1, 2. Kasi Yehova wakulongora wuli kuti ngwakupa?

YEHOVA ni Chiuta wakupa. Ndiyo wakutipa chilichose. Yehova ni Mwenecho wa golide na siliva, kweniso chilichose icho chili pa charu chapasi. Wakugwiliskira ntchito vinthu ivi kuti viwovwire kuti pa charu paŵe umoyo. (Sal. 104:13-15; Hag. 2:8) Mu Baibolo muli nkhani zinandi izo zikulongora umo Yehova wakagwiliskira ntchito vinthu vyake mwamunthondwe kuti wawovwire ŵanthu ŵake.

² Apo Ŵaisrayeli ŵakaŵa mu mapopa, Yehova wakaŵapa mana na maji vyaka 40. (Eks. 16:35) Lekani Ŵaisrayeli “ŵakasoŵerwa kanthu chara.” (Neh. 9:20, 21) Kwizira mwa ntchimi Elisha, Yehova wakachita munthondwe wa kuzgora tumafuta tuchoko twa chokoro chakugomezgeka kuŵa ghanandi. Chawanangwa ichi chikawovwira chokoro ichi kuti chilipire ngongoli kweniso kuti chiŵe na ndalama zakukwana kuti zichovwire na kovwira ŵana ŵake. (2 Mathe. 4:1-7) Yehova wakawovwira Yesu kuti wachite munthondwe wa kupanga chakurya kweniso kusanga ndalama.—Mat. 15:35-38; 17:27.

3. Kasi tidumbiskanenge mafumbo wuli mu nkhani iyi?

³ Yehova wangagwiliskira ntchito chilichose kuti wawovwire  vilengiwa vyake kuti vilutilire kuŵapo. Kweni wakupempha ŵateŵeti ŵake kuti ŵapelekenge ivyo ŵali navyo kuti viwovwire pa ntchito iyo yikuchitika mu gulu lake. (Eks. 36:3-7; ŵerengani Zintharika 3:9.) Chifukwa wuli Yehova wakukhazga kuti timupengeko ivyo tili navyo? Kasi ŵanthu ŵakugomezgeka ŵa mu nyengo yakale ŵakawovwira wuli pa ntchito iyo ŵimiliri ŵa Yehova ŵakachitanga? Kasi gulu la Yehova likuchita wuli na ndalama izo ŵanthu ŵakupeleka mazuŵa ghano? Mu nkhani iyi tizgorenge mafumbo agha.

4. Kasi tikulongorachi para tikovwirapo pa ntchito ya Yehova?

⁴ Tikupeleka kwa Yehova chifukwa chakuti tikumutemwa kweniso tikumuwonga. Tikusoŵa na chakuyowoya wuwo para tikughanaghanira ivyo Yehova watichitira. Apo Themba Davide likayowoyanga ivyo vikakhumbikwanga kuti tempile lizengeke, likati chilichose icho tikupokera chikufuma kwa Yehova, ndipo chilichose icho tikupeleka kwa Yehova chikufuma kwa iyo.—Ŵerengani 1 Midauko 29:11-14.

5. Kasi Malemba ghakulongora wuli kuti kupeleka na mtima wose ntchigaŵa cha kusopa kwaunenesko?

⁵ Tikupeleka chifukwa ni nthowa yimoza yakusopera Yehova. Mu mboniwoni, mpositole Yohane wakapulika ŵateŵeti ŵa Yehova kuchanya ŵakuyowoya kuti: “Ndimwe ŵakwenelera Yehova Chiuta withu, kupokera uchindami, ntchindi na nkhongono, chifukwa mukalenga vinthu vyose, ndipo chifukwa cha khumbo linu vikaŵako ndipo vikalengeka.” (Chivu. 4:11) Yehova ngwakwenelera nadi kupokera uchindami na ntchindi, lekani tikumupa vinthu viwemi ivyo tili navyo. Kwizira mwa Mozesi, Yehova wakaphalira Ŵaisrayeli kuti ŵalutenge kukawonekera pamaso pa Yehova pa nyengo ya viphikiro, katatu pa chaka. Pakuti nyengo ya viphikiro yikaŵa yakusopera Chiuta, Ŵaisrayeli ŵakeneranga yayi ‘kukawonekera pamaso pa Yehova mawoko ghawaka.’ (Doto. 16:16) Mazuŵa ghano napo, nthowa yimoza yakusopera Yehova nkhupeleka na mtima wose na kovwirapo pa ntchito iyo yikuchitika pa chigaŵa cha pa charu chapasi cha gulu la Yehova.

6. Chifukwa wuli ntchiwemi kupeleka? (Wonani chithuzi chakwamba.)

⁶ Ntchiwemi chomene kupeleka. Tikuŵa na umoyo uwemi para tili na mtima wa kupa m’malo mwa kupokera waka. (Ŵerengani Zintharika 29:21.) Ghanaghanirani za mwana uyo wakugura chawanangwa na kupeleka ku ŵapapi ŵake kufuma pa tundalama uto ŵapapi ŵake ŵamupa. Ŵapapi ŵakuwonga chomene. Kweniso tiyelezgere kuti mwana uyo ni mupayiniya wakukhala panyumba. Iyo wangawovwira ŵapapi ŵake vinthu vinyake ivyo vikukhumbikwa panyumba. Nangauli ŵapapi ndivyo ŵakukhazga yayi, kweni ŵangawonga wovwiri wa mwana wawo chifukwa ni nthowa iyo mwana wakulongolera kuti wakuwonga ivyo ŵapapi ŵake ŵakumuchitira. Ndimo viliri na Yehova. Wakumanya kuti vinthu vikutiyendera makora para tili na mtima wa kupeleka.

7, 8. Kasi ŵateŵeti ŵa Yehova ŵakachitanga wuli pa nkhani ya kupeleka vyawanangwa (a) kuti viwovwire pa ntchito zapadera? (b) kuti viwovwire pa milimo yakupambanapambana?

⁷ Malemba ghakulongora kuti ŵanthu ŵakamba ni kale kupeleka. Nyengo zinyake ŵanthu ŵa Yehova ŵakapelekanga vinthu vyawo kuti viwovwire pa ntchito zapadera. Mwachiyelezgero, Mozesi wakaphalira ŵanthu kuti ŵapeleke vyawanangwa vyakupangira chihema. Themba Davide nalo likapempha ŵanthu kuti ŵize na vyawanangwa vyakuzengera tempile. (Eks. 35:5; 1 Mid. 29:5-9) Apo Yehowashi wakaŵa Fumu, ŵasembe ŵakatora ndalama izo ŵanthu ŵakapeleka na kunozgera nyumba ya Yehova. (2 Mathe. 12:4, 5) Mu nyengo ya Ŵakhristu ŵakwambilira, ŵabali ŵakati ŵapulika kuti  ŵanyawo ŵasangana na suzgo la njara, “ŵakadumura kuti ŵatumizgenge wovwiri ku ŵabali awo ŵakakhalanga mu Yudeya. Waliyose wakapeleka kuyana na umo wakafiskira.”—Mil. 11:27-30.

⁸ Nyengo zinyake ŵateŵeti ŵa Yehova ŵakapelekanga wovwiri wa ndalama ku awo ŵakadangiliranga pa ntchito iyo yikachitikanga. Mwachiyelezgero, kuyana na Dango la Mozesi, Ŵalevi ŵakapokeranga chiharo chilichose yayi, apo mafuko ghanyake ghakapokeranga chiharo. Ntheura Ŵaisrayeli ŵakapelekanga chakhumi, panji kuti chigaŵa cha 10. Ivi vikawovwiranga Ŵalevi kuti ŵaŵikenge mtima wawo wose pa mulimo wawo wa pa chihema. (Maŵa. 18:21) Yesu na ŵapositole ŵake nawo ŵakawovwirika chomene na ŵanakazi ŵa mtima wa kupeleka awo “ŵakaŵateŵeteranga na vyuma vyawo.”—Luka 8:1-3.

9. Kasi vyawanangwa ivyo ŵakapelekanga mu nyengo yakale ŵakavitoranga nkhu?

⁹ Vyawanangwa ŵakavisanganga munthowa zakupambanapambana. Vyawanangwa ivyo Ŵaisrayeli ŵakapeleka kuti ŵapangire chihema mu mapopa, ŵakwenera kuti ŵakafuma navyo ku Eguputo. (Eks. 3:21, 22; 35:22-24) Mu nyengo ya Ŵakhristu ŵakwambilira, Ŵakhristu ŵanyake ŵakaguliskanga minda panji nyumba zawo na kupeleka ndalama ku ŵapositole. Ndipo ŵapositole ŵakagaŵiranga ŵakusoŵerwa ndalama izi. (Mil. 4:34, 35) Ŵakhristu ŵanyake ŵakaŵikanga padera ndalama ndipo nyengo zose ŵakapelekanga kuti zovwire pa ntchito zakupambanapambana. (1 Kor. 16:2) Ntheura kwali ni musambazi panji mukavu, waliyose wakeneranga kupeleka icho wangafiska.—Luka 21:1-4.

10, 11. (a) Kasi tingaŵayezga wuli ŵateŵeti ŵa Yehova ŵa mu nyengo yakale pa nkhani ya kupeleka? (b) Kasi mukujipulika wuli para mukovwirapo pa ntchito ya Ufumu?

¹⁰ Mazuŵa ghano napo ŵangatipempha kuti tipeleke vyawanangwa kuti viwovwire pa ntchito yinyake yapadera. Mwachiyelezgero, kasi mpingo winu ukukhumba kuzenga Nyumba ya Ufumu? Panji kasi Nyumba yinu ya Ufumu yikukhumba kunozgeka? Nyengo zinyake ŵangatiphalira kuti pakukhumbikwa ndalama zakuti ŵanozgere Ofesi yithu ya munthavi, zakovwira pa ungano wa chigaŵa, panji zakovwira ŵabali para kwachitika masoka ghachilengiwa. Vyawanangwa ivyo tikupeleka vikovwiraso ŵabali na ŵadumbu awo ŵakuteŵetera ku likuru lithu kweniso mu maofesi gha munthavi pa charu chose. Vyawanangwa ivi vikovwiraso ŵamishonale, ŵapayiniya ŵapadera, na ŵalaŵiliri ŵa dera. Tikugomezga kuti mpingo winu ukupeleka ndalama zakovwira pa ntchito yakuzenga Malo Ghakuchitirapo Maungano Ghakuru na Nyumba za Ufumu. Vinthu ivi vikovwira ŵabali ŵithu pa charu chose chapasi.

¹¹ Tose tingapeleka chilichose icho tingakwaniska kuti tovwirepo pa ntchito iyo gulu la Yehova likuchita mu mazuŵa ghaumaliro agha. Vyawanangwa vinandi ivyo tikupeleka tikulembapo zina yayi. Tikuŵika vyawanangwa vithu mu mabokosi ku Nyumba ya Ufumu, panji tikupeleka kwizira pa jw.org. Nyengo zinyake tingawona nga ivyo tikupeleka ni vichoko chomene ndipo vingawovwira yayi. Kweni unenesko ngwakuti vyakupeleka vinandi ivyo gulu likupokera vikuŵa vichokovichoko. Ŵabali ŵithu, nanga ni awo mbakavu chomene, ŵakuchita nga mbabali ŵa ku Makedoniya awo ŵakaŵa “ŵakavu chomene.” Nangauli ŵakaŵa ŵakavu, kweni ŵakapempha kuti ŵaŵazomerezge kovwirapo ndipo ŵakapeleka na mtima wose.—2 Kor. 8:1-4.

12. Kasi gulu likuchita wuli kuti ligwiliskirenge ntchito makora vyawanangwa?

¹² Wupu Wakulongozga ukulomba kwa Chiuta kuti uchite vinthu mwakugomezgeka kweniso mwamahara na ndalama izo ŵanthu ŵakupeleka. (Mat. 24:45) Para ŵabali ŵapokera  ndalama izi, ŵakupanga bajeti na kuzigwiliskira ntchito mwakwenelera. (Luka 14:28) Mu nyengo yakale, ŵabali ŵakugomezgeka awo ŵakapweleleranga vyawanangwa ivyo ŵanthu ŵapeleka, ŵakawoneseskanga kuti vyagwira nadi ntchito yake. Mwachiyelezgero, Ezira wakayegha vyawanangwa ivyo themba la Peresiya likapeleka kuluta navyo ku Yerusalemu. Vyawanangwa ivi vikaŵa golide, siliva, na katundu munyake uyo mazuŵa ghano wangakwana ndalama zakujumpha madola 100 miliyoni. Ezira wakawonanga vyawanangwa ivi kuti vyapelekeka kwa Yehova. Ndipo wakanozga ndondomeko kuti wavipwelelere makora vyawanangwa ivi apo wakajumphanga navyo mu malo ghakofya. (Ezir. 8:24-34) Mpositole Paulosi nayo ŵakamupa vyawanangwa kuti wakawovwire navyo ŵabali ŵakusoŵerwa mu Yudeya. Wakawoneseska kuti awo ŵakayegha vyawanangwa ivi ŵachite “chilichose mwakugomezgeka, pamaso pa Yehova pera yayi, kweniso pamaso pa ŵanthu.” (Ŵerengani 2 Ŵakorinte 8:18-21.) Nga ni Ezira na Paulosi, gulu lithu nalo likupwelelera chomene ndalama izo ŵabali ŵakupeleka ndipo likuzigwiliskira ntchito mwakwenelera.

13. Kasi tikwenera kuviwona wuli ivyo gulu lasintha?

¹³ Nyengo zinyake mbumba yikusintha vinthu vinyake kuti yigwiliskirenge ntchito makora ndalama, panji kuti yigurenge ivyo ni vyakukhumbikwa nadi. Kweniso yingachepeskako vinthu vinyake kuti yiŵe na nyengo yinandi yakuteŵetera Yehova. Ndimo gulu la Yehova nalo likuchitira. Sonosono apa, gulu lasintha vinthu vinandi. Nyengo yinyake gulu likagwiliskiranga ntchito ndalama zinandi kuluska izo likapokeranga. Lekani gulu likusanga nthowa zakuchepeskerako ntchito na vyakugulagura mwakuti vyawanangwa vinu vileke kunangika.

14-16. (a) Kasi vyawanangwa ivyo mukupeleka vyawovwira wuli? (b) Kasi imwe vyamovwirani wuli?

¹⁴ Ŵanandi awo ŵateŵetera Yehova nyengo yitali ŵakuyowoya kuti mazuŵa ghano kuli chakurya chauzimu chinandi kuluska kumanyuma kose. Uwu mbunenesko nadi. Sonosono apa, gulu lapanga jw.org, kweniso TV ya JW Broadcasting. Baibolo la Malemba Ghakupatulika mu Mang’anamuliro gha Charu Chiphya likusangika mu viyowoyero vinandi. Mu 2014 na 2015, mu misumba 14 pa charu chose chapasi mukachitikira Ungano wa Mitundu Yose wa mazuŵa ghatatu, wa mutu wakuti: “Lutilirani Kupenja Dankha Ufumu wa Chiuta.” Ungano uwu ukachitikira mu masitediyamu ghakurughakuru. Awo ŵakiza ku ungano uwu ŵakakondwa chomene.

 ¹⁵ Ŵanandi ŵakuwonga chomene ivyo gulu la Yehova likuŵachitira. Mwachiyelezgero, banja linyake ilo likuteŵetera ku Asia likayowoyapo za JW Broadcasting. Likalemba kuti: “Tikuteŵetera mu tawuni yichoko. Nyengo zinyake tikuwona nga tili tekha ndipo tikuluwa umo ntchito ya Yehova yikwendera pa charu chose. Kweni para tawonelera mapulogiramu gha pa JW Broadcasting, tikukumbuka kuti tikuteŵetera na ŵabali na ŵadumbu pa charu chose. Ŵabali na ŵadumbu ŵithu ŵa kuno ŵakukondwa chomene na JW Broadcasting. Kanandi para ŵawonelera pulogiramu iyo yafuma mwezi uliwose tikuŵapulika ŵakuyowoya kuti ŵakujipulika kuti ŵali pafupi na ŵabali ŵa mu Wupu Wakulongozga. Kuluska kumanyuma kose uku, sono ŵakunotha chomene kuti ŵali mu gulu Chiuta.”

¹⁶ Nyumba za Ufumu pafupifupi 2,500 pa charu chose zikuzengeka panji kunozgekaso. Ŵabali na ŵadumbu ŵa ku Honduras ŵakati ŵamba kuwungana mu Nyumba ya Ufumu yasono, ŵakalemba kuti: “Tikukondwa chomene kuti tili mu banja la pa charu chose la Yehova. Kweniso tikukondwa chomene kuŵa paubali wa pa charu chose. Ivi ndivyo vyawovwira kuti tiŵe na Nyumba ya Ufumu.” Ŵanyake ŵakuyowoya mazgu agha para ŵapokera Baibolo na mabuku ghanyake mu chiyowoyero chawo, na para ŵawovwirika pa nyengo ya masoka ghachilengiwa. Kweniso ŵanyake ŵakuyowoya nthena para ŵawona umo upharazgi wa mu matawuni ghakuru na ku malo uko kukusangika ŵanthu ŵanandi wayendera mu chigaŵa chawo.

17. Kasi tikumanya wuli kuti Yehova ndiyo wakovwira gulu lake mazuŵa ghano?

¹⁷ Ŵanthu ŵakucharu ŵakupulikiska yayi kuti vyose ivyo vikuchitika mu gulu la Yehova ntchifukwa cha vyawanangwa ivyo tikupeleka. Bwana mulara wa kampani yinyake uyo wakiza kuzakawona malo ghakupulintirako mabuku ghithu, wakazizwa chomene kuti ntchito iyi yikuchitika na ŵabali na ŵadumbu ŵakujipeleka waka, kweniso kuti yikwendeskeka na vyawanangwa. Wakazizwa kuti tikuchita bizinesi yayi panji kupempheska. Wakayowoya kuti ivi vingachitika yayi waka. Wakaneneskanga nadi. Vikuchitika chifukwa chakuti Yehova wakutovwira.—Yobu 42:2.

18. (a) Kasi pali uwemi wuli para tikupeleka kuti tovwirepo pa ntchito ya Ufumu? (b) Kasi tingasambizga wuli ŵana withu kweniso awo ŵamba sono unenesko kuti nawo ŵapelekenge?

¹⁸ Yehova watipa mwaŵi wa kovwirapo pa ntchito yakuzirwa iyo yikuchitika mazuŵa ghano. Wakutisimikizgira kuti tisangenge vitumbiko vinandi para tikovwirapo pa ntchito ya Ufumu. (Mal. 3:10) Yehova wakulayizga kuti uyo wakupeleka mwawanangwa vinthu vimwenderenge makora. (Ŵerengani Zintharika 11:24, 25.) Munthu wakuŵa wakukondwa para wakupeleka chifukwa “uyo wakupeleka wakukondwa chomene kuluska uyo wakupokera.” (Mil. 20:35) Ivyo tikuyowoya na kuchita ni nthowa yiwemi yakusambizgira ŵana ŵithu kweniso awo ŵamba sono unenesko kuti nawo ŵapelekenge na kusanga vitumbiko vinandi.

19. Kasi nkhani iyi yamukhozgani wuli?

¹⁹ Chilichose icho tili nacho chikufuma kwa Yehova. Para tikupeleka kwa iyo tikulongora kuti tikumutemwa kweniso tikumuwonga pa vyose ivyo wakutichitira. (1 Mid. 29:17) Apo ŵanthu ŵakapelekanga vyawanangwa kuti ŵazengere tempile, “ŵakasekelera pakupeleka vinthu ivi, pakuti ŵakapeleka vyawanangwa ivi kwa Yehova na mtima wakufikapo.” (1 Mid. 29:9) Tiyeni nase tilutilire kusanga chimwemwe na kukondwa apo tikupeleka kwa Yehova vinthu ivyo wakutipa.