1. Kasi tikuzizipizga masuzgo wuli? Kasi Yehova wakukondwa na vichi para wakuwona ŵateŵeti ŵake? (Wonani chithuzi chakwamba.)

TOSE tikumanya kuti umoyo mu charu ichi ngwakusuzga chomene. Ŵabali na ŵadumbu ŵithu ŵanandi ŵakuzizipizga matenda ghakuru. Ŵanyake ŵakupwelelera ŵabali ŵawo ŵachekuru nangauli nawo mbalara msinkhu. Ŵanyake vikuŵasuzga kusangira banja lawo vinthu vyakukhumbikwa. Kweniso ŵanandi ŵali na masuzgo ghose agho tazunura apa. Ivi vikukhumbikwira nyengo yinandi, nkhongono, kweniso ndalama zinandi. Kweni tikugomezga ivyo Chiuta walayizga, ndipo tili na chipulikano chakukhora kuti vinthu viŵenge makora munthazi. Yehova wakukondwa chomene para tili na chigomezgo chanthena.

2. Kasi lemba la Yesaya 40:29 likutikhozga wuli? Kweni kasi ŵanyake ŵakuchita wuli para ŵasangana na masuzgo?

² Kasi nyengo zinyake mukujipulika kuti masuzgo ghakumusoŵeskani mtende? Para ni nthena, muli mwekha yayi. Baibolo likuyowoya za ŵateŵeti ŵanyake ŵakugomezgeka awo ŵakawonanga kuti mphanyi ŵafwa waka. (1 Mathe. 19:4; Yobu 7:7) Kweni m’malo mwa kuwelera nyuma, ŵakagomezganga chomene Yehova. Ŵakakhuŵaranga yayi chifukwa Chiuta withu “wakuŵapa nkhongono  ŵakuvuka.” (Yes. 40:29) Chachitima ntchakuti ŵateŵeti ŵanyake ŵa Chiuta ŵakuwona kuti nthowa yiwemi yakumazgira masuzgo, ‘nkhuleka dankha kuwungana.’ Ŵakuwona nga vinthu vyauzimu ni mphingo m’malo mwa kuwona kuti ni thumbiko. Ntheura ŵakuleka kuŵerenga Mazgu gha Chiuta, kuwungana, ndiposo kupharazga. Satana wakukhumba kuti tichitenge nthena.

3. (a) Ni vichi ivyo tikwenera kuchita kuti tileke kukondweska Satana? (b) Kasi mu nkhani iyi tidumbiskanenge vichi?

³ Dyabulosi wakumanya kuti tikuŵa ŵakukhora para tikutangwanika chomene na vinthu vyauzimu ndipo wakukhumba yayi kuti tiŵe ŵakukhora. Para mukujipulika kuti mulije nkhongono kweniso mukwenjerwa, lekani kutalikirana na Yehova. Sendelerani chomene kwa iyo chifukwa “wazamumukhozgani, wazamumuzgorani ŵankhongono.” (1 Pet. 5:10; Yak. 4:8) Mu nkhani iyi, tiwonenge vinthu viŵiri ivyo vingatigongoweska kuteŵetera Chiuta, ndipo tidumbiskanenge umo tingalondezgera fundo za mu Baibolo kuti tizizipizge. Kweni chakwamba, tiyeni tiwone lemba la Yesaya 40:26-31 na kuwona nkhongono izo Yehova wali nazo. Ivyo vili pa lemba ili vingatikhozga.

4. Kasi lemba la Yesaya 40:26 likutisambizga vichi?

⁴ Ŵerengani Yesaya 40:26. Palije uyo wali kuŵerengapo nyenyezi zose izo zili kuchanya. Ŵasayansi ŵakusachizga kuti Chipingausiku cha Milky Way chili na nyenyezi 400 biliyoni. Kweni nyenyezi yiliyose Yehova wakuyichema zina. Kasi tikusambirapo vichi? Para Yehova wakuwona kuti vilengiwa vyambura umoyo ni vyakuzirwa, ghanaghanirani umo wakuwonera imwe usange mukumuteŵetera na mtima wose. Mukumuteŵetera chifukwa cha kuchichizgika waka yayi, kweni chifukwa chakuti mukumutemwa. (Sal. 19:1, 3, 14) Adada ŵithu ŵakuchanya ŵakumumanyani makora chomene. “Nanga ni masisi gha ku mutu kwinu ghose ghali kupendeka” na iwo. (Mat. 10:30) Wamasalimo wakutisimikizgira kuti: “Yehova wakumanya ivyo vikuwira ŵambura kafukwa.” (Sal. 37:18) Yehova wakumanya masuzgo agho mukusangana nagho, ndipo wangamupani nkhongono kuti muzizipizge suzgo lililose.

5. Kasi tikumanya wuli kuti Yehova wangatipa nkhongono?

⁵ Ŵerengani Yesaya 40:28. Yehova ndiyo ni Mweneko wa nkhongono. Ghanaghanirani nkhongono izo zuŵa lili nazo. David Bodanis, uyo wakulemba vya sayansi, wakati: “Nkhongono izo zuŵa likupeleka pa sekondi yiliyose zikuyana waka na mabomba mabiliyoni ghanandi agho ghaphulika pa nyengo yimoza.” Munthu munyake wakufufuza vinthu wakasanga kuti nkhongono iyo zuŵa “likufumiska pa sekondi yimoza, njikuru chomene mwakuti yingawovwira ŵanthu kukhala makora kwa vyaka 200,000.” Kasi walipo uyo wangakayikira kuti Yehova, uyo wakupeleka nkhongono ku zuŵa wangatipa nkhongono zakuti tizizipizgire suzgo lililose?

6. Chifukwa wuli joko la Yesu ndipusu, ndipo fundo iyi yikutikhozga wuli?

⁶ Ŵerengani Yesaya 40:29. Tikukondwa para tikuteŵetera Yehova. Yesu wakaphalira ŵasambiri ŵake kuti: “Yeghani joko lane.” Wakayowoyaso kuti: “Muzamupumuzgika. Chifukwa joko lane ndipusu na katundu wane ngwakupepuka.” (Mat. 11:28-30) Fundo iyi njaunenesko nadi. Nyengo zinyake tikuvuka para tikuluta ku maungano panji mu uteŵeti. Kweni kasi tikujipulika wuli para tawerako? Tikujipulika makora ndipo tikuŵa ŵakunozgeka kumarana na viyezgo. Joko la Yesu ndipusu nadi.

7. Yowoyani chiyelezgero icho chikulongora kuti lemba la Mateyu 11:28-30 ndaunenesko nadi.

⁷ Mudumbu munyake uyo timuchemenge Kayla wali na nthenda iyo yikumupangiska kuti  wajipulikenge wakuvuka nyengo zose, wasuzgikenge maghanoghano, kweniso kuti mutu uŵinyenge chomene. Nyengo zinyake wakuwona kuti chikuŵa chakusuzga kuluta ku maungano. Kweni wakati wayezgayezga kuluta ku maungano, iyo wakalemba kuti: “Nkhani iyo yikaŵa ku maungano yikayowoyanga za kugongowa. Mubali uyo wakayowoya nkhani iyi, wakayowoya mwalusungu chomene ndiposo mwakughanaghanira ŵanthu. Nkhakhwaskika chomene mwakuti nkhalira. Nkhajipulika kuti ku maungano ndiko nkhwenera kuŵa.” Mudumbu uyu wakakondwa chomene kuti wakayezgayezga kuluta ku maungano.

8, 9. Kasi Paulosi wakang’anamurangachi apo wakalemba kuti: “Para nili wakulopwa, apo ndipo nkhuŵa wankhongono”?

⁸ Ŵerengani Yesaya 40:30. Nanga tingaŵa ŵakukhora wuli, kweni pali vinyake ivyo tingachita yayi na nkhongono zithu. Tose tikwenera kukumbuka fundo iyi. Nangauli mpositole Paulosi wakaŵa wakukhora, kweni pakaŵa vinthu vinyake ivyo vikamutondeskanga kuchita chilichose icho wakakhumbanga. Wakati waphalira Chiuta masuzgo ghake, Chiuta wakamuzgora kuti: “Para iwe walopwa ndipo nkhongono zane zikuŵa zakufikapo.” Paulosi wakasambirapo kanthu. Paulosi wakati: “Para nili wakulopwa, apo ndipo nkhuŵa wankhongono.” (2 Kor. 12:7-10) Kasi wakang’anamuranga vichi?

⁹ Paulosi wakamanya kuti pali vinandi ivyo wangachita yayi kwambura wovwiri wa Yehova. Mzimu wa Chiuta ndiwo ukamupa nkhongono izo wakakhumbikwiranga. Kweniso mzimu utuŵa ukamovwira kuti waŵe na nkhongono zakuchitira vinthu ivyo wakate wafiskenge yayi na nkhongono zake. Ndimo viliriso na ise. Para nkhongono zithu zafuma kwa Yehova, tiŵenge ŵankhongono chomene.

10. Kasi Yehova wakamovwira wuli Davide?

¹⁰ Kanandi wamasalimo Davide wakajiwoneranga yekha nkhongono ya mzimu utuŵa wa Chiuta. Wakimba kuti: “Na wovwiri winu ningalimbana na gulu la ŵakuwukira. Ningaŵenuka chiliŵa na nkhongono ya Chiuta.” (Sal. 18:29) Pali viliŵa vinyake panji kuti masuzgo ghanyake agho tekha ‘tingaŵenuka’ yayi. Tikukhumbikwira Yehova kuti watovwire.

11. Kasi mzimu utuŵa ungatovwira wuli?

¹¹ Ŵerengani Yesaya 40:31. Nombo yikuchimbira chomene muchanya kweniso yikwenda mtunda utali chomene. Yikuchita ivi na nkhongono zake pera yayi. Kweni mphepo zakuthukira zikovwira nombo kuti yende makora kweniso kuti yileke kuvuka luŵiro. Ntheura para mwasangana na suzgo likuru, kumbukani nombo. Lombani Yehova kuti wamupani nkhongono kwizira mwa “movwiri, mzimu utuŵa.” (Yoh. 14:26) Chakukondweska ntchakuti tingapempha mzimu utuŵa nyengo yiliyose iyo takhumba. Kweniso tingakhumbikwira chomene wovwiri wa Yehova para tapambana maghanoghano na Mkhristu munyithu. Kweni chifukwa wuli tingapambana maghanoghano?

12, 13. (a) Chifukwa wuli Ŵakhristu ŵakupambana maghanoghano? (b) Kasi nkhani ya Yosefe yikutiphalira vichi za Yehova?

¹² Tikupambana maghanoghano na ŵanyithu chifukwa tose tili ŵakwananga. Lekani nyengo zinyake ivyo Ŵakhristu ŵanyithu ŵangayowoya panji kuchita vingatikhuŵazga. Panji ndise tingaŵakhuŵazga. Ivi vingayezga chipulikano chithu. Nga umo vikuŵira na viyezgo vinyake, nyengo zinyake Yehova wakuzomerezga kuti tiyezgeke na Ŵakhristu ŵanyithu. Ichi chikutovwira kuti tisambire kukolerana na ŵanthu awo iyo wakuŵatemwa nangauli mbakwananga, na kulongora kuti tili ŵakugomezgeka.

¹³ Nkhani ya Yosefe yikulongora kuti Yehova wakukanizga yayi viyezgo kuti viwire ŵateŵeti ŵake. Apo Yosefe wakaŵa munyamata, ŵakuru ŵake ŵakamuguliska ku Ŵaishimayeli ndipo ŵakamutora na kuluta nayo ku Eguputo. Ŵakuru ŵake ŵakachita nthena chifukwa cha sanji.  (Gen. 37:28) Yehova wakawonanga ivyo vikamuchitikiranga Yosefe ndipo chitima chikwenera kuti chikamukora kuwona mubwezi wake, uyo wakaŵa murunji wakusuzgika. Kweni wakanjilirapo yayi. Pakati pajumpha nyengo, Yosefe ŵakamupusikizgira kuti wakakhumbanga kukolelera mwanakazi wa Potifara, ndipo ŵakamujalira mu jele. Yehova wakanjiliraposo yayi. Kweni kasi Chiuta wakamutaya Yosefe? Yayi. Baibolo likuti: “Yehova wakatumbikanga chilichose icho Yosefe wakachitanga.”—Gen. 39:21-23.

14. Kasi pali uwemi wuli wauzimu kweniso wakuthupi para ‘tikutaya’ ukali?

¹⁴ Tiyeni tiwoneso munthu munyake. Mbanthu ŵachoko chomene awo ŵanthu ŵali kuŵachitirapo viheni nga ni ivyo ŵakachitira Davide. Kweni mubwezi wa Chiuta uyu, wakasunganga vyakusingo yayi. Iyo wakalemba kuti: “Taya ukali, leka kutukutwa. Ungakwenyeleranga chara na kwamba kuchita uheni.” (Sal. 37:8) Chifukwa chikuru chomene icho tikwenera ‘kutayira’ ukali ntchakuti tikukhumba kuyezga Yehova, uyo “wakuchita nase kuyana na kwananga kwithu chara.” (Sal. 103:10) Kweni paliso uwemi unyake para ‘tikutaya’ ukali. Para tikusunga ukali, tingaŵa na masuzgo ghanyake. Tingaŵa na BP kweniso tingatondeka kuthuta makora. Tingaŵa na suzgo la chiŵindi, kapamba, kweniso chakurya chingatondeka kugayika makora muthupi. Para takwiya, tikutondeka kughanaghana makora. Nyengo zinyake para munthu wakwiya chomene wangasuzgika maghanoghano nyengo yitali. Kweni Baibolo likuti, “mtima wakuzikira mbumoyo wa thupi.” (Zinth. 14:30) Ipo kasi tingachita wuli kuti tiwezgerepo mtende na mubali panji mudumbu uyo watibudira? Tikwenera kulondezga ulongozgi uwemi uwo uli mu Baibolo.

15, 16. Kasi tingachita wuli kuti tiwezgerepo mtende na munthu uyo watikhuŵazga?

¹⁵ Ŵerengani Ŵaefeso 4:26. Tikuzizwa yayi para ŵanthu awo Mbakaboni yayi ŵatichitira vinthu viheni. Kweni tingakhuŵara chomene para Mkhristu munyithu panji wa mu banja lithu watichitira vinthu vyakutikhuŵazga. Wuli usange vikutisuzga kuluwako waka ivyo watichitira? Kasi tisungenge vyakusingo kwa vyaka vinandi? Panji tilondezgenge ulongozgi wa mu Baibolo na kumazga mphindano mwaluŵiro? Para tikuzomerezga kuti pajumphe nyengo yitali kwambura kumazga ivyo tapambana, chiŵenge chakusuzga chomene kuŵa pamtende na mubali withu.

¹⁶ Tiyelezgere kuti mubali withu watikhuŵazga ndipo tikutondeka kusulako waka. Kasi tingachita wuli kuti tiwezgerepo mtende? Chakwamba lombani kwa Yehova kufumira pasi pa mtima na kumuphalira vyose. Lombani kuti wamovwirani kuti muyowoyeskane makora na mubali winu. Kuluwa yayi kuti mubali panji mudumbu uyo wamukhuŵazgani, njumoza mwa  ŵabwezi ŵa Yehova. (Sal. 25:14) Yehova wakumutemwa. Iyo wakuchita nawo mwalusungu ŵabwezi ŵake, ndipo wakukhazga kuti nase ndimo tichitirenge. (Zinth. 15:23; Mat. 7:12; Kol. 4:6) Pamanyuma, ghanaghanirani ivyo mukukhumba kukayowoya. Lekani kughanaghana kuti mubali winu wanguchitira dala kuti wamukhuŵazgani. Ndipo kumbukani kuti panji namwe mukachita kanthu kanyake lekani pakaŵa suzgo ili. Pakwamba kudumbiskana nayo mungayowoya kuti, “Panji ndine nkhuwona uheni, kweni apo mukayowoyanga nane mayiro nkhajipulika kuti . . . ” Para mwawona kuti vinthu vindayende nga umo mwaghanaghaniranga, sangani nyengo yinyake kuti muwezgerepo mtende. Apo mukuyezgayezga kuchita nthena, mulomberani mubali winu, na kupempha Yehova kuti wamutumbike. Lombani Yehova kuti wamovwirani kuwona ivyo mubali winu wakuchita makora. Mulimose umo vingaŵira, mungaŵa na chigomezgo chose kuti Yehova wakondwenge chomene para mukuyezgayezga kuwezga mubali winu, uyo ni mubwezi wa Chiuta.

17. Kasi tikwenera kuchita wuli kuti Yehova watigowokere para tachita zakwananga zikuru? Ndipo chifukwa wuli tikwenera kuchitapo kanthu mwaluŵiro?

¹⁷ Ŵanyake ŵakuwona kuti mbakwenelera yayi kuteŵetera Yehova chifukwa ŵachita zakwananga zikuru. Kujiyimba mulandu nkhwakofya. Fumu Davide, yikasuzgika mu mtima na zakwananga izo yikachita, ndipo yikati: “Nkhati nakhala chete kwambura kuphara kwananga kwane, viwangwa vyane vikaphapa chifukwa cha kutampha zuŵa lose. Pakuti woko linu likaŵa lizito pa ine muhanya na usiku.” Chakukondweska ntchakuti Davide wakamarana nalo suzgo ili pakuŵa munthu wauzimu. Iyo wakalemba kuti: “Paumaliro nkhaphara kwananga kwane kwa imwe, nkhabisa chara mphuvya zane. Ndipo mukanigowokera mphuvya zane na zakwananga zane.” (Sal. 32:3-5) Para muli kuchita zakwananga zikuru, Yehova ngwakunozgeka kumovwirani kuti muchire mwauzimu. Kweni mukwenera kuzomera wovwiri uwo Yehova wakupeleka kwizira mu mpingo. (Zinth. 24:16; Yak. 5:13-15) Kuchedwa yayi kuchitapo kanthu chifukwa mungatondeka kuzakasanga umoyo wamuyirayira. Kweni wuli usange Yehova wali kumugowokerani, kweni njuŵi yichali kumusuzgani?

18. Kasi ivyo vikachitikira Paulosi vingawovwira wuli awo ŵakujiyimba mulandu na ivyo ŵakachita kumanyuma?

¹⁸ Mpositole Paulosi nayo wakwenera kuti nyengo zinyake wakajiyimbanga mulandu na ivyo wakachita kumanyuma. Wakati: “Ndine muchoko chomene pa ŵapositole, ndipo nili wakwenelera yayi kuchemeka mpositole, chifukwa nkhatambuzganga mpingo wa Chiuta.” Paulosi wakayowoyaso kuti: “Kweni sono nili nthena chifukwa cha lusungu lukuru lwa Chiuta.” (1 Kor. 15:9, 10) Yehova wakamugowokera Paulosi, ndipo wakakhazganga kuti Paulosi wawonenge kuti wali kugowokereka. Para mwalapa kufumira pasi pamtima pa ivyo mukachita na kuphara, mukwenera kugomezga kuti Yehova wamulengeraninge lusungu. Ntheura pulikirani ivyo Yehova wakuyowoya ndipo manyani kuti wamugowokerani.—Yes. 55:6, 7.

19. Kasi lemba la chaka cha 2018, ndakuti wuli, ndipo chifukwa wuli ndakwenelera?

¹⁹ Pakuti umaliro wa charu ichi ukusendelera chomene, masuzgo ghalutilirenge kusazgikira. Kweni kumbukani kuti Uyo “wakuŵapa nkhongono ŵakuvuka” na kupeleka “nkhongono zinandi ku awo ŵalije nkhongono,” wangamovwirani kuti muzizipizge. (Yes. 40:29; Sal. 55:22; 68:19) Mu chaka cha 2018, tikumbuskikenge fundo iyi nyengo yiliyose para tili pa maungano. Fundo iyi yili mu lemba la chaka, ilo likuti: “Awo ŵakugomezga Yehova ŵaŵengeso na nkhongono.”—Yes. 40:31.