wane na ŵanji.”
9. Chifukwa wuli tikwenera yayi kusunga vyakusingo?
9 Nanga vingaŵa kuti uyo watikhuŵazga wakuchitapo kanthu yayi kuti watiphepiske, ise tingachitapo kanthu kuti tijipulikeko makora. Tingachita vichi? Georgette, uyo tamuzunura kukwambilira wakuti: “Nangauli pakatora nyengo, kweni nkhaleka kumusungira chakusingo kweniso kumukwiyira mfumu wane wakale. Ivi vikapangiska kuti niŵe na mtende ukuru wa mumtima.” Para taleka kusunga vyakusingo, vikutovwira kuti tileke kuŵa ŵakali. Kweniso vinthu vikutiŵiraso makora chifukwa tikuleka kughanaghanira ivyo vikatichitikira ndipo tikuŵaso ŵakukondwa nga umo tikaŵira pakwamba. (Zinth. 11:17) Kweni wuli usange pamanyuma pakumanya umo mukujipulikira, mukuwona kuti muchali mundanozgeke kugowoka?
CHITANIPO KANTHU PA UMO MUKUJIPULIKIRA
10. Chifukwa wuli tikwenera kujipa nyengo kuti ukali utune? (Wonaniso vithuzi.)
10 Kasi mungachita wuli kuti mujipulikeko makora para munthu munyake wamukhuŵazgani? Chimoza icho mungachita nkhujipa nyengo. Pamanyuma pa kupokera wovwiri wa chipatala, munthu uyo wapwetekeka chomene wakukhumbikwira nyengo kuti wachire. Mwakuyana waka, nase nyengo zinyake pangatora nyengo pambere tindanozgeke kugowokera munthu kufumira pasi pa mtima.—Muph. 3:3; 1 Pet. 1:22.
Nga umo vikuŵira kuti munthu uyo wapwetekeka chomene wakukhumbikwira nyengo kuti wachire, nase tingakhumbikwira nyengo kuti tambe kujipulika makora na kumugowokera munthu uyo wakatikhuŵazga (Wonani ndime 10)
11. Kasi lurombo lungamovwirani wuli kuti mugowokerenge ŵanji?
11 Lombani Yehova kuti wamovwirani kuŵa na mtima wakugowoka. c Ann, uyo wazunulika kukwambilira, wakulongosora umo lurombo lukamovwilira. Iyo wakuti: “Nkhalomba Yehova kuti wagowokere waliyose mu mbumba yithu pa vinthu ivyo tikatondeka kuchita makora. Pamanyuma nkhalembera kalata adada na awoli ŵawo ŵasono, na kuŵaphalira kuti naŵagowokera.” Ann wakuzomerezga kuti chikaŵa chipusu yayi kuchita nthena. Kweni wakuti: “Nkhugomezga kuti chifukwa cha kuyezga Yehova pa nkhani ya kugowoka, adada na awoli ŵawo ŵachiskikenge kusambira vinandi vyakukhwaskana na Yehova.”
12. Chifukwa wuli tikwenera kugomezga Yehova m’malo mwa maghanoghano ghithu? (Zintharika 3:5, 6)
12 Thembani Yehova, maghanoghano ghinu yayi. (Ŵazgani Zintharika 3:5, 6.) Nyengo zose Yehova wakumanya icho ntchiwemi kwa ise. (Yes. 55:8, 9) Ndipo iyo wazamutitumapo yayi kuti tichite chinthu icho chingatipweteka. Ntheura para wakutichiska kuti tigowokenge, tingaŵa na chigomezgo chose kuti tisangenge chandulo usange tachita nthena. (Sal. 40:4; Yes. 48:17, 18) Kweni para tikuthemba maghanoghano ghithu, chingaŵa chakusuzga kuti tigowokere ŵanji. (Zinth. 14:12; Yer. 17:9) Naomi, uyo wazunulika kukwambilira wakuti: “Pakwamba, nkhajigowokeranga pakuleka kumugowokera mfumu wane chifukwa cha kuwonelera vyamuziro. Nkhawopanga kuti wangazakanikhuŵazgaso panji kuluwa umo vikaniŵinyira ivyo wakachita. Ndipo mu mtima nkhatenge Yehova wakupulikiska umo nkhujipulikira. Kweni nkhamba kuwamo kuti chifukwa chakuti waka Yehova wakupulikiska umo nkhujipulikira, vikung’anamura kuti wakukolerana navyo yayi. Nangauli wakumanya nadi umo nkhujipulikira ndiposo kuti pakutora nyengo kuti ukali utune, kweni wakukhumbaso kuti nigowokenge.” d
IVYO MUNGACHITA KUTI MWAMBESO KUJIPULIKA MAKORA
13. Kuyana na Ŵaroma 12:18-21, kasi tikwenera kuchita vichi?
13 Para tagowokera munthu uyo wakatikhuŵazga chomene, tikwenera kuchita vinandi padera pa kuleka waka kuyowoyaso ivyo vikachitika. Usange munthu uyo watikhuŵazga ni Mkhristu munyithu, chilato chithu nkhuwezgerapo mtende. (Mat. 5:23, 24) M’malo mwa kulutilira kumukwiyira na kumusungira vyakusingo, tikwenera kumulongora lusungu na kumugowokera. (Ŵazgani Ŵaroma 12:18-21; 1 Pet. 3:9) Kasi ntchivichi chingatovwira kuchita nthena?
14. Kasi tikwenera kuyezgayezga kuchita vichi, ndipo chifukwa wuli?
14 Tikwenera kuyezgayezga kuwona munthu uyo wakatikhuŵazga nga umo Yehova wakumuwonera. Yehova wakusankha kuwonamo viwemi mu ŵanthu. (2 Mid. 16:9; Sal. 130:3) Kanandi ivyo tikulaŵiska mu ŵanthu ndivyo tivisangenge, kwali ni viwemi panji viheni. Para tikulaŵiska viwemi mu ŵanthu, chiŵenge chipusu kuŵagowokera. Mwachiyelezgero, mubali munyake zina lake Jarrod wakuti, “Chikuniŵira chipusu kugowokera mubali para nayaniska ivyo wakanibudira na mikhaliro yake yiwemi yinandi iyo wali nayo.”
15. Chifukwa wuli ntchakovwira chomene kumuphalira munthu kuti tamugowokera?
15 Chinthu chinyake chakuzirwa icho tikwenera kuchita ndicho kumuphalira munthu uyo wakatibudira kuti tamugowokera. Chifukwa wuli? Wonani ivyo Naomi, uyo tamuzunura kukwambilira wakuyowoya, wakuti: “Mfumu wane wakanifumba kuti, ‘Kasi wanigowokera?’ Apo nkhatenge nizgore kuti, ‘Namugowokerani,’ nkhatondeka kuyowoya. Apa nkhamanya kuti nindagowoke kufumira pasi pa mtima. Nyengo yati yajumphapo, nkhafiska kuyowoya kuti, ‘Namugowokerani.’ Nkhagomezga yayi na ivyo nkhawona! Mfumu wane nati namugowokera wakathiska na masozi wuwo ndipo nane nkhajipulika makora chomene. Kufuma waka pa nyengo iyi, nili kwambiraso kumugomezga chomene mfumu wane ndipo sono tikutemwanaso chomene.”
16. Kasi mwasambira vichi pa nkhani ya kugowoka?
16 Yehova wakukhumba kuti tigowokenge. (Kol. 3:13) Nangauli vili nthena, kweni nyengo zinyake vingatisuzga kugowokera ŵanji. Kweni tingafiska kuchita nthena usange tikuleka kusulako waka umo tikujipulikira kweniso para tikuchitapo kanthu kuti ukali utune. Para tichitenge nthena, tijipulikengeso makora.—Wonani bokosi lakuti “ Vinthu Vitatu Ivyo Vingatovwira Kuti Tigowokenge.”
ŴIKANI MTIMA PA VYANDULO IVYO TIKUSANGA CHIFUKWA CHA KUGOWOKA
17. Kasi para tikugowoka tikusanga vyandulo wuli?
17 Tili na vifukwa vinandi vyakuŵira ŵakugowoka. Wonani vinyake mwa vifukwa ivi. Chakwamba, tikuyezga na kukondweska Dada withu walusungu, Yehova. (Luka 6:36) Chachiŵiri, tikulongora kuti tikumuwonga Yehova chifukwa chakuti nase wakutigowokera. (Mat. 6:12) Ndipo chachitatu, tikuŵa na umoyo uwemi kweniso tikulutilira kuŵa paubwezi wakukhora na Yehova kweniso ŵanyithu.
18-19. Kasi ntchivichi chingachitika usange tili na mtima wakugowokera?
18 Para tagowokera ŵanyithu, pangaŵa viwemi ivyo vingachitika, ivyo panji takhazganga yayi. Mwachiyelezgero, wonani ivyo vikachitikira Denise, uyo wazunulika kukwambilira. Nangauli Denise wakamanya yayi pa nyengo iyo, kweni munthu uyo wakachitiska ngozi wakaghanaghananga vya kujikoma pamanyuma pa mulandu wake. Ndipouli, wakakhwaskika chomene Denise wati wamugowokera, mwakuti wakamba kusambira Baibolo na Ŵakaboni ŵa Yehova.
19 Nyengo zinyake tingawona kuti kugowokera ŵanyithu ntchimoza mwa vinthu vyakusuzga chomene ivyo tikwenera kuchita. Kweni kugowoka kuli na vyandulo vinandi chomene. (Mat. 5:7) Ntheura, mphanyi tose tachita vyose ivyo tingafiska kuti timuyezge Yehova pa nkhani ya kugowoka.
SUMU 125 “Mbakukondwa Awo Mbalusungu”
a Mazina ghanyake ghasinthika.
b Para vili nthena, Mkhristu waliyose wakwenera kusankha yekha vyakuchita.
c Wonani pa jw.org mavidiyo gha sumu gha mutu wakuti “Tizikhululukirana,” “Gowokani na Mtima Wose,” na “Tiŵeso Paubwezi.”
d Nangauli kuwonelera vyamuziro nkhwananga kweniso vikumuŵinya chomene munyake wa munthengwa, kweni ntchifukwa cha mu Malemba yayi chakumazgira nthengwa.
